Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
104 Псалом
1 Ошкӧ Дӧсвидзисьсӧ,
Сійӧ нимнас корӧ!
Сылісь керӧ́ммесӧ отиррезлӧ висьтасьӧ!
2 Сьылӧ Сылӧ, Сійӧ сьылӧтӧ!
Сылӧн адззывлытӧм керӧ́ммез йылісь висьтасьӧ!
3 Сылӧн вежа нимӧн ошшасьӧ!
Дӧсвидзисьсӧ кошшиссезлӧн
сьӧлӧммезныс ась гажӧтчӧны!
4 Кошшӧ Дӧсвидзисьсӧ да Сылісь вынсӧ.
Сылісь чужӧ́мсӧ пыр кошшӧ.
56 Тiйӧ ─ Авраам увтыр, Енлӧн раббез,
Яковлӧн челядь, Енлӧн бӧрйӧммез.
Сійӧн видзӧ тӧдвыланыт
Сылісь адззывлытӧм керӧ́ммесӧ,
мыччала́н пассэсӧ да Сылісь суддэсӧ.
7 Сія миян Дӧсвидзись Енным,
му вылас Сія быдлаын судитӧ-юралӧ.
8 Отиркӧт Ассис керӧм йитӧ́тсӧ
*а Сія пыр тӧдвылас видзӧ.
Одзланься каддэзӧ унася-уна чу́жӧммезлӧ
Ассис сетӧм кывсӧ Сія некӧр оз вунӧт.
9 Авраамкӧт керӧм йитӧ́тсӧ
да Исаклӧ сетӧм кывсӧ
Сія оз вунӧтлы.
10 Сійӧ кывсӧ Еныс Яковлӧ Туйдӧ́тӧн
*б сувтӧтіс.
Израилькӧт йитӧ́тсӧ пыр кежӧ керис.
11 Сія шуис:
«Тэныт сета Ханаан мусӧ,
сія тэныт дӧнзьӧ».
12 Ханаан муын нiя вӧлісӧ локтӧм йӧзӧн.
Сэк нiя вӧлісӧ ӧддьӧн етшаӧн.
13 Сэтӧн нiя ӧтік отир дынiсь
мӧдік отир дынӧ мунлісӧ,
ӧтік муись мӧдік муӧ вуджлісӧ.
14 Еныс некинлӧ эз лэдз дзескӧтлыны нійӧ.
Нельки ӧксуэсӧ ӧвліс:
15 «Менчим ма́втӧммезӧс
*в эд вӧрӧтӧ,
Месянь юӧртіссезлӧ умӧльсӧ эд керӧ».
16 Еныс му вылас тшыгьяла́н кад ыстіс,
быдӧс шепьяся́н няньсӧ тшыкӧтіс.
17 Сы одзын Египетӧ ыстіс мортӧс ─ Ӧсипӧс.
Сійӧ вузалісӧ, Египетӧ раб туйӧ нуӧтісӧ.
18 Сылісь коккесӧ кӧрттэзӧ дорисӧ,
голяас кӧрт сийӧс
*г кышалісӧ.
19 Сідз вӧлі Дӧсвидзисьлӧн кыв сьӧрті керсьӧмӧдз.
Дӧсвидзись Аслас кылӧн Ӧсипсӧ тӧдмаліс-видзӧтіс.
20 Египетісь ӧксу тшӧктіс сійӧ вайӧтны,
и Ӧсипсӧ лэдзисӧ.
Отиррез вылын юралісь сійӧ мездiс.
21 Ӧсипсӧ сувтӧтіс аслас керкуын веськӧтлісьӧн.
Аслас муись быдӧс, мый сылӧн вӧлі,
сы кипод увтӧ сетіс,
22 медбы сія туйдӧтліс ӧксулісь веськӧтліссесӧ,
велӧтіс бур мывкыдӧ сылісь пӧрисьжыккесӧ.
