Выбрать язык
Книги Ветхого Завета
Книги Нового Завета
с русским текстом1Моравтомань ветицянтень. Азоронь уренть, Давидэнь, морозо, конань сон морызе Азоронтень сестэ, зярдо Азорось идизе сонзэ весе душмантнэнь ды Саулонь*а эйстэ. Сон мерсь:
2Азоро, вечктян Тонь!
Тон монь вием!
3Азорось – монь кекшема таркам.
Сон монь ванстыцям ды менстицям.
Пазось – кевпандом, Сонзэ экшс мон кекшнян.
Сон монь ваксаром ды вием, конась монь иди ды кекши.
4Мон тердьса Азоронть, улезэ Сон шназь,
ды душмантнэде идеван.
5Куломань пиштематне тапардымизь-кутмордымизь,
ёмавтыця чадыведтне каявсть лангозон.
6Тоначинь рисьметне тапардымизь-кершимизь,
куломань терттне ульнесть икелень.
7Неть монь стакачитнестэ тердия Азоронть
ды пшкадинь монь Пазонтень.
Сон маризе вайгелем [иневанькс] озкудостонзо,
ды монь рангомась пачкодсь Сонзэ пилес.
8Сорнозевсь ды лыказевсь модась,
сорк тейсть ды айгевсть пандонь юртнэ –
кирвазсь [Пазонь] кежесь.
9Сонзэ кеженть эйстэ кепететсь качамо.
Кургостонзо лиссь пултыця тол.
Кирви ёндолт певерсть Эйстэнзэ.
10Сон чиремтизе менеленть ды валгсь –
чопода-раужо пельть Сонзэ пильгензэ ало.
11Сон ардсь ласте херувимтнень лангсо,
ливтязь ливтясь ды салавсь вармань сёлмотнень лангсо.
12Чоподанть теизе Эсензэ перька вельтямокс,
Эсензэ прянзо кекшизе потмура ведень чопода пельсэ.
13Икелензэ молиця цитнемадонть Сонзэ пельтне валсть
цярахман ды палыця седь.
14Азорось зэрнезевсь менельсэнть,
Верепазось нолдызе Эсь вайгелензэ
цярахман ды кирви ёндол марто.
15Нолдынзе Эсь налонзо ды сравтнинзе сынст,
кучинзе ламодояк ламо ёндолонзо ды ёртнинзе сынст.
16Азоро, тандавтниця Тонь вайгельденть
ды Тонь кежей лексемадонть
панжовсть ведень отьматне
ды штавтовсть модамасторонть юронзо.
17Сон верде венстизе кедензэ, каподимим монь
ды таргимим чадыведьстэнть.
18Сон олякстомтымим монь виев душманонть эйстэ,
монь авечкицятнень эйстэ, конат ульнесть мондень пек виевть.
19Сынь кепететсть-каявсть лангозон,
зярдо мон ульнинь покш стакачисэ,
ансяк Азорось ульнесь монень нежекс.
20Сон ливтимим монь олячис ды идимим,
эдь Сон путы монень паро мель.
21Азорось макссь монень видечим коряс,
казимим монь ванькс тевень коряс.
22Мон ванстынь Азоронть невтевть китнень
ды зярдояк эзинь ульне Пазонть икеле зыяновокс.
23Весе Сонзэ кармавтовкстнэ*б монь икеле,
Сонзэ аравтовкстнэнь мельга мон молян свал.
24Мон ульнинь ваньксэкс Сонзэ икеле
ды ванстынь прям зыянонь теемадо.
25Ды Азорось макссь монень видечим коряс,
ванькс тевень коряс Сонзэ сельмензэ икеле.
26Седеймарицянть марто Тон тейнят седеймарямонь путозь,
чумовтомо ломаненть марто – чумовтомочинзэ коряс,
27ваньксэнть марто – ваньксстэ,
а вана ёжовгалицянть марто – ёжовгалеманзо коряс.
28Тон идят лепштязь ломантнень,
ды, мекевланг, каштансто ваныця сельметнень покордат.
29Тон, Азоро, паловтат монь штатолом.
Пазом валдомты монь чоподанть.
30Тонь марто мон изняса ушмонть*в,
монь Пазонть марто ютан сэрей пирявксонть велькскаяк.
31Пазонть кизэ асатыкстэме, Азоронть валозо ванькс.
Сон ваксар весенень, кить кемить-нежедить Сонзэ лангс.
32Кие Пазось, Азордонть башка,
ды кие минек ванстыцясь, Паздонок башка?
33Пазось карксы монь вийсэ
ды теи монь китнень видекс.
34Сон теи монь пильгетнень эрязакс-виевекс, кода сёканень*г,
ды мон кеместэ аштян сэрей таркатнесэ.
35Сон тонавты монь кедтнень тюреме,
мик кшнинь налчирькеськак мендяви монень.
36Тон, Азором, максык монень Эсь идема ваксарот,
Тонь вить кедесь кирди монь,
Тонь лезксэсь теи эйсэнь инекс.
37Тон эскелявтат монь келей таркава,
а чатазевить монь пильгень.
38Мон пансян эсень душмантнэнь мельга, ды сасасынь сынст
ды а велявтан мекев, зярс сынст а маштнесынь.
39Правтан эйсэст, ды сынь а стявить.
Сынь пракшныть монь пильге алов.
40Тон максыть монень вий ветямс тюрема
ды правтыть монь пильге алов сетнень, кить кепететсть монь лангс.
41Тон кармавтыть душмантнэнь оргодеме монь эйстэ.
Мон маштнян монь авечкицятнень.
42Сынь вешить лезкс, ансяк идицяст арась.
Сынь рангить Азоронтень – Сон эйсэст а мари.
43Мон сравтнесынь сынст теке вармасо челькенть*д,
чалгсесынь сынст теке ульцянь рудазонть.
44Тон менстимик ломантнень кепсевемадост,
путымик лия раськетнень прявтокс.
Раськетне, конатнень а содылинь, ней важодить монень.
45Монь ланга кулянть коряс уш сынь кунсолыть монь,
лия масторонь ломантне вечкевтить пряст монь икеле.
46Вийтеме ды сорнозь лиснить лия масторонь ломантне
эсест кемекстазь кекшема таркастост.
47Азорось эри!
Шнамо Тензэ, монь ванстыцянтень!
Улезэ кепедезь Пазось, монь идицясь!
48Пазось панды чумо монь кисэ душманон туртов
ды изни монь туртов раськеть.
49Сон менсти монь душмантнэнь эйстэ.
Тон кепедимик каршо молицятнень лангсо
ды идимик монь кежей лепштицядо.
50Тень кисэ карман шнамо Тонь, Азоро, лия раськетнень ютксо
ды карман моравтомо Тонь лементь.
51Тон максат ине изнямот Эсеть кочкавт инязоронтень,
путат седеймарямо Эсеть вадевтентень, Давиднэнь,
ды сонзэ раськенть поладыцятненень пингеде пингес.
Шнамо
*а 17:1 Саул – Израилень васенце инязорось, кона пансесь Давидэнь.
*б 17:23 кармавтовкс – заповедь
*в 17:30 ушмо – войско
*г 17:34 сёкань – олень
*д 17:43 чельке – тесэ: пыль, прах
Глава 17