1 Евангелие* Турăм Пŏх Иисус Христос эԓты оԓӈăԓ тăмиты питăԓ.
2 Хŏты Турăм Ясăӈ туты кăт хŏят* кăт ԓын нэпекăнăн хăшман уԓԓа:
“Ма ангелэм Нăӈ еԓпенăн китԓэм,
ԓy̆в Нăӈ оԓӈенăн Нăӈ юшен ԓэщатăԓ.”
3 ”Увты хŏят тy̆рсый хиш таԓ хăрăн щащăԓ:
‘юш Турăм Кущая ԓэщататы, Ԓy̆в ещăԓтэԓ юшиет тy̆ӈа вераты!’”
4 Иоанн ёхтăс. Ԓy̆в хиш таԓ хăрăн хŏятăт йиӈка ԓŏӈăԓтăс* па айкеԓ тус хŏятăта ԓy̆в ат кăрэкăӈ уԓăпса хăйԓăт па ат йиӈка ԓŏӈăԓтăты вер уԓăт. Щиты Турăмăн щи хŏятăт кăрэкăт* эԓты нŏх пайтԓайт.
5 Иоанн хŏща Иудея мy̆в эԓты па Иерусалим вош эԓты шек ар ёх этсăт. Оԓăӈ щи ёх ԓy̆в кăрэкԓаԓ эԓты тy̆ӈа-щира пŏтăрсăт, щи юпийн Иоанн Иордан ёханăн щи хŏятăт йиӈка ԓŏӈăԓтăс.
6 Иоанн верблюд вой пун эԓты сŏхăн ус, нюки антăпкеԓ тăйс, саранча* ԓэс па ут мав пирмăт мав ԓэс.
7 Иоанн Ям айкеԓ тувман* ястăс: – Ма юпемăн Щит ёхăтăԓ, Хŏй ма эԓтэм вŏԓаӈшăк, па ма ăнтŏм ям щимăщ вер верты: мy̆кăрман Ԓy̆в кy̆ркеԓԓаԓ сандалийт эԓты нŏх эхты.
8 Ма нынан йиӈка ԓŏӈăԓтысԓăм, Ԓy̆в нынан Емăӈ Ԓыԓа* ԓŏӈăԓтаԓԓы.
9 Щи пŏрайн Галилея Назарет вош эԓты Иисус ёхтăс, па Иоаннан Ԓy̆в Иордан ёханăн йиӈка ԓŏӈăԓтăса.
10 Хун йиӈк эԓты этăс, Иоанн шияԓăсԓы пелки питты турăм па Ԓыԓ, голубь иты Иисус ŏха эсԓăсăс.
11 Турăм эԓты ясăӈ ёхтăс: – Нăӈ Ма сăмемăн тăйты Пŏхем! Ма ŏяӈа йиԓăм Нăӈ эԓтэн.
12 Щи юпийн Иисус мŏхты хиш таԓ хăра Емăӈ Ԓыԓăн туса.
13 Па щита хиш таԓ хăрăн сатанайн хущман няԓъяӈ хăтăԓ ус, па ут войт* кy̆тăн ус; па ангелат Ԓy̆веԓа нётсăт.
14 Хун Иоанн касна хота омăсса, щи юпийн Иисус Галилея мy̆ва Ям айкеԓ Турăм Хона уԓты вер* эԓты туты ёхтăс.
15 – Пŏрая йис, – Ԓy̆в пŏтăртăс, – Ешауԓ Турăм Хона уԓты питăԓ! Кăрэкԓăн хăяԓăн па Ям айкеԓа эвԓаты!
16 Ипуш, Галилея ԓор питăр хy̆ват шушман, Иисус хy̆ԓ веԓты хŏятӈăн шияԓăс: Симон Андрей апщеԓ пиԓăн, ԓын хоԓăпԓаԓ ёвăԓмасӈăн.
17 – Ма юпемăн юватăн, – ԓынана Иисус ястăс, – Ма нынан хŏят сăм мŏщатты утăԓтăԓԓам!
18 Яйӈăн мŏхты хоԓпăт хăйсаԓԓаԓ па Ԓy̆в юпеԓăн утăԓтăты вер утыя мăтсаӈăн.
19 Еша еԓԓы мăнман, Ԓy̆в шияԓăс Иаков па Иоанн, ԓын Зеведей пŏхӈăн, ԓын ищиты хопăн хоԓпăт ԓэщăтсаӈăн.
20 Иисус ԓынан мŏхты вохсăԓы, па ԓын Ԓy̆в юпеԓăн мăтсаӈăн, Зеведей ащан па ԓy̆в кешайԓ рупитты ёхԓаԓ хопăн хăйман.
21 Хун ԓy̆в Капернаум воша ёхăтсăт, Иисус мŏхты шаббат* хăтăԓăн синагогая* мăнăс па хŏятăт утăԓтăс.
22 Ԓy̆в утăԓтăты ясăӈԓаԓ хŏятăта ущмарăӈа* усăт. Ԓy̆в юр* тăйты хŏят иты утăԓтăс, ăнтŏм Закона утăԓтăты ёх иты.
23 Ԓy̆в синагога хотэԓăн щи сыс и хŏят ус, ԓy̆в атăм ликăӈ ԓыԓăн* катăԓман уса, па ԓy̆в уваԓтăс:
24 – Муй Нăӈ мy̆ӈ эԓтэв ԓăӈхаԓайн, Иисус Назарет вош эԓты? Нăӈ мy̆ӈев пăратты ёхăтсăн! Ма уйтԓэм, хŏй Нăӈ, Нăӈ Емăӈ €т, хŏй Турăм эԓты ёхтăс!
25 Туп Иисус такан ԓy̆веԓа партăс: – Шитама уԓа! Ким эта ԓy̆в эԓтэԓ!
26 Щи пŏрайн хŏят атăм ликăӈ ԓыԓăн тăратса па атăм ликăӈ ԓыԓ сыйӈа увман щи хŏят эԓты ким этăс.
27 Хŏятăт шек-шек ущмарăӈа усăт, па ԓy̆в кy̆тэԓăн иньщăсты питсăт: – Щит па муй? Щит па муй яԓăп утăԓтăты вер: муй Ԓy̆в юра партăԓ, атăм ликăӈ ԓыԓăта па, па щитԓăн Ԓy̆веԓа хуԓăнтыԓăт.
28 Ешауԓ иса Галилея мy̆в Иисус эԓты уйтăс.
29 Мŏхты синагога эԓты этман, Иисус Иаков па Иоанн пиԓăн Симон па Андрей хота ёхи ёхтăс.
30 Симон утпăԓ хошты мушăн ус, кăшаӈа ŏԓăс, па Иисуса мŏхты ԓy̆в эԓтэԓ ястăса.
31 Вана ювман, Ԓy̆в нэ нŏх ԓощăԓтăсԓы ёшăԓ эԓты уйман. Нэ рy̆в верăԓ еԓ питăс, па ԓy̆в нётты па иса вантман тăйты ԓy̆виԓаԓа питăс.
32 Етăн, хун хăтăԓ ăнтŏма йис, хŏԓыя мушăӈ ёх па атăм ликăӈ ԓыԓăтăн катăԓты ёх Иисус хŏща тутԓысайт.
33 Ԓŏвăтаԓăн вош ёх хот ов хŏща ăктăщăс.
34 Иисус ар хŏят арсыр мушăт эԓты ямăԓтăс. Ԓy̆в хŏят ԓыпи эԓты ким воштăс ар атăм ликăӈ ԓыԓ, па Ԓy̆в ăт эсԓăс атăм ликăӈ ԓыԓăта ястăты, мăтты ԓy̆в уятԓэԓ, муй Ԓy̆в Христос.
35 Аԓăӈсăхăт, шек аԓăӈ нŏх киԓман, ким этăс па хŏятԓы тăхая еԓ мăнăс па щита Турма пойкăщты питăс.
36 Симон па ԓy̆в пиԓăԓăн уԓăм хŏятăт Ԓy̆веԓ кăшты мăтсăт.
37 Ԓy̆веԓ уйтман Ԓy̆веԓа ястăԓăт: – Хŏԓыя хŏятăтăн Нăӈ кăшԓăйн!
38 Иисус ԓy̆виԓаԓа ястăԓ: – Ванăн ԓойты куртăта па вошăта мăнԓy̆в, Мăнэм мосăԓ щи ищи Ям айкеԓ туты, Ма щи кеша ёхăтсăм.
40 Иисус хŏща атăм эԓ муш тăйты хŏят ёхтăс. Иисус еԓпийн шанш ŏха рăкăнман, Ԓy̆веԓ пойкащăс: – Нăӈ ки ԓăӈхаԓăйн, верытԓăн мăнэм ямăԓты!
41 Иисуса ԓy̆веԓ щаля йис. Ԓy̆в ёшăԓ шăшсăԓы па щи атăм эԓ муш тăйты хŏят хŏща катԓăмтыйс, па ԓy̆веԓа ястăс: – Ԓăӈхаԓайм, сыстама юва!
42 Туп Ԓy̆в щиты ястăс, атăм эԓ муш хŏят хăйсăԓы, па ԓy̆в я̆ма йис.
43 Па ԓy̆в пеԓайԓ такан ватман мŏхты ԓy̆веԓ еԓ китман
44 ястăс ԓy̆веԓа: – Нэмăԓты хŏята тăм вер эԓты аԓ пŏтăрта; туп мăна, поп икия нăӈен этăԓтыя па ямăԓмен урăӈăн щимăщ мойԓапса Турма тува, муй партăс Моисей, ԓуԓăн поп икет щи вер ватсăт.
45 Па мăнман ԓy̆в питăм вер эԓты шек я̆ма пŏтăрты питăс, щит урăӈăн Иисус ăт верытăс хŏятăт ватман воша я̆хты, па вош кимпийн хŏятԓы тăхайн ус. Па Ԓy̆в хŏщайԓ ар тăха эԓты ёхтыԓысăт.
1 Кăмăтса хăтăԓ юпийн Иисус яԓпа Капернаум воша ёхтăс, хŏятăт хуԓсэԓ – Ԓy̆в хотăн.
2 Хотăн щи арат хŏят ăктăщăс, ов пy̆ӈăԓăн сыстам лот ăнтŏм ус. Па Иисус Турăм Ясăӈ пŏтăртăс.
3 Иисус хŏща муш эԓты ăт я̆хты хŏят туса, щитэн ня̆ԓ хŏятăн ёшăн катăԓса.
4 Ар хŏят урăӈăн ԓy̆в ăт верытԓăт Иисус хŏща ванамăты, щит урăӈăн ԓy̆в Иисус нумпийн хот ԓоӈăԓ лакки уԓăт па муш эԓты ăт я̆хты хŏят оԓăм сŏхăԓ пиԓăн щи верăм y̆с эԓты иԓ эсăԓԓэԓ.
5 Иисус ватман, муй щирăн щи хŏятăт Ԓy̆веԓа эвăԓԓăт, муш эԓты ăт я̆хты хŏята ястăԓ: – Ԓухсые, нăӈ кăрэкԓан эԓты ин нŏх пайтԓайн!
6 Щита опсăм кăмăтса Закона утăԓтăты ёх нумăссăт:
7 – Муя Ԓy̆в щиты пŏтăрăԓ? Еԓэм щиты атма ястăты Турăм эԓты! Хŏй Турăм такԓы хŏԓна верытăԓ кăрэкăт эԓты нŏх пайтты?
8 Иисус мŏхты Ԓy̆в сăмăԓăн ԓy̆в нŏмăсԓаԓ уйтăс па ястăԓ ԓy̆виԓаԓа: – Муя нын щиты нумăсԓăты?
9 Муй кеншăк, ястăты муш эԓты ăт я̆хты хŏята: “Нăӈ кăрэкԓан эԓты ин нŏх пайтԓайн”, муй ястăты “Нŏх ԓоя, оԓăм сŏхен уи па шуша”?
10 Нынан уйтты мосăԓ, Хŏят Пŏх мy̆вăн юр тăйԓ кăрэкăт эԓты хŏятăт нŏх пайтты, – Ԓy̆в муш эԓты ăт я̆хты хŏята ястăԓ:
11 – Нăӈен ястăԓăм: нŏх ԓоя, оԓăм сŏхен уи па ёхи мăна.
12 Щи хŏят мир ватман мŏхты нŏх ԓойс, оԓăм сŏхăԓ усԓы па ким этăс. Хŏԓыена щит шаӈкап ус, хŏятăт Турăм шек ишăкты питсэԓ:
– Тăмăщ умăщ вер мy̆ӈ нэмăԓты пŏрайн ăт ватсy̆в!
13 Яԓпа Иисус ԓор питăра этăс, Ԓy̆в хŏщаяԓа иса хŏятăт мăтсăт, па Ԓy̆в ԓy̆виԓаԓ утăԓтăс.
14 Мăнман, Ԓy̆в Левий, Алфей пŏх, шияԓăс, Левий мит ăкăтты хот пy̆ӈăԓăн опсăс. – Ма юпемăн утăԓтăты верэм утыя юва! – Иисус ԓy̆веԓа ястăс. Па Левий нŏх ԓойс, Ԓy̆в юпеԓăн мăнăс.
15 Хун Иисус вера утăԓтăты ёхԓаԓ пиԓăн Левий хотăн ищсăт-ԓэсăт, Ԓy̆в пиԓэԓăн ищиты ар мит ăкăтты хŏят па кăрэкаӈ хŏятăт ԓэсăт. Щимăщ хŏят ар ус па ԓy̆в Иисус юпийн йисăт.
16 Закона утăԓтăты ёх па фарисейт ватман, хŏты Иисус мит ăкăтты хŏятăт па кăрэкăӈ хŏятăт пиԓăн ԓэԓ, Иисус вера утăԓтăты ёха ястăсăт: – Муя Ԓy̆в мит ăкăтты хŏятăт па кăрэкăӈ хŏятăт пиԓăн ищăԓ-ԓэԓ?
17 Иисус щит хуԓăс па ԓy̆виԓăԓа ёхԓы ястăс:
– Мушԓы ёха я̆мăтты хŏят ăт мосăԓ, я̆мăтты хŏят мосăԓ мушăӈ ёха. Ма ăнта ёхăтсăм вохты вещката уԓты ёх, Ма кăрэкăӈ ёх кăрэкăӈ уԓăпса хăйты вохты ёхăтсăм.
18 Хŏят йиӈка ԓŏӈăԓтăты Иоанн вера утăԓтăты ёх пост тувман усăт па фарисейт вера утăԓтăты ёх ищи пост тувман усăт. Хŏятăт ёхăтсăт Иисус хŏща па иньщăссăт: – Иоанн вера утăԓтăты ёх па фарисейт вера утăԓтăты ёх пост тувман уԓԓăт, муя Нăӈ вера утăԓтăты ёхԓан пост ăт туԓăт?
19 Иисус щиты ԓy̆виԓăԓа ёхԓы ястăс: – Хун нэ туты ху мой пŏрыйн мойӈ ёх пиԓăн, мойӈ ёх муй верытԓăт пост верты? Щи кемăн, хун нэ туты ху мойӈ ёх пиԓăн, ԓy̆в пост верты ăт верытԓăт.
20 Ёхăтăԓ щимăщ пŏра, хун нэ туты ху нŏх y̆ԓа, щи пŏрайн пост туты питԓăт.
21 Нэмăԓты хŏят катра щăшкан сŏха яԓăп щăшкан эԓты ломăщ ăт омăсăԓ, щимăщ ломăщ пy̆ӈăԓăн хŏԓна катра сŏх таканшăк тохăԓ, па мет атмашăк йиԓ.
22 Ăт етшăм уна нэмăԓты хŏятан катра нюки хирăта ăт шошăмԓа, ăт етшăм уна катра нюки хирăт мăшԓăԓы, уна ким щёрыйԓ, катра нюки хирăт ăт мосты питԓăт. Ăт етшăм уна яԓăп нюки хирăта мосăԓ шошăмты.
23 Ипуш, шаббат хăтăԓăн, нянь ԓат сэм энăмты хăрăн Иисус юшие шоппи шушăс. Ԓy̆в вера утăԓтăты ёхԓаԓ мăнман нянь ԓат сэмăт сухтăты питсăт.
24 Щит урăӈăн фарисейт Иисуса ястăсăт: – Ванта муй ԓy̆в верԓăт? Муя ԓy̆в верԓăт щит, муй ăт рăхăԓ шаббат хăтăԓăн верты?
25 Иисус ёхԓы ястăс: – Нын нэмăԓты пŏрайн ăт ԓy̆ӈăтсăты, муй Давид* верăс, хун ԓy̆в па ԓy̆в пиԓăԓăн уԓăм хŏятăт вŏԓԓы ԓэтŏт ăт тăйсăт па шек сăмԓаԓ вохсайт?
26 Щит питăс хун Авиафар попăт ŏх хуя ус. Давид Турăм емăӈ хота ԓŏӈăс, Турăм кеша пŏнăм няня̆т y̆с, ԓy̆в щи няня̆т эԓты ԓэс па ԓy̆в пиԓăԓăн уԓăм хŏятăта хŏԓна мăс, щи няня̆т туп попԓана ԓэты рăхăс.
27 Иисус ԓy̆виԓăԓа ястăс: – Шаббат хăтăԓ хŏят кеша уԓ, ăнтŏм хŏят шаббат хăтăԓ кеша.
28
Щи урăӈăн Хŏят Пŏх ищи шаббат хăтăԓ кущая уԓ.
1 Иисус па щи синагога хота ёхтăс. Щита хŏят ус, щёмԓы сорăм ёш тăйс.
2 Па синагогайн щимăщ хŏятăт усăт, хŏйтăт Иисус вунавта пайтты, сута мăты ԓăӈхасăт. Щитԓăн ватман тăйсэԓ, питăԓ муй Ԓy̆в шаббат хăтăԓăн щёмԓы сорăм ёшăӈ хŏят ямăԓты.
3 Иисус щи хŏята ястăс: – Нŏх ԓоя па кy̆тпа эта.
4 Щи юпийн Иисус тумиԓăн иньщăсăс: – Муй рăхăԓ верты шаббат хăтăԓăн, ям верăт муй атăм верăт? Уԓăпса нŏх пайтты па муй веԓты? Тумиԓăн иса шитамăт.
5 Иисус ликăӈ сэмăн тумиԓан пеԓа вантамăс. Ԓy̆в кев сăмăӈăт усăт, щи урăӈăн Иисус сăмăԓ шукащăс, па Ԓy̆в хŏята ястăс: – Нăӈ ёшен шăши! Хŏят ёшăԓ шăшсăԓы, па ёшăԓ кимет ёшăԓ хŏрпи яма йис.
6 Фарисейт ким этсăт па мŏхты Ирод хон ёх пиԓăн нумăссăт, хŏты Иисус пăратты.
7 Иисус Ԓy̆в вера утăԓтăты ёхԓаԓ пиԓăн ԓор питăра мăнăс. Ԓy̆в юпеԓăн шек ар хŏят Галилея, Иудея мy̆вӈăн эԓты,
8 Иерусалим вош эԓты, Идумея мy̆в эԓты, Иордан ёхан тум пелăк эԓты, па Тир, Сидон вошӈăн пелăк эԓты мăтсăт. Щи ёх Иисус верԓаԓ эԓты хуԓсăт, Ԓy̆в хŏщайԓ ăктăщсăт, щит шек ар хŏят ус.
9 Иисус вера утăԓтăты ёхԓаԓа хоп ԓэщăтты партăс, ԓуԓăн ар хŏятăн еԓ нёртты ăт питԓа.
10 Ар хŏят ямăԓтăс, щи урăӈăн мушăӈ ёх шек оԓӈащ урăтсăт, ԓăӈхасăт Иисус хŏща щăкăптыя.
11 Атăм ликăӈ ԓыԓăт, Ԓy̆веԓ ар пуш шия- ԓăман, Ԓy̆в ещăԓтэԓ мy̆ва иԓ рăкăтсăт па увсăт: – Нăӈ Турăм Пŏх!