23 Сэк Израиль вуджис Египетӧ,
Яков пондiс овны Хамлӧн муын.
24 Сэтӧн Еныс Ассис отирсӧ йылӧтіс-содтіс.
Нiйӧ керис вынажыккезӧн ны вылӧ лэбтісьӧм отирся.
25 Еныс керис сідз,
медбы Израиль отир Египетісь йӧзлӧ
син вылӧ эз понды ковны.
Сэк Египетісь йӧз Енлӧн раббезлӧ
умӧльсӧ пондісӧ керны ылӧтлӧмӧн.
26 Сэк Еныс ыстіс Ассис Моисей рабсӧ
да Ааронсӧ, Ассис бӧрйӧмсӧ.
27 Нiя Хамлӧн муын отирыс одзын
Енлісь адззы́влытӧммесӧ керисӧ,
Сылісь пассэсӧ мыччалісӧ.
28 Нія керисӧ Енлӧн висьталӧ́м сьӧрті.
Еныс ыстіс пемытсӧ,
и му вылас лоис са пемыт.
29 Нылісь васӧ Сія вирӧ пӧртіс,
сысянь быдӧс чериыс куліс.
30 Нылӧн муыс лягушаэзӧн тырис,
нiя нельки ӧксулӧн узьланiнын чеччалісӧ.
31 Еныс висьталіс,
и локтіс унася-уна лӧдз.
Нія Египет мусӧ тыртісӧ.
32 Зэр туйӧ ны вылӧ шер ыстіс,
нылӧн му вылӧ сота́н би вайӧтіс.
33 Нылісь виноград да инжир пуэсӧ чеглаліс,
ны му вылісь пуэсӧ пӧрлаліс.
34 Сія висьталіс,
и лыдтӧм саранча чукӧр локтіс.
35 Нiя сёйисӧ му вывсис быдӧс турунсӧ,
ыббез вылын воӧ́мсӧ.
36 Египетас нылӧн медодзза зоннэзлісь,
медодзза шогмӧммезлісь
Еныс ола́ннысӧ орӧтіс,
37 Израиль отирсӧ Египет мусис Сія петкӧтіс.
Сьӧраныс зарни
*д да эзы́сь
*е сетіс.
Нылӧн некытшӧм увтырын эзӧ вӧлӧ вынтӧммез.
38 Египетісь отир ӧддьӧн полісӧ,
сійӧн нiя Израиль отирлӧн петӧ́мсянь гажмисӧ.
39 Еныс Ассис отирсӧ кымӧрӧн вевттис,
ойнас югдӧтны би сетіс.
40 Отирыс сёя́н корисӧ,
Сія нылӧ пытьканкайезӧс
*ж ыстіс.
Отирсӧ енӧжись няньӧн вердiс.
41 Сія из поткӧтіс,
сэтісь ва киссис
да кӧсiнӧттис юӧн котӧртіс.
42 Аслас Авраам раблӧ вежа кӧсйӧ́мсӧ
Сія тӧдвылас вайӧтіс.
43 Ассис бӧрйӧм отирсӧ йӧз муись петкӧтіс,
и нія ӧддьӧн гажӧтчисӧ.
44 Mӧдік отиррезлісь муэз нылӧ сетіс.
Нылӧ дӧнзис сія, мый вылын мӧдіккез уджалісӧ,
45 медбы отирыс олісӧ Сылӧн тшӧктӧ́ммез сьӧрті
да сьӧлӧманыс видзисӧ Сылісь Туйдӧ́тсӧ.
Аллилуйя!
Ошкӧ́м.
*а 104:8 йитӧ́т ─ завет
*б 104:10 Туйдӧ́т ─ Закон
*в 104:15 ма́втӧм ─ помазанник
*г 104:18 сийӧс ─ ярмо, хомут
*д 104:37 зарни ─ золото
*е 104:37 эзы́сь ─ серебро
*ж 104:40 пытьканкай ─ перепел
Глава 104
