1 Енлöн Зон Исус Кристос йылiсь бур юöрлöн пондöтчöм.
2 Енсянь юöртiсь Есай гижöм: – Тэнат локтöмöдз ме иньдöта ассим юöртiсьöс, кöда лöсьöтас тэныт туй.
3 Овтöминын кылö горöтлöм: «Господьлö лöсьöтö туй, керö сылö веськытöсь туёккесö».
4 Сiдз лоис. Иван пыртiс отирöс овтöминын. Сiя юöртiс нылö: «Бергöтчö Енлань да пыртчö, мед сiя лэдзис греккезнытö».
5 Юдей муын олiссес да ерусалимса петiсö Иван дынö. Нiя висьтасисö асланыс греккез йылiсь, и Иван пыртiс нiйö Йöрдан юын.
6 Иван новйис верблюд гöнiсь кыйöм паськöм да йиасьлiс кучик йиöн. Сiя сёйис енкöбывкаэз да вöрма.
7 Иван юöртiс: «Месся вынажык локтас ме бöрын. Меным оз туй нельки мышкыртчöмöн пöрччавны сы кöмкöтiсь воннесö.
8 Ме пыртi тiянöс ваöн, сiя пыртас тiянöс Вежа Лолöн».
9 Сiя луннэзö Галилей Назарет карись локтiс Исус, и Иван пыртiс сiйö Йöрдан юын.
10 Васис петтöн Исусыс казялiс енöжлiсь оссьöмсö да ас вылас дудi моз лэдзчисян Ловсö.
11 Енöжсянь кылiс шы: «Тэ менам муса Зон, кöдаын менам гаж».
12 Сэк жö Вежа Лов нуöтiс Исуссö овтöминö.
13 Сэтчин Исусыс вöлi нёльдас лун, сiйö ылöтлiс Сöтана. Исусыс вöлi вöрпи коласын, да ангеллэз отсалiсö сылö.
14 Кöр Ивансö пуксьöтiсö, Исусыс мунiс Галилей муö да пондiс нуöтны отирлö Енлiсь бур юöр.
15 Сiя шуис: «Лоис кад да локтiс Енлöн ыждалöм. Бергöтчö Енлань да эскö бур юöрлö».
16 Галилей ты дорöт мунтöн Исусыс казялiс черикыйиссезöс – Симонöс да сылiсь Öндрей вонсö. Нiя чапкалiсö тыас кулöммез.
17 Исусыс шуис нылö: «Локтö ме бöрсянь. Ме кера тiянöс морт лов кыйиссезöн».
18 Нiя сэк жö колисö ассиныс кулöммесö да мунiсö сы бöрсянь.
19 Одзлань мунтöн Исусыс казялiс Зебдейлiсь Яковöс да сылiсь Иван вонсö, кöдна пыжын дöмасалiсö кулöммез.
20 Сэк жö сiя корис Яковсö да Ивансö сьöрас. Мöддэс колисö пыжас Зебдей айнысö медалöм отиркöт да мунiсö Исусыс бöрсянь.
21 Нiя локтiсö Капернаум карö. Медодзза локтан шоччисян лунö Исусыс пырис еврейезлöн вичкуö да пондiс велöтны отирöс.
22 Нiя чуймисö сы велöтöмись. Эд сiя эз баит Енлöн гижöтö велöтiссес моз, сiя велöтiс кыдз юралiсь.
23 Сэк жö еврейезлöн вичкуö пырис лёк лолöн кутöм морт. Сiя горöтiс:
24 «Мый тэныт колö миянсянь, назаретса Исус? Тэ локтiн изводавны миянöс? Тöда, кин тэ – Енлöн Вежаыс».
25 Но Исусыс висьталiс: «Öвсьы! Пет сы пытшкись!»
26 Сэк лёк лов пыркйис мортсö, нёштöма горöтiс да петiс сы пытшкись.
27 Быдöнныс повзисö да öтамöдлiсь юасисö: «Мый этiйö? Кытшöм сэтшöм виль велöтöм? Сiя нельки тшöктö кывзiсьны лёк ловвесö, и нiя кывзöны сiйö!»
28 Исусыс йылiсь сёрни чожа паськалiс быдсöн Галилей пасьта.
29 Еврейез вичкуись петöм бöрын Исусыс Яковкöт да Иванкöт локтiс Симон да Öндрей ордö.
30 Симоныс иньлöн мамыс öддьöн шогалiс. Сэк жö сы йылiсь висьталiсö Исусыслö.
31 Исусыс сибöтчис, кутiс сiйö киöттяс да лэбтiс кок йылас. Шогöтыс сэк жö чулалiс, и инькаыс пондiс вердны-юктавны локтiссесö.
32 Рытнас, шондi лэдзчöм бöрын, Исусыс дынö вайöтiсö быдöс шогалiссесö да лёк лолöн кутöм отирсö.
33 Быдсöн карыс чукöртчис ыбöс дорас.
34 Исусыс веськöтiс уна отирöс быдкодь шогöтiсь. Уна лёк лов сiя вашöтiс отир пытшкись. Исусыс эз лэдз баитны лёк ловвеслö, эд нiя тöдiсö, кин сiя.
35 Ашынас, шондi петан дорöдз, Исусыс чеччис да мунiс овтöминö юрбитны.
36 Симон да мöдiккез мунiсö сы бöрсянь.
37 Адззисö Исуссö да висьталiсö сылö: «Быдöнныс кошшöны тэнö».
38 Исусыс горöтчис паныт: «Мунам матiсь посаддэзöт да каррезöт, мед сэтчин ме юöртi бур юöр, эд ме сы понда локтi».
39 Быдсöн Галилей муöт еврейезлöн вичкуезын сiя юöртiс бур юöр да вашöтiс лёк ловвез.
40 Исусыс дынö локтiс лепраöн шогалiсь морт, усис сы одзö пидзöссэз вылö да пондiс кеймисьны: «Кöсъян кö, верман менö веськöтны».
41 Исусыслöн сьöлöмыс небзис. Сiя нюжöтiс кисö, павкöтчис шогалiсьыс бердö да горöтчис сылö: «Кöсъя, веськав».
42 Шогöтыс сэк жö чулалiс, и мортыс лоис сöстöм.
43 Исусыс чорыта висьталiс:
44 «Видзöт, некинлö нем эн баит. Мун мыччась поплö да, кыдз тшöктiс Мосей, аслат веськалöм понда езъяв, мед отирыс тöдiсö».
45 Веськöтöм мортыс мунiс да пондiс висьтасьны лоöмыс йылiсь. Сiйöн Исусыс эз ни вермы пырны карö тöдмавтöг. Сiя кольччис овтöминын, и отирыс быдласянь вовлiсö сы дынö.
1 Кынымкö лун бöртi Исусыс бöра локтiс Капернаум карö. Сэк кывсис, сiя пö гортас.
2 Сэтчö öксис уна отир, нельки ыбöс дорас эз туй сибöтчыны. Исусыс висьтасис нылö бур юöр.
3 Сы дынö локтiсö нёльöн, кöдна вайöтiсö кикоктöмсялöм мортöс.
4 Уна чукöртчöм отир кузя нiя эз вермö сибöтчыны Исусыс дынö. Сiйöн разисö короминасö да лэдзисö кикоктöмсялöм мортсö ольпасьнас керкуас, кытöн вöлi Исусыс.
5 Исусыс казялiс нылiсь эскöмнысö да шуис кикоктöмсялöм мортыслö: «Зонö, тэнат греккет лэдзöмöсь».
6 Сэтöн пукалiсö Енлöн гижöтö велöтiссес да аслыныс баитiсö:
7 «Мый нö сiя Енсö лёкöтöмöн баитö? Кин Енся вермас лэдзны греккез?»
8 Исусыс сэк жö аслас лолöн тöдмалiс нылiсь чайтöмсö да висьталiс нылö: «Мыйлö сiдз баитат аслыныт?
9 Мый кокнитжык? Висьтавны кикоктöмсялöм мортлö: «Тэнат греккет лэдзöмöсь», а поди висьтавны: «Чеччы, босьт ассит ольпасьтö да ветлöт»?
10 Öнi тiйö тöдмалат, мый Морт Зон вермö лэдзны му вылын греккез». Сiя бергöтчис кикоктöмсялöм мортлань:
11 «Тэныт шуа: чеччы, босьт ольпасьтö да мун аслат гортö».
12 Мöдыс чеччис, сэк жö босьтiс ольпасьсö да петiс отирыс одзö. Быдöнныс паймисö, ошкисö Енсö да шувлiсö: «Некöр эттшöмсö мийö эг адззывлö».
13 Исусыс бöра петiс ты дорö. Быдöс отирыс мунiс сы дынö, и сiя велöтiс нiйö.
14 Мунтöнняс Исусыс казялiс Алпейлiсь Леви зонöс, кöда пукалiс да чукöртiс вот. Сiя шуис Левиыслö: «Лок ме бöрсянь». Мöдыс чеччис да мунiс Исусыс бöрсянь.
15 Кöр Исусыс пажнайтiс Леви ордын, сыкöт да сылöн велöтчиссескöт пажнайтiсö вот öктiссез да уна мöдiк грека отир. Нiя быдöнныс ветлöтiсö Исусыс сьöрын.
16 Парисейес коласiсь Енлöн гижöтö велöтiссес казялiсö, эд Исусыс сёйö öтлаын вот öктiссезкöт да грека отиркöт. Нiя шуисö сы велöтчиссезлö: «Кыдз сiя вермö сёйны öтлаын вот öктiссескöт да грека отиркöт?»
17 Исусыс кылiс этiйö да висьталiс нылö: «Веськöтiсьыс колö шогалiссезлö, сiя оз ков шогтöм отирлö. Ме эг лок корны веськыта олiссезöс, локтi корны грека отирöс».
18 Иванлöн да парисейезлöн велöтчиссес кöслуналiсö. Исусыс дынö локтiсö юавны: «Мыля Иванлöн да парисейезлöн велöтчиссес кöслуналöны, а тэнат велöтчиссет озö?»
19 Исусыс нылö висьталiс паныт: «Вермöны я зонкаэс кöслунавны, кöр ныкöт гöтрасись зонка? Кытчöдз гöтрасись зонкаыс ныкöт, нiя оз кöслуналö.
20 Но локтасö луннэз, кöр нылiсь мырддясö гöтрасись зонкасö, сэк нiя пондасö кöслунавны.
21 Некин оз пукты дöмас виль дöраись бырöм паськöм вылö: вились вурöм дöмасыс косялас важ паськöмсö, да осьтаыс лоас ыджытжык.
22 Некин оз кисьт шöмтöм сур важ кучик доззэзö: шöмтöм сурыс поткöтас нiйö. Сурыс киссяс, да кучик доззэс тшыксясö. Шöмтöм сурсö колö кисьтны виль кучик доззэзö».
23 Шоччисян лунö Исусыс мунiс кöдзöм ыб дорöт. Сылöн велöтчиссес пондiсö чегны шеппесö.
24 Парисейес висьталiсö Исусыслö: «Видзöт, мыля нiя керöны шоччисян лунö сiйö, мый оз туй керны!»
25 Исусыс висьталiс нылö: «Тiйö разь эд лыддьöтö сы йылiсь, мый керис Давид, кöр сiя да сылöн отирыс тшыгьялiсö и нылöн эз вöв сёян?
26 Сiя пырис Абьятар аркирей дырни Ен керкуö, мед сёйны ачыс да вердны ассис отирсö Енлö пуктöм няньöн, кöдö эз туй сёйны поппезся некинлö».
27 Исусыс содтiс: «Шоччисян лун лöсьöтöм морт понда, морт абу керöм шоччисян лун понда.
28 Сiйöн Мортлöн Зон шоччисян лунöн веськöтлыны вермö».
1 Исусыс мунiс бöра еврейезлöн вичкуö. Сэтчин вöлi косьмöм киа морт.
2 Мед мыжавны Исуссö, парисейез видзöтiсö сы сьöрын: оз я веськöт косьмöм киа мортсö шоччисян лунö.
3 Исусыс шуис косьмöм киа мортыслö: «Сувт отирыс шöрö».
4 Парисейеслiсь сiя юалiс: «Позьö я шоччисян лунö керны бурö али умöльö? Мортöс мездыны али вийны сiйö?» Нiя чöлiсö.
5 Сiя чорыта ны вылö видзöтiс да шогсис нылöн чорзьöм сьöлöммез понда. Исусыс шуис косьмöм киа мортыслö: «Нюжöт китö». Мöдыс нюжöтiс кисö, и киыс веськалiс.
6 Парисейес петiсö да сэк жö пондiсö баитчыны Ирöд дор сулалiсь йöзкöт, кыдз вийны Исуссö.
7 Исусыс аслас велöтчиссезкöт иньдöтчис ты дорö. Сы сьöрö мунiс Галилейись уна отир. Юдейись,
8 Ерусалимись, Идумейись, Йöрдан сайись, Тырей да Сидон гöгöрись отирыс локтiсö сы дынö, кöр кылiсö, мый сiя керö.
9 Исусыс тшöктiс аслас велöтчиссезлö лöсьöтны сы понда пыж, мед отирыс эз дзескöтö.
10 Исусыс унаöс веськöтiс, сiйöн шогалiссес сибöтчывлiсö сы дынö, мед павкöтчыны бердас.
11 Кöр лёк ловвес адззисö Исуссö, усьлiсö сы одзын да горöтлiсö: «Тэ Енлöн Зон!»