12 Туп Иисус такан ԓy̆виԓаԓа партыԓыйс ăт пŏтăрты, хŏй Ԓy̆в.
13 Щăԓта Иисус рэпа хуӈхăс па вохăс Ԓy̆в хŏщаеԓа, хŏй Ԓy̆в ԓăӈхăс. Щитԓаԓ Ԓy̆в хŏщаяԓа ёхăтсăт.
14 Ԓy̆в кăтхŏщьяӈ хŏят пирыйс Ԓy̆в пиԓăԓăн хăщты кеша па Ям айкеԓ туты китыԓыты,
15 па ԓуԓăн ԓy̆в юр ат тăйсăт мушăт эԓты ямăԓты па хŏят ԓыпи эԓты атăм ликăӈ ԓыԓăт ким воштăты.
16 Ԓy̆в пирыйс тăм кăтхŏщьяӈ хŏят: Симон – щитэна Ԓy̆в мăс нэм Петра;
17 яйӈăн 13Иаков па Иоанн, Зеведей пŏхӈăн – Иисус ԓынана мăс нэм Воанергес, щит мăтты “пŏхăл сый пŏхӈăн”;
18 Андрей, Филипп, Варфоломей, Матфей, Фома, Иаков – Алфей пŏх, Фаддей, Симон Кананит
19 па Иуда Искариот, тăмен юхăт Иисус вуракăта ёша пайтăс.
20 Хун Иисус хота ёхтăс, тŏхи яԓпа ар хŏят ăктăщсăт, Ԓy̆в вера утăԓтăты ёхԓаԓ пиԓăн па ԓэты кум ăт шитăс.
21 ԓy̆в пŏтăрсăт: – Ԓy̆в ŏшԓы йис.
22 Закона утăԓтăты ёх Иерусалим эԓты ёхăтман, ястăԓăт: – Ԓy̆в ԓыпеԓăн веельзевул, Ԓy̆в атăм ликăӈ ԓыԓăт куща юрăн щимăщ ԓыԓăт ким воштăԓ.
23 Щи юпийн Иисус Ԓy̆в хŏщайԓ ԓy̆виԓаԓ вохсăԓы, ястăс утăԓтăты пŏтăр: – Хŏты верытăԓ сатанайн сатана ким воштăты?
24 Хон мy̆в кy̆т кy̆тэԓăн ляля ки питăԓ, щи хон мy̆в ăт питăԓ хон щирăн ԓойты,
25 па семья, хŏта кy̆т кy̆тэԓăн лявăтԓăт, ищи ăт верытԓăт яха уԓты.
26 Па сатана, ԓy̆в ԓy̆в ещăԓтэԓ лялясты ки питăԓ, ԓy̆в ăт верытăԓ щирăн ԓойты, ԓy̆в сŏрмăԓ ёхтăс.
27 Нэмăԓты хŏят ăт верытăԓ юрăӈ хŏят хота ԓŏӈты па ԓоԓмăсты, оԓӈа ăт ки ярăԓ юрăӈ хŏят, щи юпийн хот ԓоԓмăсăԓ.
28 Ма нынан яна ястăԓăм: иса кăрэк па иса Турăм эԓты атăм ястăм ясăӈ хŏята ёрэмăты питԓа,
29 туп атăм ясăӈ Емăӈ Ԓыԓ эԓты нэмăԓты пŏрайн Турăмăн ăт ёрэмаԓа, щи кăрэк хŏят хŏща иса хăщăԓ.
30 Щит Ԓy̆в ястăс щи урăӈăн, муя ястăсăт: “Ԓy̆в ԓыпеԓăн атăм ликăӈ ԓыԓ.”
31 Иисус аӈкеԓ па яйԓаԓ ёхăтсăт. Камăн ԓойман парсăт Иисус вохты.
32 Ԓy̆веԓ керăтман ар хŏят опсăс. Ԓy̆веԓа ястăса: – Камăн Нăӈ аӈкен, Нăӈ яйԓан, ŏпиԓан, Нăӈ иньщăсԓайн.
33 – Хŏй Мăнэм аӈки па хŏй Мăнэм яйт? – Иисус ёхԓы ястăс.
34 Ԓy̆в керăтман опсăм ёхԓаԓ ăӈкăрмăс па ястăс: – Тăм Ма аӈкем па яйԓам.
35 Хŏй ям верăԓ, хŏты Турăм ԓăӈхаԓ, щитэн Ма яем, ŏпем па аӈкем.
1 Ԓор питăрăн Иисус яԓпа ёх утăԓтăты питăс. Ԓy̆в пy̆ӈԓăԓăн щи арат хŏят ăктăщăс, щит урăӈăн Ԓy̆в хопа опсăс, еша еԓшăк хопăн мăнăс па щиԓта пŏтăртăс, иса хŏятăт ԓор питăрăн хăщсăт.
2 Ԓy̆в утăԓтăты пŏтрăтăн ар утăԓтăс. Ԓy̆в утăԓтыман ԓy̆виԓаԓ пŏтăртăс:
3 – Хуԓăнтаты: мy̆вăн рупитты хŏят нянь энăмты хăра ԓат сэм ёвăԓман омăсты мăнăс.
4 Хун ԓy̆в ԓат сэм ёвԓăс, кăмăтса ԓат сэм юш пy̆ӈԓа рăкнăс. Щищкет пурԓăпсăт па ԓат сэмăт хŏԓыя ԓавемăсԓаԓ.
5 Па ԓат сэмăт кев тăхая, хŏта мy̆в вŏԓԓы шимăԓ, питсăт. Щи ԓат сэмăт сора нŏх питсăт – мy̆в ăнтŏм кy̆ԓ ус,
6 туп хун хăтăԓ пăԓа йис, щи этăм ай ԓат тŏрнăт сŏрсăт, мy̆вăн ԓэрԓаԓ ăнтŏм усăт.
7 Па ԓат сэмăт пеԓтăсты варсăӈ мy̆ва питсăт, щита варсăт энăпсăт, щит урăӈăн ԓат сэм тŏрнăт ăт верытсăт ԓат сэм мăты унты энăмты.
8 Па щи ԓат сэмăт, мăтэт ям мy̆ва питсăт, яма энăпсăт, муй хŏльмаӈ, муй хутъяӈ, муй сот ԓат сэм мăс.
9 Па Ԓy̆в ястăс ԓy̆виԓаԓа: – Пăԓ тăйты ŏтăт хуԓăнтаты!
10 Юхăтшăк, хун хŏятăт мăтсăт па Иисус пиԓăн кăтхŏщьяӈ вера утăԓтăты хŏят па Ԓy̆веԓ кертман уԓăм ёх хăщсăт, ԓy̆в иньщăссэԓ Ԓy̆веԓ: – Муй щи пŏтрэнăн ястăты утщисăн?
11 Ԓy̆в ястăс ԓy̆виԓаԓа: – Нын мăсайты уйтты щит, муй оԓăӈăн хăняя ус Турăм Хона уԓты вер эԓты. Туп па ёха иса ястăԓа утăԓтăты пŏтрăтăн.
12 Щит урăӈăн
ԓy̆в ватԓăт, туп ăт шияԓăԓăт,
хуԓăтԓăт, туп ŏша ăт пайтԓăт.
Щиты ԓy̆в Турăм пеԓа сăмԓăԓăн ăт питԓăт,
щи урăӈăн кăрэкԓаԓ эԓты нŏх ăт пайтԓайт.
13 Щăԓта Иисус иньщăсăс: – Нын тăм пŏтăр ŏша ăт пайтсăԓăн? Щиты ки муй щирăн нын ŏша пайтԓăԓăн па утăԓтăты пŏтрăт?
14 Нянь ԓат сэм пŏнты хŏят Турăм Ясăӈ пŏнăԓ.
15 Юш пy̆ӈăԓăн рăкнăм ԓат сэм: сăмԓăԓă ясăӈăн пŏнăм хŏятăт, туп щитԓăн щи ясăӈ хуԓԓăт, сатана ёхăтăԓ па ԓy̆в сăмԓăԓă пŏнăм ясăӈ ԓоԓăмăԓ.
16 Кевăӈ тăхайн рăкнăм ŏтăт – щит мŏԓты кем ёх, хŏй хун ԓy̆в ясăӈ хуԓԓăт, мŏхты амăтман щи ясăӈ уԓăт.
17 Туп сăмԓăԓăн ԓэр ăт тăйԓăт, па щи урăӈăн мŏԓты кум туп верытԓăт, щăха, хун ясăӈ урăӈăн шукăщты вер питăԓ па ԓy̆в ликăн этты питԓайт, мŏхты ԓy̆в эвăԓты верэԓ хăйԓэԓ.
18 Пеԓтăсты варса рăкнăм ԓат сэмăт – щит ясăӈ хуԓты хŏятăт,
19 туп щи хŏятăт сăмԓăԓă кашăӈ хăтăԓ верăт па мир верăт, тащ тăйты верăт па па ԓăӈхăты верăт ԓŏӈԓăт па щита ясăӈ веԓԓăт, па щи ясăӈ эԓты нэмăԓты ăт энмăԓ.
20 Я̆м мy̆ва рăкнăм ԓат сэмăт – щит хŏятăт, хŏй ясăӈ хуԓԓăт, па щи ясăӈ сăма уԓэԓ, па нянь ԓат тŏрăн иты, яԓăп ԓат сэмăт мăԓăт, хŏй хŏльмаӈ, хŏй хутъяӈ, хŏй сот кемăн.
21 Щăԓта Иисус иньщăсăс: – Нŏх ущитăм тy̆т сун, хун хот ята ԓŏӈăԓԓа, пy̆т иԓпия муй кровать иԓпия хун хăнятԓа? Ăнтŏм муй тy̆т сун нŏх омăсты кеша?
22 Муйкем хăня вер хăнятԓа, ищипа хăня вер нŏх питăԓ. Иса хăня верăт нŏх питԓăт.
23 Нын пăԓ ки тăйԓăты – хуԓăнтаты!
24 Ԓy̆в ястăс ԓy̆виԓаԓа: – Нумăсаты Ма ясăӈԓам эԓты. Муй арăт мерайн нын мортаԓыԓԓан, щи арăт мерайн нынан мортаԓаты питԓа, па нынан аршăк питԓа, хуԓăтты ёх.
25 Хŏй тăйԓ, щита хŏԓна мăты питԓа, хŏй ăт тăйԓ – щит эԓты щи айкем тăйм ŏтăԓ нŏх уты питԓа.
26 Иисус ястăс: – Тăмиты Турăм Хона уԓ: хŏят ԓат хăр ԓат сэм ёвăԓман омăсăԓ.
27 Ԓy̆в атăԓăн оԓăԓ па яԓăп хăтԓа киԓăԓ. Ԓат сэм нŏх питăԓ па энăмăԓ, хŏят ăт уятăԓ, муй щирăн,
28 мy̆в ԓy̆в энмăԓăԓ: оԓăӈăн ай тŏрăн этăԓ, щăԓта тŏрăн ԓат сэмăн этԓа, щăԓта ԓат сэм пŏшԓа,
29 па хун пŏра питăԓ, хун ԓат сэмăт пŏшсайт, хŏят мŏхты серп кеши китăԓ.
30 Иисус ястăс: – Муй пиԓăн Турăм Хона уԓты вер эԓты ястăты, па муй утăԓтăты пŏтăрăн щит эԓты ястăты?
31 Щит энăмты горчица сэм хŏрпи. Горчица сэм, хун мy̆ва омăсԓа, па мир хy̆ват ԓат сэмăт кy̆тăн мет ай,
32 па хун мy̆ва омăсԓа, мy̆в эԓты нŏх питăԓ, мет уна хŏят энăмты ŏтăт эԓты йиԓ, па ун нy̆вăн энăмԓа, щит урăӈăн ԓy̆в нy̆вԓаԓ иԓпийн турăм щищкет сай тăха кăшты верытԓăт.
33 Иисус ар щимăщ утăԓтăты пŏтрăтăн ԓy̆виԓаԓа Турăм Ясăӈ пŏтăртăс. Ԓy̆в пŏтăртăс щикем, муйкем хŏят верытăс ŏша пайтты.
34 Щимăщ пŏтăр такԓы Иисус ԓy̆виԓаԓа ăт пŏтăртăс, па хун Ԓy̆в вера утăԓтăты ёхԓаԓ пиԓăн утща хăщиԓыйс, ԓy̆виԓаԓа иса яма пŏтăртăс.
35 Щи хăтăԓăн, етăн, Иисус вера утăԓтăты ёхԓаԓа партăс: – Ԓор па пелка мăнԓy̆в.
36 Вера утăԓтăты ёхԓаԓ хŏятăт эсăԓсăт, па щи хопăн, хŏта Иисус опсăс, Ԓy̆веԓ пăтăн уйман, ԓор питăр эԓты еԓ питсăт. Па па хопăт Ԓy̆в пиԓэԓăн усăт.
37 Ԓорăн шек ун вот питăс. Хумпăт хопа такан хойсăт, хоп йиӈкăн уты питса.
38 Иисус щи кемăн рома хоп ёԓта оԓăӈăн, осăм пŏнмăн ŏԓăс. Вера утăԓтăты ёх Ԓy̆веԓ нŏх курăтсэԓ: – Утăԓтăты Ху! Нăӈен муй ищи хŏрпи, хŏты мy̆ӈ сŏрма питԓy̆в?
39 Иисус нŏх ԓойс, вота партăс ăт пŏԓты па ԓора ястăс: – Шитама юва! Рома юва! Щи пŏрайн вот рома йис, па шек-шек шитама йис.
40 – Муй па нын пăԓтăп пиԓăн уԓԓăты? – Ԓy̆в вера утăԓтăты ёхԓаԓа ястăс. – Хŏта нын эвăԓты верăн?
41 Вера утăԓтăты ёх ун пăԓтăп тăйсăт. Ԓy̆в кy̆тэԓăн пŏтăрсăт:
– Па Хŏй Ԓy̆в щимăщ, вот па ԓор Ԓy̆веԓ хуԓăтԓăт?
1 Ԓy̆в ԓор па пелка Гадара вош ёх мy̆ва ёхăтсăт.
2 Хун Иисус хоп эԓты иԓ охԓăс, Ԓy̆в ещăԓтэԓ рэп кев хаԓăщ лот* эԓты хŏят ёхтăс, ԓy̆в атăм ликăӈ ԓыԓăн катăԓман уса.
3 Тăм хŏят рэп кев хаԓăщ лотăн ус, ԓy̆в нэмăԓты хŏятăн вŏԓаӈ карты кеԓăн ярты ăт вертса.
4 Муй арат пy̆ш ԓy̆в карты кеԓăн кy̆рӈăԓаԓ-ёшӈăԓаԓ иԓ ярыԓыса, ԓy̆в кашăӈ пy̆ш карты кеԓ шукатăс, мăншийс па еԓ мăнăс. Нэмăԓты хŏятăн ромăԓты ăт верытса.
5 Иса атăԓ- хăтăԓ ԓy̆в рэп кев хаԓăщ лотăтăн ус па рэпăт хy̆ват яӈхăс па атăм тy̆рăн увман кевăта сэӈкащăс.
6 Еԓта Иисус шияԓăман, вана хухăԓмăс па шаша омăсман ŏх пŏнăс Ԓy̆веԓа.
7 – Муй Нăӈ ма эԓтэм ԓăӈхаԓăйн, Иисус, Нум Турăм Пŏх? – так тy̆рăн ԓy̆в увман пŏтăртăс. – Я̆м нŏмăсăн, Турăм урăӈăн, мăнэм аԓ шy̆каты!
8 Щит питăс, хун Иисус щи еԓпийн ястăс щи хŏята: – Ким эта хŏят эԓты, атăм ликăӈ ԓыԓ!
9 Щăԓта, Иисусăн иньщăсса: – Нăӈ нэмен муй? – Ма нэмем легион, мy̆ӈ шек ар, – ԓy̆в ёхԓы ястăс.
10 Щăԓта ԓy̆в Иисус пойкты питсăт, тăм мy̆в тăха эԓты ԓy̆в еԓ ăтăт Иисусăн воштăсайт.
11 Щита рэп пy̆ӈăԓăн ун пурăщ тащ ԓэтŏт кăшман яӈхăс.
12 Па иса атăм ликăӈ ԓыԓăт Иисус пойксăт: – Киты мy̆ӈев пурщăт ԓыпия ԓŏӈты! Эсԓы мy̆ӈев тăм пурщăт ԓыпия ԓŏӈты!
13 Иисусăн мŏхты эсăԓсайт, па атăм ликăӈ ԓыԓăт хŏят эԓты ким этсăт па пурщăт ԓыпия ԓŏксăт. Тăԓаӈ пурăщ тащ рэп эԓты йиӈка хухăԓман навăрмăс па щита хăԓăс, кăт щёрăс кем пурăщ тащ ус.
14 Па пурăщ шавийм хŏятăт хŏнтаман щи вер эԓты вошăн па куртăтăн пŏтăрсăт. Щита уԓты хŏятăт этсăт ватты, муй хŏты йис.
15 Хун хŏятăт Иисус пy̆ӈăԓăн ăктăщсăт па шияԓăсăт, хŏты атăм ликăӈ ԓыԓăтăн, легионăн катԓыԓыйм хŏят ԓумăтԓиман па я̆м ŏх веԓăмăн омăсăԓ, щит эԓты ԓy̆в шек пăԓтамăсăт.
16 Щи вер вантăм ёх ԓy̆виԓаԓа пŏтăрсăт, муй хŏты йис атăм ликăӈ ԓыԓăтăн катԓыԓыйм хŏят пиԓăн па муй 1хŏты йис пурщăт пиԓăн.
17 Щи мy̆вăн уԓты ёх Иисус пăртты питсэԓ ԓy̆в мy̆веԓ эԓты еԓ мăнты.
18 Хун Иисус хопа опсăс, атăм ликăӈ ԓыԓԓаԓ воштăм хŏят Иисус пиԓăн урăтăс,
19 туп Иисус ăт кашащăс. – Мăна ёхи, – ԓy̆веԓа Иисус ястăс, – па рутԓана пŏтăрта, муй я̆м нăӈен Турăм Куща верăс па хŏты нăӈен щалитсăԓы.
20 Я̆ма ювăм хŏят мăнăс па Яӈ вошăӈ мy̆вăн айкеԓ туты питăс, хŏты муй ԓy̆веԓ Иисус верăс. Хŏԓыя ущмарăӈа усăт.
21 Хун Иисус яԓпа хопăн ԓор па пелка ёхтăс, Ԓy̆в пy̆ӈԓăԓăн шек ар хŏят ăктăщăс. Ԓy̆в ԓор пy̆ӈăԓăн ус.
22 Ԓy̆в хŏщайԓ и синагoга куща Иаир ёхтăс, па Ԓy̆веԓ шияԓăман, Ԓy̆в кy̆рӈăԓаԓ хŏща рăкăнăԓ.
23 Па шек пойкман Ԓy̆веԓ пŏтăртăԓ: – Эвем сŏрма питты кемăн, ёхта па ёшӈăԓан ԓy̆в эԓтэԓ пŏны, ԓy̆в я̆ма ат йиԓ па ат уԓ.
24 Иисус ԓy̆в пиԓăԓăн мăнăс. Ԓy̆в юпеԓăн ар хŏят мăнăс, Ԓy̆в ар тăха эԓты нёртса.
25 Хŏятăт кy̆тăн нэ шушăс, кăтхŏщьяӈ тăԓ шукащăс нэ ур муш эԓты.
26 Ԓy̆в ар леккар эԓты ар шукащăс, пăраттсăԓы иса, муй ԓy̆в тăйс, па нэмăԓты нётăпса ăт мŏщатăс, туп ԓy̆в иса атмашăк йис.
27 Ԓy̆в Иисус эԓты хуԓман, ар хŏят кy̆тăн Иисус шăнша ин ванамăс, Ԓy̆в сŏхăԓа катԓăмтыйс.
