Выбрать язык
Книги Ветхого Завета
Книги Нового Завета
с русским текстом1Давидэнь псалмась. Мельс ледстямо оймсемачиде.
2Азоро, аволь кежсэть ливтемак лангс,
аволь ацирьгадомасот пандт тень чумонть.
3Тонь налтнэ пезнасть монь эйс,
ды Тонь стака кедесь монь лангсо.
4Монь рунгосо арась шумбра тарка Тонь кеждеть,
арась оймамо монь ловажатнесэяк эсень пежеттнеде.
5Прянек-пильгенек вельтимизь монь пежеттне,
сынь понгавтовсть монь лангс, теке стака канст.
6Чиниякшныть ды сыявтыть монь аржотне*а
эсень превтемечидень.
7Мон мендявинь ды допрок кичкерьгадынь,
чинь-чоп якан ды авардян эсень кувалма.
8Псись чавозь чави эйсэнь карксамо видьга,
ды арась рунгосон вейкеяк шумбра тарка.
9Лавшомгадынь мон ды допрок яжазян,
верьга вайгельть ранган седеень сэредькстэнть.
10Азоро, Тон содасыть весе монь мелень-бажамон,
ды монь кувсематне-вайкстнематне Тонь эйстэ апак кекше.
11Монь седеем сорны-сэреди, вием маштсь,
сельменьгак лоткасть цитнемадо.
12Монь кажонть*б кувалма ялган-оян потыть эйстэнь,
малавикстнэяк аштить веёно.
13Монь ойменть вешницятне путнить кундамкат-пистенть.
Монень зыянонь арсицятне алтыть куроконь кулома
ды эрьва чистэ арсить апаро тевть.
14А вана мон, теке амариця, а марян,
теке акортыця, а панжтнян кургом.
15Мон теевинь истямо ломанекс,
кие а мари ды кинень а ёвтави каршо вал.
16Азоро, Тонь лангс мон кеман-нежедян.
Азоро, монь Пазом, Тон ёвтат монень каршо вал.
17Мон меринь: «Кадык а кеняркшныть [монь душмантнэ],
конат нарьгить лангсон, зярдо монень сави пупордямс».
18Мон курок пран,
ды седейризксэм ве липкескак а ойми.
19Мон видькстан эсень чумом кувалт
ды ризнан-янксян эсень пежетень кисэ.
20А вана монь душмантнэ эрить ды виевгалить,
ламолгалить сетне, кить а вечксамизь,
куш тенень арасть тувталт.
21Сеть, конат монень кежсэ пандыть паронть кисэ,
тюрить каршон сень кисэ, мекс мон бажан паронтень.
22Азоро, монь Пазом, илямак кадо,
иля аште эйстэнь васоло.
23Капшак лездамо тень, Азоро, монь Идицям!
*а 37:6 аржо – рана
*б 37:12 кажо – беда, несчастье
Глава 37