Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
ИСУС ПЕТКÖДЧÖ ЭММАУСÖ МУНЫСЬЯСЛЫ
Исуслöн кык велöдчысь мунiсны Эммаус нима сиктö. Найö сёрнитiсны ас костаныс Ерусалимын лоöмтор йылысь. Сёрнитiганыс Ачыс Исус матыстчис да пондiс мунны накöд, но найö эз тöдны Сiйöс.
Исус юалiс мунысьяслысь: «Мый йылысь сёрнитанныд, туй йöз? Мыйла тi жугыльöсь?» На пиысь Клеоп нима вочавидзис: «Буракö, Тэ дзик öтнад Ерусалимö локтысьясысь он тöд, мый сэнi лои тайö лунъясö?» Исус юалiс: «Мый лои?» Найö вочавидзисны: «Лёктор лои Назаретса Исускöд. Тайö Мортыс Ен водзын да йöз водзын кывнас и уджнас вöлi вына пророк. Аркирейясным юралысьяскöд мыждiсны сiйöс да сетiсны тувъявны крестö. Ми лача кутiм, мый Сiйö мездас Израильöс. Но тайö абу на ставыс. Талун коймöд лун нин лоöмторсяньыс. Миян пиысь кодсюрö аньяс чуймöдiсны миянöс. Водз асывнас найö ветлöмаöсь дзебанiнас да шойсö абу аддзöмаöсь сэтысь. Локтöм бöрас висьталiсны, аддзылiм пö анделъясöс. Анделъяс шуöмаöсь, Исус пö ловъя. Миян пиысь кодсюрö тшöтш ветласны дзебанiнас да аддзасны, мый аньясыд збыль вöлöм висьталöны. Исустö сэтысь оз аддзыны».
Исус шуис налы: «Гöгöрвотöмöсь тай тi. Сьöкыда эсканныд пророк кывъясö. Эз-ö тайö сьöкыдыс пыр ков мунны Кристослы да пырны Аслас дзирдлунö?» Сэсся Исус пондiс гöгöрвоöдны налы ставсö, мый Гижöдас шуöма Сы йылысь.
Найö матыстчисны Эммаус сиктлань. Исус петкöдлiс, быттьö кöсйö водзö мунны. Но найö эз лэдзны Сiйöс, шуалiсны: «Кольччы миянкöд. Луныс рытлань нёровтчö». Исус кольччис на ордö. Сёйиганыс Исус босьтiс нянь, Енмöс аттьöалöмöн чегис няньсö да сетiс налы. Сэки налöн синныс воссис, и найö тöдiсны Сiйöс. Но тайö здукас Исус лои налы тыдавтöм. Сэки найö шуисны: «Эз-ö сьöлöмным ыпъяв, кор Сiйö сёрнитiс миянкöд туй вылын да гöгöрвоöдiс миянлы Гижöдсö?»
Лука 24:13-32
432 