12 Но Исусыс эз тшöкты баитны нылö ас йывсис.
13 Сыбöрын Исусыс кайис керöс вылö. Сiя корис ас дынас бöрйöм отирöс. Нiя локтiсö сы дынö.
14 Исусыс бöрйис даскык мортöс, мед нiя вöлiсö сыкöт. Сiя кöсйис ыстыны нiйö нуöтны отирлö бур юöр
15 да мöдiс сетны нылö лёк ловвезöс вашöтан вын.
16 Исусыс бöрйис Симонöс, кöдалö сетiс Петра ним;
17 Зебдейлiсь Яков да Иван зоннэзöс, кöдналö сетiс Боанергес ним, кöдö позьö вуджöтны «гымлöн зоннэз»;
18 Öндрейöс, Пилипöс, Бартоломейöс, Матьвейöс, Помаöс, Алпейлiсь Яков зонöс, Падейöс, аслас му понда пессись Симонöс
19 да Юда Искарйотöс, кöда сыбöрын вузалiс Исуссö.
20 Исусыс мунiс гортас. Сы дынö бöра чукöртчис отир. Сылö да велöтчиссеслö эз позь нельки сёйны.
21 Исусыслöн увтырись отирыс локтiсö нуöтны сiйö сэтiсь, кöр кылiсö этiя йылiсь. Нiя баитiсö, сiя пö йöймöм.
22 Енлöн гижöтö велöтiссес, кöдна локтiсö Ерусалимись, баитiсö: «Сы пытшкын Бельзебул. Сiя вашöтö лёк ловвесö ны юралiсь вынöн».
23 Исусыс корис кывзыны Енлöн гижöтö велöтiссесö да баитiс нылö велöтан висьттэзöн: «Кыдз вермас Сöтана вашöтны Сöтанаöс?
24 Торьясяс кö оланiн му, сiя оз ни вермы лоны оланiнöн.
25 Торьясяс кö увтыр, сiя оз ни вермы лоны увтырöн.
26 Сувтас кö Сöтанаыс аслыс паныт да торьясяс, локтас сылö пом.
27 Некин оз вермы петкöтны вына мортлiсь керку, оз кö кöртав мортсö.
28 Былись баита тiянлö: лоасö лэдзöмöсь отирлöн быдöс греккез да умöльтöм, кытшöм бы лёк сiя эз вöв.
29 Но кин пондас лёкöтны Вежа Ловсö, сылöн греккес озö лоö лэдзöмöсь некöр. Мыжыс кольччас сылö пыр кеж».
30 Исусыс висьталiс этiйö сiйöн, мыля баитiсö: «Сы пытшкын лёк лов».
31 Локтiсö Исусыслöн мамыс да воннэс. Нiя эзö пырö керку пытшкас, иньдiсö корны сiйö.
32 Исусыс гöгöр пукалiс отир. Сылö висьталiсö: «Тэнат мамыт, воннэт да сойет сулалöны öтöрас да корöны тэнö».
33 Исусыс шуис нылö: «Кин менам мамö да менам воннэзö?»
34 Ас гöгöрсис пукалiссесö видзöтöмöн висьталiс: «Эстöн менам мамö да менам воннэзö.
35 Сiя менам вон, сой да мам, кöда керö Ен кöсйöм сьöртi».
1 Исусыс бöра пондiс велöтны ты дорын. Сы дынö öксис уна отир. Сiйöн сiя пуксис пыжö, быдöс отирыс вöлiсö вадöрас.
2 Исусыс уна велöтiс нiйö висьттэзöн. Аслас велöтанын сiя баитiс нылö:
3 «Кывзö: Кöдзись петiс кöдзны.
4 Кöдзтöнняс мукöд тусьыс усис туй дорö. Пуксисö кайез да кокалiсö туссесö.
5 Мукöдыс усисö иззэз вылö, кытöн етша вöлi муыс. Петассэс чожа петалiсö, эд муыс вöлi непыдын.
6 Петiс шондi, петассэс лёпмисö да косьмисö, эд нылöн эз вöлö вужжез.
7 Мукöдыс усисö ёгтурунö, ёгтуруныс быдмис да пöдтiс сюсö, сiя эз сет кöдзыссö.
8 Мукöдыс усисö бур муö, петiсö, быдмисö да сетiсö кöдзыс: öтiк – куимдас, мöдiк – кватьдас, куимöт – сё тусь».
9 Исусыс висьталiс нылö: «Кинлöн эмöсь пеллез кывны, ась кылö!»
10 Кöр отирыс мунiсö, Исусыслöн велöтчиссес да кöдна кольччисö сыкöт юалiсö сылiсь, мый йылiсь висьтасьöны велöтан висьттэс.
11 Исусыс шуис нылö: «Тiянлö сетöм тöдны Енлöн ыждалöмись тöдтöмсö, а мöдiккеслö локтö дзир велöтан висьттэзын.
12 Нiя асланыс синнэзöн адззöны да оз казялö, асланыс пеллезöн кылöны да оз вежöртö, Енлань оз бергöтчö, и Еныс оз лэдз нылiсь греккесö».
13 Исусыс юалiс нылiсь: «Од вежöртö велöтан висьтсö? Кыдз нö мöдат вежöртны быдöс велöтан висьттэсö?
14 Кöдзисьыс кöдзö Кыв.
15 Туй дорö усьöм кöдзысыс висьталö ны йылiсь, кöдна кылöны Кывсö, но сэк жö локтö Сöтана да мырддьö ны сьöлöмись кöдзöм Кывсö.
16 Иззэз вылö кöдзöмыс висьталö ны йылiсь, кöдна кылöны Кывсö, сэк жö долыта босьтöны сiйö.
17 Но нылöн абу вуж да вежласьö мывкыд, а кöр локтö умöль лун али Кыв понда вöтлöм, сэк жö ылöтчöны.
18 Ёгтурунö кöдзöмыс висьталö ны йылiсь, кöдна кылöны Кывсö,
19 но нылöн оланын пырся тöждiсьöм, бура олöм да мукöд кöсйöммез пöдтöны Кывсö, и сiя оз сет кöдзыссö.
20 А бур муö кöдзöмыс висьталö ны йылiсь, кöдна кывзöны Кывсö, босьтöны сiйö сьöлöманыс да сетöны кöдзыс: öтiк – куимдас, мöдiк – кватьдас, куимöт – сё».
21 Исусыс висьталiс нылö: «Сы понда я öзтöны бисö, мед сюйыштны сiйö кашник увтö али лабич увтö? Бисö öзтöны сы понда, мед сiя сетiс югытсö.
22 Быдöс тöдтöмыс лоö тöдсаöн, быдöс дзебöмыс петö вевдöрö.
23 Кинлöн эмöсь пеллез кывны, ась кылö!»
24 Исусыс висьталiс нылö: «Тöдвыланыт босьтö, мый кылатö. Мымда тiйö мурталат, сымда тiянлö лоас мурталöм, да лоас содтöт.
25 Кинлöн эм, сылö лоас сетöм. Кинлöн абу, сылiсь лоас босьтöм сiя, кöда эм».
26 Исусыс висьталiс: «Енлöн ыждалöмыс сэтшöм: Мортыс кöдзö муö сю тусь.
27 Сiя ойнас узьö да луннас чеччö, а кыдз сюыс петалö да быдмö, сiя оз тöд.
28 Муыс ачыс сетö петассэз, сэсся шеп, сэсся быдса сю шепас.
29 Кöр сюыс воö, мортыс сэк жö босьтö чарла, эд локтiс вундан кад».
30 Исусыс шуис: «Мый вылö вачкисьö Енлöн ыждалöмыс? Кытшöм велöтан висьтöн мыччалам сiйö?
31 Сiя кыдз горчицалöн тусь. Кöр сiйö кöдзöны муö, кöдзыссэс коласын сiя медучöт.
32 Кöр кöдзöмыс петалö да быдмö, карччес коласын лоö медыджыт. Сiя лэдзö ыджыт вожжез, нельки ны вуджöр увтын вермöны поздiсьны кайез».
33 Исусыс уна сэтшöм висьттэзöн юöртiс отирлö бур юöрсö, мымда вермисö нiя вежöртны.
34 Исусыс пыр баитiс велöтан висьттэзöн, велöтчиссеслö öтнаныслö бöрынжык вежöртöтлiс быдöс.
35 Сiя рытö Исусыс висьталiс велöтчиссеслö: «Вуджам мöдöрас».
36 Велöтчиссес колисö отирсö да пуксисö пыжö, кытöн пукалiс Исусыс. Сэтöн ордчöн вöлiсö мöдiк пыжжез.
37 Лэбтiсис ыджыт тöвчик, тыэз чапкалiсö пыжсö да пондiсö тыртны сiйö ваöн.
38 Исусыс узис юрöдз вылын пыж бöр йылас. Велöтчиссес саймöтiсö сiйö да шуисö: «Велöтiсь! Абу разь тэныт шог, эд мийö вöям?»
39 Сiя чеччис, дугдöтiс тöвчиксö да висьталiс тыыслö: «Öвсьы, дугды!» Сэк жö тöвчикыс дугдiс пöльтны, лоис öддьöн лöнь.
40 Исусыс шуис велöтчиссеслö: «Мыля тiйö сiдз полат? Мыля тiян эскöмыс абу?»
41 Нiя öддьöн бура повзисö да ас коласаныс баитiсö: «Кин сiя, нельки тöвчикыс да тыыс сiйö кывзiсьöны?»
1 Нiя локтiсö мöдлапöлö, Гераса муö.
2 Кöр Исусыс чеччис пыжсис, сэк жö панталiс сiйö шойнагуись петöм морт. Сiя вöлi кутöм лёк лолöн.
3 Сылöн оланiныс вöлi шойнагуын, и некин эз вермы сiйö нельки кöртавны.
4 Унаись кöртавлiсö сылiсь ки-коксö, но сiя орлавлiс-жугöтлiс кöртöттэсö. Некин сiйö эз вермы лöньсьöтны.
5 Пыр, ой и лун, керöссэзын да гуэзын горöтлiс сiя да вартiс асьсö иззэз бердö.
6 Мортыс ылiсянь казялiс Исуссö, котöрöн локтiс, копыртчис сылö
7 да горöтiс лёк горшöн: «Мый тэныт колö месянь, Исус, Медыджыт Енлöн Зон? Ен могöн, эн маит менö!»
8 Эд Исусыс сылö шуöма: «Пет, лёк лов, этiя морт пытшкись».
9 Исусыс юалiс сылiсь: «Кыдз тэнат нимыт?» Сiя шуис паныт: «Легион менам нимö, сiдз кыдз мийö унаöн».
10 Сiя öддьöн корис Исуссö, мед лёк ловвесö эз вашöт сiя муись.
11 Сэтчин керöс дорас йирсис порссезлöн ыджыт чукöр.
12 Лёк ловвес корисö Исуссö: «Иньдöт миянöс порссес дынö, мед ми пырим ны пытшкö».
13 Исусыс лэдзис нiйö. Лёк ловвес петiсö мортыс пытшкись да пырисö порссес пытшкö. Порсь чукöрыс, кöда вöлi кык сюрс гöгöр, уськöтчис крут керöссянь тыас да вöйис.
14 Порсь пастучитiссес котöртiсö да висьтасисö аркмöмыс йылiсь карас да посаддэзас. Олiссес петiсö видзöтны, мый аркмис.
15 Нiя локтiсö Исусыс дынö да казялiсö: лёк ловвезöн кутлöм морт пукалö паськöма да вежöра. Отирыс повзисö.
16 Кöдна адззылiсö, мый лоис мортыскöт да порссескöт, висьтасисö отирыслö аркмöмыс йылiсь.
17 Йöзыс пондiсö корны Исуссö мунны ны муэзiсь.
18 Кöр Исусыс пуксис пыжас, лёк ловвезнас кутлöм мортыс пондiс корсьыны мунны сыкöт.
19 Исусыс эз лэдз сiйö, висьталiс: «Мун аслат гортö да висьтась увтырытлö, мый тэныт керис Господь да кыдз бурсьöлöмтчис тэ дынö».
20 Мортыс мунiс да Декаполи му пасьта пондiс висьтасьны, мый керис сылö Исусыс. Быдöнныс чуймисö.
21 Кöр Исусыс бöра вуджис мöдлапöлас, уна отир öксисö сы дынö. Сiя вöлi ты дорын.
22 Сэтчö локтiс Яир нима морт, еврейезлöн вичкуись öтiк юралiсь. Сiя казялiс Исуссö, усис сы коккезö
23 да öддьöн корис: «Менам нылö кулö. Лок да пукты киэтö сы вылö, мед сiя мезмис кулöмись да кольччис ловйöн».
24 Исусыс иньдöтчис сэтчин. Уна отир мунiсö бöрсяняс сiйö дзескöтöмöн.
25 Öтiк инька шогалöм вир мунöмöн даскык во,
26 уна сьöкытсö адззылöм веськöтiссезсянь, быдöс видзöм, мый сылöн вöлöм, но абу адззöм нем бурсö, а лоöм сылö нельки умöльжык.
27 Сiя кылöм Исусыс йылiсь. Отир коласöт инькаыс сибöтчис Исусыс дынö бöрсяняс да павкöтчис паськöм бердас.
28 Сiя ас кежас баитiс: «Паськöм бердас кö павкöтча, сэк мезма шогöтiсь».
29 Сэк жö дугдiс котöртны сылöн вирыс, сiя кылiс ас пытшкас веськалöмсö.