28 Нэ нумăсман ястăс: – Ԓy̆в сŏхăԓа катԓăмтыԓăм ки, ма я̆ма йиԓăм.
29 Ԓy̆в мŏхты я̆ма йис нэ ур мушăԓ эԓты, па мŏхты ŏша пайтсăԓԓы па хуԓсăԓы эԓăԓăн, ԓy̆в мушăԓ эԓты нŏх питăс.
30 Иисус щи кемăн Ԓy̆в Ԓy̆веԓ ԓыпийн хуԓсăԓы, хŏты Ԓy̆в эԓтэԓ ямăԓты юр этăс. Ԓy̆в керԓăс ёх кy̆тăн па иньщăсăс: – Хŏй ма сŏхема катԓăмтыйс?
31 Вера утăԓтăты ёхԓаԓ ястăсăт: – Нăӈ ватԓэн, Нăӈ ар тăха эԓты хŏятăтăн нёртԓайн, па Нăӈ ястăԓăн: “Хŏй Мăнэма катԓăмтыйс?”
32 Иисус хŏятăт кертман вантăс тумеԓ шияԓăты кеша, хŏй щит верăс.
33 Тăрыты унты пăԓтамăм нэ уйтман муй ԓy̆в пиԓăԓăн питăс, вана ёхтăс, Ԓy̆в ещăԓтэԓ рăкнăс па иса тy̆ӈа- щира ястăс.
34 Иисус ԓy̆веԓ ястăс: – Ма эвем, нăӈ эвăԓты верэнăн нŏх пайтсайн! Мушен эԓты нŏх питман я̆м нŏмăсăн мăна.
35 Хун Иисус щиты пŏтăртăс, синагога куща хот эԓты айкеԓ туса: – Нăӈ эвен пăрăс, муя хŏԓна тŏрастăԓăн Утăԓтăты Хуя.
36 Туп щи ясӈăт хуԓман, Иисус синагога кущая мŏхты ястăс: – Аԓ пăԓа, туп эвԓа!
37 Ԓy̆в нэмăԓты па хŏята ăт эсԓăс Ԓy̆в юпеԓăн мăнты, y̆с туп Петра, Иаков па ԓy̆в апщеԓ Иоанн.
38 Ԓy̆в синагога куща хота ёхтăс па вантăԓ ăнтŏм ром ёх, ԓy̆в хоԓԓăԓăт па шук эԓты такан увԓăт.
39 Иисус хота ԓŏӈăс па иньщăсăс: – Муя нын ăнтŏм ромăт па хоԓԓăԓты, эви ăт пăрăс, ԓy̆в ŏԓăԓ.
40 Па Ԓy̆в хŏятăтăн няхса. Туп Иисус иса ёха партăс ким этты, Ԓy̆в пиԓăԓăн эви ащи па аӈки па Ԓy̆в пиԓăԓăн ёхтăм ŏтăт y̆ԓ па тŏхи ԓŏӈăԓ, хŏта эви ŏԓăс.
41 Эви ёш уйман ԓy̆веԓ ястăс: – Талита кум! Муй па ясăӈ эԓты тŏлмащман питăԓ: – Эви, нăӈен ястăԓăм: нŏх ԓоя!
42 Эви мŏхты нŏх ԓойс па яхты питăс, ԓy̆веԓ кăтхŏщьяӈ тăԓ ус. Щит вантăм ёх ун ущмара питсăт.
43 Па Ԓy̆в такан ԓy̆виԓаԓа партăс, нэмăԓты хŏят щит эԓты ăтăт уйтăс, па ястăс, эви ԓэтŏтăн ат мăса.
1 Иисус щиԓта еԓ мăнăс па ай пŏрайн уԓăм вошăԓа ёхтăс, па вера утăԓтăты ёхԓаԓ Ԓy̆в юпеԓăн мăтсăт.
2 Шаббат хăтԓа йис, па Ԓy̆в синагога хотăн хŏятăт утăԓтăты питăс. Ԓy̆веԓ хуԓăнтам ар хŏят ущмарăӈа пŏтăрсăт: – Хŏԓща щит Ԓy̆веԓа питăс? Хŏԓща Ԓy̆в щимăщ мутрайӈ? Па муй щимăщ вŏԓаӈ мутрайт, мăтэт Ԓy̆в ёшӈăԓăԓăн верԓайт?
3 Па муй тăмен ăнтŏм хот верты хŏят, Мария пŏх, Иаков, Иосий, Иуда па Симон яй, па муй Ԓy̆в ŏпиԓаԓ ăнтŏм тăта, мy̆ӈ кy̆тэвăн? Щит урăӈăн хŏятăт Иисуса ăт эвăԓсăт.
4 Иисус ԓy̆виԓаԓа ястăс: – Ăт уԓԓийԓ Турăм Ясăӈ туты хŏят ям нŏмăсăн ԓy̆в рут мy̆в пелкăԓăн, рут хŏятԓаԓ кy̆тăн па хотăԓăн. Па тăхaятăн иса ԓy̆в ям нŏмăсăн тăйԓа.
5 Иисус щита и вŏԓаӈ мутра ăт верытăс верты. Ԓy̆в туп кăмăтса хŏят муш эԓты нŏх пайтăс, ёшӈăԓаԓ ԓy̆в эԓтэԓ пŏнмăн.
6 Иисус, хŏятăт ăт эвăԓты вер урăӈăн, ущмарăӈа ус. Щи юпийн Иисус ван куртăт хy̆ват хŏятăт утăԓтăман яӈхăс.
7 Ԓy̆в кăтхŏщьяӈ вера утăԓтăты ёхԓаԓ вохăс па кăтăнăн ԓy̆виԓаԓ ортăсман яхты китсăԓы. Ԓy̆в хŏятăт эԓты атăм ликăӈ ԓыԓ воштăты юр ԓy̆виԓаԓа мăс.
8 Иисус ԓy̆виԓаԓа щиты ястăс: – Пăтăн нэмăԓты аԓ уяты, туп шушты юх. Юш хир, нянь, ŏх антăпăн аԓ уяты.
9 Кy̆ра сандалийт ԓумтаты, па кăт эԓ сŏх аԓ ԓумтаты.
10 Па Ԓy̆в ястăс: – Па мăтты тăхaйн хота ки ԓŏӈԓăты, щита хăщаты еԓԓы мăнтăн унты.
11 Щăԓта нын мăтты тăхайн хойты ăт ки эсăԓԓайты па нынан хуԓăтты ăт ԓăӈхаԓайт ки, щиԓта еԓ мăнаты па кy̆рпат эԓты рав хиш пăркăтаԓăн. Щи вер тум хŏятăт вунавтэԓ этăԓтăԓ. Яна нынан ястăԓăм: Содома па Гоморра вошӈăна сут хăтăԓăн кеншăк питăԓ тум вош эԓты.
12 Ԓy̆в мăтсăт па айкеԓ тусăт: хŏятăт ат кăрэкаӈ уԓăпсаеԓ хăйсэԓ па ат Турăм пеԓа сăмăн керԓăсăт
13 Ԓy̆в ар атăм ликăӈ ԓыԓ хŏятăт эԓты воштăсăт па ар мушăӈ хŏят оливка юх вŏйн ŏхԓаԓ нёсăтсăт па ямăԓсăт.
14 Иисус нэм эԓты иса хŏятăт хуԓԓысăт. Хун Иисус эԓты Ирод хон хуԓăс, ԓy̆в ястăс: – Щит ԓыԓӈăтыйс Иоанн – йиӈка хŏятăт ԓŏӈăԓтăты хŏят па щи урăӈăн вŏԓаӈ мутрайт щитăн верԓăйт.
15 Па ŏтăт пŏтăрсăт: – Щит Илия. Хуԓметăт пŏтăрсăт: – Щит – Турăм Ясăӈ туты хŏят, хy̆вăн уԓăм Турăм Ясăӈ туты хŏятăт хŏрпи.
16 Ирод Иисус эԓты хуԓăс па ястăс: – Щит Иоанн, ма ԓy̆веԓ ŏхԓы пайтсэм. Ԓy̆в сŏрма питăм ŏт эԓты нŏх пайтăсăс.
17 Щи еԓпийн Ирод хŏятăт Иоанн мŏщатты парталыйс па касна хота омăсты. Щит Ирод верăс Иродиада урăӈăн. Иродиада – Иродэн ай яй Филипп ими ус. Ирод ай яйԓ ими нэӈа тусԓы.
18 Иоанн ястыԓыйс Ирода: – Нăӈ ăт верытԓăн уԓты апщен нэ пиԓăн.
19 Иродиада шек Иоанн пеԓа ликăӈ ус па нумăсăс ԓy̆веԓ веԓты. Па ԓy̆в кум ăт мŏщатăс Иоанн веԓты,
20 Ирод Иоанн эԓты пăԓăс па Иоанн шавиман тăйсăԓԓы. Ирод уйтсăԓԓы, Иоанн вещкат па емăӈ хŏят. Хун ԓy̆в Иоанн хуԓăнтăс, ар верăт ԓy̆веԓ хуԓăтман верăс, па 14ямăн ԓy̆веԓ хуԓăнтăс.
21 Ипуш Иродиада кеша ям пŏра ёхтăс, хун Ирод сэма питăм хăтԓа йис па хун ԓy̆в ун пăсан ԓэщăтăс хон хотăн уԓты вŏԓаӈ ёха, ун ляль ёха па Галилеяин мет тащăӈ ёха.
22 Иродиада эви ԓэты-ищты тăхая ԓŏӈăс па якăс, Ирода па мойӈ ёхԓаԓа щи эви шек сăма рăхăс. Ирод хон ԓy̆веԓ ястăс: – Воха муй ԓăӈхаԓайн, щит нăӈен мăԓăм.
23 Ясăӈ ԓy̆веԓа мăс: – Муй туп нăӈ вохԓăн, нăӈен мăԓэм, хон мy̆в и шуп верытԓăм мăты.
24 Эви этăс па аӈкеԓ иньщăсăс: – Муй вохты? – Хŏят йиӈка ԓŏӈăԓтăты Иоанн ŏх воха, – аӈкеԓ ястăс.
25 Эви сора хон хŏща ёхԓы ёхтăс па вохăс: – Ԓăӈхаԓайм, Хŏят йиӈка ԓŏӈăԓтăты Иоанн ŏх мăнэм анăн ин мŏхты мии.
26 Хон шек мăрэма йис, туп ясӈăԓ ёхԓы уты ăт верытăс, иса мойӈ ёх уԓман ясăӈ ястăс.
27 Ԓy̆в мŏхты партăс ԓy̆веԓ шавийм хŏята Хŏят йиӈка ԓŏӈăԓтăты Иоанн ŏх туты.
28 Тумен касна хота мăнăс, Иоанн ŏх еԓ пайтăс па щи ŏх анăн эвия тусԓы, эви щи ŏх аӈкеԓа мăсԓы.
29 Хун щи вер эԓты Иоанн вера утăԓтăты ёх хуԓсэԓ, ԓy̆в ёхăтсăт, Иоанн эԓ усăт па рэп кев хаԓăщ лота тусэԓ.
30 Апостолăт Иисус хŏща ăктăщсăт па иса пŏтăрсăт, муй ԓy̆в версăт па муя хŏятăт утăԓтăсăт.
31 Иисус ԓy̆виԓаԓа ястăс: – Юваты утща тăхая па еша щутщаты. Ар ёхтыԓыйм па мăнăм ёх ус, апостолăт ԓэты кум ăт тăйсăт.
32 Па ԓy̆в хопăн хŏятԓы тăхая утща мăтсăт.
33 Туп хŏятăт ватсăт, хŏты ԓy̆в хопăн мăтсăт. Па ар хŏятăн ԓy̆в уйтсайт. Хŏятăт иса вошăт эԓты хухăԓсăт па ԓy̆в мy̆в хy̆ват сорашăк тŏхи ёхăтсăт па Иисус пy̆ӈԓа ăктăщсăт.
34 Хун Иисус уты охԓăс, тэԓыя хŏят шияԓăс. Ԓy̆веԓа щи хŏятăт щаля йис, ԓy̆в ищи мăтты ош войт ош шавиты хŏят такԓы усăт, па Иисус ԓy̆виԓаԓ утăԓтăты питăс па ар утăԓтăс.
35 Хун етная йиты питăс, вера утăԓтăты ёхԓаԓ Ԓy̆в хŏщайԓ ванамсăт па ястăсăт: – Тăта хŏятԓы тăха па пŏра хy̆ва йис,
36 хŏятăт киты ван хотăта па куртăта мăнты па нянь ԓy̆веԓа ԓутты, ԓy̆в ԓэтŏт ăт тăйԓăт.
37 Иисус ястăс: – Нын мияты ԓy̆виԓаԓа ԓэты. Вера утăԓтăты ёх иньщăссăт: – Нăӈ муй тăми ԓăӈхаԓайн, мy̆ӈ ат мăтсy̆в па кăтсот динарияя нянь ԓутсy̆в па тăм хŏятăт ԓапăтсy̆в?
38 Туп Иисус иньщăсăс: – Муй арат нянь нын тăйԓăты? Яӈхаты, вантаты. Ԓy̆в уйтман ястăԓăт: – Вет нянь па кăт хy̆ԓ.
39 Иисус щи пŏрайн вера утăԓтăты ёхԓаԓа партăс хŏятăт омăсты похлăтăн вŏсты тŏрна.
40 Па нартăпа омăссăт сот па ветъяӈ хŏятăтăн.
41 Щи юпийн Ԓy̆в вет нянь па кăт хy̆ԓ y̆с, турăм пеԓа вантăс па Турма пумащипа ястăс. Щăԓта Ԓy̆в иса нянь пулăта мŏрытăс па вера утăԓтăты ёхԓаԓа мăс хŏятăта мăты кеша; па кăт хy̆ԓ иса хŏятăта лакки ортăс.
42 Хŏԓыя ԓэсăт па тăрăпсайт.
43 Нянь хăщăм пулăт па хăщăм хy̆ԓ эԓты кăтхŏщьяӈ тэԓăӈ ун сун ăкăтсăт.
44 Щита ԓэсăт вет щёрăс кем ху хŏят.
45 Мŏхты щи юпийн Иисус вера утăԓтăты хŏятԓаԓ такан партăс хопа ԓэԓты па оԓӈа, ԓор па пелка, Вифсаида курта, мăнты. Щи кемăн Ԓy̆в хŏятăт пиԓăн пайм уԓăм верăԓ.
46 Ԓy̆в пайм уԓăм верăс, па рэп ԓоӈԓа пойкăщты мăнăс.
47 Ата йиты питăс, вера утăԓтăты ёхԓаԓ хопăн ԓор кy̆тăпăн омăссăт, Иисус мy̆вăн утща.
48 Ԓy̆в вантăс, хŏты тумиԓаԓ вот ещăԓт ԓавăрта ԓовăԓсăт, па ат кy̆тăн аԓăӈсăхăта йиты кемăн, йиӈк хy̆ват ԓy̆в хŏщаеԓ шушăс. Ԓy̆в нŏмăс ус хоп мŏхты мăнты.
49 Туп тумиԓаԓăн шияԓăса, хŏты Ԓy̆в йиӈк хy̆ват шушăԓ, нумăссăт, тăм исхор па уваԓсăт.
50 Иса вера утăԓтăты ёх Ԓувеԓ шияԓăсăт па пăԓтамăсăт. Иисус мŏхты ԓy̆в пиԓаԓăн пŏтăрты питăс: – Рома юваты, тăми Ма, аԓ пăԓаты.
51 Ԓy̆в хопа ԓy̆в хŏщаеԓ опсăс, па вот шитама йис. Вера утăԓтăты ёхԓаԓ ŏхвеԓăмԓаԓ ԓыԓԓăсăт,
52 ԓy̆в нянь-хy̆ԓ умăщ вер хŏԓна ŏша па сăма ăт пайтсэԓ, сăмԓаԓ ищи мăтты тŏманăӈăт усăт.
53 Па пелка мăнман, Геннисарет мy̆ва ёхăтсăт па уты хойсăт.
54 Хун хоп эԓты уты киԓсăт, хŏятăтăн Иисус мŏхты уйтса.
55 Ԓy̆в мy̆веԓ сора яӈхăмтысэԓ, па мушăӈ хŏятăт оԓăм сŏхԓаԓ пиԓăн тŏхи туты питсăԓăԓ, хŏта хуԓсэԓ Иисус ус.
56 Хŏԓта Ԓy̆в туп ăт ёхтыԓыйс, курта муй воша, муй куртăӈ хота, хŏятăт мушăӈ ёхԓаԓ хăр тăхая туԓăт па вохԓăт Иисус мушăӈ ёхăта Ԓy̆в эԓты сŏх питăрăта кy̆ш кепа катԓăмтатыя, па хŏԓыя, хŏй Ԓy̆в хŏщайԓ катԓăмтыйс, яма йисăт.
1 Иерусалим эԓты кăмăтса Закона утăԓтăты ёх ёхăтсăт. Ԓy̆в фарисейт пиԓăн Иисус пy̆ӈԓа ăктăщсăт,
2 па ватԓэԓ, хŏты хŏйтыԓаԓ Ԓy̆в вера утăԓтăты ёхԓаԓ эԓты нянь ԓэсăт ăнтŏм сыстам ёшăн, ăт лёхитăм ёшăн, па вантăм ёх щит урăӈăн лявтăссăт.
3 Фарисейт па иса иудейт ăт ԓэԓăт ёш ки я̆ма ăт лёхăтԓăт, щит ԓy̆в йис пŏра ёх ясăӈ щирăн верԓăт.
4 Ԓутты-тыныты тăха эԓты ёхăтман ăт ки лёхитыԓăт – ăт ԓэԓăт. Хŏԓна уԓԓăт ар па верăт, мăтэт ԓy̆виԓаԓа мосăԓ иса ԓy̆в щирэԓăн верты: шай анăт, вощԓах эԓты верăм пy̆тăт, пăтăрух анăт, кроватят лёхитты.
5 Щи юпийн фарисейт па Закона утăԓтăты ёх Иисус иньщăссăт: – Муя Нăӈ вера утăԓтăты ёхԓан йис пŏра ёх ясăӈ щирăн ăт верԓăт, муя ԓy̆в ёш ăт лёхитман нянь ԓэԓăт?
6 Иисус ёхԓы ястăс:
– Яна ястăс Исаия Турăм Ясăӈ нын эԓтан, кăт вешпи хŏятăт, тăмиты хăшман уԓԓа:
“Ясăӈăн тăм мир ёх Мăнэм вŏԓаӈа тăйԓэԓ,
туп ԓy̆в сăмԓаԓ Ма эԓтэм еԓăн.
7 Ԓy̆в Ма нэмем ишăкты верэԓ таԓ вер,
хун ԓy̆в хŏятăн верăм партăм ясӈăта
хŏятăт утăԓтăԓăт, хŏты Турăм Ясӈа.”
8 – Нын Турăм партăм ясăӈ хăйман хŏят йис пŏра ясӈăт щирăн уԓԓăты вощԓах эԓты верăм пy̆тăт па шай анăт лёхитман па ар щимăщ верăт верман.
9 Па Иисус ԓy̆виԓаԓ ястăс: – Я̆м муй, Турăм партăм ясăӈ таԓа пайтԓăԓăн йис пŏра ясăӈԓăн щирăн уԓты кеша?
10 Моисей ястăс: “Ащен па аӈкен вŏԓаӈа тăи” па “хŏй атма ащеԓ муй аӈкеԓ эԓты ястăԓ, щитэн сŏрма пайтты мосăԓ”.
11 Нын па утăԓтăԓты па щирăн. Хун хŏят ащеԓа муй аӈкеԓа ястăԓ: “Ма эԓтэм нăӈен муй мосăс – щит корван* – ма ястăсăм мăты Турма”,
12 щи юпийн нын хŏята эсăԓԓăԓăн нэмăԓты ащи муй аӈки кеша ăт верты.
13 Щиты нын таԓа пайтԓăԓăн Турăм Ясăӈ нын йис пŏра ясӈăн урăӈăн. Щимăщ ясăӈ хŏятăта мăԓты. Хŏԓна нын ар па щимăщ вер верԓăты.
