Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
ÖСИП ВОССЬÖ ВОКЪЯСЫСЛЫ
Öсиплöн вокъясыс локтiсны гортаныс да висьталiсны батьыслы ставсö, мый накöд вöлi. Яков чорыда шуис, мый оз лэдз медiчöт Венямин писö Египетö, öд пöрысьö-нэмö Венямин вöлi сылöн öти гажлуныс.
Но регыд мысти Египетысь вайöм няньыс бырис, и Яков бара шуис ыстыны сэтчö пиянсö. А пияныс шуисны сылы, мый Египет муöн веськöдлысь эз тшöкты локны налы медiчöт воктöгныс. Яков дыр эз кöсйы лэдзны накöд Веняминöс, но кор кутiсны ёна тшыгъявны, сiйö бурсиöмöн мöдöдiс найöс туйö да шуис: «Ставсöвермысь Ен мед отсалас тiянлы. Сiйö мортыс мед лоас бур сьöлöма тiян дiнö да лэдзас Симеон да Венямин вокъяснытö».
Вокъяс бара локтiсны Öсип дiнö. Кор сiйö аддзис Веняминöс, петiс на дiнысь да пондiс бöрдны. Сэсся чышкалiс синвасö чужöмсьыс да тшöктiс кесйöгъясыслы вайны вокъясыслы чöскыд сёян. Вокъяс шöйöвошисны. Найö эз тöдны, мыйла найöс татшöма пыдди пуктöны.
Мöд луннас, кор вокъясöс бара вайöдiсны Öсип дiнö, сiйö эз нин вермы кутчысьнысö да гораа бöрддзис. Сэсся шуис вокъясыслы: «Ме öд Öсип. Ловъя-ö менам батьöй?» Вокъяс чуймöмнысла кывсö воштiсны. «Матыстчöй ме дiнö, – шуис Öсип. – Ме – тiян вокныд, кодöс тi вузалiнныд Египетö. Энö шогсьöй и энö мыжалöй асьнытö, мый тi вузалiнныд менö. Енмыс менö водзвыв ыстiс татчö, медым видзны тiянлысь олöмнытö. Сiдзкö, энö тi менö татчö ыстöй, а Енмыс. Сiйö менö индiс фараонлы отсасьысьöн, пуктiс сылöн став керка вылын да став Египет му вылын ыджыдöн. Öдйöджык мунöй бать дiнö да висьталöй сылы, Öсип пиыд пö шуö: ”Ен пуктiс менö став Египет вылын ыджыдöн. Лок ме дiнö нюжмасьтöг. Танi ме верда тэнö, медым тэ эн тшыгъяв, и эз тшыгъявны тэнад гортсаясыд да тэнад пемöсъясыд. Öд тшыгъялöмыс лоö нöшта на вит во”».
Тайö кывъяс бöрын Öсип сывъялiс Веняминöс да пельпом вылас юрсö пуктöмöн бöрдiс. Сэсся сiйö кутлiс да окалiс вокъяссö.
Олöм 42:36-38, 43:1-34, 45:1-15
76 