30 Сэк жö Исусыс кылiс ас пытшксис вын петöм, бергöтчис отирыслань да юалiс: «Кин павкöтчис менам паськöм бердö?»
31 Велöтчиссес висьталiсö сылö: «Тэ адззан, отирыс дзескöтö тэнö, а тэ юалан: “Кин павкöтчис ме бердö?”»
32 Исусыс видзöтiс гöгöр, мед казявны павкöтчисьсö.
33 Инькаыс тöдiс, мый сыкöт лоис. Повзьöмöн да паймöмöн сiя сибöтчис, усис Исусыс одзö да висьтасис сылö быдöс лоöм йылiсь.
34 Исусыс висьталiс сылö: «Нылöй, тэнат эскöмыт тэнö мездiс. Мун повтöг, тэ мезмин шогöтсит».
35 Кöр Исусыс эшö баитiс этiйö, юралiсь керкуись сибöтчисö морттэз да висьталiсö Яирыслö: «Тэнат нылыт кулiс. Мыйлö маитан велöтiсьсö?»
36 Кöр Исусыс кылiс этнö кыввесö, горöтчис еврейезлöн вичкуись юралiсьыслö: «Эн пов, дзир эскы».
37 Исусыс эз лэдз мунны некинöс ас сьöрас Петрася, Яковся да Яковлöн Иван вонся.
38 Сiя локтiс юралiсьыс керкуö да казялiс отирыслiсь паймöм, горзöм да горöтлöм.
39 Исусыс пырис керкуас да шуис нылö: «Мый öшит да горзат? Нылочкаыс эз кув, сiя узьö».
40 Отирыс сералiсö сы вылын. Исусыс вашöтiс быдöннысö, корис сьöрас нылочкаыслiсь ай-мамсö да куимнан велöтчисьсö, кöдна вöлiсö сыкöт. Нiя пырисö жырö, кытöн куйлiс нылочкаыс.
41 Исусыс кутiс нылочкасö киöттяс да шуис сылö: «Талита кум», мый позьö вуджöтны: «Нылiньöй, тэныт шуа: чеччы».
42 Нылочкаыс сэк жö чеччис да пондiс ветлöтны. Сылö вöлi даскык во гöгöр. Отирыс шай-пай лоисö.
43 Исусыс чорыта öлiс нiйö, мед эз висьтасьö некинлö лоöмыс йылiсь. Сiя тшöктiс сетны нылочкаыслö сёян.
1 Исусыс локтiс аслас карö. Сы сьöрын мунiсö сылöн велöтчиссес.
2 Шоччисян лунö Исусыс пондiс велöтны еврейез вичкуын. Уна кывзiсь паймöмöн баитiсö: «Кысянь сылöн быдöс этiя? Кытшöм сэтшöм вежöр сылö сетöм? Кыдз эттшöм адззывтöмторрес керсьöны сы киэзöн?
3 Абу я сiя тшупсись, Марилöн зон, Яковлöн, Йöвсейлöн, Юдалöн да Симонлöн вон? Абу я миян коласын сылöн сойес?» Этадз нiя эз эскö сылö.
4 Исусыс нылö висьталiс: «Енсянь юöртiсьöс быдлаын пыдди пуктöны, сiйö оз пыдди пуктö аслас карын, ас увтырын да ас гортын».
5 Сiя эз вермы керны сэтчин адззывтöмторрез, дзир неуна шогалiсь вылö пуктiс киэсö да веськöтiс нiйö.
6 Исусыс чуймис ны эскытöмись.
Исусыс ветлöтiс матiсь посаддэзöт да велöтiс.
7 Сiя корис ас дынас даскык велöтчисьöс да кык мортöн пондiс ыставны нiйö велöтны отирсö. Сiя сетiс нылö лёк ловвезöс вашöтан вын.
8 Нянь, пестер, кушаканыс сьöм – нем этiйö эз тшöкты босьтны нылö сьöраныс бедься.
9 Сiя тшöктiс кöмасьны да пасьтавны дзир öтiк йöрнöс.
10 Исусыс нылö висьталiс: «Кытшöм керкуö пырат, кольччö сэтöн сэтчöдз, кытчöдз од мунö сiя посадiсь.
11 Кытöн тiянöс оз сибöтö да оз кывзö, сэтiсь петтöн пыркöтö коккезсиныт буссö. Ась тöдöны, мый нiя керисö».
12 Велöтчиссес мунiсö да юöртiсö отирлö, мед бергöтчисö Енлань.
13 Нiя вашöтiсö уна лёк лов да веськöтiсö виöн мавтöмöн уна шогалiсьöс.
14 Ирöд öксу кылiс Исусыс йылiсь, эд сы йылiсь быдлаын баитiсö. Отирыс шуисö: «Пыртiсь Иван ловзьöм кулöммезiсь, сiйöн сылöн эм сэтшöм вын».
15 Мöдiккес баитiсö: «Этö Илля». Мукöдыс шуисö: «Этö Енсянь одзза кодь жö юöртiсь».
16 Ирöд кылiс этiйö да шуис: «Сiя ловзьöм Иван, кöдалiсь ме орöтi юрсö».
17 Эд Ирöдыс кöркö тшöктöм кутны Ивансö да пуксьöтны Ирöдиада понда. Ирöдиадаыс вöлi Ирöдыс Пилип вонлöн инь, а Ирöдыс гöтрасис сы вылын.
18 Иваныс жö баитлiс Ирöдыслö: «Оз позь тэныт овны аслат вонлöн инькöт».
19 Ирöдиадаыс этасянь лöгасис Иваныс вылö и кöсйис сылiсь кулöм, но эз вермы нем керны.
20 Ирöдыс тöдiс, эд Иваныс веськыта олiсь да вежа морт. Сiя полiс Иваныслiсь да дорйис сiйö. Сылö гленитчис кывзыны Ивансö. Но сылöн басниэс вайöтлiсö Ирöдсö гöрдöтöмöдз.
21 Локтiс лöсялан лун, кöр Ирöд чужан лун кежас чукöртiс веськöтлiссезöс, косьвынöн юралiссезöс да галилейса пыдди пуктана отирöс.
22 Ирöдиадаыслöн нылыс локтiс ны дынö да йöктiс. Йöктöмыс гленитчис Ирöдыслö да сыкöт пукалiссезлö. Öксу шуис нывкаыслö: «Кор менчим, мый тэныт колö, ме сета тэныт».
23 Ирöдыс сетiс сылö кыв: «Сета тэныт быдöс, мый коран, нельки джын муэзöс».
24 Нывкаыс петiс да юалiс аслас мамлiсь: «Мый корны?» Мöдыс шуис паныт: «Пыртiсь Иванлiсь юрсö».
25 Нывкаыс сэк жö перыта мунiс öксуыс дынö да корис: «Сет меным öнi жö бекöр вылын Пыртiсь Иванлiсь юрсö».
26 Ирöдыс гажтöмсялiс, но сiдз кыдз сетiс кыв сыкöт пукалiссес дырни, эз понды керсьыны бöрлань.
27 Сэк жö öксуыс ыстiс шыпурт новйöтiсьöс да тшöктiс вайны Иваныслiсь юрсö.
28 Мöдыс мунiс да орöтiс Иваныслiсь юрсö, вайис сiйö бекöр вылын да сетiс нывкаыслö. Нывкаыс сетiс юрсö аслас мамлö.
29 Иванлöн велöтчиссес кылiсö лоöмыс йылiсь. Нiя локтiсö, босьтiсö сылiсь шойсö да нöбöтiсö шойнаö.
30 Апостоллэс чукöртчисö Исусыс дынö да висьтасисö сылö быдöс, мый керисö да мыйö велöтiсö отирсö.
31 Сiя висьталiс нылö: «Локтö, мунам öтнаным овтöминö, тiянлö колö невна шоччисьны». Уна вöлi вовлiсь-мунiсь отирыс, сiйöн Исусыс велöтчиссескöт эз ешты нельки сёйны.
32 Нiя öтнаныс уйисö пыжöн овтöминö.
33 Уна отир тöдiсö нiйö да казялiсö нылiсь уйöмсö. Быдöс каррезiсь отир котöртiсö овтöминас да локтiсö сэтчин нысся одзжык.
34 Исусыс чеччис пыжсис да казялiс отирсö. Сiя небзис сьöлöмнас, эд отирыс вöлiсö кыдз баля чукöр, кöдалöн абу пастучитiсь. Сiя пондiс велöтны нiйö унаторö.
35 Дыр мыйись велöтчиссес сибöтчисö Исусыс дынö да шуисö: «Эстöн овтöмин, а кадыс уна ни.
36 Лэдз отирсö мунны матiсь посаддэзö да каррезö небны аслыныс сёян».
37 Сiя горöтчис нылö паныт: «Тiйö сетö нылö сёйны». Велöтчиссес шуисö сылö: «Колö я миянлö мунны да небны нянь кык сё гöгöр динар вылö да сетны отирыслö сёйны?»
38 Исусыс юалiс нылiсь: «Мымда тiян нянь чöвпаннэс? Мунö видзöтö». Нiя тöдмалiсö да висьталiсö сылö: «Вит нянь чöвпан да кык чери».
39 Исусыс тшöктiс пуксьöтны быдöннысö турун вылас чукöррезöн.
40 Отирыс пуксисö ордчöн сёöн да витдас мортöн.
41 Сiя босьтiс вит нянь чöвпансö да кык черисö. Енöжö видзöтöмöн Исусыс басвоитiс сёянсö, чеглалiс нянь чöвпаннэсö да сетiс аслас велöтчиссезлö вердны отирсö. Кык черисö сiя торйöтiс быдöнныслö.
42 Отирыс сёйисö да пöтiсö.
43 Кольöм нянь торресö да чери торресö öктiсö даскык пестер тыр.
44 Сёйиссес коласын вöлiсö вит сюрс гöгöр айка.
45 Сэк жö Исусыс тшöктiс ассис велöтчиссесö пуксьыны пыжö да одзлань вуджны мöдлапöлас Бетсайдаö, кытчöдз сiя лэдзас отирсö.
46 Исусыс лэдзис отирсö да кайис керöс вылö юрбитны.
47 Рытнас пыжыс уйис ты шöрын, Исусыс вöлi öтнас му вылын.
48 Сiя казялiс, кыдз паныт пöльтiс чорыт тöв, да кытшöм сьöкыт вöлi сынны велöтчиссеслö. Одз асывнас сiя иньдöтчис подöн ты кузя. Исусыс сибалiс велöтчиссес дынö да мöдiс орддьыны нiйö.
50 (49-50)Велöтчиссес повзисö, кöр казялiсö ты кузя мунiсьсö. Нiя чайтiсö сiйö кытшöмкö лолöн, повзисö да горöтiсö. Эд сiйö адззисö быдöнныс. Сэк жö Исусыс пондiс баитны ныкöт: «Лöньсьö, эд полö, эстöн ме».
51 Сiя пуксис ны дынö пыжас, и тöлыс лöнис. Велöтчиссес чуймисö ас кежаныс,
52 52 эд сёянöн лоöмыс нiйö немö эз велöт. Нiя вöлiсö измöм сьöлöмаöсь.
53 Нiя вуджисö тысö да локтiсö Геннесарет муö.
54 Кöр быдöнныс чеччисö пыжсис, сэк жö отирыс тöдiсö Исуссö.
55 Нiя кытшöвтiсö быдöс матiсь посаддэсö. Отирыс кылiсö, кытöн вöлi Исусыс, да пондiсö вайны шогалiссесö сэтчö.
56 Кытчö бы эз лок сiя – посадö, карö – быдлаын водтöтлiсö шогалiссесö му вылö да корисö сiйö, медбы сетiс нылö павкöтчыны кöть паськöм подув бердас. Сы бердö павкöтчиссес веськалiсö.
1 Öксисö Исусыс дынö парисейез да Ерусалимись Енлöн гижöтö велöтiссез.
2 Нiя казялiсö, кыдз сылöн мукöд велöтчиссес сёйöны няньсö мисьтöм киэзöн.
3 Эд парисейес, кыдз быдöс еврейес, видзöны пöриссеслiсь велöтöм: оз сёйö мисьтöм киэзöн
4 да вузасянiнiсь локтöм бöрын оз сёйö миссьытöг. Нiя видзöны уна мöдiк велöтöм: кыдз миссьöтны бекöр-пань.
5 Парисейес да Енлöн гижöтö велöтiссес юалiсö Исусыслiсь: «Мыля тэнат велöтчиссет оз олö пöриссеслöн велöтöм сьöртi да сёйöны няньсö мисьтöм киэзöн?»
6 Сiя горöтчис нылö: «Тiян йылiсь, бöбöтчиссес йылiсь, бура висьталiс Есай Енлöн гижöтын: – Этна отирыс пыдди пуктöны менö öманыс, а нылöн сьöлöмныс ме дынсянь ылын.
7 Весь нiя копыртчöны меным, кöр велöтöны отирöн лöсьöтöм тшöктöммезö.
8 Тiйö колит Енлiсь тшöктöмсö да видзсят морт велöтöм бердын».
9 Исусыс висьталiс нылö: «Тiйö шыблялöмöн вештат бокö Енлiсь тшöктöмсö, мед овны пöрись отир велöтöм сьöртi.
10 Эд Мосей висьталiс: «Пыдди пукты ассит ай-мамтö» да «Кин умöля баитö ай-мам йылiсь, мед вийöмöн кулö».