14 Иисус иса хŏятăт вохăс па ԓy̆виԓаԓ ястăс: – Хуԓăнтаты иса нын Ма ясăӈԓам па ŏша пайтаԓăн.
15 Нэмăԓты ким эԓты хŏята ԓŏӈты ŏт атма, укщăма хŏят ăт верăԓ; туп муй ԓy̆в ԓыпеԓ эԓты этăԓ, щитăн укщăма хŏят верԓа.
16 Нын пăԓ ки тăйԓăты – хуԓăнтаты!
17 Хун Иисус хŏятăт кy̆т эԓты еԓ мăнăс па хота ԓŏӈăс вера утăԓтăты ёхԓаԓ партсăт Ԓy̆веԓ ястăты, муй Ԓy̆в утщийс щи пŏтрăԓăн ястăты.
18 Ԓy̆в ԓy̆виԓаԓа ястăс: – Па муй нын ищиты ŏша ăт пайтты хŏятăт? Па муй нын ŏша ăт пайтԓăԓăн, нэмăԓты щит эԓты, муй ԓŏӈăԓ хŏят ԓыпия атма, укщăма ԓy̆веԓ верты ăт верытăԓ.
19 Ԓy̆в ăнтŏм хŏят сăма мăнăԓ, хŏят хŏн мŏхты мăнăԓ па ким этăԓ. Щиты Иисус ясăӈ мăс: иса ԓэты ŏт сыстам.
20 Иисус хŏԓна ястăс: – Атма, укщăма хŏят верԓа щитăн, муй ԓy̆в ԓыпи эԓтэԓ мăнăԓ.
21 Хŏят ԓыпеԓ эԓты, сăм эԓты ликăӈ нŏпсăт мăнԓăт, ики-ими щирăн атма уԓты верăт, ху-нэ щирăн атма уԓты верăт*, хŏят веԓты верăт,
22 ԓоԓмăсты верăт, тарма уԓты вер, лик вер, ущмарăӈа- ŏлмащты вер, укщăма уԓты вер, атăм сэмăн ватты вер, Турăм эԓты атма пŏтăрты вер, ёращты вер, нэман ăт нумăсман верты вер.
23 Иса тăм атăм ликăт хŏят ԓыпи эԓты этԓăт па хŏят укщăма па атма верԓăт.
24 Галилей эԓты Иисус Тира па Сидон вошӈăн мy̆ва мăнăс. Хота ԓŏӈман, ԓăӈхăс, ԓуԓăн нэмăԓты хŏят Ԓy̆в ёхтăм верăԓ эԓты ăт уйтсăт, туп щиты ăт тыйс.
25 Ԓy̆в эԓтэԓ и нэ хуԓăс, ԓy̆в эвеԓ атăм ликăӈ ԓыԓăн катăԓман уса. Нэ ёхтăс па Ԓy̆в кy̆рӈăԓаԓ пy̆ӈԓа иԓ рăкнăс.
26 Тăм нэ ăнтŏм еврей нэ ус, ԓy̆в Сирияйн Финикия мy̆в эԓты ус. Па Ԓy̆в эԓтэԓ вохăс эвеԓ эԓты атăм ликăӈ ԓыԓ ким воштăты.
27 Туп Иисус ԓy̆веԓа ястăс: – Оԓӈа эсԓы няврэмăта ямăс ԓэты, ăнтŏм я̆м щиты верты – няврэмăт эԓты нянь нŏх уты па кутювăта вŏщкăты.
28 Нэ Ԓy̆веԓ ёхԓы ястăс: – Щиты, Куща, туп кутювăт пăсан иԓпийн ищи ԓэԓăт няврэмăт эԓты рăкнăм пулăт.
29 Па Иисус ястăс ԓy̆веԓ: – Щи ясăӈԓан урăӈăн мăна: эвен ԓыпи эԓты атăм ликăӈ ԓыԓ мăнăс.
30 Нэ ёхи ёхăтман шияԓăсԓы, атăм ликăӈ ԓыԓ ким этмаԓ эвеԓ эԓты па эвеԓ ŏԓты лотăԓăн ŏԓăԓ.
31 Тира па Сидон мy̆в юпийн Иисус Яӈ вошăӈ мy̆в мŏхты Галилея ԓор пy̆ӈԓа мăнăс.
32 Иисус хŏща пăԓԓы па тăхрăтԓаты, вевтама пŏтăрты хŏят туса па пойкса Иисус ёшăԓ ԓy̆в эԓтэԓ пŏнты.
33 Иисус мир ёх эԓты ԓy̆веԓ еԓшăк тусԓы, ёш ԓy̆йԓаԓ мушăӈ хŏят пăԓӈăн ԓыпия пŏтсăԓԓы па пŏлщăӈ ляксăман, хŏят няԓăм хŏща катԓăмтыйс.
34 Щăԓта Ԓy̆в турăм пеԓа ăӈкăрмăс, ԓаԓмăс па ԓy̆веԓ ястăс: – Еффата! Щит: – нŏх пуншаща!
35 Щи хŏят мŏхты питăс хуԓты па няԓăм я̆ма питăс, па ԓy̆в я̆ма, тy̆ӈа пŏтăрты питăс.
36 Иисус хŏятăта партăс нэмăԓты хŏята щи вер эԓты ăт ястăты. Туп муйкем ар Ԓy̆в ăт эсԓăс пŏтăрты, хŏятăт щикем ар пy̆ш айкеԓăт лакки тусăт.
37 Ԓy̆в шек-шек ущмарăӈ усăт, па пŏтăрсăт:
– Ԓy̆в иса я̆ма верăԓ: пăԓԓы хŏятăт хуԓăтты кумăн мăԓԓы па няԓăмԓы хŏятăт пŏтăрты кумăн мăԓԓы.
1 Щи пŏрайн, хун шек ар хŏят ăктăщман ус па щиты тыйс, муй хŏятăта нэмăԓты ԓэты ăнтŏм ус, Иисус вера утăԓтăты ёхԓаԓ вана вохсăԓы па ԓy̆виԓаԓа ястăс:
2 – Мăнэм щаль тăм хŏятăт, ԓy̆в хуԓăм хăтăԓ Ма пy̆ӈԓэмăн, па нэмăԓты ԓэтŏт ăт тăйԓăт.
3 Ԓэԓԓы ки ёхи китԓăԓам, юш хy̆ват щёмԓы йиԓăт, мŏԓты хŏятăт хy̆в тăха эԓты ёхăтсăт.
4 Вера утăԓтăты ёхԓаԓ Ԓy̆веԓ ястăсăт: – Хŏԓща па хŏй тăта, таԓ хŏятԓы мy̆вăн, нянь мŏщатăԓ ԓy̆виԓаԓ ԓапăтты?
5 Ԓy̆в иньщăсăс: – Муй арат нянь нын хŏщайн? Ԓy̆в ястăсăт: – Ԓапăт.
6 Иисус мир ёха партăс мy̆ва иԓ омăсты. Па Ԓy̆в ԓапăт нянь уйман, пумащипа Турма ястăман, няня̆т мŏрытсăԓы па вера утăԓтăты ёхԓаԓа мăсԓы мир ёха мăты кеша па ԓy̆в мир ёх кy̆тăн лакки мăсԓаԓ.
7 Па кăмăтса хy̆ԓые тăйсăт, Иисус пумащипа ястăман щитԓаԓ ищи ортты партăс.
8 Ԓэсăт па тăрăпсайт; па хăщăм пулăт ԓапăт сун тэԓ ăкăтсăт.
9 Ԓэвăм хŏят няԓ щёрăс кем усăт. Па Иисус ԓy̆виԓаԓ китсăԓы.
10 Па мŏхты вера утăԓтăты ёхԓаԓ пиԓăн хопа ԓэԓман Далмануфа мy̆ва ёхтăс.
11 Фарисейт ёхăтсăт, Иисус пиԓăн урая хойман пŏтăрсăт па Ԓy̆веԓ турăм эԓты пос верты такан вохсэԓ. Ԓy̆в ватты урăтсăт Ԓy̆в эԓтэԓа, верытăԓ Ԓy̆в щит муй ăнта.
12 Па Ԓy̆в ԓавăрта тыштăмăс па ястăс: – Муя тăм уԓты ёх пос верты такан вохԓăт? Яна нынана ястăԓăм, тăм уԓты ёхăта пос ăт мăԓа.
13 Ԓy̆в хăйсăԓԓы ԓy̆виԓаԓ, яԓпа хопа опсăс па ԓор па пелка мăнăс.
14 Вера утăԓтăты ёхԓаԓ ёрэмăсăт нянь уты, пăтăн хопăн туп и нянь тăйсăт.
15 Иисус ԓy̆виԓаԓа ястăс так ясăӈăн пŏтăрман: – Вантаты, пăԓманшăк уԓаты фарисейт па Ирод нянь дрожжи эԓты.
16 Вера утăԓтăты ёхԓаԓ ԓy̆в кy̆тэԓăн пŏтăрсăт: – Ԓy̆в щирăԓăн, мy̆ӈ нянь ăт тăйԓy̆в.
17 Иисус ŏша пайтман, муй эԓты ԓy̆в пŏтăрԓăт, ԓy̆виԓаԓа ястăс: – Нын нянь ăт тăйԓăты. Муя нын пŏтăрԓаты щит эԓты? Нын хŏԓна ăт шияԓăԓты па ŏша ăт пайтԓăты? Хŏԓна муй нын сăмԓăн ищи мăтты тŏманăӈăт?
18 Сэм тăйман нынана ăт ныԓа? Пăԓ тăйман ăт хуԓԓăты? Па ăт нумԓăԓăн?
19 Хун Ма вет нянь мŏрытсăм вет щёрăс хŏят кеша, муй арат тэԓăӈ ун сун хăщăм пулăт пиԓăн ăкăтсăты? Ԓy̆веԓ ястăԓăт: – Кăтхŏщьяӈ.
20 – Хун ԓапăт нянь няԓ щёрăс хŏята, муй арат тэԓăӈ сун хăщăм пулăт ăкăтсăты? Ястăсăт: – Ԓапăт.
21 Па Иисус ястăс ԓy̆виԓаԓа:
– Муй щирăн ŏша ăт пайтԓăԓăн?
22 Иисус Вифсаида курта ёхтăс; па Ԓy̆в хŏщайԓ сэмԓы хŏят туԓа па вохԓа Иисус щи хŏята катԓăмтатыя.
23 Иисус сэмԓы хŏят ёш эԓты усԓы, курт эԓты еԓ тусԓы па сэмӈăԓаԓа пŏлщăӈ ляксăман, ёшӈăԓаԓ ԓy̆в ŏхăԓа пŏтсăԓы па иньщăсăс ԓy̆веԓ, вантăԓ муй мŏԓты.
24 Ԓy̆в еԓԓы ватман ястăс: – Мăнты хŏятăт ватԓăм, ԓy̆в юх хŏрпет.
25 Щăԓта па Иисус ёшӈăԓаԓ ԓy̆в сэмӈăԓаԓа пŏтсăԓы па партсăԓы ԓy̆веԓ ăӈкăрмăты. Ԓy̆в яма йис па иса яма ватты питăс.
26 Па Иисус ԓy̆веԓ ёхи китсăԓы ястăман:
– Курта аԓ ԓŏӈа па нэмăԓты хŏята куртăн аԓ пŏтăрта.
27 Иисус вера утăԓтăты ёхԓаԓ пиԓăн куртăта мăнăс. Щи куртăт уԓԓăт Филипп Кесария вош кертман. Юш хy̆ват мăнман Иисус вера утăԓтăты ёхԓаԓ иньщăсăс: – Хŏй юкана Ма хŏятăтăн тăйԓайм?
28 Ԓy̆в ястăсăт: – Нăӈ тăйԓайн Иоанн юкана – щит йиӈка хŏятăт ԓŏӈăԓтăты хŏят, па хŏятăтăн – Илия юкана, па хуԓметăтăн – Турăм Ясăӈ туты и хŏят юкана.
29 Ԓy̆в ԓy̆виԓаԓа ястăԓ: – Па нын хŏй юкана Мăнэм тăйԓăԓăн? Петра ёхԓы ястăс: – Нăӈ – Христос.
30 Иисус ăт эсԓăс ԓy̆виԓаԓа нэмăԓты хŏята Ԓy̆в эԓтэԓ пŏтăрты.
31 Па Иисус утăԓтăты ԓy̆виԓаԓ питăс, хŏты Хŏят Пŏха ар мосăԓ шукащты, хŏты еԓ поткаԓа ун икетăн, попăт ŏх хуйтăн па Закона утăԓтăты хŏятăтăн, хŏты Хŏят Пŏх пăратԓа, па хуԓмет хăтăԓăн сŏрăм эԓты нŏх питăԓ.
32 Ԓy̆в щит эԓты тy̆ӈа пŏтăртăс. Туп Петра, еԓшăк Ԓy̆веԓ вохман, такан ёхԓы пŏтăрты питăс.
33 Иисус вера утăԓтăты ёхԓаԓ пеԓа ёхԓы ăӈкăрмăс па ăт эсԓăс Петрая ёхԓы пŏтăрты па ястăс: – Еԓ мăна Ма эԓтэм, сатана! Нăӈ ăнтŏм Турăм щирăн нумăсԓăн, нумăсԓăн хŏят щирăн.
34 Иисус, мир ёх па вера утăԓтăты ёхԓаԓ вана вохман ԓy̆виԓаԓа ястăс: – Хŏй ԓăӈхаԓ Ма юпемăн мăнты, нынан мосты нŏмăсԓăн пy̆ӈԓа хăяԓăн па пернайԓăн уйман Ма юпемăн юваты.
35 Хŏй ԓy̆в ԓыԓăԓ шавиты ԓăӈхаԓ, щит ԓыԓăԓ уштăԓ, хŏй ԓыԓăԓ уштăԓԓы Ма урӈема па Евангелие урăӈăн, щит век кеша ԓыԓăԓ шавиԓăԓԓы.
36 Па муй ŏнтас, хŏята тăԓаӈ мир ёхăт тащ ёша пайтты, хун ԓy̆в ԓыԓăԓ уштăԓԓы.
37 Па, хŏят ԓy̆в ԓыԓăԓ урăӈăн муй тын мăԓ?
38 Па Ма эԓтэм хой еԓэма питăԓ па Ма ясăӈԓам эԓты тăм уԓты хŏятăт кy̆тăн, хŏйтăт Турăм ульняя ёрэмăмăн тăйԓэԓ па кăрэк кy̆тăн уԓԓăт, щи хŏят эԓты щăха еԓэма питăԓ хŏят Пŏх, хун Ԓy̆в ёхԓы ёхăтăԓ Ԓy̆в Ащеԓ вŏԓаӈ юр пиԓăн па емăӈ ангелăт пиԓăн.
1 Па ястăс ԓy̆виԓаԓ:
– Вещката нынан пŏтăрԓăм: тăта ԓойты хŏятăт кy̆тăн тухăԓ хŏятăт ԓy̆в уԓăпсайԓаԓăн ищипа ватԓăт, хŏты Турăм юрăԓ пиԓăн Хона уԓты питăԓ.
2 Хут хăтăԓ мăнăм юпийн Иисус Петра, Иаков па Иоанн пăтăн усԓы па паԓ кева ԓy̆виԓаԓ утща тусԓы, па ԓy̆в еԓпиԓаԓăн па хŏраса верăнтăс.
3 Ԓy̆в сŏхԓаԓ ворԓия йисăт, ԓощ хŏрпи вŏԓԓы нŏвия, хŏты иса мирăн сŏх нŏвия верты хŏят сŏх щиты нŏви сыстама верты ăт верытăԓ.
4 Щăԓта Илия па Моисей сэма пайтăссаӈăн па Иисус пиԓăн пŏтăрсаӈăн.
5 Щи кемăн Петра Иисуса ястăс: – Равви, мy̆ӈев я̆м тăта уԓты! Хуԓăм ай варăс хотые верԓy̆в: Нăӈена ит, Моисея ит па ит Илияя.
6 Петра ăт уйтăс, муй ястăты, щи пуляӈ ԓy̆в шек пăԓтамăман усăт.
7 Туп пăԓăӈ ёхтăс, ԓy̆виԓаԓ лап лаӈкăс па пăԓăӈ эԓты тy̆рсый щащмăс: – Тăм Ма сăмемăн тăйты Пŏхем, Ԓy̆веԓ хуԓăнтаты!
8 Шаӈкап кертман ăӈкăрмăмăн нэмăԓты ԓy̆в пиԓэԓăн ăт шияԓăсăт, туп и Иисус.
9 Хун ԓy̆в рэп эԓты иԓ охăԓсăт, Иисус нэмăԓты хŏята ăт эсԓăс пŏтăрты вантăм верэԓ эԓты щи унты, хун Хŏят Пŏх сŏрма питăм верăԓ эԓты нŏх питăԓ.
10 Ԓy̆в щи ясӈеԓ катăԓман тăйсэԓ кy̆т кy̆тэԓăн иньщăсман, муй щит: сŏрма питăм вер эԓты нŏх питты.
11 Па Ԓy̆веԓ иньщăссэԓ: – Муя Закона утăԓтăты ёх ястăԓăт, мăтты Илияя мосăԓ оԓӈа ёхăтты?
12 Ԓy̆в ԓy̆виԓаԓа ёхԓы ястăс: – Яна, Илияя мосăԓ оԓӈа ёхăтты па иса яԓпа ԓэщăтты па ԓy̆в лотԓаԓа пŏнты; па Хŏят Пŏха, хŏты Ԓy̆в эԓтэԓ хăшман уԓԓа, мосăԓ ар шукащты па атма тăйты питты.
13 Па ястăԓăм нынан, па Илия ёхтăс па ԓy̆в пиԓăԓăн версăт щит, муй ԓăӈхасăт, хŏты ԓy̆в эԓтэԓ хăшман уԓԓа катра емăӈ нэпекăн.
14 Хăщăм вера утăԓтăты ёхԓаԓ хŏща ёхăтман, Иисус ар хŏят тумиԓан пy̆ӈăԓăн шияԓăс, па Закона утăԓтăты ёхăт, мăтэт ԓy̆виԓаԓ пиԓăн ура верман пŏтăрсăт.
15 Мŏхты, Ԓy̆веԓ шияԓăман, иса ёх ущмарăӈа йисăт па вана хухăԓман, Ԓy̆в пиԓăԓăн уща версăт.
16 Ԓy̆в Закона утăԓтăты ёх иньщăсăс: – Муй эԓты ԓy̆виԓаԓ пиԓăн ура верман пŏтăрԓаты?
17 Хŏятăт кy̆т эԓты и хŏят ёхԓы ястăс: – Утăԓтăты Ху! Ма Нăӈ хŏщаен пŏхем тусэм, ԓy̆в атăм ликăӈ ԓыԓăн катăԓман уԓԓа, щит урăӈăн ԓy̆в пŏтăрты ăт верытăԓ.
18 Хŏта туп ԓy̆в ԓыԓăн катԓăпԓа, ԓy̆в мy̆ва вŏщкăԓа, па ԓy̆в y̆ӈԓăԓ эԓты нявăр этты питăԓ, па пекԓаԓăн шихăртăԓ, па кев иты таԓăсăԓ. Ма Нăӈ вера утăԓтăты ёхԓан эԓты вохсăм, ат воштăԓăт атăм ликăӈ ԓыԓ пŏхем ԓыпи эԓты, туп ԓy̆в щём ăт тăйсăт.
19 Иисус ёхԓы ястăс: – Нын, тăм уԓты ăт эвăԓты ёх! Муй унты нын пиԓăнăн питԓăм? Муй унты Ма нын пиԓăнăн шукащты питԓăм? Ма хŏщаем ԓy̆веԓ туваԓăн.
20 Па пŏх Ԓy̆в хŏщайԓ туса. Туп ԓy̆в Иисус шияԓăс, атăм ликăӈ ԓыԓăн тарăстыса, ԓy̆в мy̆ва иԓ рăкнăс па кертԓыйс па y̆ӈԓăԓ эԓты нявăр этты питăс.
