Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
ОЗНОМАМОРОТ
Глава 38
Ломанень эрямо шкась пек нурькине
1Моравтомань ветицянтень, Идифумнень. Давидэнь псалмась.
2Мон меринь эстень:
«Карман пштистэ ваномо эсень китнень мельга сень кисэ:
а теемс пежетть кельсэнь,
а панжтнемс кургом, зярс зыяновось икелень».
3Мон ульнинь акортыця ды вайгельтеме,
натой пародонтькак чатьмонинь.
Седейсэредьксэм ялатеке виевгалесь ды кассь.
4Седейсэнь кирвазсь тол,
арсемангак ульнесть теке толкельть.
Сестэ мон кортазевинь:
5”Азоро, ёвтык монень кулома шкам, зяро карман эрямо,
макст монень содамс, нурькине-аволь эрямом.
6Вана Тон максыть монень эрямо
вейке эли кавто ваксонь кувалмосо,
монь пингесь Тонь икеле прок мезеяк арась.
Виде, эрьва ломанень эрямось – те ансяк варма ялтке*а.
7Алкукс, ломанесь яки теке сулей,
стяко сон мелявты-майси,
пурны ули-паро ды а соды,
кинень те весе кадови.
8Азоро, мезе ней монень учомс?
Мон весе седейсэ нежедян ансяк Тонь лангс.
9Идемак весе берянь тевдень,
илямак максо нарьгамс превтеменень.
10Монь кундатотсь келем, а панжтнян кургом.
Содан, весе те моли Тонь эйстэ.
11Саить монь лангсто Тонь кучовт кажотнень,
мон эль кулан-ёман Тонь кедеть вачкодькстнэде.
12Бути Тон кармат ломаненть лангс ливтеме
ды чумонзо пандомо зыянов тевензэ кисэ,
сестэ сонзэ мазычись калады теке коцт, конань сэвизь кить.
Эдь эрьва ломанень эрямось – те ансяк варма ялтке.
13Азоро, марик озномам ды кунсолык авардемам.
Иля чатьмоне сельведень каршо,
эдь мон Тонь кедьсэ теке инже, лия таркасто сыця,
кода весе монь покштятне-тетятне.
14Саить эйстэнь чумондыця сельметь,
ули мелем кенярдомс эрямосто туемадон икеле –
аволь сестэ, зярдо а карман улеме”.
*а 38:6 варма ялтке – шожда вармине
Глава 38