11 Мыйö тiйö велöтат? Сылö, кин висьталас ай-мамлö: «Сiя, кöдö тiйö видзчисят месянь, – Енлö козин»,
12 тiйö од лэдзö нем керны сы ай-мам понда.
13 Асланыт велöтöмöн тi вештат Енлiсь кывсö. Уна мöдiкö сэтшöмсö керат».
14 Исусыс бöра корис быдöс отирсö да шуис нылö: «Кывзö менö быдöнныт да вежöртö.
15 Мый пырö мортыс пытшкö, оз тшыкöт сiйö. Мый петö сы пытшкись, тшыкöтö мортсö.
16 Кинлöн эмöсь пеллес кывны, ась кылö!».
17 Кöр отир дынсянь Исусыс пырис керкуö, велöтчиссес юалiсö сы велöтöм йылiсь.
18 Сiя висьталiс нылö: «Сiдз и тiйö нем од вежöртö! Нельки юраныт оз пыр, эд морт пытшкö пырöмыс оз вермы тшыкöтны сiйö?
19 Сёяныс оз пыр сы сьöлöмö, пырö кынöмас да петö бöр». Сiйöн Исусыс висьталiс, эд быдöс сёяныс сöстöм.
20 Одзлань сiя висьталiс: «Мый петö мортыс пытшкись, тшыкöтö мортсö.
21 Мортыс пытшкись, сы сьöлöмись, петöны лёк кöсйöммез:
22 гöтрасьтöг öтлаын олöм, гусясьöм, вийöм, гозъя коласын бöбöтлöм, горшасьöм, умöльö керöм, ылöтчöм, лöг, вежаалöм, лёкöтöм, асьтö вылö пуктöм, мывкыдтöм олöм.
23 Быдöс этiя лёкыс петö мортыс пытшкись да тшыкöтö сiйö».
24 Исусыс мунiс сэтчинiсь да локтiс Тырей муö. Сiя кöсйис, мед некин эз тöд сы йылiсь. Но сылiсь керкуö пырöмсö казялiсö.
25 Исусыс йылiсь кылiс инька, кöдалöн нылыс вöлi кутöм лёк лолöн. Сiя сэк жö локтiс да усис Исусыс коккезö.
26 Инькаыс вöлi гречанка Пиникия Сирияись. Сiя корис, мед Исусыс вашöтiс лёк ловсö нылыс пытшкись.
27 Исусыс висьталiс сылö: «Колö медодз сетны челядьлö пöттöдз сёйны. Абу бур мырддьыны челядьлiсь няньсö да чапкыны поннэзлö».
28 Инькаыс висьталiс сылö паныт: «Сiдз, Господь, но и поннэс пызан увтас сёйöны челядьыслiсь нянь торресö».
29 Исусыс шуис сылö: «Тэ бура висьталiн. Мун, лёк лолыс петiс тэнат ныв пытшкись».
30 Инькаыс локтiс гортас да казялiс: нылыс куйлö ольпась вылын, лёк лолыс петöм сы пытшкись.
31 Исусыс бöра мунiс Тырей муись, Сидон да Декаполи муэзöт локтiс Галилей ты дынö.
32 Вайöтiсö сы дынö мортöс, кöда эз кыв да умöля баитiс. Вайöтiссес корисö, мед сiя пуктiс сы вылö кисö.
33 Исусыс кежöтiс сiйö отирыс дынсянь бокö, сюйыштiс чуннесö сылö пеллезас, сьöвзис да павкöтчис сы кыв бердö.
34 Сiя видзöтiс енöжö, ышловзисис да висьталiс мортыслö: «Эффата!», мый позьö вуджöтны: «Оссьы!»
35 Сэк жö мортыс пондiс кывны да бура баитны.
36 Исусыс эз тшöкты висьтасьны лоöмыс йылiсь некинлö. Но кыным унажык сiя öлiс, сыным ёнжыка отирыс висьтасисö этiйö юöрсö.
37 «Бура чуймисö да баитiсö: «Быдöс бура керö: пельтöммесö керö кылiссезöн, кывтöммесö – баитiссезöн».
1 Нiя луннэзö бöра öксисö уна отир. Нылö нем вöлi сёйны. Исусыс корис ассис велöтчиссесö да висьталiс нылö:
2 «Менам сьöлöм висьö отирыс понда. Куим лун ни нiя мекöт, а сёйны нылö нем.
3 Лэдза кö нiйö гортаныс сёйтöг, туй вылас мыдзасö да усясö, эд мукöдыс ны коласiсь локтiсö ылiсянь».
4 Велöтчиссес шуисö сылö: «Кин нö вермас адззыны эстöн овтöминас няньсö, мед вердны нiйö?»
5 Исусыс юалiс нылiсь: «Мымда тiян нянь чöвпаннэс?» Нiя сылö висьталiсö: «Сизима».
6 Исусыс тшöктiс отирсö пуксьыны му вылö. Сiя босьтiс сизим нянь чöвпансö, аттьö висьталiс Енлö, чегöтiс да сетiс аслас велöтчиссезлö, медбы нiя сеталiсö няньсö отирлö. Мöддэс сеталiсö сiйö быдöнныслö.
7 Нылöн вöлi невна чери. Исусыс басвоитiс да тшöктiс сетавны сiйö.
8 Отирыс сёйисö да пöтiсö. Кольччöм нянь торресö öктiсö сизим пестер.
9 Сёйиссес вöлiсö нёль сюрс гöгöр. Исусыс лэдзис отирсö горттэзö.
10 Сiя сэк жö пуксис аслас велöтчиссезкöт пыжö да уйис Далманута муэзö.
11 Локтiсö парисейез да пондiсö Исусыскöт етшасьны. Нiя корисö сысянь енöжись пас, мед тöдмавны кин сiя.
12 Исусыс пыдына ловзисьöмöн шуис: «Мыйлö этiя увтырыс корö енöжись пассö? Былись баита тiянлö: оз ло этiя увтырлö енöжись пасыс».
13 Сiя колис нiйö, бöр пуксис пыжас да иньдöтчис мöдлапöлас.
14 Велöтчиссес вунöтiсö босьтны нянь. Нылöн сьöраныс öтiк нянь чöвпанся нем эз вöв.
15 Исусыс шуис нылö: «Видзöтö да полö парисейезлöн да Ирöдлöн шöмись».
16 Велöтчиссес ас коласаныс баитiсö: «Миян няньыс абу».
17 Исусыс тöдöмöн шуис нылö: «Мый баитатö сы йылiсь, бытьтö тiян няньыс абу? Тiйö одö вежöртö да одö авйö? Тiян сьöлöмныт измöм?
18 Эмöсь синнэзныт да од адззö? Эмöсь пеллезныт да од кылö? Тöдвыланыт од уськöтö?
19 Кöр ме вит нянь чöвпансö чеги вит сюрс понда, кыным тыра пестер тiйö öктiт кольччöм нянь торресö?» Велöтчиссес шуисö сылö: «Даскыкö».
20 «А кöр сизим нянь чöвпансö чеги нёль сюрс понда, кыным тыра пестер öктiт тiйö кольччöм нянь торресö?» Нiя висьталiсö: «Сизимö».
21 Исусыс шуис нылö: «Кыдз жö öнöдз од вежöртö нем?»
22 Нiя локтiсö Бетсайдаö. Исусыс дынö вайöтiсö синтöмöс да корисö павкöтчыны сы бердö.
23 Исусыс кутiс синтöмсö киöттяс, петкöтiс посадсис, сьöвзис сылö синнэзас, пуктiс сы вылö киэсö да юалiс сылiсь: «Адззан я мыйкö?»
24 Синтöмыс видзöтiс да шуис: «Адзза отирöс, нiя вачкисьöны ветлöтiсь пуэз вылö».
25 Сэсся Исусыс бöра пуктiс киэсö сы синнэз вылö. Мортыс веськалiс да бура пондiс адззыны.
26 Исусыс ыстiс сiйö гортас да висьталiс: «Орддьы посадсö».
27 Исусыс мунiс аслас велöтчиссезкöт Пилиплöн Кесарей посаддэзö. Туй вылас сiя юасис нылiсь: «Кинöн менö лыддьöны отирыс?»
28 Велöтчиссес шуисö паныт: «Öтiккес – Пыртiсь Иванöн, мöдiккес – Илляöн, мукöдыс лыддьöны тэнö Енсянь юöртiссес коласiсь».
29 Сiя юасис нылiсь: «Кинöн тiйö менö лыддят?» Петра висьталiс сылö паныт: «Тэ – Мессия».
30 Исусыс эз тшöкты висьтасьны велöтчиссеслö ас йывсис некинлö.
31 Исусыс пондiс велöтны велöтчиссесö: «Мортлöн Зонлö ковсяс мырсьыны-пессьыны. Пöриссес, аркирейес да Енлöн гижöтö велöтiссес бергöтчасö сы дынiсь. Сiйö виясö, но куим лун бöртi сiя ловзяс».
32 Исусыс баитiс этiя йылiсь веськыта. Сэк Петраыс корис сiйö бокö да öлiс.
33 Исусыс бергöтчис велöтчиссеслань, видзöтiс ны вылö да чорыта öмалiс Петрасö: «Вешшы ме дынiсь, Сöтана! Тэнат кöсйöмыт мортлöн, абу Енлöн».
34 Исусыс корис отирсö да ассис велöтчиссесö, шуис нылö: «Кин кöсйö мунны мекöт, ась вунöтö асьсö, босьтö ассис крестсö да мунö ме бöрсянь.
35 Эд сiя, кöда кöсйö ассис олансö видзны, öштас сiйö. Кин öштас ассис олансö ме понда да бур юöр понда, видзас сiйö.
36 Мый бурыс мортлö, лоас кö сылöн быдöс муыс, а ассис олансö öштас?
37 Мый вермас сетны мортыс, мед небны бöр ассис олансö?
38 Кин бергöтчас ме дынiсь да менам кыввез дынiсь этiя лэдзчисьöм да грека увтырын, сы дынiсь бергöтчас Мортлöн Зон, кöр локтас аслас Ай дзардöмын вежа ангеллэзкöт».
1 Исусыс висьталiс нылö: «Былись баита тiянлö: эмöсь эстöн сулалiссез коласын нiя, кöдна кувтöдззаныс адззыласö Енлiсь вынöн локтан ыждалöмсö».
2 Квать лун бöртi Исусыс босьтiс сьöрас Петраöс, Яковöс да Иванöс. Сiя ныкöт öтнаныскöт кайис вылын керöсö. Сэтчин сiя вежсис ны одзын.
3 Сылöн паськöмыс пондiс дзардны, лоис чочкомся-чочком, кыдз му вылын некин оз вермы чочкомтыны.
4 Ны одзö мыччисис Мосейкöт Илля. Нiя баитiсö Исусыскöт.
5 Петраыс висьталiс Исусыслö: «Велöтiсь, бур миянлö татöн. Керам куим чом: öтiкö тэныт, öтiкö Мосейыслö да öтiкö Илляыслö».
6 Петраыс эз тöд, мый баитны, эд велöтчиссес öддьöн повзисö.
7 Мыччисис кымöр, вевттис быдöннысö, и сэтчинсянь кылiс шы: «Эта менам муса Зон. Сiйö кывзö».
8 Сэк жö велöтчиссес видзöтiсö гöгöр, но некинöс Исусысся эз казялö.
9 Керöсiсь лэдзчытöн Исусыс эз тшöкты висьтасьны некинлö адззылöмыс йылiсь сэтчöдз. кытчöдз Мортлöн Зон оз ловзьы кулöммезiсь.
10 Нiя сiдз керисö, но юасисö öтамöдныслiсь: «Кыдз вежöртны – «ловзьыны кулöммезiсь»?»
11 Велöтчиссес юалiсö Исусыслiсь: «Мыля Енлöн гижöтö велöтiссес баитöны, Иллялö пö колö локны одзжык?»
12 Сiя шуис нылö: «Былись, Илляыслö ковсяс локны одзжык да быдöс лöсьöтны. А мыля гижöм, мый Мортлöн Зонлö ковсяс уна мырсьыны-пессьыны да лоны ёрдöмöн?
13 Ме висьтала тiянлö: Илляыс локтiс ни, сылö керисö кöсйöмныс сьöртi. Сiдз гижöм сы йылiсь».
14 Исусыс, Петраыс, Яковыс да Иваныс локтiсö мöдiк велöтчиссес дынö, казялiсö ны дынiсь уна отирöс да Енлöн гижöтö велöтiссезöс, кöдна етшасисö ныкöт.
15 Кöр отирыс казялiсö Исуссö, чуймисö да перыта сибöтчисö баитны сыкöт.
16 Исусыс юалiс: «Мый йылiсь етшасят?»
17 Отирыс коласiсь öтiк морт висьталiс паныт: «Велöтiсь, ме вайöтi тэ дынö ассим зонöс, кöдö видзö кывтöм лёк лов.
18 Кöр лёк лолыс кутö сiйö да чапкö сiйö му вылö, зонö лэдзö öмсис быг, йирö пиннесö да тувдö. Ме тшöктi тэнат велöтчиссезлö вашöтны лёк ловсö, но нiя эз вермö сiйö вашöтны».
19 Исусыс паныт горöтчис: «О, эскытöм отир! Кытчöдз меным колö лоны тiянкöт? Кытчöдз ме верма видзны тiянöс? Вайöтö зонкасö ме дынö».