21 Па Иисус пŏх ащи иньщăсăс: – Муй хy̆вăн тăмиты питăс? Ащи ястăс: – Ай пŏра эԓты.
22 Па ар пy̆ш атăм ликăӈ ԓыԓăн пŏх тy̆та па йиӈка вŏщкăԓа пăратты урăӈăн; туп мŏԓты верытԓăн ки, мy̆ӈ пеԓэва щаля юва па нёты мy̆ӈев.
23 Иисус ԓy̆веԓа ястăс: – Па еша кепа эвăԓты ки верытԓăн, эвăԓты хŏята иса верăт рăхăԓ.
24 Па мŏхты пŏх ащи сэм йиӈк пиԓăн такан ястăс: – Эвăԓԓăм, Куща! Нёты мăнэм эвăԓты!
25 Ватман, хŏты хŏԓна ёх ăктăщман вана хухăԓăԓ, Иисус атăм ликăӈ ԓыԓа ястăс: – Пŏх няԓăмԓы па пăԓԓы верты ԓыԓ! Ма нăӈен такан парԓэм, пŏх эԓты ким эта па нэмăԓты пŏрайн ԓy̆в ԓыпеԓа аԓ ԓŏӈа.
26 Па увăԓтаман па пŏх такан тарăстыман атăм ликăӈ ԓыԓ ким этăс; па пŏх сŏрма питăм ŏт иты йис, щит урăӈăн ар хŏят пŏтăрсăт, пŏх пăрăс.
27 Туп Иисус ԓy̆веԓ ёш эԓты катăԓман нŏх ԓy̆веԓ ԓойԓсăԓы па пŏх нŏх ԓойс.
28 Па хун Иисус хота ԓŏӈăс, Ԓy̆в вера утăԓтăты ёхԓаԓ Ԓy̆веԓ хŏятԓы тăхайн иньщăссэԓ: – Муя мy̆ӈ ăт верытсэв тăм атăм ликăӈ ԓыԓ пŏх ԓыпи эԓты воштăты?
29 Па Иисус ԓy̆виԓаԓ ястăс: – Щимăщ атăм ликăӈ ԓыԓ ăт верытԓа па щирăн хŏят ԓыпи эԓты ким пайтты, туп хун Турма пойкăщԓа па постăԓа, щиты атăм ликăӈ ԓыԓ ким этăԓ.
30 Щиԓта мăнман, Галилея мy̆в мŏхты мăтсăт; па Ԓy̆в ԓăӈхăс, щи мăнты верэԓ эԓты хŏятăт атăт уйтсăт.
31 Щи кемăн Ԓy̆в вера утăԓтăты ёхԓаԓ утăԓтăс па пŏтăртăс ԓy̆виԓаԓа, Хŏят Пŏх хŏят ёша пайтԓа, па Ԓy̆в сŏрма пайтԓа па сŏрма пайтăм юпийн хуԓмет хăтăԓăн сŏрăм эԓты нŏх питăԓ.
32 Туп вера утăԓтăты ёх щи пŏтăр ŏша ăт пайтсăт, па Ԓy̆в эԓтэԓ иньщăсты пăԓсăт.
33 Иисус Капернаум воша ёхтăс, па хун хотăн ус, вера утăԓтăты ёхԓаԓ эԓты иньщăсăс: – Юш хy̆ват мăнман муй эԓты кy̆т кy̆тăнăн пŏтăрсăты?
34 Вера утăԓтăты ёх еԓэмăман нэмăԓты ёхԓы ăт ястăсăт. Ԓy̆виԓаԓа еԓэм ус щи пŏтăр эԓты. Юш хy̆ват мăнман кy̆т кy̆тэԓăн пŏтăрсăт, хŏй ԓy̆в кy̆тэԓăн вŏԓаӈшăк.
35 Омăсман, кăтхŏщьяӈ вера утăԓтăты ёхԓаԓ вохсăԓы па ԓy̆виԓаԓа ястăс: – Хŏй ԓăӈхаԓ оԓӈа питтыя, щитэн мет ёԓта ат питăԓ па иса ёха митхуя ат уԓ.
36 Щăԓта няврэм тувман, ԓy̆веԓ вера утăԓтăты ёхԓаԓ кy̆та ԓощăԓтăсԓы па, няврэм апăԓмăман, ястăс ԓy̆виԓаԓа:
37 ”Хŏй и тăмăщ няврэм вана y̆ԓ Ма нэмем урăӈăн, щит Мăнэм вана y̆ԓԓы. Хŏй Мăнэм вана y̆ԓ, щит ăнтŏм Мăнэм, щит Хŏй Мăнэм китăс вана y̆ԓԓы.
38 Щи тумпийн Иоанн ястăс: – Утăԓтăты Ху! Мy̆ӈ ватсy̆в хŏят, хŏй Нăӈ нэменăн атăм ликăӈ ԓыԓăт хŏят ԓыпи эԓты воштăс, туп мy̆ӈ пиԓэвăн ăт яӈхăԓ; па ԓy̆веԓ ăт эсăԓсэв щиты верты, ԓy̆в мy̆ӈ пиԓэвăн ăт яӈхăԓ.
39 Иисус ястăс: – Эсԓаԓăн ԓy̆веԓ щиты верты; нэмăԓты хŏят вŏԓаӈ мутра Ма нэмемăн верман тăм ван кy̆тăн Ма эԓтэм атăм ясăӈ ястăты ăт верытăԓ.
40 Па, хŏй ăнтŏм атма вантăԓ нын пеԓайн, щит нын пиԓăнăн.
41 Па хŏйн нын Ма нэмем урăӈăн, нын Христос хŏятăт урăӈăн йиӈк анăн ищăԓтăԓайты, вŏԓԓы вещката нынан ястăԓăм, щит ԓy̆в я̆м верăԓ ăт ёрэмаԓа.
42 – Па хŏй тăмет Мăнэма эвăԓты няврэмăт эԓты и няврэм атăм вера вохԓăԓы, щи хŏята ямшăк питăс ԓуԓăн, хун ԓy̆в сапԓăԓа ун кев ярԓа па ԓy̆в щарса вŏщкăԓа.
43 Па нăӈ ёшенăн атма хy̆щԓайн ки, ёшен еԓ сэвры: ямшăк нăӈена мушмăӈа Турăм уԓăпсая ԓŏӈты, мăтты ки кăт ёш пиԓăн ада мăнты, ăт хурты тy̆та,
44 хŏта “ԓy̆в нёхайԓаԓ ԓэты ващ войԓаԓ ăт хăԓԓăт, па тy̆т ăт хурԓăԓ”.
45 Па нăӈ кy̆рэнăн атма хy̆щԓайн ки, еԓ сэвры кy̆рэн: ямшăк нăӈена нохман Турăм уԓăпсая ԓŏӈты, мăтты ки кăт кy̆р пиԓăн ада вŏщкăты питԓайн ăт хурты тy̆та,
46 хŏта “ԓy̆в нёхайԓаԓ ԓэты ващ войԓаԓ ăт хăԓԓăт, па тy̆т ăт хурԓăԓ”.
47 Па нăӈ сэменăн атма хy̆щԓайн ки, сэмен ким сухты: ямшăк нăӈена и сэмăн ԓŏӈты тŏхи, хŏта Турăм Хона уԓ, мăтты ки кăт сэм пиԓăн тy̆тăӈ ада вŏщкăты питԓайн,
48 хŏта “ԓy̆в нёхайԓаԓ ԓэты ващ войԓаԓ ăт хăԓԓăт, па тy̆т ăт хурԓăԓ”.
49 – Кашăӈ хŏят тy̆тăн сŏԓăтԓа па кашăӈ Турма пŏрԓыты ŏт сŏԓăн сŏԓăтԓа.
50 Сŏԓ – я̆м мосты ŏт; туп хун сŏԓ ăнтŏм сŏԓаӈа йиԓ, муйн ԓy̆веԓ яма верԓăԓăн? Кашăӈ нын ԓыпанăн сŏԓ тăяты, па сăмăӈа кy̆т кy̆тэнăн уԓаты.
1 Щиԓта мăнман, Иисус Иордан ёхан па пелăк хy̆ват Иудея мy̆ва яӈхăс. Па яԓпа Ԓy̆в хŏщайԓ ар ёх ăктăщăс, па хŏты иса Ԓy̆в верăс, ԓy̆виԓаԓ утăԓтăс.
2 Фарисейт Ԓy̆в пy̆ӈԓăԓа ёхăтсăт па Ԓy̆веԓ я̆ма ватты кеша, муй щирăн Ԓy̆в ёхԓы ястăԓ, щит урăӈăн Ԓy̆веԓ охсар иты иньщăссăт: – Эсăԓԓа муй икия имеԓ пиԓăн кăтна мăнты?
3 Иисус ԓy̆виԓаԓа ёхԓы ястăс: – Моисей нынан муй партăс?
4 Фарисейт ястăсăт: – Моисей эсԓăс икия кăтна мăнты кеша нэпек хăшты па имеԓ пиԓăн кăтна мăнты.
5 Иисус ԓy̆виԓаԓа ёхԓы ястăс: – Нын так сăмԓăн урăӈăн ԓy̆в щи партăм ясăӈ нынан хăншăс.
6 Оԓăӈăн, хун Турăм мир верăс, Турăм верăс хŏят: ху па нэ.
7 Щит урăӈăн хŏят хăйԓ ԓy̆в ащеԓ па аӈкеԓ
8 па питăԓ ԓy̆в имеԓ пиԓăн яха уԓты, па кăтӈăн питԓăӈăн ита, щиты ԓын ăнтŏм кăтӈăн, туп ит.
9 Щит, муй Турăм я̆ха пайтăс, щит хŏятăн кăтна ăт верытԓа пайтты.
10 Щăԓта хотăн вера утăԓтăты ёхԓаԓăн Ԓy̆в яԓпа иньщăсса щи вер эԓты.
11 Иисус ястăс ԓy̆виԓаԓа: – Хŏй имеԓ пиԓăн кăтна мăнăԓ па па ими туԓ, щитэн кăрэк верăԓ еԓпи имеԓа.
12 Па ими икеԓ пиԓăн кăтна ки мăнăԓ па па ики туԓ, щи имен кăрэк верăԓ.
13 Иисус хŏща няврэмăт тутԓисайт Ԓy̆веԓ няврэмăт хŏща катԓăмтатыя, тувăм няврэмăт вера утăԓтăты ёхԓаԓăн ăт эсăԓсайт Иисус хŏща.
14 Щит шияԓăман, Иисус шек ликащăс па ястăс ԓy̆виԓаԓа: – Эсԓаԓăн няврэмăт Ма хŏщаем ёхтыԓыты, па ԓy̆виԓаԓ аԓ ертаԓăн, щимăщ хŏятăт щита уԓԓăт, хŏта Турăм Хона уԓ.
15 Вŏԓԓы вещката нынан ястăԓăм: хŏй Турăм Хона ԓy̆в хŏщайԓ ăт y̆ԓԓы няврэм иты, щит тŏхи ăт ԓŏӈăԓ, хŏта Турăм Хона уԓ.
16 Иисус няврэмăт апăԓмăман, ёшӈăԓаԓ ԓy̆в эԓтэԓ пŏнăс па Турăм эԓты я̆м верăт няврэмăта вохăс.
17 Хун Иисус юша пайтăсăс, и хŏят вана хухăԓмăс, Иисус ещăԓт шаншŏха рăкнăс па иньщăсăс Ԓy̆веԓ: – Утăԓтăты я̆м Ху! Муй мăнэм верты век уԓăпса мŏщатты кеша?
18 Иисус ԓy̆веԓа ястăс: – Муя Мăнэм я̆ма ая̆ԓԓэн? Нэмăԓты хŏят я̆м ăнтŏм, туп и Турăм я̆м.
19 Уйтԓăн Турăм партăм ясӈăт: ики-ими щирăн атма аԓ уԓа; хŏят аԓ веԓа; аԓ ԓоԓма; хŏят эԓты нэман ŏлмащ аԓ яста; аԓ шуката; нăӈ ащен па аӈкен вŏԓаӈа тăи.
20 Ԓy̆в па Иисуса ёхԓы ястăс: – Утăԓтăты Ху! Иса тăм ясӈăт щирăн ма ай пŏра эԓты уԓԓăм.
21 Иисус ԓy̆в пеԓайԓ ăӈкăрмиман, сăма рăхăтсăԓы ԓy̆веԓ па ястăс: – И вер туп нăӈена ăт тăрмăԓ: мăна, иса муй тăйԓăн, тыныи па ŏхԓан нy̆ша ёха мии, па питԓăн турăмăн тащ тăйты; щăԓта ёхта, па пернаен уйман Ма юпемăн юва.
22 Ԓy̆в па щи ясӈăт эԓты атăм венша ювман, мăрэмăман еԓ мăнăс, ԓy̆в шек тащăӈ ус.
23 Па кертман ватман, Иисус вера утăԓтăты ёхԓаԓа ястăԓ: – Хŏты ԓавăрт тащ тăйты ёха ԓŏӈтыя тŏхи, хŏта Турăм Хона уԓ!
24 Вера утăԓтăты ёхԓаԓ щи ясӈăт эԓты пăԓтама йисăт. Туп Иисус яԓпа ԓy̆виԓаԓа ёхԓы ястăԓ: – Ԓухсăт! Хŏты ԓавăрт тащеԓа эвăԓты ёха ԓŏӈтыя тŏхи, хŏта Турăм Хона уԓ!
25 Кеншăк верблюд воя йинтăп y̆с мŏхты ԓŏӈты, муй тащăӈ хŏята ԓŏӈтыя тŏхи, хŏта Турăм Хона уԓ.
26 Вера утăԓтăты ёх шек ущмарăӈа усăт па ԓy̆в кy̆тэԓăн пŏтăрсăт: – Па хŏй верытăԓ нŏх пайтăстыя?
27 Иисус ԓy̆в пеԓайԓ ватман ястăԓ: – Хŏятăт щит ăт верытԓăт верты, туп Турăм верытăԓ; Турăм иса верытăԓ верты.
28 Па Петра питăс Ԓy̆веԓ пŏтăрты: – Тăм муй, мy̆ӈ иса мŏԓтыԓy̆в хăйсăԓy̆в па Нăӈ юпенăн мăтсy̆в.
29 Иисус ёхԓы ястăс: – Вŏԓԓы вещката нынан ястăԓăм: щит, хŏй хот хăйс, муй яйԓаԓ, муй ŏпиԓаԓ, муй апщиԓаԓ, муй ащеԓ, муй аӈкеԓ, муй имеԓ, муй няврэмԓаԓ, муй мy̆в хăрԓаԓ Ма урӈемăн па Евангелие урăӈăн,
30 ин ԓy̆в тăм уԓăпсайн, хун ԓy̆в ликăн этты питԓайт, мŏщатăԓ сот пy̆ш аршăк хотăт, па яйт, па ŏпет, па апщет, па ащет, па аӈкет, па няврэмăт, па мy̆в хăрăт, па ёхăтты векăн иса века уԓăпса.
31 Туп аркем хŏятăт оԓӈăт эԓты питԓăт ёԓтая, аркем ёԓта эԓты оԓӈая.
32 Хун ԓy̆в юшăн усăт, Иерусалим воша нŏх мăнман, Иисус оԓӈа шушăс, па вера утăԓтăты ёхԓаԓ пăԓтама ювиԓысăт па Ԓy̆в юпеԓăн мăнман, пăԓтама усăт. Кăтхŏщьяӈ вера утăԓтăты ёх вана вохман, Ԓy̆в па питăс пŏтăрты, муй питăԓ Ԓy̆в пиԓăԓăн:
33 ”Мy̆ӈ Иерусалима нŏх мăнԓy̆в, па Хŏят Пŏх попăт ŏх хуйт па Закона утăԓтăты ёхăт ёша пайтԓа па щитԓăнăн сутытԓа сŏрма пайтты, па щитԓăнăн па мир ёх ёша пайтԓа.
34 Па щи хŏятăт атмащ няхман Ԓy̆веԓ тăйԓэԓ, па питԓăт Ԓy̆веԓ сэкты, па пŏлщăӈăн лякты, па Ԓy̆в сŏрма пайтԓа; па хуԓмет хăтăԓăн Ԓy̆в сŏрăм эԓты нŏх питăԓ.
35 Щи пŏрайн Иисус хŏща вана ёхăтсаӈăн Зеведей пŏхӈăн, Иаков па Иоанн, па ястăсӈăн: – Утăԓтăты Ху! Мин ԓăӈхаԓаймăн, Нăӈ щит ат версăн, муй эԓты мин вохԓамăн.
36 Па Иисус ԓy̆веӈăна ястăс: – Муй ԓăӈхаԓайтăн, мăтты Ма нынан версăм.
37 Ԓын ястăсӈăн Ԓy̆веԓа: – Эсԓы минэмăна Нăӈ хŏщаен омăсты, ита ям пелка, кимета пăрта пелка, хун Нăӈ вŏԓаӈ юр тăйты питԓăн.
38 Туп Иисус ԓy̆веӈăԓăԓа ястăс: – Ăт уйтԓатăн, муй вохԓатăн: верытԓатăн муй ан ищты, мăты Ма ищԓăм, па верытԓатăн муй щиты ищи мăтты йиӈка ԓŏӈăԓтаԓайты, хŏты Ма ищи мăтты йиӈка ԓŏӈăԓтаԓайм?
39 Ԓын ёхԓы ястăсӈăн: – Верытԓамăн. Иисус ԓy̆веӈăԓăԓа ястăс: – Ан, мăты Ма ищԓăм, питԓатăн ищты, па щиты ищи мăтты йиӈка ԓŏӈăԓтаԓайтăн, хŏты Ма ищи мăтты йиӈка ԓŏӈăԓтаԓайм.
40 Туп омăсты Ма хŏщаем я̆м пелка па пăрта пелка – ăнтŏм Ма эԓтэм щи вер этăԓ, туп тăм омăсты тăхайт щитăта, хŏя ԓэщатман уԓԓа.
41 Па щит хуԓман, яӈ вера утăԓтăты ху Иаков па Иоанн пеԓа лика питсăт.
42 Па Иисус, ԓy̆виԓаԓ вана вохман ԓy̆виԓаԓа ястăс: – Нын уйтԓăԓăн, вŏԓаӈ кăнащăт мир ёхăт нумпийн кущая уԓԓăт, па юр тăйты ёхăт щи мир ёхăт нумпийн кущая уԓԓăт.
43 Туп нын кy̆тăнăн щиты атăт питăԓ: па хŏй ԓăӈхаԓа вŏԓаӈашăк нын кy̆тăнăн питты, ат питăԓ нынана митхуя.
44 Па хŏй ԓăӈхаԓа нын кy̆тăнăн оԓӈа питты, ат питăԓ исаятă мет хуԓăтты митхуя.
45 Хŏят Пŏх ăнтŏм щит урăӈăн ёхтăс хŏятăтăн митăн ат верса, туп Ԓy̆в хŏятăта мит верты па Ԓy̆в ԓыԓăԓ мăты ар ёх нŏх пайтты урăӈăн.
46 Иерихон воша ёхăтԓăт. Па хун Ԓy̆в Иерихон вош эԓты вера утăԓтăты ёхԓаԓ пиԓăн па ар ёх пиԓăн этăс, Тимей пŏх, сэмԓы Вартимей, юш пy̆ӈăԓăн куняра вохăсман опсăс.
47 Хуԓман, муй щит Иисус Назарет вош эԓты, Вартимей увты питăс па пŏтăрты питăс: – Иисус, Давид пŏхăт Пŏх, щалиты мăнэм!
48 Ар хŏятăн шитама уԓты пăртса; туп Вартимей мет таканшăк увты питăс: – Давид пŏхăт Пŏх, щалиты мăнэм!
