Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
ЕРУСАЛИМ КАР БЫРÖДÖМ
Ми водзынджык лыддим нин, кыдзи израильса Соломон öксы Енлöн тшöктöм серти лэптiс крам Ерусалимын. Но кор вавилонса тышкайöз мöдысь локтiсны босьтны Ерусалим карсö, найö бырöдiсны тайö шензьöдана крамсö. Тайö лои медводдза босьтöмсяньыс дас öти во мысти.
Седекей, кодöс вавилонса Навуходоносор öксы индылiс юравны Ерусалимöн, паныд сувтiс сылы. Та вöсна Навуходоносор локтiс аслас тышкайöзкöд да кытшалiс Ерусалимсö. Во да джын карыс вöлi кытшын. Йöзыс тшыгьялiсны да сьöкыдалiсны. Öтчыд войнас Седекейлöн шыпуртаяс пышйисны Ерусалим карысь. Седекей öксы тшöтш пышйис аслас йöзкöд Йöрдан юлань, но вавилонса тышкайöз кутiсны сiйöс да вайöдiсны вавилонса öксы дiнö. Седекейлысь пиянсö виисны сылöн син водзын, а сылысь ассьыс перъялiсны синъяссö, сэсся дорисны чепъясöн да нуöдiсны Вавилонö.
Вавилонса öксы бара ыстiс ассьыс тышкайöзсö Ерусалимö. Найö сотiсны иудаса öксылысь оланiнсö да карсьыс став ыджыд керкасö, жуглiсны стенъяссö Ерусалим гöгöрысь. Крамсö тшöтш сотiсны, а ыргöнысь, зарниысь да эзысьысь став вöчöмторсö нуисны Вавилонö. Карсьыс коляс войтырсö нуöдiсны Вавилонö, сöмын кодсюрööс колисны уджавны виноград йöръясын да видз-му вылын.
Тайö вöлi 587/586 воын Кристос чужтöдз. Соломонлöн крамыс сулалiс 400 воысь дырджык. Бöрыннас юдейяс некымынысь на выльысь лэптылiсны крамсö Ерусалимын, но эз вермывны вöчны медводдза крам кодь мичаöс.
Öксыяслöн нёльöд небöг 25:1-17
228 