20 Сiйö вайöтiсö Исусыс дынö. Кöр лёк лолыс казялiс Исуссö, пыркнитiс зонкасö. Мöдыс усис му вылас, туплясис да лэдзис öмсис быг.
21 Исусыс юалiс зонкаыс айлiсь: «Важын я эттшöмыс сыкöт лоис?» Сiя шуис: «Челядькадсянь.
22 Унаись лёк лолыс чапкалiс зонöс биö да ваö, мед вийны сiйö. Верман кö, сьöлöмсянят отсав миянлö».
23 Исусыс висьталiс сылö: «Верман кö! Быдöс позьö керны эскисьлö».
24 Сэк жö зонкаыслöн айыс горöтiс: «Эска! Отсав меным эскытöмлö».
25 Исусыс казялiс котöрöн чукöртчись отирöс да öлiс лёк ловсö: «Кывтöм да пельтöм лёк лов, ме тшöкта тэнö петны зонкаыс пытшкись. Сэсся эн пыр сы пытшкö».
26 Лёк лов горöтiс, бура вартiс зонкасö да петiс. Зонкаыс тувдiс. Отирыс шуисö: «Сiя кулiс».
27 Но Исусыс босьтiс зонкасö киöттяс да лэбтiс, мöдыс чеччис.
28 Керкуö пырöм бöрын Исусыслöн велöтчиссес юасисö сылiсь аскöттяс: «Мыля мийö эг вермö вашöтны лёк ловсö?»
29 Исусыс висьталiс нылö: «Эттшöммесö позьö вашöтны дзир Енлö кеймöмöн».
30 Исусыс велöтчиссескöт петiс сэтчинiсь да мунiс Галилей пыр. Сiя кöсйис, мед некин эз тöд сылiсь мунöмсö.
31 Эд сылö колiс велöтны ассис велöтчиссесö. Исусыс висьталiс нылö: «Мортлöн Зон лоас сетöм отир киэзö, нiя виясö сiйö. Сiя кулас, но куим лун бöртi ловзяс».
32 Велöтчиссес эз вежöртö висьталöмсö, а юасьны сылiсь полiсö.
33 Нiя локтiсö Капернаум карö. Гортас Исусыс юалiс велöтчиссеслiсь: «Мый йылiсь тiйö баитiт туй вылас?»
34 Нiя чöлiсö, сiдз кыдз туй вылас баитiсö ас коласаныс, кин медыджыт.
35 Исусыс пуксис, корис дынас даскык велöтчисьсö да шуис нылö: «Кин кöсйö лоны медодззаöн, ась лоö быдöнныс коласын медбöрьяöн да быдöнныслö отсалiсьöн».
36 Сiя босьтiс кага, сувтöтiс сiйö ны шöрö, сывтыртiс сiйö да шуис нылö:
37 «Кин босьтö ас дынас эттшöм öтiк кага ме понда, сiя босьтö ас дынас менö. Кин босьтö менö ас дынас, сiя оз босьт менö, босьтö менö ыстiсьöс».
38 Иван шуис: «Велöтiсь, мийö адззылiм мортöс, кöда тэнат нимöн вашöтiс лёк ловвесö. Мийö öлiм сiйö, эд миянкöт этiя мортыс оз ветлöт».
39 Исусыс висьталiс: «Эд öлö сiйö. Некин оз вермы сэк жö лёкöтны менö, керис кö менам нимöн адззывтöмтор.
40 Кин абу миянлö паныт, сiя миян дор.
41 Былись баита тiянлö: оз öшты ассис донсö сiя, кин юкталас тiянöс ваöн, сiдз кыдз тiйö Кристослöн».
42 «Кин грекö воштö меным эскись челядь коласiсь öтiкöс, сылö буржык, öшöтiсö кö голя вылас сылö изын да шупкисö саридзö.
43 Киыт кö грекö воштö тэнö, керышт сiйö. Буржык тэныт пырны оланас китöг, нежели кык киöн мунны адö, куслытöм биö,
44 кытöн «нылöн гагыс оз кув, да биыс оз куслы».
45 Кокыт кö грекö воштö тэнö, керышт сiйö. Буржык тэныт пырны оланас коктöг, нежели кык кокöн лоны чапкöмöн адö,
46 кытöн «нылöн гагыс оз кув, да биыс оз куслы»).
47 Синыт кö грекö воштö тэнö, нетшкöвт сiйö. Буржык тэныт пырны Енлöн ыждалöминö синтöг, нежели кык синöн лоны чапкöмöн адö,
48 кытöн «нылöн гагыс оз кув, да биыс оз куслы».
49 Быдыс биöн соласяс.
50 Солыс – буртор. Но лоас кö солыс дуб, позьö я сiйö солавны? Мед лоас солыс тiян пытшкын, да лöня олö ас коласаныт».
1 Капернаум карись мунöм бöрын Исусыс локтiс Юдей муö да Йöрдан ю сайись муэзö. Бöра öксисö сы дынö отир. Кыдз пыр сiя велöтiс нiйö.
2 Сибöтчисö парисейез да сiйö кыйöм могись юалiсö: «Позьö я айкалö янсöтчыны инькöт?»
3 Исусыс висьталiс нылö паныт: «Мый висьталiс тiянлö Мосей?»
4 Нiя шуисö: «Мосей лэдзис гижны торйöтчан гижöт да янсöтчыны».
5 Исусыс висьталiс нылö: «Тiян чорыт сьöлöммез кузя сiя гижис тiянлö сэтшöм тшöктöмсö.
6 Муюгыт керöм коста Еныс керис айкаöс да инькаöс.
7 Сiйöн мортыс коляс ассис ай-мамсö да öтлаасяс аслас инькöт,
8 и лоас кык мортiсь öтiк морт. Сiдз нiя лоöны öтiк торöн.
9 Сiдзкö, мый Еныс öтлаöтiс, сiйö мортыслö янсöтны оз туй».
10 Керкуас велöтчиссес бöра юалiсö Исусыслiсь сiйö жö.
11 Сiя висьталiс нылö: «Кин янсöтчас иньыскöт да гöтрасяс мöдiк вылын, сiя кыскасись морт.
12 Иньыс кö янсöтчас аслас айкакöт да петас мöдiк сайö, сiя кыскасись инька».
13 Вайöтiсö Исусыс дынö челядьöс, мед сiя павкöтчис ны бердö. А велöтчиссес эз лэдзö сибöтчыны сы дынö.
14 Исусыс казялiс да чорыта шуис нылö: «Лэдзö челядьсö сибöтчыны ме дынö, эд панлалö нiйö. Ны коддес лоасö Енлöн ыждалöминын.
15 Былись баита тiянлö: кин оз босьт сьöлöмнас кага моз Енлiсь ыждалöминсö, сiя оз пыр сэтчö».
16 Исусыс сывьялiс челядьсö, пуктiс ны вылö киэсö да басвоитiс нiйö.
17 Исусыс петiс туйö. Кинкö котöрöн сибöтчис, усис сы одзö пидзöссэз вылас да юалiс сылiсь: «Бур велöтiсь, мый меным колö керны, мед адззыны пырся олан?»
18 Исусыс висьталiс сылö: «Мыля тэ менö шуан бурöн? Енся бурыс некин абу.
19 Тöдан Енлiсь тшöктöммесö: эн вий, гозъя коласын эн бöбöтлы, эн гусясь, эн пöрьяв, эн мырддьы, пыдди пукты ай-мамтö».
20 Мортыс шуис Исусыслö паныт: «Велöтiсь, ме томсянь ола этна тшöктöммез сьöртi».
21 Исусыс видзöт керис сы вылö да радейтöмöн шуис: «Öтiк тор тэныт оз тырмы: мун вузав, мый тэнат эм, да сет гов отирлö. Сэк лоас тэнат эмбурыт енöжын. Сыбöрын лок ме бöрсянь».
22 Мортыс повзис этна кыввезiсь да гажтöма мунiс, эд сылöн вöлi ыджыт пажыть.
23 Исусыс видзöтiс гöгöр да шуис аслас велöтчиссезлö: «Кытшöм сьöкыт мортлö пырны Енлöн ыждалöминö, уна кö сылöн эмбурыс!»
24 Велöтчиссесö чуймöтiсö сылöн кыввес. Исусыс бöра шуис нылö: «Челядь, öддьöн сьöкыт пырны Енлöн ыждалöминö!
25 Кокнитжык верблюдлö мунны ем пыс пыр, нежели пажытя мортлö пырны Енлöн ыждалöминö».
26 Велöтчиссес чуймöмöн баитiсö ас коласаныс: «Кин вермас мезмыны?»
27 Исусыс ны вылö видзöтöмöн шуис: «Отирыслö этiйö оз позь, Енлö позьö. Сiя быдöс вермö».
28 Петра пондiс баитны Исусыслö: «Мийö колим быдöс да иньдöтчим тэ бöрсянь».
29 Исусыс шуис: «Былись баита тiянлö: кин коляс керкусö, воннэсö, сойесö, мамсö, айсö, челядьсö, муэсö ме понда да бур юöр понда,
30 сылö лоасö öнняся вашöтлан кадас сёись унажык керкуэс, воннэс, сойес, маммес, челядьыс, муэс, да локтан кадас – пырся олан.
31 Медодзиссес лоасö медбöрьяэзöн, медбöрьяэс лоасö медодзиссезöн».
32 Ерусалимö кайикö Исусыс мунiс одзас. Велöтчиссес мунiсö сы бöрсянь чуймöмöн, отирыс – полöмöн. Исусыс бöра корис дынас даскык велöтчисьсö да пондiс баитны нылö, мый лоас сыкöт:
33 «Мийö каям Ерусалимö, Мортлiсь Зонсö вузаласö аркирейезлö да Енлöн гижöтö велöтiссезлö. Нiя мыждасö сiйö вийöм вылö да сетасö бокись йöзлö.
34 Нiя янöтасö сiйö, сьöлаласö, вартласö да виясö. А куим лун бöртi сiя ловзяс».
35 Исусыс дынö сибöтчисö Зебдейлöн Яков да Иван зоннэс да шуисö: «Велöтiсь, кер миянлö, мый корам».
36 Сiя юалiс нылiсь: «Мый тiян понда колö керны?»
37 Нiя висьталiсö сылö: «Лэдз миянлö пукавны тэ дынын, öтнымлö – веськытлань, мöднымлö – шульгалань тэнат ыждалöминын».
38 Исусыс висьталiс нылö: «Од тöдö, мый корат. Вермат я юны дозсис, кöдаись ме юа, да пыртчыны ме моз?»
39 Нiя шуисö паныт: «Вермам». Исусыс висьталiс нылö: «Дозсис, кöдаись ме юа, юат, да ме моз пыртчат.
40 А лэдзны пукавны ме дынсянь веськытлань да шульгалань – ме ог вермы. Сэтчö пуксясö нiя, кинлö лöсьöтöм».
41 Дас велöтчисьыс кылiсö этiя йылiсь да лöгасисö Яковыс да Иваныс вылö.
42 Исусыс корис велöтчиссесö дынас да шуис: «Тiйö тöдат, юралiссес сулалöны отир вевдöрын, ыджыт йöз веськöтлöны отирöн.
43 Тiян коласын мед оз ло сiдз. Кин мöдö лоны тiян коласын ыджытöн, ась лоö тiянлö отсалiсьöн.
44 Кин мöдö лоны медодззаöн, ась лоö быдöнныслö верöн.
45 Эд Мортлöн Зон эз лок сы понда, мед сылö отсалiсö. Сiя локтiс отсавны да сетны ассис олансö кыдз мездан дон уна отир понда».
46 Нiя локтiсö Ерико карö. Кöр Исусыс велöтчиссескöт да уна отиркöт петiс карсис, Тимейлöн Бартимей зон, синтöм корись, пукалiс туй дорас.
47 Сiя кылiс, этiйö пö назаретса Исусыс, да пондiс горöтлыны: «Давидлöн Зон, Исус, бурсьöлöмтчы ме дынö».
48 Отирыс тшöктiсö сiйö чöвны, но сiя ёнжыка горöтлiс: «Давидлöн Зон, бурсьöлöмтчы ме дынö».
49 Исусыс сувтчис да шуис: «Корö сiйö». Синтöмсö корисö да висьталiсö сылö: «Эн пов, чеччы, Исусыс корö тэнö».
50 Бартимейыс чапкис вывсис вевдöрись паськöмсö, чеччыштiс да сибöтчис Исусыс дынö.
51 Исусыс юалiс: «Мый тэ видзчисян месянь?» Синтöмыс шуис сылö: «Велöтiсь, ме кöсъя адззыны».
52 Исусыс висьталiс сылö: «Мун, эскöмыт тэнö мездiс». Мортыс сэк жö пондiс адззыны да мунiс Исусыс бöрсянь.
1 Исусыс велöтчиссескöт сибалiс Ерусалим дынö. Нiя вöлiсö матын Елей керöс бокись Бетпаги да Бетани посаддэз дын. Исусыс ыстiс ассис кык велöтчисьöс:
2 «Мунö посадас, кöда веськыта тiян одзын. Пыриканыт сэк жö казялат домалöм том осёлöс, кöда вылын некин эз на пукав. Пöрччалö сiйö да вайöтö.
3 Юалас кö тiянлiсь кинкö: “Мыля тiйö сiдз керат?” – висьталö паныт: “Осёлыс колö Господьлö. Господьыс чожа иньдöтас сiйö бöр”».