49 Иисус ԓойс па партсăԓы тумеԓ Ԓy̆в хŏщайԓ вохты. Сэмԓы хŏят вохԓа па ԓy̆веԓ ястăԓа: – Аԓ пăԓа, нŏх ԓоя, Ԓy̆в нăӈен вохԓăԓы.
50 Вартимей эԓты ԓумтăм сŏхăԓ нŏх эхман вŏщкăсԓы, нŏх ԓойс па Иисус хŏща ёхтăс.
51 Иисус Вартимей иньщăсăс: – Муй нăӈ Ма эԓтэм ԓăӈхаԓайн? Сэмԓы хŏят Ԓy̆веԓ ястăс: – Утăԓтăты Ху! Ма яԓпа сэмăӈа ат йисăм!
52 Иисус ԓy̆веԓ ястăс:
– Мăна, нăӈ эвăԓты верэнăн нăӈ нŏх пайтсайн.
Па ԓy̆в мŏхты сэмăӈа йис па Иисус юпийн юш хy̆ват мăнăс.
1 Хун Иерусалим пеԓа мăтсăт, Елеон рэп пy̆ӈăԓăн Виффагия па Вифания куртӈăна ванамăсăт. Иисус кăт вера утăԓтăты ёхӈăԓаԓ курта китăԓ
2 па ястăԓ ԓy̆веӈăԓăԓа: – Нын еԓпанăн уԓты курта мăнатăн; курта ԓŏӈман, мŏхты уйтаԓăн иԓ ярăм ай осёл, ԓy̆в ԓоӈԓаԓа нэмăԓты хŏят нэмăԓты пŏрайн ăтат опсыԓыйс, осёл эхман, ты туваԓăн.
3 Па мăтты хŏят нынан ки ястăԓ: “Муя нын щит верԓăты?”, ёхԓы ястатăн: “Ԓy̆в Кущая мосăԓ”, па щи хŏят мŏхты осёл ты китԓăԓы.
4 Вера утăԓтăты ёхӈăн мăтсаӈăн, па юш хулăн пушас ов пy̆ӈăԓăн ярăм ай осёл уйтсаӈăн, па кеԓ эԓты ԓy̆веԓ эхсăԓăн.
5 Па щита ԓойм хŏй хŏятăт ԓынан ястăсăт: – Муй верԓăтăн? Муя кеԓ эԓты ай осёл эхԓăԓăн?
6 Ԓын ёхԓы ястăсӈăн щиты, хŏты партăс Иисус; па щитăтăн мăнты эсăԓсайӈăн.
7 Па Иисус хŏща ай осёл тусӈăн, па осёл ԓоӈԓа ԓy̆в ԓумăтты сŏхԓаԓ пŏтсăт; Иисус ай осёл ԓоӈԓа опсăс.
8 Ар хŏят ԓумăтты сŏхԓаԓ юша лаксăт, па па ёх юх нy̆вăт лыптăт пиԓăн юх эԓты эвăтсăт па юша ищи лаксăт.
9 Оԓӈа мăнăм ŏтăт па Ԓy̆в юпеԓăн мăнăм ŏтăт увсăт:
– Осанна!
Турăм я̆м верăт мăс щита,
хŏй Турăм Куща нэм урăӈăн ёхăтăԓ.
10 Турăм я̆м вер пиԓăн, Ԓy̆в нэмăԓ урăӈăн,
Давид ащев хон пŏра ёхăтăԓ!
Осанна Турма!
11 Иисус Иерусалима ёхтăс па емăӈ хота ԓŏӈăс; щита иса вантăс, етная йис па щит урăӈăн Вифания курта кăтхŏщьяӈ вера утăԓтăты ёхԓаԓ пиԓăн мăнăс.
12 Кимет хăтăԓăн, хун ԓy̆в Вифания эԓты этсăт, Иисус сăмăԓ вохты питса.
13 Па еԓта смоковница лыптăӈ юх шияԓăман тŏхи мăнăс ватты, уйтăԓ муй мŏԓты щи юхăн; туп юх пy̆ӈԓа ёхăтман, нэмăԓты ăт уйтăс, туп лыптăт, па хŏԓна пŏра ăт ёхтăс смоква ăкăтты.
14 Иисус юха ястăс:
– Тăм пŏра эԓты нэмăԓты хŏят нăӈ эԓтэн энмăм ŏт нэмăԓты пŏрайн ăт ԓэԓ. Па вера утăԓтăты ёхԓаԓ щи пŏтăр хуԓсăт.
15 Иерусалима ёхăтсăт. Иисус емăӈ хота ԓŏӈман, питăс емăӈ хотăн тынăсты ёх па ԓутăсты ёх ким воштăты; па ŏх пелтты ёх пăсанăт па голубят тыныты ёх омăсты пăсанăт иԓ пайтăс.
16 Па ăт эсԓăс хŏятăта мŏԓты пŏрмăс емăӈ хот мŏхты туты.
17 Па утăԓтăс ԓy̆виԓаԓ ястăман: – Ăт муй емăӈ нэпекăн хăшман уԓԓа: “Ма хотэм пойкăщты хота ая̆ԓты питԓа иса мир ёхăт кеша”? Па нын емăӈ хот хорахщет уԓты лота версăԓăн.
18 Щит Закона утăԓтăты ёх па попăт ŏх хуйт хуԓсăт, па нумăссăт, муй щирăн Иисус сŏрма пайтты. Ԓy̆в Иисус эԓты пăԓсăт, иса ёх Ԓy̆в утăԓтăты верăԓ эԓты ущмарăӈа усăт.
19 Хун етная йис, Иисус вош эԓты мăнăс.
20 Аԓăӈсăхăт кемăн, смоковница юх пy̆ӈăԓăн мăнман, шияԓăсăт, щи юх ԓэрԓаԓ унты сормаԓ.
21 Па, нŏпса пайтман, муй еԓпи ус, Петра Иисуса ястăԓ: – Равви, ванта! Нăӈ атăм ясăӈăн китăм юхен сормаԓ.
22 Иисус ёхԓы ястăман пŏтăртăԓ ԓy̆виԓаԓа:
23 – Турма эвԓаты. Вŏԓԓы вещката нынан ястăԓăм: па хŏй ястăԓ тăм рэпа: “Нŏх ԓоя па щарса рăкна” па сăмăԓăн ăт питăԓ ропхая, туп эвăԓăԓ, ԓy̆в ясăӈԓаԓ щирăн вер питăԓ, – иса питăԓ ԓy̆веԓа, муй туп ăт ястăԓ.
24 Щит урăӈăн нынан ястăԓăм: муй туп ăт питԓăты Турăм эԓты пойкащман вохты, эвԓаты, ёша питăԓ – па питăԓ нынан.
25 Хун пойкащман ԓойԓăты, ликăн хăяԓăн щит пэԓа, хŏй пеԓа мŏԓты ки тăйԓăты, щи пŏрайн па нын Турăм Ащан нын кăрэкԓан еԓ пайтԓăԓԓы.
26 Па ликăн ăт ки хăйԓăԓăн, нын кăрэкԓан еԓ ăт пайтԓăԓԓы ищи нын Турăм Ащан.
27 Па яԓпа Иерусалим воша ёхăтсăт. Па хун Иисус емăӈ хотăн яӈхăс, Ԓy̆в хŏщайԓ попăт ŏх хуйт, Закона утăԓтăты ёх па ун икет вана ёхăтсăт.
28 Па ястăсăт Иисуса: – Муй юрăн Нăӈ щит верԓăн? Па хŏйн Нăӈ юрăн мăсайн тăм верăт верты?
29 Иисус ԓy̆виԓаԓ ёхԓы ястăс: – Ма нынан па и вер эԓты иньщăсԓăм, ёхԓы Мăнэм ястăԓăн; щи пŏрайн па Ма ястăԓăм нынан, муй юрăн тăм верăт верԓăм;
30 Турăмăн муй хŏятăтăн Иоанн хŏятăт йиӈка ԓŏӈăԓтăты китса? Мăнэм ястаты.
31 Тумет кy̆т кy̆тэԓăн нумăссăт: – Ястăԓy̆в ки “Турăмăн”, Ԓy̆в ястăԓ: “Щиты ки муя нын Иоанн ясăӈԓаԓа ăт эвăԓсăты?”
32 Ястăԓy̆в ки “хŏятăтăн”? – ёх эԓты пăԓсăт; хŏԓыя ёх уйтман тăйсэԓ, Иоанн вŏԓԓы яна Турăм Ясăӈ туты хŏят ус.
33 Па Иисуса ԓy̆в ёхԓы ястăсэԓ:
– Ăт уйтԓэв.
Иисус ԓy̆виԓаԓ ёхԓы ястăс:
– Ма па нынан ăт ястăԓăм, муй юрăн тăм верăт верԓăм.
1 Па Иисус утăԓтăты пŏтрăтăн ԓy̆виԓаԓа пŏтăрты питăс: – Ахой хŏят виноград варсăт опсăс, па пушасăн лăп кертсăԓы, па мy̆вăн y̆с верăс виноград сэмăт шy̆кăтты кеша, па шавиты кеша паԓ ващ хот верăс, па щит виноград энмăԓты ёха мийман, еԓ хy̆ва мăнăс.
2 Па мосты пŏрайн виноград энмăԓты ёхăт хŏща хŏят митхуйԓ китăс – виноград энмăԓты ёх эԓты мŏԓты кем виноград уты.
3 Вино-град энмăԓты ёхăтăн митху мŏщатса, сэкса па таԓ ёшԓы ёхԓы китса.
4 Яԓпа ԓy̆виԓаԓ хŏща па митху китăс: щитэн ŏхăԓ эԓты кевăн сэкса па атмащ няхман эсăԓса.
5 Па и митху китăс – щит пăратса. Ар па митху китыԓыйс: хŏйтăт сэксайт, хŏйтăт пăратсайт.
6 Па хŏԓна ԓy̆в ит, сăма тăйты пŏх тăйс, мет юхԓы щи пŏхăԓ виноград энмăԓты ёх хŏща китăс ястăман: “Еԓэма питԓăт пŏхем эԓты.”
7 Виноград энмăԓты ёх кy̆т кy̆тэԓăн ястăсăт: “Тăм пŏха иса тащ хăщăԓ; мăнԓy̆в, ԓy̆веԓ веԓԓэв, па ԓy̆в тащăԓ мy̆ӈева питăԓ.”
8 Пŏх мŏщатсэԓ, пăратсэԓ па еԓ вŏщкăсэԓ виноград энăмты тăха эԓты.
9 Муй верăԓ виноград энăмты тăха тăйты куща? Ёхăтăԓ па сŏрма пайтԓăԓы виноград энмăԓты ёх, па виноград энăмты тăхайԓ па ёха мăԓԓы.
10 Нын щит эԓты муй Емăӈ хăншăм ŏтăн ăт ԓy̆ӈăтсăты:
“Хот верты ёхăн еԓ пайтăм кев,
хот щуӈ мет вŏԓаӈ кева йис:
11 Щи вер Турăм Кущăйн верса
– ущмар, мăты мy̆ӈ ватԓy̆в”?
12 Па хŏя пŏтăр ястăман уса, щитԓăн утщисăт Иисус мŏщатты, ŏша пайтсэԓ, ԓy̆виԓаԓ эԓты пŏтăр ястăс; туп ёх эԓты пăԓсăт; па Ԓy̆веԓ хăйман, еԓшăк мăтсăт.
13 Па ԓy̆в Иисус хŏща фарисейт па Ирод хон пеԓа уԓты ёх эԓты хŏйтăт китсăт Ԓy̆веԓ ясăӈăн мŏщатты кеша.
14 Ёхăтман, Иисуса ястăԓăт: – Утăԓтăты Ху! Мy̆ӈ уйтԓэв, нăӈ вещкат па нэмăԓты хŏят эԓты ăт пăԓԓăн. Нэмăԓты ёх веш пеԓа ăт ватԓăн, туп тy̆ӈа-щира вещката Турăм партты щирăн утăԓтăԓăн; эсăԓԓа ки налок Рим хона мăты муй ăнтŏм? Мосăԓ мy̆ӈев мăты, муй ăт мŏсăԓ?
15 Туп Иисус ԓy̆в кăт вешпи щирэԓ уйтман, ԓy̆виԓаԓ ястăс: – Муя Мăнэм хy̆щԓăԓăн? Мăнэм ватты кеша динарий туваты.
16 Щел ŏх туса. Па Иисус ԓy̆виԓаԓа ястăԓ: – Хŏй щел ŏхăн верман уԓԓа па хŏй нэм тăта хăшман уԓԓа? Ԓy̆в ястăсăт Иисуса: – Рим хон хŏрас па ԓy̆в нэмăԓ.
17 Иисус ԓy̆виԓаԓ ёхԓы ястăс:
– Рим хон верăт Рим хона ёхԓы мияԓăн, Турăм верăт Турма ёхԓы мияԓăн.
Щи ёхăта Иисус ясӈăт шек ущмара усăт – ԓy̆в ăт уйтсăт, муй верты.
18 Щи юпийн Иисус хŏща саддукейт ёхăтсăт. Щитԓăн ястăԓăт, мăтты ки нэмăԓты хŏят сŏрăм эԓты нŏх ăт питăԓ, па Иисус иньщăссăт, ястăман:
19 – Утăԓтăты Ху! Моисей иса мy̆ӈева хăншăс: “Па мăтты хŏят яйԓ сŏрма ки питăԓ па нэӈăԓ хăйԓ няврэм ăт тăйман, щи хŏят нэӈа ат туԓԓы яйԓ ими па яйԓ опращ нэм еԓԓы туԓ.”
20 Ԓапăт яй ус. Оԓăӈ яй нэ тус, па яй сŏрма питман няврэмăт ăт хăйс.
21 Кимет яйн щи нэ туса, яй сŏрма питăс, ԓy̆в па няврэмăт ăт хăйс; ищиты питăс хуԓмет яй пиԓăн.
22 Ԓапăт яйн щи нэ нэӈа уйԓыса па няврэмăт ăт хăйсăт. Мет юхăт нэ сŏрма питăс.
23 Па сŏрăм эԓты нŏх питты хăтăԓăн, хун ԓy̆в сŏрăм эԓты нŏх питԓăт, мăты яя тăм нэ нэӈа питăԓ? Ԓапăт яя нэ нэӈа ус.
24 Иисус ԓy̆виԓаԓ ёхԓы ястăс: – Хŏты нын ăнтŏм щиты нумăсԓаты! Муя? Нын ăт уйтԓăты, муй хăшман уԓԓа Емăӈ хăншăм ŏтăн па Турăм юр ăт уйтԓăты.
25 Па хун сŏрăм эԓты хŏятăт нŏх питԓăт, щи пŏрайн ики-ими туты вер ăнтŏм питăԓ, туп турăмăн уԓты ангелăт иты уԓты питԓăт.
26 Хун мy̆ӈ ин пŏтăрԓy̆в сŏрма питăм ŏтăт эԓты, ԓy̆в хŏԓыя сŏрăм эԓты нŏх питԓăт, нын Моисей нэпекăн щит эԓты муй ăт ԓy̆ӈăтсăты, хŏты Турăм и пеԓтăсты варăс кy̆т эԓты ԓy̆веԓ ястăс: “Ма Авраам Турăм, па Исаак Турăм, па Иаков Турăм”?
27 Турăм ăнтŏм сŏрма питăм ŏтăта Турăм, туп ԓыԓăӈ ŏтăта Турăм. Щиты ки нын вŏԓԓы ăнтŏм щиты нумăсԓаты.
28 И Закона утăԓтăты хŏят ԓy̆в ура верман пŏтăрԓаԓ хуԓăтман па ватман, хŏты Иисус яма саддукеята ёхԓы ястăԓ, вана ёхтăс па Ԓy̆веԓ иньщăссăԓы: – Мăты партăм ясăӈ Турăм партăм ясӈăт эԓты мет вŏԓаӈ?
29 Иисус ԓy̆веԓ ёхԓы ястăс: – Мет вŏԓаӈ партăм ясӈăт эԓты ясăӈ: “Хуԓăнта, Израиль! Мy̆ӈ Турăм Кущаев уԓ туп и Куща.
30 Па вŏԓаӈа сăма тăи нăӈ Турăм Кущаен, па сăма тăи иса нăӈ ԓыпенăн, па иса нăӈ нŏпсэнăн, па иса нăӈ юрэнăн”: щит мет вŏԓаӈ Турăм партăм ясăӈ!
31 Кимет щи хŏрпи партăм ясăӈ: “Сăма тăи нăӈ вана тăйты хŏятэн, щиты сăма тăи, хŏты я̆ма нăӈ нăӈен тăйԓэн”: пā уншăк тăм Турăм партăм кăт ясăӈӈăн эԓты ăнтŏм партăм ясăӈ.
32 Закона утăԓтăты хŏят Иисуса ястăс: – Ям, Утăԓтăты Ху! Вещкат ясăӈ Нăӈ ястăсăн, Турăм уԓ туп и Турăм па Ԓy̆в такԓэԓа ăнтŏм па ŏт.
33 Па хŏят вŏԓаӈа сăмăн Ԓy̆веԓ тăйԓăԓы ки, па сăма тăйԓăԓԓы иса ԓy̆в ԓыпеԓăн па иса ŏшăԓăн, па иса ԓy̆в юрăԓăн, па сăма тăйԓăԓы вана тăйты хŏят, хŏты яма ԓy̆в ԓy̆веԓ тăйԓ – щи верăт уԓԓăт мет вŏԓаӈа иса тy̆тăн ԓэвăм Турма пŏрԓыты ŏтăт эԓты па па Турма пŏрԓыты ŏтăт эԓты
34 Иисус вантăԓ, хŏты Закона утăԓтăты ху ŏшăӈа ёхԓы ястăԓ, па ԓy̆веԓа ястăс:
– Нăӈ иса Турăм Хон юра ванăн.
Щи Иисус ясӈăт юпийн хŏятăт пăԓсăт мŏԓты Ԓy̆в эԓтэԓ иньщăсты.
35 Еԓԓы емăӈ хотăн хŏятăт утăԓтăман, Иисус пŏтăртăс: – Хŏты Закона утăԓтăты ёх верытԓăт ястăты, мăтты Христос Давид пŏхăт пŏх?
36 Па Давид Емăӈ Ԓыԓăн хy̆щман ястăс:
“Турăм Куща ма Кущаема ястăс:
я̆м пелăк ёшем пy̆ӈăԓăн опса
щи унты, хун Ма Нăӈ вуракԓан
Нăӈ кy̆рӈăԓан иԓпия пŏнԓăԓăм”.
37 – Давид Ԓy̆веԓ Кущая ая̆ԓԓăԓы: муй щирăн Ԓy̆в Давид пŏхăт пŏха уԓ? Па шек ар хŏят Ԓy̆веԓ ям нŏмăсăн хуԓăнтăс.
38 Па Иисус Ԓy̆в утăԓтăты верăԓăн пŏтăртăс: – Сăма рăхман хy̆в сŏхăн яхты Закона утăԓтăты ёх эԓты хурыяты, па хурыяты Закона утăԓтăты ёх эԓты, мăтэт сăмăӈа тăйԓэԓ, хун вош хăрăн ёх ԓy̆в кешаеԓ ŏх пŏнмăн уща верԓăт;
39 ԓy̆в ԓăӈхаԓайт синагога хотăн оԓӈа омăсты па ун пăсан кy̆тăн куща пy̆ӈăԓăн омăсты;
40 икиԓаԓ сŏрма питăм нэӈăт хăщăм хот ԓоԓăмԓăт па нэман вантăсман хy̆в пойкащԓăт, сут хăтăԓăн верэԓ ԓавăрташăк питăԓ.
41 Иисус ŏх пŏнты ай усăӈ ун ԓаращ еԓпийн еԓăншăк опсăс па вантăс, хŏты ёх ŏх ԓаращ ԓыпия пŏнăс. Ар тащăӈ ёх ар ŏх пŏтсăт.
42 Икеԓ сŏрма питăм и куняр нэ ёхтăс па кăт мет ай пăтăрух ŏх пŏнăс, щит ус и кодрант.
