Выбрать язык
Книги Ветхого Завета
Книги Нового Завета
с русским текстом1Моравтомань ветицянтень. Кореень буенть псалмась.
2Кунсолынк тень, весе раськетне,
маринк тень, масторлангонь весе эрицятне,
3содавикстнэ ды асодавикстнэ,
истя жо сюпавтнеяк ды кажовтнеяк!
4Монь кургосто лисить содамочинь валт,
седейсэньгак – превейчинь арсемат.
5Мон кунсолоса валмеревксэнть домкачинзэ,
арфасо седязь, панжса содамоёвксонть смустензэ:
6«Мекс монень пелемс стака шкасто,
зярдо зыянось моли мельган, пири монь эйсэ?»
7Зыянонь теицятне кемить эсь виест лангс
ды шныть пряст эсь покш сюпавчисэст.
8Ансяк ломанентень кодаяк а идеви-рамави эсь малавиксэзэ,
а максови Пазонтень кисэнзэ рамамонь питне.
9Сонзэ оймензэ идемась-рамамось пек питней,
ды те а тееви зярдояк.
10Кияк а эри пингеде пингес,
ялатеке понги калмос.
11Эрьвась неи: превейтнеяк кулыть,
истя жо кулыть-ёмить чаволатне ды превтеметне,
ды кадсызь ули-парост лиянень.
12Эсь пачкаст сынь арсить:
кудост кармить аштеме пингеде пингес,
эрямо таркасткак – буестэ буес,
ды эсь модаст туртов сынь путыть эсест лемест.
13Ансяк ломанесь, кодамо содавикс илязо уле,
аволь пингеде пингень, сон ракша ладсо кулы-ёми.
14Те сынст кись – превтеметнень ки.
Те кияванть ютыть мельгаст молицятнеяк,
конатнень мельс тукшныть сынст валост.
15Печкемс саезь реветнень ладсо сынь алтазь тоначинтень.
Куломась карми ванстомо сынст.
Валске марто виде ойметне кармить улеме сынст лангсо азорокс.
Сынст рунготне наксадыть-ёмить.
Сынст эрямо таркаст – тоначись.
16Ансяк Пазось идесы-рамасы монь ойменть
тоначинь отьманть кедьстэ.
Сон сайсамам Эстензэ.
17Илязо сявадо сельметь, зярдо ломанесь сюпалгады,
ды ламолгали сонзэ кудонзо ули-парось.
18Куломсто сон мартонзо мезеяк а саи,
сонзэ сюпавчись а туи мельганзо калмос.
19Кадык эрямстонзо сон лови эсь прянзо уцяскавокс,
ды кадык ломантне тень кисэ шныть эйсэнзэ,
мекс тевензэ молить ладс,
20ялатеке сон моли эсензэ тетятненень,
таркантень, косо зярдояк уш а неить валдо.
21Ачарькодиця ломанесь, кодамо ине илязо уле,
ракша ладсо кулы-ёми.
Шнамо
Глава 48