4 Нiя мунiсö да адззисö öтöрись ыбöс бердö домалöм том осёлсö да пöрччалiсö сiйö.
5 Сэтöн сулалiссес юалiсö нылiсь: «Мый керат? Мыйлö пöрччалат чаньсö?»
6 Велöтчиссес висьталiсö паныт, кыдз тшöктiс Исусыс. Отирыс лэдзисö нiйö.
7 Велöтчиссес вайöтiсö чаньсö Исусыс дынö. Нiя тэчисö чаньыс вылö вевдöрись паськöмнысö, и Исусыс пуксис сы вылö.
8 Отирыс ольсалiсö паськöмсö туй кузя, мöдiккез чеглалiсö пуэз вылiсь уввез да паськöтiсö туй кузяс.
9 Одзас да бöрас муннiссес горöтлiсö: - Осанна! Господь нимöн локтiсьыс ась лоö ошкöм!
10 Миян Давид айлöн локтан ыждалöмыс ась лоö ошкöм! Ошкöм Енлö енöжын!
11 Исусыс локтiс Ерусалимö, пырис вежа керкуö да видзöтiс быдöс гöгöр. Кадыс вöлi сёр ни, сiя даскык велöтчисьыскöт мунiс Бетаниö.
12 Мöд лунас нiя мунiсö Бетанисис. Исусыс туй вылас тшыгьялiс.
13 Сiя ылiсянь казялiс корья инжир пу да сибöтчис видзöтны, оз я адззы сы вылiсь мыйкö сёйны. Кöр локтiс пу дынас, корся нем эз адззы. Эд эз на лок кад öктыны инжир.
14 Сэк Исусыс шуис пуыслö: «Öнiсянь ась некин оз сёй инжиртö». Сылöн велöтчиссес кылiсö этiйö.
15 Нiя локтiсö Ерусалимас. Исусыс пырис вежа керкуас да пондiс вашöтны сэтчинiсь вузасиссесö да небиссесö. Сiя пöрлалiс сьöм вежсиссезлiсь пызаннэсö да дудi вузалiссезлiсь лабиччесö,
16 эз лэдз новйöтны нем вежа керку пыр.
17 Сiя велöтiс нiйö: «Абу я гижöм: «Менам керкуö шусяс быдöс отир понда юрбитан керкуöн? А тiйö керит сiйö гусясись йöз понда дзебсисянiнöн».
18 Аркирейес да Енлöн гижöтö велöтiссес кылiсö этiйö да пондiсö баитны ас коласаныс, кыдз вийны сiйö. Нiя полiсö Исусыслiсь, эд быдöс отирыс чуймис сы велöтöмись.
19 Рытнас Исусыс велöтчиссескöт петiс карсис.
20 Асывнас нiя мунiсö инжир пуыс дынöт да казялiсö: сiя косьмöм вужöдз.
21 Петралö усисö тöдвылас Исусыслöн кыввес. Сiя шуис сылö: «Велöтiсь, видзöт, тэöн ёрдöм инжир пуыс косьмöм».
22 Исусыс шуис велöтчиссеслö: «Эскö Енлö.
23 Былись баита тiянлö: висьталас кö кинкö этiя керöслö: «Лэб да усь саридзö!» да оз кöвьясь сьöлöмнас, а эскас сы кыввез сьöртi лоöмлö – лоас сiдз.
24 Сiйöн баита тiянлö: эскö сылö, мый Ен сетiс ни, и лоас тiян быдöс, мый корат кеймöмöн.
25 Кеймикö лэдзö тiянлö умöля керисьлiсь греккесö, мед тiян енöжся Айныт лэдзис тiянлiсь греккезнытö.
26 Од кö лэдзö тiянлö умöля керисьлiсь греккесö, сэк тiян енöжся Айныт оз лэдз тiянлiсь греккезнытö».
27 Исусыс велöтчиссескöт локтiс бöра Ерусалимас. Кöр сiя ветлöтiс вежа керкуöт, сы дынö сибöтчисö аркирейез, Енлöн гижöтö велöтiссез да пöриссез.
28 Нiя юалiсö сылiсь: «Кытшöм вынöн тэ быдöс керан? Кин сетiс тэныт этiйö вынсö?»
29 Исусыс висьталiс нылö паныт: «Ме юала тiянлiсь öтiк тор. Висьталат кö меным, сэк ме висьтала тiянлö, кытшöм вынöн быдöс кера.
30 Иванлöн пыртöмыс вöлi енöжсянь али отирсянь? Висьталö меным».
31 Нiя ас коласаныс баитiсö: «Висьталам кö: «Енöжсянь», сiя шуас: «Мыля нö тiйö эд эскö сылö?»
32 Висьтавны я: «Отирсянь»?» Но нiя полiсö отирыслiсь, эд быдöнныс чайтiсö, Иван былись вöлi Енсянь юöртiсь.
33 Нiя шуисö паныт Исусыслö: «Ог тöдö». Сэк Исусыс висьталiс нылö: «И ме ог висьтав, кытшöм вынöн быдöс кера».
1 Исусыс пондiс баитны нылö велöтан висьттэзöн: «Öтiк морт пуктiс муö виноград пуэз, йöрйис нiйö, гарйис виноград пичкан гöп да лэбтiс вылын видзöтчанiн. Сыбöрын сiя сетiс виноград йöрсö кöртымö виноград быдтiссезлö, а ачыс мунiс.
2 Виноградлöн воан кадö мортыс ыстiс виноград быдтiссес дынö ассис отсалiсьöс, медбы босьтны ассис торсö воöм виноградсис.
3 Виноград быдтiссес кутiсö отсалiсьсö, вартлiсö сiйö да немтöг ыстiсö бöр.
4 Мортыс ыстiс мöдiк отсалiсьöс, но сiйö янöтiсö да поткöтiсö юрсö.
5 Мортыс ыстiс куимöтöс, сiйö вийисö. Унаöс ыстылiс сiя, но öтiккесö вартлiсö, мöдiккесö вийисö.
6 Медбöрын мортыслö кольччис ыстыны ассис муса зонсö. Сiя ыстiс зонсö чайтöмöн: «Повзясö вöрзьöтны менчим зонöс».
7 Но виноград быдтiссес баитiсö öтамöд коласын: «Зонкаыслö кольччас пажыть. Виям сiйö, и пажытьыс лоас миян».
8 Нiя кутiсö сiйö, вийисö да чапкисö йöр сайö.
9 Мый нö керас виноград йöр видзисьыс? Локтас да тшöктас вийны виноград быдтiссесö, а виноград йöрсö сетас мöдiккезлö.
10 Эд разь лыддьöтö Гижöтсис: – Изыс, кöдö керку лэбтiссес чапкисö, пондöтiс керкуыслiсь пельöссö.
11 Этö – Господьсянь, да чуймöтö миянöс».
12 Аркирейес, Енлöн гижöтö велöтiссес да пöриссес вежöртiсö, эд висьтыс висьталöм ны йылiсь. Нiя мöдiсö кутны Исуссö, но повзисö отирыслiсь. Сiйöн аркирейес, Енлöн гижöтö велöтiссес да пöриссес колисö сiйö да мунiсö сэтiсь.
13 Исусыс дынö ыстiсö парисейезöс да Ирöд дор сулалiссезöс, мед кыйны сiйö кылын.
14 Нiя локтiсö Исусыс дынö да шуисö: «Велöтiсь, мийö тöдам -тэ веськыт морт и он кер отир кöсйöм сьöртi. Тэ он торйöт йöзсö, веськыта велöтан Енлöн туйö. Позьö я кесарлö мынтны вот? Колö я мынтны миянлö?»
15 Исусыс тöдiс нылiсь ылöтчöмнысö да шуис паныт: «Мый кыят менö кылын? Вайö меным динар, мед ме сiйö адззи».
16 Нiя вайисö динарсö. Исусыс юалiс: «Кинлöн эстöн чужöмыс да кинлöн гижöм нимыс?» Мöддэс висьталiсö сылö: «Кесарлöн».
17 Исусыс шуис паныт: «Кесарлö сетö кесарлiсь, Енлö – Енлiсь». Нiйö чуймöтiсö сылöн кыввес.
18 Локтiсö Исусыс дынö саддукейез, кöдна эз эскö кулöммезлöн ловзьöмлö. Нiя юалiсö сылiсь:
19 «Велöтiсь, Мосей гижис миянлö: «Кулас кö кинлöнкö вон да коляс иньсö челядьтöг, ась мöд воныс гöтрасьö сы инь вылын, мед чужис кага кулöм воныс ним вылö».
20 Вöлiсö сизим вон, медодззаыс гöтрасис, но кöр кулiс, челядьсö эз коль.
21 Босьтiс сылiсь иньсö мöд воныс, но кулiс да челядьсö эз коль. Сiдз жö лоис куимöт воныскöт.
22 Гöтрасьлiсö инькаыс вылын сизимнан воныс, но челядьсö некин эз коль. Медбöрын кулiс инькаыс.
23 Кинлö сiя лоас иньöн, кöр быдöнныс ловзясö? Эд сизимнан воныслö сiя вöлi иньöн».
24 Исусыс висьталiс нылö: «Енлiсь вынсö да Гижöттэсö одö тöдö, сiйöн тiйö ылалат.
25 Кöр кулöммез ловзясö, нiя оз гöтрасьö да оз петö айка сайö. Нiя олöны енöжся ангеллэз моз.
26 Баитны кö ловзьöммес йылiсь: эд разь лыддьöтö Мосей небöгись сотчан жельнöг йылiсь? Мосейлö Еныс висьталiс: «Ме Абраамлöн Ен, Исаклöн Ен да Яковлöн Ен».
27 Еныс абу кулöммезлöн Ен, сiя ловяэслöн Ен. Тiйö öддьöн ылалат».
28 Енлöн гижöтö велöтiссес коласiсь öтiк морт кывзiс етшасьöмсö да казялiс, кыдз Исусыс бура шувлiс нылö паныт. Сiя сибöтчис Исусыс дынö да юалiс сылiсь: «Кытшöм медыджыт тшöктöмыс?»
29 Исусыс шуис сылö паныт: «Медыджытыс: «Кывзы, Израиль! Миян Господь Еныс эм öтнас Господь.
30 Радейт Господьöс, ассит Ентö, быдсöн сьöлöмнат, быдсöн ловнат, быдсöн мывкыднат да быдсöн выннат».
31 Мöдiк ыджыт тшöктöм: «Радейт матiсьтö кыдз асьтö». Этна тшöктöммезся ыджытжык тшöктöмыс абу».
32 Енлöн гижöтö велöтiсьыс висьталiс сылö: «Былись, велöтiсь! Тэ веськыта висьталiн – эм öтiк Ен, мöдiк еныс сысся абу.
33 И колö радейтны Енсö быдсöн сьöлöмöн, быдсöн мывкыдöн да быдсöн вынöн, да колö радейтны матiсьсö кыдз асьтö. Сiя быдöс сотöм да мукöд езся коланажык».
34 Исусыс казялiс сылiсь мывкыда баитöмсö да шуис сылö: «Тэ абу ылын Енлöн ыждалöминсянь». Сыбöрын Исусыслiсь некин эз лысьт юасьны нем.
35 Вежа керкуын велöтiкö Исусыс баитiс: «Кыдз Енлöн гижöтö велöтiссес вермöны шуны, Мессия пö Давидлöн Зон?
36 Ачыс Давидыс висьталiс Вежа Лов пыр: – Господь шуис менам Господьлö: Пукав веськыт ладорам, кытчöдз ог пукты коккез увтат тэныт умöльö кериссесö.
37 Ачыс Давидыс шуö Мессиясö Господьöн. Мыля сэк сiя Давидлöн Зон?»
Уна отир бура кывзiсö Исуссö.
38 Сiя баитiс нылö аслас велöтöмын: «Видзсьö бокын Енлöн гижöтö велöтiссес дынiсь. Нiя радейтöны ветлöтны кузь паськöмöн да кывзыны отир чукöртчанiннэзын пыдди пуктана кыввез,
39 пукавны еврейезлöн вичкуэзын да павжуннэз вылын одзас.
40 Нылö, кöдна куштöны дöваэзлiсь керкуэз да быдöнныс одзын дыр юрбитöны, лоас öддьöн сьöкыт мыж».
41 Исусыс пуксис паныт сьöм чукöртан доз дын да видзöтiс, кыдз отирыс тэчöны сэтчö сьöмсö. Озыр отир тэчисö уна сьöм.
42 Сибöтчис öтiк гов дöва да пуктiс кык ыргöна сьöм.
43 Исусыс корис велöтчиссесö да шуис нылö: «Былись баита тiянлö: этiя гов инькаыс пуктiс быдöннысся унажык.
44 Эд быдöнныс тэчисö сьöмсö эмбурись, сiя пуктiс абусис быдöс öктöмсö».
1 Кöр Исусыс петiс вежа керкусис, сылöн öтiк велöтчись шуис: «Велöтiсь, видзöт, кытшöмöсь иззэс да кытшöмöсь керкуэс!»
2 Исусыс висьталiс сылö: «Адззан этнö ыджыт керкуэсö? Быдöс нiя лоасö жугдöмöсь, оз кольччы эстöн из вылын из».
3 Елей керöс вылын вежа керкулö паныт пукалiкö Петра, Яков, Иван да Öндрей юалiсö Исусыслiсь:
4 «Висьтав миянлö, кöр этiя быдöс лоас. Кытшöм пас мыччалас чожа лоöмсö?»