43 Вера утăԓтăты ёхԓаԓ вана вохман, Иисус ԓy̆виԓаԓ ястăс: – Вещката нынан ястăԓăм, тăм куняр нэ мет ар пŏнăс ԓараща иса пŏнăм ёх эԓты.
44 Хŏԓыя пŏтсăт ар тăймеԓ урăӈăн, куняр нэ пŏтсăԓы иса, муй тăйс, иса ԓэты кем ŏтăԓ пŏнăс.
1 Па хун Иисус емăӈ хот эԓты этăс, и вера утăԓтăты хŏятăԓ Ԓy̆веԓ ястăԓ: – Утăԓтăты Ху! Ванта, муй хŏрпи кевăт па муй хŏрпи хотăт!
2 Иисус ԓy̆веԓ ёхԓы ястăс:
– Ватԓăн тăм ун хотăт? Иса тăм шy̆катԓа, кев кевăн ăт хăщăԓ.
3 Па хун Иисус Елеон рэпăн опсăс, вошăн уԓты емăӈ хот шомайн ус, Ԓy̆в Петрайн, Иаковăн, Иоаннан па Андрейн утща иньщăсса:
4 – Мy̆ӈев яста, хун щит питăԓ, па муй эԓты щит ныты питԓа, хун иса щи верăт вана питԓăт?
5 Ёхԓы ԓy̆виԓаԓ ястăман, Иисус питăс пŏтăрты: – Ватман уԓаты, нэмăԓты ŏтăн нын атăт ŏлмая пŏтсайты.
6 Ар ŏт Ма нэмемăн ёхăтԓăт, па питԓăт пŏтăрты, мăтты ки щит Ма, па ар ёх ŏлмая пайтԓăт.
7 Хун ван ляля̆т эԓты па хy̆в ляля̆т эԓты хуԓԓăты, аԓ пăԓтамăман уԓаты; щиты питты мосăԓ; туп щит хŏԓна ăнтŏм иса пăрăм вер.
8 Мир ёх мир ёх ещăԓт ляля ԓойԓ, и хон мy̆в кимет хон мy̆в ещăԓт ляля ԓойԓ; па мy̆в ар тăхайн тăрăтыты питыԓыйԓ, па ԓэԓԓы уԓты верăт питԓăт па ăнтŏм рома уԓты верăт питԓăт. Щи верăт оԓăӈ мушăт.
9 Туп нын щи вера ԓэщатыяты: нын сута мăты питԓайты, синагогайн сэкты питԓайты, нын ун кущайт па хонăт ещăԓт ԓощăԓтăты питԓайты Ма урӈемăн, ԓy̆виԓаԓ ещăԓт вещката ястăты кеша.
10 Иса мир ёхăт кy̆тăн оԓӈа Ям айкеԓ туты мосăԓ.
11 Хун нын сута туты питԓайты, аԓ нумăсаты, муй питԓăты пŏтăрты; щи ясӈăт, мăтэт нынан щи щёсăн Турăм мăԓ, щи ясӈăтăн пŏтăртăты; ăнтŏм нын пŏтăрты питԓăты, Емăӈ Ԓыԓ пŏтăрты питăԓ.
12 Яй яйԓ сŏрма пайтты китăԓ, ащи няврэмԓаԓ сŏрма пайтты китăԓ, па няврэмăт лик тăйман ащиԓаԓ-ăӈкиԓаԓ сŏрма пайтԓăԓăԓ.
13 Иса ёхăн ликăӈа тăйты питԓайты Ма нэмем урăӈăн; туп хŏй такан ԓойԓ пăрты унты, Турăмăн нŏх пайтԓа.
14 – Хун Турăм Ясăӈ туты Даниил ястăм атăм укщăм пăԓты па таԓа верты ŏт шияԓăԓты, хŏты ԓойԓ, хŏта ăт мŏсăԓ – ԓy̆ӈăтты хŏята щит эԓты ŏша пŏнты мосăԓ – щи пŏрайн Иудеяйн уԓты ёха мосăԓ рэпăта хŏнтаты.
15 Па хŏй хот ԓоӈăԓăн, щит атăт хота ԓŏӈăԓ па атăт хотăԓ ԓыпи эԓты мŏԓты y̆ԓ.
16 Хŏй мy̆в хăрăн, атăт ёхԓы мăнăԓ па атăт ԓу- мăтты сŏхăԓ y̆ԓ.
17 Няврэм ԓавăԓты нэӈăта па эсăмăн няврэмăт ԓапăтты нэӈăта атăм вер щи хăтԓăтăн питăԓ.
18 Пойкащаты, хŏнтаты верăн ԓуԓăн тăԓăн ăтăт питăс.
19 Па щи хăтԓăтăн щимăщ шукaщты вер питăԓ, мăтты ăт уԓԓыйс Турăм верăм мир оԓăӈ эԓты тăм унты, па щимăщ шукащты вер па ăт питăԓ.
20 Па Турăм Куща щи хăтԓăт шимԓа ăт ки верăс, ԓуԓăн нэмăԓты хŏят ԓыԓӈа ăт хăщăс; туп Турăмăн пирыйм ёх паты урăӈăн щи хăтԓăт шимԓа версăԓы.
21 – Щи пŏрайн, мăтты хŏят нынан ястăԓ ки “тăта Христос”, муй ястăԓ “ванта, тута” – аԓ эвԓаты.
22 ŏлмащ христосăт па ŏлмащ турăм ясăӈ туты ёх ŏхԓаԓ нŏх аԓăмԓăԓăԓ. Ԓy̆в пoсăт па мутрайт туԓăт ŏлмая пайтты кеша, рăхăԓ ки, Турăмăн пирыйм ёх па.
23 Нын хурыман уԓаты: нынана уйтты кеша, муй питăԓ, Ма нынан оԓӈа иса ястăсăм.
24 – Па щи хăтԓăтăн, щи шукащты пŏра юпийн, най патлама йиԓ, па тыԓăщ ԓy̆в тy̆тăԓ ăт мăԓ.
25 Турăм эԓты хусăт иԓ питԓăт, па турăм юрăт так щирэԓ хăйԓэԓ.
26 Щи пŏрайн Хŏят Пŏх иса ёхăн шияԓăԓа паԓӈăтăн ёхăтман ар юрăԓ па вŏԓаӈ юрăԓ пиԓăн.
27 Щи пŏрайн Ԓy̆в Ԓy̆в ангелԓаԓ китԓăԓы па Ԓy̆в пирыйм ёхԓаԓ ня̆ԓ вот эԓты ăкăтԓăԓԓы, мy̆в етшăты тăха эԓты па турăм етшăты тăха унты.
28 – Муй смоковница юх пиԓăн питăԓ, щит эԓты утăԓтыяты: хун ԓy̆в нy̆вԓаԓ ԓыԓӈа йиԓăт па лыпăт мăԓăт, нын уйтԓăԓăн – ԓy̆ӈ ванăн.
29 Ищиты нын, хун щи питты верăт шияԓăԓты, уйтаԓăн – щи вер ванăн, ов еԓпийн.
30 Вещката нынан ястăԓăм: тăм уԓты ёх уԓăпсайԓ ăт етшăԓ, хун иса тăм питăԓ.
31 Мy̆в па турăм ăнтŏма йиԓӈăн, туп Ма ясăӈԓам уԓты хăщԓăт.
32 Щи хăтăԓ эԓты, муй щи щёс эԓты нэмăԓты хŏят ăт уятăԓ, турăмăн ангелăт ăт уйтԓăт, Пŏх ăт уятăԓ, туп Ащи щи вер эԓты уятăԓ.
33 – Ватман уԓаты, пойкащаты; ăт уйтԓăԓăн, хун питăԓ щи пŏра.
34 Щит иса щит хŏрпи, хун юша мăнты хŏят митхуйԓаԓа хотăԓ хăйс юр пиԓăн, па кашăӈ митхуя вер хăйс, па хот ов шавиты хуя ватман уԓты партăс.
35 Ватман уԓаты; ăт уйтԓăԓăн, хун хот куща ёхăтăԓ, етăн, муй ат кy̆тăпăн, муй щищкурэкăт увты пŏрайн, муй аԓăӈсăхăт кемăн.
36 Хот куща шаӈкап ёхăтăԓ, ватман уԓаты нынан ŏԓман атăт уйтԓăԓы.
37 Па муй нынан ястăԓăм, ястăԓăм исаята: ватман уԓаты.
1 Кăт хăтăԓ юпийн Пасха емăӈ хăтăԓ па дрожжи ăт тăйты нянь ԓэты емăӈ ԓапăт хăтăԓ уԓты верăԓ ус па попăт ŏх хуйт па Закона утăԓтăты ёх нумăссăт, хŏты ŏлмащиман Иисус мŏщатты па сŏрма пайтты.
2 Пŏтăрсăт:
– Туп ăнтŏм емăӈ хăтԓăтăн, атăт питăс мир ёх кy̆тăн ăнтŏм рома уԓты ура вер.
3 Па хун Иисус Вифания куртăн атăм эԓ мушăӈ Симон хотăн ус па ԓэвман опсăс, сыстам тынăӈ нард вŏйн тэкнăптăман алебастра кев эԓты верăм ващ турпи пy̆т пиԓăн нэ ёхтăс, па ващ пy̆т шy̆катман, Иисус ŏх пăта вŏй шошмăс.
4 Хŏйтэт ликащсăт па кy̆т кy̆тэԓăн пŏтăрсăт: – Муя вŏй таԓ кеша шошăмты?
5 Рăхăс ԓуԓăн щит тыныты хуԓăм сот динарий эԓты тынăӈшăка, па куняр ёха щи ŏх мăты. Па нэ пеԓа лявăтсăт.
6 Туп Иисус ястăс: – Рома хăяԓăн ԓy̆веԓ; муя ԓy̆веԓ ясăӈăн шукатԓăԓăн? Ԓy̆в я̆м вер Ма кешаема верăс.
7 Куняр ёх иса пăтăн тăйԓăты, па хун ԓăӈхаԓайты, верытԓăты ԓy̆виԓаԓа нётты, Мăнэм ăнтŏм иса пăтăн тăйԓăԓăн.
8 Щи нэ верăс, муй верытăс: сŏрăм лота пŏнты ԓэщăтты кеша Ма эԓэм нёсытсăԓы.
9 Вещката нынан ястăԓăм: хŏта туп Ям айкеԓ иса мирăн туты питԓа, щăха щи нэ нумты кеша, муй ԓy̆в верăс, ястăты питԓа.
10 Иуда Искариот, кăтхŏщьяӈ вера утăԓтăты ёх эԓты ит, хŏй попăт ŏх хуйт хŏща мăнăс Иисус ԓy̆в ёшеԓа пайтты кеша.
11 Щит хуԓман, щи кущайт амăтсăт па ясăӈ мăсăт щел ŏх ԓy̆веԓа сŏхăптăты. Па Иуда кăншăс кум, хун и я̆м кемăн Иисус вуракăта ёша пайтты.
12 Оԓăӈ дрожжи ăт тăйты нянь ԓэты хăтăԓăн, хун пасха кеша и тăԓ ԓŏват ош кешийн веԓса, Иисус вера утăԓтăты ёхԓаԓ ястăԓăт Ԓy̆веԓ: – Хŏта ԓăӈхаԓайн пасха емăӈ хăтăԓ ԓэтŏт ԓэты? Мy̆ӈ мăнԓy̆в па ԓэщăтԓy̆в.
13 Па кăт вера утăԓтăты ёхӈăԓаԓ китăԓ па ястăԓ ԓынана: – Воша мăнатăн; нын ещăԓтан пy̆тăн йиӈк туты хŏят этăԓ; ԓy̆в мăнты юшăԓ юпийн мăнатăн.
14 Па хŏԓта ԓy̆в ԓŏӈăԓ, щи хот кущая ястатăн: “Утăԓтăты Ху ястăԓ: хŏта хот ят, мăты тăхайн вера утăԓтăты ёхԓам пиԓăн Мăнэм пасха емăӈ хăтăԓ ԓэтŏт ԓэты?”
15 Па ԓy̆в нынан яма ԓэщăтăм нуман уԓты ун хот ят этăԓтăԓ, щита мy̆ӈева ԓэщататăн.
16 Па Ԓy̆в вера утăԓтăты ёхӈăԓаԓ мăтсаӈăн, воша ёхăтсаӈăн, па, хŏты ԓынан ястăса, уйтсаӈăн, па пасха емăӈ хăтăԓ ԓэты вер ԓэщăтсаӈăн.
17 Хун етная йис, Иисус кăтхŏщьяӈ вера утăԓтăты ёхԓаԓ пиԓăн ёхăтăԓ.
18 Па хун ԓy̆в ԓэвман омăссăт, Иисус ястăс: – Вещката нынан ястăԓăм, ит нын эԓтан, хŏй Ма пиԓэмăн ԓэԓ, Мăнэм вуракăта ёша пайтԓăԓԓы.
19 Ԓy̆в сăмԓаԓ шаксăт па питсăт июпийн Иисуса ястăты: – Ăнтŏм муй ма? Ăнтŏм муй ма?
20 Иисус ԓy̆виԓаԓ ёхԓы ястăс: – Ит кăтхŏщьяӈ ёх эԓты, хŏй Ма пиԓэмăн и ан эԓты ԓэԓ.
21 Па Хŏят Пŏх мăнăԓ Ԓy̆в юшăԓ хy̆ват, хŏты Ԓy̆в эԓтэԓ Емăӈ хăншăм ŏтăн хăшман уԓԓа; туп атăм вера питăԓ щи хŏят, хŏй Хŏят Пŏх вуракăта ёша пайтăԓ: ямшăк ус ԓуԓăн щи хŏята сэма ăт питты.
22 Па хун ԓy̆в ԓэсăт, Иисус нянь уйман Турăм Ащия пумащипа ястăс, нянь мŏрытăс, ԓy̆виԓаԓа мăс па ястăс: – Уяты, ԓэваты: тăми уԓ Ма Эԓэм.
23 Па уна ан уйман, пумащипа Турăм Ащия ястăман, ԓy̆виԓаԓа мăс; па щи ан эԓты хŏԓыя ищсăт.
24 Па ястăс ԓy̆виԓаԓа: – Тăми уԓ Ма Урэм, мăты ар ёх урăӈăн ким шошмаԓԓа. Тăм Урăн Турăм Яԓăп Так Ясăӈ и вера питты мăԓ.
25 Вещката нынан ястăԓăм: Ма щи юпийн ăт питԓăм виноград рых эԓты йиӈк ищты щи хăтăԓ унты, хун щита, хŏта Турăм Хона уԓ, яԓăп уна ищты питԓăм.
26 Па Турăм ишăкман арыман Елеон рэпа мăтсăт.
27 Па ястăԓ ԓy̆виԓаԓ Иисус: – Нын хŏԓыя тăм атăн Ма эԓтэм еԓ питԓăты; па хăшман уԓԓа: “Веԓԓэм ош шавиты хŏят, па ошăт лакки мăнԓăт”.
28 Па Ма сŏрăм эԓты нŏх питтэм юпийн Ма нынан Галилея мy̆вăн ԓавăԓԓăԓăм.
29 Петра Иисуса ястăс: – Па хŏԓыя Нăӈ эԓтэн еԓ ки питԓăт, туп ăнтŏм ма.
30 Па Иисус ԓy̆веԓ ястăԓ: – Вещката нăӈен ястăԓăм, нăӈ ин, тăм атăн, щищкурэк кăт пy̆ш увтаԓ еԓпийн, хуԓăм пy̆ш Ма эԓтэм еԓ ясăӈăн пайтăсԓăн.
31 Туп Петра мет ураяӈа ястăԓ:
– Па ма сŏрма ки Нăӈ пиԓэнăн питԓăм, ищипа Нăӈ эԓтэн ясăӈăн еԓ ăт уратԓăм.
Щиты иса вера утăԓтăты ёхԓаԓ пŏтăрсăт.
32 Гефсимания нэмпи тăхая ёхăтсăт; па Иисус вера утăԓтăты ёхԓаԓа ястăс: – Ма пойкащтэм кемăн тăта опсаты.
33 Па пăтăн Петра, Иаков па Иоанн y̆с, па шек сăмăԓ мăнăс па ԓавăрта питăс.
34 Па ястăс ԓy̆виԓаԓа: – Ма сăмемăн сŏрма питты кемăн ԓавăрт; еша тăта питаты па ватман уԓаты.
35 Па, еԓшăк мăнман, мy̆ва рăкнăс па пойкащăс: – Рăхăԓ ки, Ма щи вер кемăн ԓуԓăн атăт хойсайм.
36 Па ястăс: – Авва Ма Ащем! Муй иса Нăӈен рăхăԓ; вера питты вер Ма эԓтэм еԓта туви; туп аԓ эсԓы муй Ма ԓăӈхаԓайм, туп Нăӈ щирэнăн веры.
37 Пойкăщты вер эԓты ёхăтман ёхԓаԓ ŏԓман уйтăԓ па Петрая ястăԓ: – Симон! Нăӈ ŏԓԓăн? Ăт верытсăн нăӈ и щёс ăт ŏԓты?
38 Ватман уԓаты па пойкащаты, сатана атăт верытăс нынан кăрэка хy̆щты: ԓыпи так, эԓ щёмԓы.
39 Иисус па еԓ мăнăс, яԓпа щи ясӈăт ястăман пойкащăс.
40 Па хун ёхԓы ёхтăс, яԓпа ԓy̆виԓаԓ ŏԓман уйтсăԓы: ԓy̆в сэмԓаԓ оԓăм эԓты ԓавăрта ювмеԓ; па ԓy̆в ăт уйтсăт, муй Иисуса ястăты.
41 Па Иисус хуԓмет пy̆ш ёхăтăԓ па ԓy̆виԓаԓ ястăԓ: – Нын хŏԓна ŏԓԓăты па щутщăԓты? Щи, мета, ёхтăс щёс, ванта, ин Хŏят Пŏх кăрэкăӈ ёха ёша пайтԓа.
42 Ԓояты, мăнԓy̆в: хŏят вана ёхтăс Мăнэм вуракăт ёша пайттыя.
43 Па мŏхты, Иисус хŏԓна пŏтăртăс, Иуда ёхăтăԓ, ит кăтхŏщьяӈ ёх эԓты, па ԓy̆в пиԓăԓăн ар хŏят ăԓты кешет пиԓăн па ющăӈ хy̆в юхăт пиԓăн, щитăт попăт ŏх хуйтăн, Закона утăԓтăты ёхăтăн па ун икетăн китсайт.
44 Иисус вуракăта ёша пайтты ŏтэн щи еԓпийн пос мăс ястăман: – Хŏй ма мосăԓтăԓэм, Щит Ԓy̆в; Ԓy̆веԓ мŏщатаԓăн, па такан ватман еԓ туваԓăн.
45 Ёхтăм ŏт мŏхты Иисус пy̆ӈԓа ванамăԓ па ястăԓ: – Равви! Равви! – па Ԓy̆веԓ мосăԓтăсԓы.
46 Тумиԓан Иисус ёшăн катăԓсэԓ.
47 Щи пŏрайн и ванăн тăта ԓойм ŏт аԓты кеши нŏх сухтăман попăт ŏх ху митху рэскăс па пăԓăԓ еԓ сэвăрмăс.
48 Щи пŏрайн Иисус ԓy̆виԓаԓ ястăс: – Ищи мăтты хорахщи ещăԓт нын этсăты аԓты кешет па ющăӈ хy̆в юхăт пиԓăн Мăнэм мŏщатты кеша.
49 Кашăӈ хăтăԓ Ма нын хŏщайн емăӈ хотăн усăм па утăԓтăсăм, па нын Мăнэм ăт мŏщатысԓăн; туп питăԓ Емăӈ хăншăм ŏт щирăн.
50 Щи ясӈăт хуԓман, Ԓy̆веԓ хăйман, хŏԓыя хŏнтăсăт.
