Выбрать язык
Книги Ветхого Завета
Книги Нового Завета
с русским текстом1Моравтомань ветицянтень. Давидэнь псалмась2се шкадонть, зярдо Натан пазмарицясь сась Давиднэнь, кона седе икеле Вирсавия марто совась пежетьс.
3Пазом, нолдык чумом Эсь седеймарямот коряс
ды нардыть монь зыянов тевень Эсеть ине парочить коряс.
4Шлик монь эйстэ весе чумочим,
ванськавтомак пежетень эйстэ.
5Эдь мон чарькодьсынь весе апаро тевень,
ды монь пежетесь свал икелень.
6Тонь каршо, ансяк Тонь каршо, мон теинь пежеть,
теинь сень, мезенть Тон ловат зыянокс.
Тон видеят Эсь чумондома валсот
ды ваньксат Эсеть судсот.
7Уш чачома шкастон монь лангсо пежетть,
авань пекиямо шкастонть мон пежетеван.
8А вана Тонеть вечкеви седеень видечись,
ды весе оймеёжом Тон валдомгавтат превейчисэть.
9Пургсемак монь иссопсо*а, ды улян ваньксэкс,
шлямак монь, ды улян ловдо ашокс.
10Макст монень марямс кеняркс ды эрьгелема,
ды мон пештяван кеняркссо, куш Тон монь яжимик-тапимик.
11Велявтык чачот монь пежеттнень эйстэ
ды нардыть весе монь берянь тевтнень.
12Пазом, тейть монь эйс ванькс седей,
одкстомтык ды теик кемевиксэкс оймем.
13Илямак пане монь Эсь чачот икельде,
ды иляк сае Эсеть Иневанькс Оймеялтонть*б монь эйстэ.
14Максык монень одов идемань кенярксонть
ды кемекстамак монь азорксчинь Оймеялтсот.
15Пежетевтнень тонавтсынь Тонь китненень,
ды зыяновтне велявтыть Тонеть.
16Пазом, идиця Пазом,
ванстомак монь верень валомань пежетенть эйстэ,
ды монь келесь шнасы Тонь видечинть.
17Азоро, панжик монь кургом,
ды монь кургось шнатанзат Тонь.
18Мон кандовлинь Теть анокс,
ансяк аноксось Тонь мельс а тукшны,
пултавксонтеньгак мель а путат.
19Пазонтень мельстуиця аноксось –
те синдезь оймесь.
Синдезь ды томбазь седеенть Тон, Пазом, а паньсак.
20[Азоро,] Эсеть паро мелеть коряс тейть паро Сиононтень.
Кепедик одс Иерусалимень ошпирявтонть*в.
21Сестэ таго туить мелезэть аравтозь анокстнэ,
пултавкстнэ ды целанек Тонеть путозь кандовкстнэ.
Сестэ путсызь Тонь алтаренть лангс вазтнэнь.
Шнамо
*а 50:9 иссоп – сэрей тикше, кона ульнесь эрявиксэкс еврейтнень аноксонь пултамонь ды ванськавтомань койтнесэ-кирдатнесэ
*б 50:13 Иневанькс Оймеялт – Святой Дух
*в 50:20 ошпирявт – крепостная стена
Глава 50