5 Исусыс шуис: «Видзсьö бокын тiянöс öштöтiссез дынiсь.
6 Унаöн локтасö менам нимöн да унаöс бöбöтасö.
7 Кöр кылат тышкасьöммез да ны йылiсь юöррез, эд повзьö. Сiдз колö лоны, но сiя абу пом.
8 Лэбтiсяс отир вылö паныт отир, ыждалöм вылö паныт ыждалöм. Уналаын лоас мугымалöм, лоас тшыгьялöм. Сiдз пондöтчö зубыта чужтöм.
9 Тiйö лöсьöтчö. Тiянöс сетасö мыждыны. Тiянöс вартласö еврей вичкуэзын. Тiянöс ме понда сувтöтасö юралiссез да öксуэз одзын, мед тiйö висьталiт нылö ме йылiсь.
10 Помся одзжык колö нуöтны быд муэзiсь отирлö бур юöр.
11 Кöр нуöтасö тiянöс мыждыны, эд тöждiсьö одзлань асланыт кыввез йылiсь. Висьталö сiйö, мый лоас сетöм тiянлö сiя кадö. Эд тiйö од баитö, баитö Вежа Лов.
12 Вон сетас вийны вонсö, ай сетас вийны челядьсö. Челядь сувтасö паныт асланыс ай-мамлö да виясö нiйö.
13 Быдöнныс лöгасясö тiян вылö ме понда. Но кин чорыта сулалас помöдз, сiя мезмас».
14 «Кöр тiйö казялат умöлься-умöльö, кытöн сылö оз туй лоны, – ась лыддьöтiсьыс вежöртö! – сэк Юдейын олiссес мед пышшасö керöссэзö.
15 Кин коромина вылын лоас, мед оз пыр керкуö босьтны мыйкö.
16 Кин ыб вылын лоас, мед оз берт бöр босьтны ассис паськöм.
17 Умöль нiя луннэзö лоас новйöтчись да нимöтчись инькаэзлö!
18 Кеймö, мед сiя оз ло тöлöн.
19 Эд нiя луннэзö лоас сэтшöм шог, кытшöм эз вöв Енöн мусö керöмсянь öння кадöдз да оз ло сэсся некöр.
20 Эз кö Господьыс чинт нiйö луннэсö, эз мезмы сэк некин. Но бöрйöммес понда сiя чинтiс нiйö луннэсö.
21 Висьталас кö сэк кинкö тiянлö: «Видзöт, эстöн Кристос!» али: «Видзöт, Кристосыс сэтчин!» – эд эскö.
22 Локтасö бöбöтчись кристоссэз да бöбöтчись юöртiссез. Нiя мыччаласö пассэз да эмтöмторрез, мед öштöтны, позяс кö, бöрйöм отирсö.
23 Тiйö видзöтö. Ме висьталi тiянлö быдöс одзлань».
24 «Нiя луннэзö, сiя шог бöрын, шондiыс пемдас, тöлiсьыс оз сет ассис югытсö,
25 кöдзыввес усясö енöжсис, енöжся выннэс вöрзясö.
26 Сэк казяласö Мортлiсь Зонсö, кöда локтö кымöррезын ыджыт вынöн да дзардöмöн.
27 Сэк сiя ыстас ассис ангеллэсö да чукöртас нёльнан ладорсянь ассис бöрйöм отирсö, муыс дорсянь енöж дорöдз.
28 Инжир пусянь велöтчö: кöр сылöн уввес ловзьöны да лэдзöны коррез, тiйö тöдат – гожум матын ни.
29 Сiдз жö, кöр тiйö казялат – лоö быдöс менам кыввез сьöртi, тöдат – сiя матын, ыбöс дынын.
30 Былись баита тiянлö: оз кув этiя увтырыс сэтчöдз, кытчöдз оз ло этадз.
31 Енöжыс да муыс öшасö, менам кыввезö оз öшö».
32 «Этö лунсö да кадсö некин оз тöд, оз тöдö енöжын ангеллэс, оз тöд Зоныс, тöдö öтнас Айыс.
33 Видзöтö, эд узьö, эд тiйö од тöдö, кöр локтас сiя кадыс.
34 Сiя кыдз морт, кöда петö туйö, кольö керкусö аслас отсалiссезлö да быдыслö кольö ассиныс удж и тшöктö ыбöс видзисьлö лоны кок йылын.
35 Сiдзкö, лоö кок йылын, эд тiйö од тöдö, кöр локтö юрвердiсьыс, рытнас али ойшöрнас, петук кытсасикö али югдандорö.
36 Мед тöдтöг локтöмнас эз адззы тiянöс узьöмись!
37 Мый тiянлö баита, быдöнныслö висьтала: лоö кок йылын».
1 Ыджыт лунöдз да шöмтöм нянь сёян вежалунöдз кольччис кык лун. Аркирейес да Енлöн гижöтö велöтiссес кошшисö, кыдз кутны бöбöтöмöн Исуссö да вийны.
2 Нiя баитiсö: «Но оз ков кутны Ыджыт луннас, мед отирыс эз сувтö паныт».
3 Исусыс вöлi Бетаниын, лепраись веськöтöм Симон ордын. Сёйöм коста сэтчö локтiс инька да вайис сöстöм нардiсь керöм дона чöскыт дука виöн тыртöм доз. Сiя жугдiс дозсö да кисьтiс висö Исусыслö юр вылас.
4 Сэтöн пукалiссес коласiсь мукöдыс скöрмисö да баитiсö ас коласаныс: «Мыйлö эттшöм дона торсö видзны?
5 Эд позис сiйö вузавны куимсёся унажык динар вылö да сетны сьöмсö гов отирлö». Нiя шувлiсö инькаыслö.
6 Исусыс висьталiс: «Кольö инькасö, эд видö сiйö. Сiя керис ме понда бурö.
7 Гов отирыс пыр тiянкöт, асланыт кöсйöм сьöртi вермат керны нылö бурсö пыр. Ме тiянкöт абу пыр.
8 Инькаыс керис, мый вермис: мавтiс менчим вывтырöс одзлань дзебöм понда.
9 Былись баита тiянлö: быдöс му пасьта, кытöн висьтасясö этiйö бур юöрсö, висьталасö инькаыс йылiсь да сы керöм йылiсь».
10 Даскык велöтчись коласiсь öтiк, Юда Искарйот, мунiс аркирейес дынö вузавны Исуссö.
11 Нiя кывзiсö сiйö да радмисö. Кöсйисö Юдаыслö сьöм. Сiя видзчисис, кöр лöсялас кад вузавны Исуссö.
12 Шöмтöм нянь сёян кадлöн медодзза лунö, кöр начкылiсö Ыджыт лун кежö баляöс, велöтчиссес юалiсö Исусыслiсь: «Кытöн мöдан сёйны Ыджыт лунся балясö? Кытчö мунам лöсьöтны сiйö?»
13 Исусыс ыстiс кык велöтчисьöс да висьталiс нылö: «Мунö карас, пантасяс тiянлö ваöн морт. Тiйö мунö сы бöрсянь.
14 Керкуас, кытчö сiя пырас, висьталö юрвердiсьыслö: «Велöтiсьыс юалö: Кöда жырын ме аслам велöтчиссезкöт верма сёйны Ыджыт лунся балясö?»
15 Сiя мыччалас тiянлö лöсьöтöм ыджыт веськытасö мöд сувдаас. Сэтчин лöсьöтö миянлö сёян-юансö».
16 Велöтчиссес мунiсö карас. Сэтчин былись быдöс лоис сiдз, кыдз висьталiс нылö Исусыс. Нiя лöсьöтiсö Ыджыт лунся балясö.
17 Рытнас Исусыс локтiс даскык велöтчисьыскöт керкуас.
18 Нiя пукалiсö да сёйисö, Исусыс шуис: «Былись баита тiянлö: тiян коласiсь öтiк, кöда öтлаын сёйö мекöт, вузалас менö».
19 Нiя гажтöмсялiсö да сьöрсьöн-бöрсьöн пондiсö сылiсь юасьны: «Абу я ме?»
20 Сiя висьталiс нылö паныт: «Даскыксис öтiк, кöда тюкö мекöт öтiк бекöрись.
21 Мортлöн Зон мунас, кыдз гижöм сы йылiсь. Но умöль лоас Мортлiсь Зонöс вузалiсьлö. Буржык сылö, эз кö чуж».
22 Сёйтöнняс Исусыс босьтiс нянь чöвпан, басвоитiс, чегöтiс, сетiс сiйö велöтчиссеслö да шуис: «Босьтö, этiя менам яйö».
23 Сэсся сiя босьтiс юандоз, аттьö висьталiс Енлö да сетiс нылö. Сэтiсь быдöнныс юисö.
24 Исусыс шуис нылö: «Этiя менам вирö, кöда öтлаöтö отирсö Енкöт. Сiя киссяс уна йöз понда.
25 Былись баита тiянлö: ме ог ни сэсся ю виноградсис юансö татöн, юа виль юансö Енлöн ыждалöминын».
26 Енсö сьылöтöм бöрын нiя мунiсö Елей керöсö.
27 Исусыс шуис нылö: «Быдöнныт тiйö колят менö. Эд гижöм: «Ме дойда пастучитiсьсö, и баляэс пышшасö öтмöдöрö».
28 Но аслам ловзьöм бöрын ме тiянся одзжык муна Галилейö».
29 Петраыс висьталiс сылö: «Быдöнныс поди колясö тэнö, но ме ог коль».
30 Исусыс шуис сылö: «Былись баита тэныт: талун ойнас, петуклöн кыкись китсöвтöмöдз, тэ куимись суськисян ме дынiсь».
31 Но Петраыс ёнжыка шувлiс: «Кöть меным ковсяс кувны тэкöт, ог суськись тэ дынiсь». Сiдз баитiсö быдöс велöтчиссес.
32 Локтiсö Гетсеман оланiнö. Исусыс шуис аслас велöтчиссезлö: «Пукалö эстöн, кытчöдз ме юрбита».
33 Сiя босьтiс сьöрас Петраöс, Яковöс да Иванöс. Сэтчин Исусыс пондiс шогсьыны да гажтöмавны.
34 Сiя висьталiс нылö: «Менам лолö шогсьö-пессьö. Кольччö эстöн, эд онмöссьö».
35 Исусыс мунiс бокö, уськöтчис му вылас да пондiс юрбитны. Сiя кеймис: «Туяс кö, ась орддьö менö эттшöм кадыс».
36 Исусыс шувлiс: «Абба, Айö! Тэ быдöс верман. Нуöт этiйö юандозсö ме дынiсь, но эн кер менам кöсйöм сьöртi, кер аслат кöсйöм сьöртi».
37 Исусыс бертiс, адззис велöтчиссесö узянiсь да шуис Петраыслö: «Симон, тэ узян? Эн тэ вермы узьтöг пукалыштны?
38 Эд узьö, кеймö, мед эз ылöтö тiянöс. Мортлöн лолыс кöсйö керны бурö, а лысиныс сiйö керны оз вермы».
39 Исусыс бöра мунiс да кеймис нiя жö кыввезöн.
40 Сiя бертiс велöтчиссес дынö да бöра адззис нiйö узянiсь. Нылöн синнэзныс куньсисö, нiя эз тöдö, мый сылö висьтавны.
41 Исусыс ветлiс да локтiс куимöтiсь. Сiя шуис нылö: «Тiйö сё тай узят да шоччисят? Тырмас! Локтiс кад, кöр сетасö Мортлiсь Зонсö грека отир киэзö.
42 Чеччö, мунам. Матын ни менö вузалiсьыс».
43 Исусыс эшö баитiс, кöр локтiс Юда, даскык велöтчись коласiсь öтiк. Сыкöт локтiсö йöз шыпурттэзöн да зоррезöн. Нiйö ыстiсö аркирейез, Енлöн гижöтö велöтiссез да пöриссез.
44 Вузалiсьыс одзлань баитчис сетны йöзыслö пас: «Кöдö ме окышта, сiя Исусыс. Кутö сiйö да син вылiсь лэдзтöг нуöтö».
45 Юда локтiс, сэк жö сибöтчис Исусыс дынö, горöтчис: «Велöтiсь» да окыштiс сiйö.
46 Локтiсь йöзыс уськöтчисö Исусыс вылö да кутiсö сiйö.
47 Исусыскöт сулалiссес коласiсь öтiк морт кыскис шыпуртсö, öвтыштöмöн орöтiс аркирейлöн отсалiсьлiсь пельсö.
48 Сэк Исусыс висьталiс нылö: «Шыпурттэзöн да зоррезöн тiйö петiт кутны менö кыдз лёк мортöс.
49 Быд лун ме вöлi тiянкöт вежа керкуын да велöтi тiянöс, сэк тiйö менö эдö кутö. Но ась лоö Гижöттэс сьöртi».
50 Быдöнныс колисö Исуссö да пышшисö.
51 Öтiк зонка, дзир каттисьöм дöраöн, мунiс Исусыс бöрсянь. Сiйö кутiсö,
52 но зонкаыс колис дöрасö да пышшис пасьтöг.
53 Исуссö вайöтiсö юралiсь аркирей дынö. Сэтчö öксисö пöриссес, Енлöн гижöтö велöтiссес да быдöс аркирейес.
54 Петраыс ылын мунiс Исусыс бöрсянь да пырис аркирей йöрö. Сiя пуксис шонтiсьны би одзö öтлаын аркирейлöн медалöм йöзкöт.
