Выбрать язык
Книги Ветхого Завета
Книги Нового Завета
с русским текстом1Иля шна прят вандынь чисэнть,
эдь тон а содат, мезе сон канды.
2Кадык тонь шны лия – аволь тонсь,
аволь тонсеть кургось – лиянь.
3Кевесь стака, чувароськак аволь шожда –
превтемень теевть апарось сындесткак стака!
4Кежесь – казямо, азаргалемась – акирдевикс.
А вана манязь мирденть ацирьгалеманзо каршо кие цидярды?!
5Панжадо седейсэ лангс ливтемась
седе паро салавань вечкемадонть.
6Вечкицясь мурнияк ванькс седейсэ,
а вечкицянть палсематнеяк манчицят.
7Кинь пекезэ пешксе, медтентькак безарди,
вачонтень сэпееськак маряви ламбамокс.
8Ломанесь, кона кадызе тиринь тарканзо,
теке нармунь, кона кадызе эсь пизэнзэ.
9Тантей чинень ваднемась ды сувтамось кенярдовтыть седей,
седеяк покш мельспаро канды ялгань вечкезь превс путомась.
10Иляк кадо ялгать ды тетять ялганзояк.
Сы теть кажо – сеске иля моле раськеть кудов.
Эдь маласо шабрась васоло ялакстонть паро.
11Цёрам! Ульть превей ды кенярдовт седеем,
сестэ монь карми улеме, мезе ёвтамс покордыцям туртов.
12Превеесь редясы сыця кажонть ды туи эйстэнзэ веёнов,
эрямонь а чарькодицясь моли видьстэ ды эртеви.
13Саик сень оршамопелензэ, кие макссь вал а содавикс ломанень долконзо кисэ:
ванст те оршамопеленть икелев пандомакс лиянь туртов.*а
14Гайтевстэ иля шумбракстне ялгат марто ашолгадомсто:
чанстицянь таркас ловтадызь сюдыцякс.
15Музгордиця-машнетиця нись –
теке сумбура чистэ суводиця пиземесь.
16Сонзэ оймавтомась – теке вармань кундамось
эли коморсо вецана оень кирдемась-сюворямось.
17Кшнись човави кшнисэ,
ломанесь – лия ломаньсэ.
18Кие яки инжир чувтонть мельга, се ярсы кастозденть.
Кие мелявты азородонзо, се ули шназь.
19Кода чамась неяви ведьсэнть,
истя ломанесь неяви седеензэ вельде.
20Кодат а пештявикст тоначинь отьмась ды Аваддонось,*б
истят а пештявикст ломанень сельметнеяк.
[Инешкипазонтень нулгодьксэв вановтонзо верьга кайсицясь.
Превтеметь сеть, кинь а кирдевить келест.]
21Кода тигелесь*в – сиянтень,
солавтома каштомось – сырнентень,
истя шныця кургось – ломаненть варчавтнемантень.
[Койтементь седеесь вешни зыян,
виденть седеесь вешни содамочить].
22Превтементь куш томбак човарсо-петькельсэ сюро марто човор –
ялатеке эйстэнзэ превтемечись а явови.
23Пштистэ вант эсеть вишка ракшатнень мельга,
мелявт эсеть ревень-сеянь стадатнеде.
24Эдь сюпавчись аволь пингеде пингес
ды азорксчиськак аволь раськестэ раськес.
25Зярдо тикшесь ледезь, ды вана уш пижелды отавась,*г
зярдо урядазь пандонь лугатне,
26сестэ ревелевкстнэ улить тонеть оршамопелекс,
сеябарантнэ – од паксянь рамамс.
27Сестэ сеянь ловсось саты эстетькак ярсамс,
весе кудораськетькак андомс,
тонь важаватнень пекесткак пештямс.
*а 27.13 Те тарканть ули лия ютавтовксозояк: лиянть нинзэ туртов.
*б 27.20 Аваддон – те тоначинть омбоце лемезэ.
*в 27.21 тигель – солавтома кедьге.
*г 27.25 отава – ледезь таркава одс касыця тикше.
Глава 27