Выбрать язык
Книги Ветхого Завета
Книги Нового Завета
с русским текстом1Вана Соломононь валмеревкстнэ, конатнень пурнызь-ванстызь Езекиянь, Иудань инязоронть, ломанензэ.
2Пазонть инексчись – салавачинть кекшемасо,
инязоронть инексчись – салавачинть чарькодемасо.
3Кода менель тёкшось, кода мода потмонь отьмась,
истя инязоронь седеесь – а чарькодевикст.
4Саить сиястонть човорявкстнэнь,
ды сиянь чавиця гизаенть*а кедь алдо лиси мазый кедьге.
5Саик инязоронть эйстэ пазтомонть,
ды инязорксчись кемекстави видечисэ.
6Иля покшолгавтне прят инязоронть икеле,
инетнень юткскак иля стякшно-эцне.
7Седе паро ули, зярдо мерить теть: «Сак седе верев»,
аволь кода алов валгстадызь чирязонть икеле.
Куш тень неик эсеть сельмсэ,*б
8иля капша тевенть судс пачтямо. –
Сестэ мезе кармат тееме ванкшноманть прядомадо мейле,
зярдо чумочить панжозь лия неицясь ветятанзат визьксчамас?
9Ломаненть марто пелькстак ансяк эсь теветь коряс,
лиянь салавачитнень илить панжо.
10Панжсыть – тень марицясь визьксэс эсеть пачтятанзат,
сестэ паро леметь уш а велявтсак.
[Вечкемась ды ялгаксчись олякстомтыть,
ванстыть сынст эсеть туртов,
илязат тееве покордамо таркакс.
Вадрясто-парсте ванстыть эсеть килангот.]
11Шкастонзо ды тарказонзо ёвтазь валось –
теке сиянь кедьгесэ сырнень умарь.
12Кода сырнень пилекстнэ
ды ванькс сырнестэ теезь кирьгашась –
истя мариця пилентень превеень мурнемась.
13Кода нуема шкасто экше ялтось,
истя кучицянстэнь кучозесь, кона парсте топавты тевензэ:
сон азоронстэнь канды кеняркс.
14Кодат пиземевтеме пельтне ды вармась,
истямо ансяк казнень алтамосо прянзо шныцясь.
15Коронь кирдемась чирязонтькак седеймарямос велявтсы,
чевте валтнэ кевень седей калавтыть.
16Муить медь – сэвть эйстэнзэ зяро мелеть,
ансяк иля ярса нильтякадомазот-уксновомазот.
17Вельть сеедьстэ иля яксе ялгать кудоскак –
сонгак илязо нильтякадо эйстэть ды илязо карма пек а вечкеметь.
18Кодамо цётмарось, торось, пшти налось –
истямо малавиксэнзэ каршо кенгелиця неицясь-яволявтыцясь.
19Кодамо наксадо пейсэ поремась, кодамо лавшо пильгсэ якамось,
истямо кажонь чистэ аволь кемевикс ломаненть лангс нежедемась.
20Кодамо якшамо чистэ оршамопелеть лангстот ёртомась,
кодамо аржонть лангс уксусонь каямось,
истямо ризныця седеенть туртов морыцясь.
[Кодат сэвиця китне оршамопелентень ды сукстнэ чувтонтень,
истя ризксэсь канды зыян седеентень].
21Ятот вачодо – андык,
сась симемазо – симдик.
22Истя [тень теезь] тон пурнат-каят прязонзо ченярдыця тонолт,
а вана тонь тень кисэ Инешкипазось казтянзат.
23Якшамо ёнксонь вармась канды пиземе,
кенгелицянь келесь – кежейгалиця варштавкст.
24Машнетиця ни марто паро кудосо эрямодонть
седе паро эрямс латонь ужосо.
25Кодамо симемавтомо майсицянтень кельме ведесь,
истямо васоло масторсто сыця паро кулясь.
26Кодамо бутралгавтозь лисьмапрясь,
кодамо рудаскавтозь лисьмась,
истямо видечисэсь, кона сорны-кавтолды пазтомонть икеле.
27Кода берянь сэвемс вельть ламо медь,
истя а вадря вешемс эстеть шнамо.
28Кодамо калавтозь, пирявкстомо ошось,
истямо ломанесь, конанень а кирдеви эсь прязо.
*а 25.4 сиянь чавиця гизай – серебряник; гизай – кузнець.
*б 25.7 Куш тень неик эсеть сельмсэ. Неть валтнэ максовить кода 7-це стихсэнть, истя 8-сэнть.
Глава 25