55 Мед сетны Исуссö вийны, аркирейес да быдсöн öксяныс кошшисö Исусыслö паныт висьталiсь отирöс, но эз адззö.
56 Унаöн пöрьялiсö сы вылö, но этна висьталöммес эз лöсялö öтамöдлö.
57 Мукöдыс сувтöмöн пöрьялiсö сы вылö:
58 «Мийö кылiм, кыдз сiя баитiс: “Ме разя киöн керöм вежа керкусö, и куим лунöн ки пуктытöг сувтöта мöдiкö”».
59 Но и нылöн висьталöммес эз лöсялö öтамöдлö.
60 Сэк аркирей сувтiс шöрас да юалiс Исусыслiсь: «Мыля тэ шы он сет паныт, кöр нiя мыжалöны тэнö».
61 Но Исусыс чöлiс, эз висьтав паныт нем. Аркирейыс бöра юалiс сылiсь: «Тэ я Мессия, ошкана Енлöн Зон?»
62 Исусыс висьталiс: «Ме. Тiйö казялат Мортлiсь Зонсö Вылiсь Вынлöн веськыт ладорас пукалiсьöн да кымöррез вылöт бертiсьöн».
63 Сэк аркирейыс нетшкöвтiс-косьыштiс ассис паськöмсö да шуис: «Мыйлö миянлö колöны паныта висьталiссес сы вылö?
64 Тiйö кылiт, кыдз сiя лёкöтö Енсö. Мый тiйö висьталат?» Нiя быдöнныс тшöктiсö вийны Исуссö.
65 Мукöдыс пондiсö сьöлавны Исусыс вылö, вевттисö сылiсь чужöмсö да вартiсö. Нiя шуисö сылö: «Енсянь юöртiсь, висьтав, кин сöтiс». И аркирейлöн медалöм йöз вартiсö сылö чужöмас.
66 Кöр Петраыс вöлi аркирей йöрын, локтiс аркирейыслöн öтiк медалöм нывка.
67 Сiя казялiс шонтiсись Петрасö, видзöтiс сы вылö да шуис: «И тэ вöлiн назаретса Исусыскöт».
68 Петраыс суськисис: «Ог тöд и ог вежöрт, мый йылiсь тэ баитан». Сiя петiс йöрсис öтöр ладорас.
69 Нывкаыс казялiс Петрасö да бöра пондiс баитны сэтöн сулалiссеслö: «Этiя мортыс Исусыслöн велöтчиссес коласiсь».
70 Петраыс бöра суськисис. Недыр мыйись сэтöн сулалiссес бöра пондiсö баитны сылö: «Былись тэ ны коласiсь, эд тэ Галилейись».
71 Петраыс пондiс видчыны да ёрдчыны: «Ог тöд ме сiйö мортсö, кöда йылiсь тiйö баитат».
72 Сэк жö петукыс китсöвтiс мöдпырся. Петраыслö тöдвылас усисö Исусыслöн кыввес: «Петуклöн кыкись китсöвтöмöдз, тэ куимись суськисян ме дынiсь». Петраыс пондiс горзыны.
1 Асъяпоннас аркирейес пöриссескöт да Енлöн гижöтö велöтiссескöт быдсöн öксяннас чукöртчисö баитчыны. Кöрталöм Исуссö нiя нуöтiсö Пилат дынö.
2 Пилатыс юалiс сылiсь: «Тэ еврейезлöн öксуыс?» Исусыс шуис сылö паныт: «Тэ сiдз висьталiн».
3 Аркирейес унаторись мыжалiсö сiйö.
4 Пилат бöра юалiс Исусыслiсь: «Тэ шы он сет паныт? Адззан мымда мыжалöны тэнö».
5 Но Исусыс и этна кыввез вылö шы эз сет паныт, сiйöн Пилатыс чуймис.
6 Пилат лэдзлiс быд Ыджыт лунö öтiк пукалiсьöс, кöдö корисö лэдзны отирыс.
7 Сiя кадö пукалiс Баравва нима морт. Юралiссезлö паныт сувтöм коста вöлi вийöм морт, и Бараввасö мöдiк тышкасиссезкöт пуксьöтiсö вийöм понда.
8 Отирыс чукöртчисö Пилат дынö да пондiсö корны сiйö керны сiдз, кыдз сiя керис пыр.
9 Пилатыс висьталiс нылö паныт: «Кöсъят кö, лэдза тiянлö еврейезлiсь öксусö».
10 Сiя тöдiс, эд аркирейес вежаалöмись сетiсö сы киэзö Исуссö.
11 Но аркирейес öдззöтiсö отирсö, мед нiя корисö лэдзны Бараввасö.
12 Пилатыс бöра паныт шуис: «Мый тiйö тшöктат керны сылö, кöдö шуат еврейезлöн öксуöн?»
13 Нiя горöтiсö: «Дор сiйö крест вылö!»
14 Пилат висьталiс нылö: «Мый умöльсö керис сiя?» Отирыс öддьöнжык горöтiсö: «Дор сiйö крест вылö!»
15 Отирыс кöсйöм сьöртi Пилатыс лэдзис Бараввасö, а Исуссö тшöктiс ёна песны да дорны крест вылö.
16 Косьйöз нуöтiсö Исуссö юралiсь керку дын йöрö. Сэтчö чукöртiсö уна косьйöзöс.
17 Исуссö пасьтöтiсö кузь пемыт-гöрд паськöмö, юр вылас пуктiсö жельнöгись юркытш
18 да пондiсö янöтны сiйö: «Мед олас еврейезлöн öксу!»
19 Вартiсö сiйö юрвоманас бедьöн, сьöлалiсö сы вылö да пидзöссэз вылын копрасисö сы одзын.
20 Кöр янöтöв керисö, чöвтiсö вывсис кузь пемыт-гöрд паськöмсö, пасьтöтiсö аслас паськöмö да нуöтiсö дорны крест вылö.
21 Тшöктiсö нуöтны сылiсь крестсö кыренейса Симонöс, Öльöксанлiсь да Руплiсь айöс. Сiя мунiс боки ыб вывсянь карö.
22 Исуссö вайöтiсö Голгопа керöс вылö. «Голгопа» позьö вуджöтны «юрлы».
23 Сетiсö сылö смирнаöн сорлалöм вина, но сiя эз ю.
24 Исуссö дорисö крест вылö. Летiсö сылiсь паськöмсö, кинлö мый дöнзяс.
25 Сiйö дорисö крест вылö öкмысöт час гöгöрын асывнас.
26 Крест вылас, Исусыслöн юр вевдöрын, вöлi гижöм сылöн мыжыс: «Еврейезлöн öксу».
27 Сы дын ордчöн дорисö кык лёк мортöс, öтсö – веськытланяс, мöдсö – шульгаланяс.
28 Лоис Гижöт сьöртi: «Лёк йöзкöт öткодьсьöтiсö».
29 Йöзыс мунiсö бокöттяс, лёкöтiсö, öвтiсö юррезнаныс да шувлiсö: «Этiйö тэ! Вежа керку жугдiсь да куим лунöн сувтöтiсь!
30 Мезды асьтö ачыт да лэдзчы крест вылiсь».
31 Сiдз жö аркирейес да Енлöн гижöтö велöтiссес янöтiсö Исуссö да баитiсö öтамöдлö: «Мöдiккесö мездiс, асьсö мездыны оз вермы!
32 Кристос, Израильлöн öксу, ась лэдзчö öнi крест вылiсь. Адззылам кö лэдзчöмсö, сэк сылö эскам». И сы дын ордчöн дорöм морттэс янöтiсö сiйö.
33 Луншöрнас быдсöн му пасьта пемдiс. Пемытыс сулалiс куим час гöгöр.
34 Куимöт час вылас Исусыс ёна горöтiс: «Элой, Элой! Лама сабактани?», мый позьö вуджöтны: «Енöй, Енöй! Мыля тэ менö колин?»
35 Сэтöн сулалiссес кылiсö Исусыслiсь кыввесö, мукöдыс баитiсö: «То тай, Иллясö корö».
36 Öтiк морт котöртiс кöтöтны шöммöм винаöн торк, кышалiс сiйö бедь вылö да сетiс Исусыслö юны. Мортыс шуис: «Видзöтам, локтас я Илляыс лэдзны сiйö крест вылiсь».
37 Исусыс горöн горöтiс да лэдзис ловсö.
38 Вежа керкуын ыбöс дöраыс косясис шöри вылiсянь улöдз.
39 Сё косьмортöн веськöтлiсь сулалiс паныт Исусыслö. Кöр веськöтлiсьыс казялiс, кыдз Исусыс лэдзис ловсö, горöтчис: «Былись этiя мортыс вöлi Енлöн Зон».
40 Инькаэс коласын, кöдна видзöтiсö ылiсянь лоöмыс сьöрын, вöлi магдаласа Мари, учöтжык Яковлöн да Йöвсейлöн Мари мамыс да Саломе.
41 Нiя ветлöтiсö Исусыскöт Галилейöт да отсалiсö сылö. Сэтöн вöлiсö уна мöдiк инькаэз, кöдна тшöтш локтiсö сыкöт Ерусалимö.
42 Вöлi шоччисян одзын лун. Рытнас
43 локтiс Ариматейись Öсип, öксянiсь пыдди пуктана морт. Сiя видзчисис Енлiсь ыждалöмсö. Öсип повтöг пырис Пилатыс дынö да корис Исусыслiсь шойсö.
44 Пилатыс чуймис, кöр кылiс Исусыслöн чожа кулöм йылiсь. Сiя корис сё косьмортöн веськöтлiсьöс да юалiс сылiсь: «Важын я кулiс?»
45 Пилатыс тöдмалiс веськöтлiсьыссянь Исусыслöн кулöм йылiсь да тшöктiс сетны шойсö Öсипыслö.
46 Мöдыс небис дöра, лэдзис Исусыслiсь шойсö, каттис дöраас да пуктiс сiйö изö гарйöм шойнагуö. Öсипыс тупкис шойнагусис осьтасö изöн.
47 Магдаласа Мариыс да Йöвсейлöн Мари мамыс видзöтiсö, кытчö дзебисö Исуссö.
1 Шоччисян лун бöрын магдаласа Мариыс, Яковлöн Мари мамыс да Саломеыс небисö чöскыт дука ви мавтны Исуссö.
2 Одз асылöн, шондi петiкö, нiя локтiсö шойнагу дынас.
3 Инькаэс баитiсö ас коласаныс: «Кин вештас миянлö изсö шойнагу осьта весьтсис?»
4 Нiя видзöт керисö да казялiсö, мый ыджытся-ыджыт изыс вештöм.
5 Инькаэс пырисö шойнагуас да казялiсö чочком паськöма зонкаöс, кöда пукалiс веськытланяс. Мöддэт шардiсö.
6 зонкаыс шуис нылö: «Эд полö. Тiйö кошшат назаретса Исусöс, кöдö дорисö крест вылö. Сiя ловзис, татöн абу. Видзöтö, эстöн куйланiныс, кытчö сiйö пуктылiсö.
7 Мунö, висьталö сы велöтчиссезлö да Петраыслö: Исусыс тiянся одзжык мунас Галилейö. Кыдз висьтавлiс тiянлö, сiйö адззат сэтчин».
8 Инькаэс петiсö да котöртiсö шойнагу дынсис. Нiя шардöмсяняныс некинлö нем эз висьталö.
9 Шоччисян бöрся медодзза лунö асъяпоннас Исусыс ловзис. Сiя медодз мыччасис магдаласа Марилö, кöдалiсь вашöтiс одзжык сизим лёк лов.
10 Инькаыс мунiс да юöртiс Исусыслöн ловзьöм йылiсь нылö, кин вöлi Исусыскöт одзжык. Öнi нiя шогсисö да бöрдiсö.
11 Этна отирыс эз эскö Исусыс ловзьöмлö. Нiя сiдз жö эз эскö, мый Мариыс адззылiс сiйö.
12 Сыбöрын Исусыс мыччасис мöдiк мыгöрöн ны коласiсь кык мортлö, кöр нiя мунiсö кар сайö.
13 Мöддэс бертiсö бöр да висьталiсö Исусыс йылiсь мöдiккезлö, но и нылö эз эскö.
14 Медбöрын Исусыс мыччасис дасöтiк велöтчисьлö сёйтöнняныс. Сiя шувлiс нылö эскытöм понда да чорыт сьöлöммез понда. Шувлiс, мыля эз эскö отирлö, кöдна адззылiсö сiйö ловзьöм бöрас.
15 Исусыс висьталiс нылö: «Мунö да быдсöн му пасьта быдöнныслö нуöтö бур юöрсö.
16 Кин эскас да пыртчас, сiя мезмас. Кин оз понды эскыны, сiя лоас мыжйöм.
17 Эскиссеслö лоасö сэтшöм пассэз: Менам нимöн пондасö вашöтны лёк ловвез, пондасö баитны виль кыввезöн.
18 Кутасö кö кыйезöс али юасö кытшöмкö кулантор, нылö этаись нем оз ло. Нiя пуктасö киэзнысö шогалiссез вылö, и мöддэс веськаласö».
19 Висьталiс этадз Господь Исусыс, и босьтiс сiйö Еныс дынас енöжö. Исусыс пуксис Еныслö веськыт бокас.
20 Исусыслöн велöтчиссес мунiсö да нуöтiсо бур юöрсö быдлаö. Господь отсалiс нылö да вынсьöтiс бур юöрсö быдкодь пассэзöн.