Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
ДАНИИЛ КЕВМЫСЬÖ
Дарий öксы вöлi ыкша морт да юрбитiс идолъяслы. Но сiйö ёна радейтiс Даниилöс сылöн мывкыдлунысь да веськыда олöмысь.
Öксы индiс аслас муöн веськöдлыны сё кызь мортöс, кодъясöс шуисны сатрапъясöн. Налы пуктiс куим юралысьöс, öтиыс на пиысь вöлi Даниил. Даниил торъялiс ыджыд мывкыдлуннас. Та вöсна öксы мöвпалiс нин индыны сiйöс веськöдлыны став мунас. Сэки мöд кык юралысьыс да сатрапъяс пондiсны корсьны помка мыждыны Даниилöс. Но найö нинöм эз аддзыны, öд Даниил вöлi веськыд морт да лёксö эз вöч.
Сатрапъяс да налöн юралысьяс сёрнитчисны наяна мыжавны Даниилöс öксы водзын. Найö тöдiсны, мый Даниил кевмысьö аслас Енлы. Та вöсна найö корисны öксыöс гижны тшöктöм, мый комын лун чöж оз позь кевмысьны некутшöм енлы либö мортлы, сöмын Дарий öксылы. Кодi торкас тайö тшöктöмсö, сiйöс шыбитасны левъяслы. Но öксы эз тöд тайö корöмыслысь помкасö да йöзöдiс тшöктöмсö.
Даниил кылiс öксылöн выль тшöктöм йылысь, но эз дугды кевмысьны аслас Енлы. Кыдзи пыр вöчлiс, куимысь луннас сiйö пидзöсчанясьöмöн кевмысис да аттьöалiс ассьыс Енсö. Вежöсас, кöнi кевмысьлiс Даниил, öшиньясыс видзöдiсны Ерусалимлань, та вöсна кевмысигас сiйö восьтлывлiс öшиньсö. Даниил вылö лöгалысьяс кыйöдчисны сы бöрся. Кор найö аддзисны, мый сiйö пидзöс вылас сувтöмöн кевмысьö аслас Енлы, дзик пыр мунiсны да висьталiсны та йылысь öксылы.
Даниил 6:1-12
236 
