Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
ОЗНОМАМОРОТ
Глава 16
Азоронть лангс кемема
Давидэнь озномазо.
1Азоро, марик монь энялдомам видечим кисэ,
кунсолык лайшемам-авардемам –
сон аволь кенгелиця кургосто.
2Судямак монь видечим коряс,
Тонь сельметь неить видечинть.
3Тон варчавтник-терявтник седеем, содавтымик монь ветькак,
ванымик монь эрьва ёндо ды мезеяк берянь эзить муе.
Монь арсематне а явить валон эйстэ.
4Мон кунсолыя Тонь валот,
ломанень тевтнесэ эзинь моле лепштицятнень мельга.
5Кемекстамак монь Эсеть кинть лангсо,
кадык а нолажтыть монь пильгень сонзэ лангсто.
6Пазом, Тонеть мон пшкалян, Тон марясамак монь.
Чиремтик пилеть монь ёнов ды марить валон.
7Невтик Тон Эсеть седеймарямот, Тон,
конась иди каршот молицятнень эйстэ весе сетнень,
кить кемить-нежедить Тонь лангс.
8Ванстомак монь сельме эрьгеть ладсо,
сёлмо сулейсэть кекшемак монь
9зыяновтнень эйстэ,
конат кайсевить монь лангс.
Ванстомак монь оймень душмантнэде,
конат эрьва ёндо пирить монь.
10Сынст седеест кевензасть,
ды валосткак ёвтыть покшкавтнезь.
11Сынь ней якить монь пильге чалгавкска ды пиримизь монь,
сялгизь сельмест лангозон, бажить модалангс правтомон.
12Сынь левень кондят, конат анокт каявомс,
од левень кондят, конат кекшнить цитёрькс таркасо.
13Азором, стяк, сыргак монь душмантнэнь каршо
ды правтыть сынст.
Идемак монь Эсь торосот зыяновтнень эйстэ.
14Азоро, идемак Эсеть вийсэ те модалангонь ломантнень эйстэ,
кинь уцяскаст ансяк те эрямосонть.
Тон сынст андыть ламо паросо,
эйкакшосткак андыть,
ды нетнеяк эсест эйкакштненень мезеяк кадыть.
15Мон вана карман ваномо видечисэ Тонь чачот лангс.
Сыргоземстэ мельспаро ули монень Тонь чачот эйстэ.
Шнамо
Глава 16
