Выбрать язык
Книги Ветхого Завета
Книги Нового Завета
с русским текстом19
1Сельметь илязо сявадо апаро ломань лангс,
иля бажа улемс сынст ютксо.
2Эдь сынст превсэ-мельсэ – нарьгамо,
сынст келест-валост – ансяк зыяндо.
20
3Покш превейчисэ кудось стявтови,
чарькодьксчисэ сон кемекстави.
4Содамочись пешти кудопотмонть
питней ды кенярдовтыця ули-паросо.
21
5Кие превей, се нардев,
кинь улить содамочинзэ, се ламолгавты виензэ.
6Секс тюремат ветяк арсевтезь:
изни се, кинь улить превс ламо путыцянзо.
22
7Превтементень превейчись а чарькодевикс:
ошонь орта лангсо пурнавозтнень ютксо кургозояк а панжови.
23
8Кие арси тейнемс зыян,
сень лемдить салава сускицякс.
9Чаволань арсемась – те пежеть,
ды визькстэмесь-нарьгицясь кельмевти ломанень седейть.
24
10Бути ойметь лавшомсь кажонь само чистэ,
сестэ тон алкукс нардевтемат.
25
11Олякстомт куломас максозетнень!
Идек маштомас пачтявицятнень!
12Тон, паряк, меревлить: «Те аволь минек тевесь!».
Арсят, Седеень Варчавтницясь а чарькодтянзат?
Эрямот мельга Ваныцясь весемеде соды,
ды Сон эрьвантень максы тевензэ коряс.
26
13Цёрам! Ярсак медте, эдь сон пек тантей,
ды керяз медте, кона ламбамо тонь келентень.
14Содак: покш превейчиськак истямо тонь ойментень.
Бути муик сонзэ, тонь карми вандынь чить,
ды седейнежедьксэтькак а ёми.
27
15Теке пазтомо, зыян иля арсе видечисэнть кудонзо каршо,
иляк яжа-тапа сонзэ эрямо тарканзо.
16Эдь видечисэсь сисемксть пры ды одов сти,
пазтомотне вана прыть кажос-ёмамос.
28
17Иля кенярдо, зярдо пры тонь ятот,
кадык а кенярды седееть, зярдо сон пупорди.
18Неиндерясы тень Инешкипазось – ловсы апарокс
ды сайсы кежензэ тонь ятонть лангсто.
29
19Иля кежиявтне зыянонь теицятнень лангс,
сельметь иляст сявадо пазтомотнень лангс.
20Эдь зыянонть арась вандынь чизэ,
ды пазтомотнень штатолост апак учо мади.
30
21Цёрам! Пельть Инешкипаздонть ды инязордонть,
сынст каршо молицятнень марто иля вейсэньгале.
22Эдь Инешкипазонть ды инязоронть пельде апак учо сы ёмамо:
а чарькодяткак, кодамо кажо таргить лангозот.
23Вана пек превеень лия валтнэ:
Cудямсто киненьгак башка мелень путомась – аволь паро тев.
24Кие мери чумонь теицянтень: «Тон а чумат»,
сень кармить сюдомо раськетне, вельть а вечкеме буетне.
25Сонзэ чумондыцянть вана кармить вечкеме,
лангозонзо валги чанстямо-парочи.
26Виде кортамось –
теке турвас паламо.
27Васняяк теить кардазъютконь теветь
ды прядыть паксянсетнень.
Ансяк теде мейле пурнак эстеть кудораське.
28Киненьгак иля уле кенгелиця неицякс-яволявтыцякс,
кадык а ули тонь кургсо манчема.
29Иля арсе: «Кода сон тейсь монь марто,
истя монгак теян, пандса тензэ тевензэ коряс».
30Ютынь нузякс ломаненть пакся чирева,
те превтементь винаумарь пире вакска,
31неинь: весе пиресь пупиця тикше потсо,
вельтявсь пиципалакссо-чудожовсо,
кевень пирявксоськак лондадсь.
32Мон варштынь ды арсезевинь,
ванынь ды сынь превс-чарькодемас:
33бути оштё аламошкас удат, зярскак нувсят,
мейле зярскак кедень кундазь мадезь аштят –
34вант, сы теть кажовчись, теке азгондиця-нельгениця,
ды мутанзат арасьчись, теке маштомапель марто салыця.
Глава 24