Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
ИИСУСЭЗ ВАТОН
Иисуслэн кулон нуналыз пятницае учыраз. Субботалы мугоръёсты кирос борды кельтонтэм понна, иудейёс Пилатлэсь куризы, соослэсь пыдъюмылъёссэс пыргытыны но соосты кирос бордысь басьтыны. Солдатъёс Иисус доры лыктэм беразы адӟизы, Со кулэмын ини шуыса, соин ик Солэсь пыдъюмылъёссэ ӧз пыргытэ. Солдатъёс пӧлысь одӥгез Солэн урдлы висказ шибодыен бышкалтӥз но, соку ик вирен ву вияны кутскиз. Священной Гожтэмын веран быдэсмиз: «Одӥг лыэз но Солэн медаз пырды». Захария пророк азьвыл ик тодытыса вераз вал: «Кинэ бышкалтӥзы – Со шоры учкозы».
Та бере Аримафеяысь Иосиф, Солэн лушкем дышетскисез, Иисуслэсь Мугорзэ кирос бордысь басьтыны Пилатлэсь куриз. Пилат лэзиз. Соин ӵош лыктӥз Никодим. Соос Иисуслэсь Мугорзэ басьтӥзы но иудейёслэн ватон сямзыя, ческыт зыно вӧйёсын зыраса, дэраен бинязы. Сое кортӵогам интыын сад вал, нош садын выль шайгу, отчы та дырозь нокин но ватэмын ӧй на вал. Иосифен Никодим Иисуслэсь Мугорзэ отчы понӥзы, пырон пасьсэ бадӟым изэз кымаса ӵоксазы.
Субботае Пилат доры архиерейёс, фарисейёс лыктыса шуизы: «Кузё! Ми тодамы ваимы, кызьы со пӧяськись эшшо улэп дыръяз вераз вал: “Куинь нунал бере улӟыса султо“. Озьы бере, куинь нунал ортчытозь, шайгузэ возьманы кос: Солэн дышетскисьёсыз уин лыктыса, Сое медаз лушкалэ но медаз шуэ калыклы: “Кулэмысь улӟыса султӥз“. Соку берпуметӥез пӧяськон нырысетӥезлэсь но уродгес луоз». Пилат соослы шуиз: «Возьмаськисьёсты вань; кызьы тодӥськоды, мынэлэ но возьмалэ». Соос мынӥзы но шайгу доры возьмаськисьёсты пуктӥзы, из вылэ печать нюртӥзы.
Матфейлэсь Ӟеч Ивор 27:62-66; Иоаннлэсь Ӟеч Ивор 19:31-42
426 
