Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
ФИЛИП ДА ЭФИОПИЯСА ЫДЖЫД ЧИНА МОРТ
Вичкоса отсасьысьяс лыдын вöлi тшöтш Филип. Кор сiйö висьтавлiс Бур Юöр, унаöн эскисны Исус Кристослы да пыртчисны. Öтчыд Господьлöн андел тшöктiс Филиплы мунны Газаö нуöдан туй вылö. Сiйö кадас сэтi мунiс эфиопияса ыджыд чина морт. Сiйö вöлi волöма Ерусалимö юрбитны. Öнi бöр мунiс гортланьыс. Сiйö пукалiс тарантасын да лыддис Исай пророклысь гижöд. Вежа Лов шуис Филиплы: «Матыстчы тарантас дорас да мун орччöн». Филип котöрöн матыстчис да кылiс, кыдзи тарантасын пукалысь лыддис Исай пророклысь гижöд. Филип юалiс: «Гöгöрвоан-ö, мый лыддян?» Мöдыс шуис: «Кыдзи нö верма гöгöрвонысö, гöгöрвоöдысьыс кö абу?» Сiйö корис Филипöс пуксьыны орччöн. Гижöдсьыс сiйö лыддис татшöм кывъяс:
– Сiйöс вайöдiсны начкыны ыжöс моз.
Шы лэдзлытöм баля моз
Сiйö эз восьтлы шырысь водзын Ассьыс вомсö.
Сiйöс вöлi увтыртöма
да мыждöма абу веськыд ёрд водзын.
Кодi висьталас Сысянь водзö чужысьяс йылысь,
мувывса олöмсö кö Сылысь орöдасны?
Эфиопияса морт шуис Филиплы: «Висьтав, код йылысь пророкыс шуöма тайöс? Ас йывсьыс али мöд йылысь?» Сэки Филип тайö гижöдсяньыс пондiс висьтавны сылы Исус йылысь. Сэккостi найö воисны вадорö, эфиопияса шуис: «Со ваыс. Мый менö кутö пыртчöмысь?» Филип шуис сылы: «Став сьöлöмсяньыд кö эскан, позьö». Сiйö вочавидзис: «Эска, мый Исус Кристос – Ен Пи». Сэсся тшöктiс сувтöдны тарантассö да найö кыкнанныс пырисны ваö. Филип пыртiс сiйöс. Ваысь петöм бöрын Вежа Лов лэччис эфиопияса вылö. Господьлöн андел босьтiс Филипöс, а эфиопияса долыдпырысь мунiс водзö аслас туйöд.
Ен оз видзöд мортлöн чужöм вылö, кодi сiйö да кутшöм кывйöн сёрнитö. Гижöма, мый «быдöн, кодi шыасяс Господь нимö, мездмас».
Апостолъяслöн уджъяс 8:12, 26-39, 2:21
454 