51 И ям ԓŏват пŏх сŏх ăт ԓумтăм няр эԓа щăшкана ёвăртыман Ԓy̆в юпеԓăн мăнăс, па ляль ёхăн ԓy̆в мŏщатса.
52 Па пŏх щăшкан ляль ёх ёшăн вŏщкăман нярԓŏмăԓты тумиԓăн эԓты хŏнтăс.
53 Па Иисус попăт ŏх ху хŏща туса; па щита иса попăт ŏх хуйт, ун икет па Законаутăԓтăты ёхăт ăктăщсăт.
54 Петра еԓта Иисус юпийн мăнăс, ԓy̆в попăт ŏх ху ун хотăт кy̆тăп пушас унты ёхтăс; па митхуйт пиԓăн опсăс па тy̆т пy̆ӈăԓăн хошмăԓтăс.
55 Попăт ŏх хуйт па иса мир хот Иисус сŏрма пайтты кеша Иисус верăм кăрэк кăшсăт, па ăт уйтсăт.
56 Па ар ёх Иисус эԓты ищи мăтты вещкат, туп ŏлмащ ясăӈ тусăт, па щи ясӈăт кy̆т кy̆тԓаԓăн вŏԓаӈа ăт рăхсăт.
57 Па хŏйтăт нŏх ԓойман, ищи мăтты вещкат, туп ŏлмащ ясăӈ Иисус эԓты тусăт па пŏтăрсăт:
58 – Мy̆ӈ хуԓсy̆в, хŏты Иисус пŏтăртăс: “Ма ёшăн верăм тăм емăӈ хот шy̆катԓэм, па хуԓăм хăтăԓ сыс ăнтŏм ёшăн верăм па емăӈ хот верԓăм”.
59 Па щимăщ хуԓăнтăм ясӈăт кy̆т кy̆тԓаԓăн вŏԓаӈа ищи ăт рăхсăт.
60 Щи пŏрайн попăт ŏх ху ԓойс, мир хот кy̆тԓăпа этăс па Иисус иньщăсăс: – Муй па Нăӈ ёхԓы нэмăԓты ăт ястăԓăн? Тăми муй, тăмиԓан Нăӈ кăрэкԓан эԓты пŏтăрԓăт?
61 Туп Иисус шитама ус па ёхԓы нэмăԓты ăт ястăс. Яԓпа попăт ŏх хуйн Ԓy̆в иньщăсса па ястăс Ԓy̆веԓа: – Нăӈ муй Христос, Ишăктăм Ŏт Пŏх?
62 Иисус ястăс: – Ма щи, па нын Хŏят Пŏх шияԓăԓԓăн щăха, Юрăӈ Ŏт ям пелăк ёшăн омăсман па турăм паԓӈăтăн ёхăтман.
63 Щи пŏрайн попăт ŏх ху, ԓy̆в эԓ сŏхԓаԓ мăншиман, ястăс: – Муя мy̆ӈев хŏԓна вер вантăм хŏятăт?
64 Нын Турăм эԓты ястăм атăм ясăӈ хуԓсăты; хŏты нынан щит вантăсăԓ? Ԓy̆в хŏԓыя Иисус вунавта версэԓ, ястăсăт, Ԓy̆веԓ сŏрма пайтты мосăԓ.
65 Па хŏйтăт Иисус пеԓа полщатты питсăт, па Ԓy̆в веншăԓ лăп сайман сэксăт Ԓy̆веԓ па питсăт Ԓy̆веԓ ястăты:
– Турăм Ясăӈ туты хŏят, яста, хŏйн нăӈ рэскасайн?
Па Иисус веш пy̆ӈăԓԓăԓ эԓты митхуятăн сэкса.
66 Хун Петра пушасăн иԓăн ус, попăт ŏх ху и митнэ ёхтăс
67 па хошмăԓтыйм Петра шияԓăман, ԓy̆в пеԓайԓ яма ватман, ястăс: – Па нăӈ ищи Иисус пиԓăн усăн, щи хŏят Назарет вош эԓты.
68 Туп Петра ясăӈăн еԓ пайтăсăс ястăман: – Ăт уйтԓăм па ŏша ăт пŏнԓăм, муй эԓты нăӈ ястăԓăн. Па ким этăс оԓăӈ пушаса; па щищкурэк уваԓтăс.
69 Митнэ, яԓпа Петра шияԓăман, тăта ԓойм хŏятăта пŏтăрты питăс: – Тăмен щитԓăн эԓты ит.
70 Петра па ясăӈăн еԓ пайтăсăс. Айкем пŏра мăнман, тăта ԓойм ёх па питсăт Петрая ястăты: – Вŏԓԓы яна нăӈ щитԓăн эԓты; па нăӈ Галилея мy̆в эԓты уԓты ху, па пŏтăрты щирэн щимăщ.
71 Петра ясăӈ мăты па Турăм нэма так ясăӈ мăты питăс: – Щи хŏят ăт уйтԓэм, мăты Ŏт эԓты нын пŏтăрԓаты.
72 Щи пŏрайн щищкурэк кимет пy̆ш увăс. Па Петра Иисус ястăм ясӈăт нумăсмăсԓы: “Щищкурэк кăт пy̆ш увтаԓ еԓпийн, хуԓăм пy̆ш Ма эԓтэм ясăӈăн еԓ пайтăсԓăн.” Петра хоԓԓăты питăс.
1 Алăӈсăхăт мŏхты попăт ŏх хуйт, ун икет па Закона утăԓтăты ёхăт пиԓăн па иса мир хот пиԓăн пŏтăр версăт па Иисус ярман еԓ тусăт па Пилат ёша мăсăт.
2 Пилат Ԓy̆веԓ иньщăссăԓы: – Нăӈ Иудейт Хон? Иисус ԓy̆веԓ ёхԓы ястăс: – Нăӈ ястăԓăн.
3 Па попăт ŏх хуйт Ԓy̆веԓ ар вер вунавта пŏтсэԓ.
4 Пилатăн па яԓпа Ԓy̆в иньщăсса: – Нăӈ нэмăԓты ёхԓы ăт ястăԓăн? Ватԓэн, муй арат вунавт Нăӈена пŏнмăн уԓԓа.
5 Туп Иисус тăм ясӈăта па нэмăԓты ёхԓы ăт ястăс, щит эԓты Пилат ущмара ус.
6 Кашăӈ Пасха емăӈхăтăԓăн касна хотăн омăсты хŏятăт эԓты и хŏят, хŏй ёхăтăн парса эсăԓты, Пилатăн ким эсăԓса.
7 Щи пŏрайн касна хотăн Варавва атăм пиԓԓаԓ пиԓăн опсăс, ԓy̆в щи еԓпийн щи мy̆в хон кущайт ещăԓт ляляссăт, па хŏят пăратсăт.
8 Па ёх увты питсăт па вохсăт Пилат эԓты щит, муй ԓy̆в ԓy̆виԓаԓ урăӈăн кашăӈ тăԓ щи пŏрайн верăс.
9 Пилат ёха ёхԓы ястăс: – Ԓăӈхаԓайты, ма нын кешайн Иудейт Хон эсăԓԓам?
10 Пилат уйтсăԓы, попăт ŏх хуйт Иисус атăм сэмăн Ԓy̆в пеԓайԓ ватмеԓ урăӈăн ԓy̆в ёшаԓа мăсэԓ.
11 Туп попăт ŏх хуйт ёха парсăт: – Нын ԓy̆в эԓтэԓ вохаты, ямшăк Варавва касна хот эԓты ат эсăԓԓăԓы.
12 Пилат па щи ястăс ԓy̆виԓаԓа: – Муй нын ԓăӈхаԓайты, муй мăнэм верты Щит пиԓăн, Хŏй нын Иудейт Хона ая̆ԓԓăԓăн?
13 Хŏятăт па щи уваԓсăт: – Ԓy̆веԓ перна юха карԓукăтăн сэӈки!
14 Пилат ԓy̆виԓаԓ ястăс: – Муй лик Ԓy̆в верăс? Туп ёх мет таканшăк увсăт: – Ԓy̆веԓ перна юха карԓукăтăн сэӈки!
15 Щи пŏрайн Пилат, хŏятăт кеша ям верты урăӈăн, Варавва эсԓăс ёх кеша, Иисус ԓy̆в перна юха сэкты мăсԓы, туп щи еԓпийн партăс Ԓy̆веԓ хомщийн сэкты.
16 Ляль ёхăн Иисус Иудея мy̆в куща ун хотăт кy̆тăп пушаса туса, па ляль ёх похăл акăтса.
17 Па Ԓy̆в ляль ёхăн ԓумăттăса питы-урты сŏха, па ԓy̆в пеԓтăсты варăс эԓты лак сэвман, Ԓy̆в ŏхăԓа пŏтсăт.
18 Па Ԓy̆в пиԓăԓăн ищи мăтты уща верты питсăт: – Амта, Иудейт Хон!
19 Па ŏхăԓ эԓты Ԓy̆в хy̆в ващ юхăн сэкса, Ԓy̆в полщăӈăн лякса, па кy̆р шанша ԓойман, нэман Ԓy̆веԓ ŏх пŏтсăт.
20 Хун яма атма няхсăт Ԓy̆в эԓтэԓ, питы-урты сŏх Ԓy̆в эԓтэԓ нŏх эхсăт, ԓумăттăса Ԓy̆в сŏхԓаԓа па Ԓy̆в перна юха сэкты туса.
21 Па парса нянь сэм омăсты хăр эԓты мăнăм Киринея вош эԓты уԓты Симона, Александр па Руф ащия, Иисус урăӈăн перна туты.
22 Па туса Ԓy̆в Голгофа тăхая, щит: “Лобный тăха”.
23 Па Ԓy̆веԓа смирна юх уӈх пиԓăн уна ищты мийԓыса, туп Ԓy̆в ăт инщăс.
24 Щи юпийн тумиԓанăн Ԓy̆в перна юха сэкса па жребий ёвăԓсăт уйтты кеша, хŏя муй Ԓy̆в сŏхԓаԓ эԓты уты.
25 Най нŏх питты юпийн хуԓмет щёс* ус, хун Ԓy̆в перна юха сэкса.
26 Па хăшман ус Иисус нумпийн Ԓy̆в тăйм вунавтăԓ: Иудейт Хон.
27 Ԓy̆в пиԓăԓăн кăт хорахщи кăт перна юха сэксайӈăн, ит – Иисус я̆м пелкăԓ эԓты, кимет – Ԓy̆в пăрта пелкăԓ эԓты.
28 Щиты Емăӈ хăншăм ŏтăн хăшман ус: “па Ԓy̆веԓ хорахщет хŏща ванапса”.
29 Ванăн мăнăм ŏтăт атăм ясăӈăн Ԓy̆в эԓтэԓ ŏхԓаԓăн ёвăԓман пŏтăрсăт: – Э! Емăӈ хот шy̆катты ŏт па хуԓăм хăтăԓ сыс емăӈ хот верты ŏт!
30 Нăӈ Нăӈен нŏх пайты – перна эԓты еԓ пита.
31 Попăт ŏх хуйт Закона утăԓтăты ёх пиԓăн ищиты атма няхсăт, кy̆т кy̆тэԓăн ястăсăт: – Па ёх нŏх пайтăс, па Ԓy̆в Ԓy̆веԓ нŏх пайтты ăт верытăԓ!
32 Христос, Израиль Хон, перна эԓты ин еԓ ат нŏх ԓойԓ, мy̆ӈ ат ватԓэв, щи пŏрайн эвăԓԓy̆в.
Па Ԓy̆в пиԓăԓăн перна юха сэӈкăм ŏтӈăн ищи атăм ясăӈăн Ԓy̆в эԓтэԓ пŏтăрсаӈăн.
33 Хăтăԓ кy̆тапăн хутмет щёсăн патлама иса мy̆вăн йис, па щит яртъяӈмет щёс унты ус.
34 Яртъяӈмет щёсăн Иисус так сыйӈ тy̆рăн увăс: – Элои, Элои! Ламма савахфани? – щит мy̆ӈ ясӈевăн: – Ма Турăм Ащем, Ма Турăм Ащем! Муй урăӈăн Нăӈ Мăнэм хăйсэн?
35 Хŏйтăт, тăта ԓойм ŏтăт эԓты, щит хуԓăтман, ястăсăт: – Хуԓăтԓаты, Илия вохăԓ.
36 Па ит хухăԓмăс, губка уксусăн тэкнăптăман па хy̆в ващ юх оԓӈа пŏнмăн, Ԓy̆веԓ мийԓыйс ищты пŏтăрман: – Ԓояты, ватԓэв, ёхăтăԓ муй Илия Ԓy̆веԓ перна эԓты иԓ уты.
37 Иисус, такан увăԓман, ԓыԓăԓ эсԓăс.
38 Па емăӈ хотăн так лап петты сŏх кăтна тŏхмăс, нумăԓта иԓ унты.
39 Ԓy̆в еԓпеԓан ԓойм сотник ики, шияԓăман, хŏты Ԓy̆в щиты увăԓман, ԓыԓăԓ эсԓăс, ястăс: – Яна Тăм Хŏят Турăм Пŏх ус.
40 Тăта нэӈăт ищи усăт, ԓy̆в еԓта ватсăт; щи нэӈăт кy̆тăн Магдала вош Мария ус, па Мария, айшăк Иаков па Иосий аӈки, па Саломия.
41
Щи нэӈăт па щи пŏрайн, хун Иисус Галилеяин ус, Ԓy̆в юпеԓăн мăтсăт па Ԓy̆веԓа нётсăт. Тăта ус ар па нэ, хŏй Ԓy̆в пиԓăԓăн Иерусалима ёхăтсăт.
42 Па етная йиты питăс. Щутщăты хăтăԓ ԓэщăтты хăтăԓ ус, шаббат хăтăԓ еԓпи хăтăԓ.
43 Щи пŏрайн Иосиф Аримафея вош эԓты ёхтăс, па ԓy̆в Турăм Хона уԓты питты вер ԓавԓăс. Ԓy̆в мир хот вŏԓаӈ ху ус. Пăԓтапăԓ еԓ хăйман Пилат хŏща ԓŏӈăс па Иисус Эԓ вохăс.
44 Пилат ущмара йис, муй Иисус щи сора сŏрма питăс; па сотник ху вохман, ԓy̆веԓ иньщăссăԓы: – Хy̆вăн муй сŏрма питăс?
45 Па сотник эԓты щи вер уйтман, Иисус Эԓ Иосифа эсăԓсăԓы уты.
46 Иосиф, ям нŏви щăшкан ԓутман, па перна юх эԓты Иисус иԓ уйман, ям нŏви щăшканăн Ԓy̆веԓ ёвăрсаԓы па сŏрăм лота пŏтсăԓы. Щи сŏрăм лот кев тăха ԓыпийн сэвăрман уса; па сŏрăм лот ов кев шупăн лап вортсăԓы.
47 Магдала вош Мария па Мария, Иосий аӈки, ватсаӈăн, мăты тăхайн Ԓy̆в пŏныԓыса.
1 Шаббат хăтăԓ хăщăм юпийн Магдала вош Мария, Мария, Иаков аӈки, па Саломия ям эпăԓ тăйты ŏт ԓутсăт Иисус Эԓ нёсăтты кеша мăнты.
2 Па шек аԓăӈ, ԓапăт оԓăӈ хăтăԓăн, мŏхты най нŏх питты юпийн сŏрăм лота щи нэӈăт ёхăтԓăт.
3 Па кy̆т кy̆тэԓăн пŏтăрԓăт: – Хŏйн мy̆ӈева сŏрăм лот ов эԓты кев шуп еԓ вортԓа?
4 Па ăӈкăрмăман ватԓăт, кев еԓ вортăм; шек ун кев шуп ус
5 Па сŏрăм лота ԓŏӈман, ям пелăкăн омăсты нŏви сŏхăн ԓумăтԓийм ям ԓŏват пŏх шияԓăсăт; па пăԓтамăсăт.
6 Ԓy̆в па ԓy̆виԓаԓа ястăԓ: – Аԓ пăԓаты. Нын перна юха сэӈкăм Назарет Иисус кашԓаты; Ԓy̆в сŏрăм эԓты нŏх питăс, Ԓy̆в тăта ăнтŏм. Тăм тăха, хŏԓта Ԓy̆в пŏнмăн уса.
7 Туп мăнаты, Ԓy̆в вера утăԓтăты ёхԓаԓа па вера утăԓ-тăты Петрая ястаты, Ԓy̆в нынан Галилеяин ԓавăԓԓаԓы. Хŏты Ԓy̆в нынан ястăс, щита Ԓувеԓ щияԓăԓԓан.
8 Па ким этман сŏрăм лот эԓты нэӈăт еԓ хухăԓмăсăт; ԓy̆в шек ун пăԓтапа питсăт, па пăԓмăн нэмăԓты хŏята нэмăԓты ăт ястăсăт.
9 Аԓăӈ ԓапăт оԓăӈ хăтăԓăн сŏрăм эԓты нŏх питман, Иисус оԓӈа Магдала вош Мария сэма хойс, Ԓy̆в, сŏрма питтаԓ еԓпийн, Мария ԓыпи эԓты ԓапăт атăм ликăӈ ԓыԓăт ким воштăс.
10 Магдала вош Мария мăнăс па Иисус пиԓăн еԓпи уԓăм такан хоԓԓăты хŏятăта айкеԓ мăс.
11 Туп щи хŏятăт хуԓман Иисус ԓыԓăӈ верăԓ эԓты, па Магдала вош Мария Ԓy̆веԓ ватсăԓы, – ăт эвăԓсăт.
12 Па щи юпийн юш хy̆ват курта мăнăм ԓy̆виԓаԓ эԓты кăт хŏята па сыр хŏрасан Иисус сэма пайтыԓыйс.
13 Па щитӈаԓан, ёхԓы ёхăтман, Иисус пиԓăн еԓпи уԓăм па ёхăта щит эԓты айкеԓ мăсӈан, туп щитӈаԓана ищи ăт эвăԓса.
14 Мет юхăт етăн ԓэвман опсăм ихŏщьяӈ вера утăԓтăты ёхԓаԓ сэма Иисус питăс па айкемăн ԓy̆виԓаԓ ляваттăс ăт эвăԓмеԓ урăӈăн па так сăм урăӈăн, муя ăт эвăԓсăт Ԓy̆в сŏрăм эԓты нŏх питăм верăԓ вантăм хŏятăта.
15 Па Иисус ястăс ԓy̆виԓаԓа: – Иса мир хy̆ват мăнаты па Ям айкеԓ туваты иса мира, Турăм верăм иса хŏятăта.
16 Хŏй тăм айкеԓа эвăԓԓаԓ па ԓy̆в йиӈка ԓŏӈăԓтăԓа, щит Турăмăн нŏх пайтԓа; хŏй ăт эвăԓԓаԓ – сутытты питԓа.
17 Па щитăт пиԓăн, хŏйтăт эвăԓԓăт, тăмăщ вŏԓаӈ посăт питԓăт: Ма нэмемăн атăм ликăӈ ԓыԓăт ԓy̆в ким воштăты питԓăт, яԓăп ясӈăтăн пŏтăрты питԓăт.
18 Хy̆в ващ вой питԓăт ёша уты; па мŏԓты хăԓты питты йиӈк ищԓăт ки, щит эԓты ԓy̆виԓаԓа атма ăт питăԓ; мушăӈ хŏятăт эԓты ёшăт пŏнԓăт па ԓy̆в яма йиԓăт.
19 Па щиты Куща вера утăԓтăты ёхԓаԓ пиԓăн пŏтăрмаԓ юпийн, турма нŏх пайтăсăс па Турăм Ащи ям пелăк ёш пy̆ӈԓа опсăс.
20 Вера утăԓтăты ёхԓаԓ мăтсăт па Ям айкеԓ иса тăхая тусăт. Куща ԓy̆виԓаԓа нётăс па этăԓтăс, хŏты ԓy̆в ясăӈԓаԓ вещката усăт, па щиты вŏԓаӈ посăт ясӈăт юпийн питсăт. Тăми иса щиты.