Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
ИСУС КОРХНИ НИКОДИМОНЬ МАРХТА
Фарисейхнень ёткса ульсь ломань, лемоцоль Никодим. Сон иудеянь прятнень эзда фкясель. Сон сась Исусонди веть, мярьгсь: «Рабби! (минь кяльсонк – тонафты) минь содасаськ, тон Шкайть эзда саф Тонафтыят; сяс мес тяфтама ацермат, кодамот тиендят тон, киндинге аф тиевихть, аф улендяряй мархтонза Шкайсь». Исус мярьгсь каршезонза: «Афкукс, корхтан тейть, кие аф шачендяряй вярде, сянди аф сави няемс Шкаень Оцязорксшись». Никодим корхтай тейнза: «Кода сире ломанць одукс шачеви? Кали нинге весть сувави тядянь потмос и шачеви?» Исус каршезонза: «Афкукс корхтан тейть, кие аф шачендяряй ведть и Ваймопожфть эзда, ся аф пови Шкаень Оцязорксшить алу. Ломаньцта шачфсь – ломань, Ваймопожфонь эзда шачфсь–ваймопожф. Тязанза дивандафне ся, мезе азонь: тейнть шачема вярде...»
Никодим аф шарьхкодезь кизефтезе: «Кода тя уленди?» Эста Исус кармась панжемонза, местема сон сась модать лангс, и кода Шкайсь арьсесь идемс ломаттнень пежетьта. Исус мярьгсь: «Кода Моисей кеподезе шавмодаса куйть, тяфта кеподевома Ломанень Цёратинге, эзонза эрь кемайть аф юмаманкса, тейнза пефтома пингонь эряфонь сатоманкса. Вдь Шкайсь сяшкава кельгозе масторлангть, нльне максозе эсь фкя-тяка Цёранц эзонза эрь кемайть аф юмаманкса, тейнза пефтома пингонь эряфонь сатоманкса. Вдь Шкайсь ашезе куче эсь Цёранц масторлангстотнень судендамост, а кучезе идемост. Эзонза кемайсь аф судендави, а аф кемайсь судендаф ни, сяс мес ашезь кема Шкайть фкя-тяка Цёранцты. Тя судендамась ащи ва мезьса: масторлангу сась валда, аньцек ломаттненди валдта пяк кельговсь шобдась, сяс мес тевсна ульсть кяжихть. Эрь кяжи тевонь тиись афолезе няе валдть и эсь тевонзон кяшеманкса аф моли валдти, вдь тевонза кяжихть; ина видешинь коряс тиись моли валдти эсь тевонзон няфтеманкса, сяс мес синь тифт Шкайть мархта».
ИОАНН 3:1-21, 7:50-51
322 
