Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
АВЕССАЛОМЛÖН КУЛÖМ
Давидлöн Авессалом пиыс вöлi синмö шыбитчана зон, медсясö аслас кузь да мича юрсинас. Но сiйö вöлi зэв ыкша, зiлис пуксьыны öксыö батьыс пыдди. Израиль войтыр водзын Авессалом петкöдлiс асьсö бурöн да тöждысьысьöн. Пöръясьöмнас сiйö кужис бергöдны асланьыс йöзыслысь сьöлöмсö. Давидлы ковмис чукöртны ассьыс тышкайöзсö, эновтны Ерусалим да дзебсьыны овтöминö аслас пиысь.
Авессалом аслас тышкайöзкöд вöтчис батьыс бöрся. Кор Давид кылiс та йылысь, мöдöдiс ассьыс йöзсö Авессаломлы паныд да тшöктiс налы, медым оз вöрöдны писö. Давид ёна радейтiс ассьыс писö, кöть батьыслы сiйö вайис уна шог да вöчис уна лёктор.
Тышыс пансис вöрын. Ен отсалiс Давидлöн тышкайöзлы вермыны. Авессаломлöн шыпуртаяс пышъялiсны, ачыс Авессалом тшöтш пышйис. Вöв вылын рöдтiгас сылöн кузь юрсиыс гартчис ыджыд тупу вожйö. Вöлыс котöртiс водзö, ачыс Авессалом колис öшавны пу вылас. Давидлöн тышкайöзöн веськöдлысь аддзис тайöс да лыйис шынас Авессаломлы веськыда сьöлöмас. Кор Давидлы юöртiсны та йылысь, сiйö шогысла ёна бöрдiс: «Авессалом пиöй менам, Авессалом пиöй! Меным колö вöлi кувны тэ пыдди, пиукöй!»
Тадзи Ен мыждiс Авессаломöс. Библияын шуöма: «Кодi омöльтö ассьыс бать-мамсö, сылöн олöмыс помасяс, кыдзи би кусö сап пемыд дырйи».
Öксыяслöн мöд небöг 14-15, 18, Соломонлöн шусьöгъяс 20:20
174 
