Выбрать язык
Книги Ветхого Завета
Книги Нового Завета
с русским текстом1Пазтомось чии-оргоди, куш кияк мельганзо а панси,
видечисэсь теке од лев: сэтьме лувонзо а колси.
2Зярдо масторось колы коенть, прявттнэде ламо.*а
А вана вейке чарькодиця ды превей прявт марто сон кирдеви кувать сэтьме лувсо.
3Кажовось, кона лепшти арасьчисэтнень,
валый пиземень кондямо, кона салы-шли паксясо видезь сюронть.
4Коень колсицясь шны пазтомотнень,
Коень топавтыцясь тюри каршост.
5Апаро ломантне а чарькодить, мезе истямо видечись,
Инешкипазонть вешницятне чарькодить сонзэ педе-пес.
6Виде киява молиця арасьчисэ эрицясь седе паро
сюпавдонть, кона эрямо кинзэ ацы апаро тевсэ.
7Чарькодиця цёрась топавты Коенть.
Визьксэнь а содыця марто вейсэньгалицясь тетянзо совавты визьксчамас.
8Кие касты сюпавчинзэ долкс максомсто покш питнень саезь,
се ташты сонзэ сенень, кие (м:седеймарязь?) лезды арасьчисэтненень.
9Кие а кунсолы Коень валтнэнь,
сень озномазояк нулгодьксэв.
10Кие видечисэ эрицянть чалгавты зыянов килангс,
сонсь кундамказонзо понги.
А вана ваньксчисэнтень максови паро уцяска.
11Сюпав ломанесь лови эсь прянзо пек превеекс,
ансяк чарькодиця кажовось пачк неи сонзэ.
12Зярдо прявтсо аштить видечисэтне – весенень покш кенярксчи,
зярдо покшокс арыть пазтомотне – ломантне кекшнить.
13Кие кекши пежетензэ – паро илязо учо,
кие панжсынзе ды ёртсынзе сынст, сенень Пазось путы седеймарямо.
14Уцяскав се ломанесь, кона свал пели Инешкипаздонть.
А вана седеензэ казямокс теицясь понги кажос.
15Кодамо урныця левесь ды лытыця овтось,
истямо кажов ломантненень пазтомо инязорось.
16Превтеме прявтось саи ламо каявкст,
а вана эстензэ лезэнь а вешницянть чинзэ кувалгавтовить.
17Кие ломанень верень валомасо чумо,
се куломазонзо чийни-орголи.
Истямонтень кадык кияк а лезды.
18Кие эри ваньксчисэ, се идеви.
Кие яки чирь-мур киява, се апак учо пры-ёми*б.
19Кие соки-види моданзо, сень пекезэ ули пешксе.
Кие панси чаво бажамотнень мельга,*в се коршты арасьчи.
20Кемевикс ломанесь пештязь чанстямосо-баславамосо.
Кие капши сюпалгадомо, се а кадови чумонзо апак пандовто.
21Киненьгак башка мелень путомась – те аволь паро тевесь:
эдь сехте вишка казненть кисэяк тейнить пежетть.
22Сельмень сявадыця ломанесь панси сюпавчи мельга.
Сон а редияк: эйсэнзэ уш старды арасьчись.
23Мурнек-тонавт ломаненть – сон мейле ловтанзат
соланя валонь кортыцядонть питнеекс.
24Кие салси тетянзо-аванзо ули-паронть
ды корты: «Теньсэ арась пежеть»,
се нельгеницянть-маштницянть кондямо.
25Сельмень сявадыця ломанесь кирвазти сёвнома.
Инешкипазонть лангс нежедицясь карми эрямо парочисэ.
26Се превтеме, кие кеми ансяк эсензэ лангс,
идеви се, кие яки покш превейчинь киява.
27Кие максы пурныцянень, сень а ули арасьчизэ,
кие а неи кажовонть, сень лангс прыть ламо сюдомат.
28Зярдо покшокс арыть пазтомотне – ломантне кекшнить,
зярдо сынь прыть-ёмить – видечисэтне теевить азорокс.
*а 28.2 Эли: прявттнэ сеедьстэ полавтневить.
*б 28.18 апак учо – те тарканть ули лия чарькодемазояк: китнень эйстэ вейкенть лангсо.
*в 28.19 Синод. ютавтовкссонть: Кие моли важодемань а вечкицятнень мельга.
Глава 28