Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
105 Псалом
1 Аллилуйя!
Ошкӧ Дӧсвидзисьсӧ,
Сія эд бур да пыр небыт сьӧлӧма!
2 Кин вермас быдӧс висьтавны
Дӧсвидзисьлӧн вын йылісь
да Сылӧн югьялӧ́м йылісь?
3 Шудаӧсь нiя,
кӧдна юраныс видзӧны веськыта судитӧ́мсӧ
да пыр керӧны веськыта.
4 Дӧсвидзисьӧ,
кӧр лоан небыт сьӧлӧма Аслат отир дынӧ,
сэк и менӧ уськӧт тӧдвылат.
Кӧр пондан нiйӧ мездыны,
сэк и меным отсав,
5 медбы меным адззывны
Тэнат бӧрйӧммезлісь бура олӧ́мнысӧ,
Тэнат отиркӧт гажӧтчыны
да ныкӧт ӧтлаын Тэӧн ошшасьны.
6 Мийӧ айезным моз умӧльсӧ керим,
Туйдӧ́т вылӧ видзӧттӧг олім,
быльсис мӧдӧрӧ ылалім.
7 Миян айезным Египетас
Тэнчит адззывлытӧм керӧ́мметӧ эзӧ вежӧртӧ.
Тэнчит небыт сьӧлӧмсянь унася-уна бур керӧ́мтӧ
нiя вунӧтісӧ.
Гӧрд саридз дорын нiя Тэ вылӧ лэбтісисӧ.
8 Но Аслас ним понда Сія нiйӧ мездiс,
Ассис ыджыт вынсӧ мыччаліс.
9 Сія тшӧктіс Гӧрд саридзлӧ, и сія косьмис.
Еныс Ассис отирсӧ саридз пыдӧсӧт кыдз кӧсiнӧт нуӧтіс.
10 Сія айезнымӧс ны вылӧ лэбтісьӧммез киись мездiс,
дзескӧтліссез ки увтісь нійӧ петкӧтіс.
11 Ны вылӧ лэбтісьӧммесӧ ваыс вӧйӧтіс,
ловьяыс ӧтік морт эз кольччы.
12 Сэк нія пондісӧ веритны Дӧсвидзисьлӧн кыввезӧ,
Сійӧ сьылӧмӧн ошкисӧ.
13 Но чожа мыйись Израиль отир
Сылісь керӧ́ммесӧ вунӧтісӧ,
эзӧ пондӧ видзчисьны,
кӧр Сія Ачыс нійӧ туйдӧтас.
14 Кушмуас нiя ёна номсӧтчисӧ,
овтӧминас Енлісь мыласӧ тӧдмалісӧ-видзӧтісӧ.
15 Корӧмнысӧ Сія нылӧ сетіс,
но ны вылӧ лёк пӧрӧс
*а ыстіс.
16 Сувтчанінын мукӧдыс пондiсӧ завидуйтны Моисейлӧ
да Ааронлӧ, Дӧсвидзисьлӧн вежа мортлӧ.
17 Сэк муыс оссис,
Дафанӧс, Авиронӧс да сы дор сулаліссесӧ
сія ньылыштіс.
18 Израиль отир коласын би ыпнитіс,
умӧльсӧ кериссесӧ сотіс.
19 Хорив керӧс дынын нiя ӧшкаӧс керисӧ,
киӧн керӧ́мныслӧ копрасьны пондiсӧ.
20 Ассиныс югьяла́н Енсӧ вежисӧ
турун сёйись вылӧ,
киэзнаныс керӧм ӧшка вылӧ.
21 Нiя вунӧтісӧ Ассиныс Мездісь Енсӧ,
Кӧда Египетас сэтшӧм вына керӧ́ммез мыччаліс:
22 Хам муын
*б Сылӧн керӧ́ммезсянь диво кутӧ,
Гӧрд саридз дорын керӧ́мыс повзьӧтӧ.
23 Эта понда Израиль отирлісь ола́ннысӧ
Еныс мӧдіс орӧтны.
Сэк Моисей, Енлӧн бӧрйӧм морт,
сувтіс Еныс одзӧ кусӧтны Сылісь лӧгсӧ.
Сія отирсӧ пондiс дорйыны,
медбы Еныс нылісь ола́ннысӧ эз орӧт.
24 Сылӧн висьталӧ́мӧ нiя эзӧ веритӧ,
кӧсйӧм бур мусӧ абутӧм туйӧ пуктісӧ.
25 Асланыс ӧнассэзын
*в нiя боньгисӧ,
Дӧсвидзисьсӧ эзӧ кывзiсьӧ.
26 Сэк Дӧсвидзись лэбтіс Ассис кисӧ,
медбы кушмуас орӧтны нылісь ола́нсӧ.
27 Сія лэбтіс кисӧ,
медбы нылісь челядьсӧ
мӧдік отиррез коласӧ шентавны,
муыс пасьта нiйӧ рознитны.
28 Израиль отирлӧн сьӧлӧмныс
Ваал-Фегор
*г дынӧ лякасис,
ловтӧм еннэзлӧ вайӧм езъяла́н козинсӧ нiя сёйисӧ.
29 Асланыс керӧ́ммезӧн нiя Енсӧ лӧгӧтлісӧ.
Эта понда ны коласын кула́н пӧрӧс паськаліс.
30 Сэк Финеес чеччис,
умӧльсӧ кериссез вылын судсӧ чулӧтіс,
и отирыс дугдіс кувны.
31 Эта понда сійӧ шуӧны веськыта олісьӧн
айезсянь челядьӧдз, пырся-пыр.
32 Мерива ва дорын нiя Енсӧ бӧра лӧгӧтлісӧ,
ны кузя Моисейыслӧ Енсянь дӧнзис.
33 Нiя эд Моисейсӧ лӧгӧтісӧ,
и сія аслас висьталӧ́мӧн умӧляс пырис.
34 Израиль отир эзӧ вийӧ йӧз отирресӧ,
кӧднӧ тшӧктіс Дӧсвидзисьыс.
35 Ентӧдтӧммезкӧт нія сорласисӧ
да ны моз керны велалісӧ.
36 Израиль отир киӧн керӧм еннэзлӧ копрасьны пондiс,
нылӧн кыйся́нӧ шедіс.
37 Ассиныс ныввезнысӧ да зоннэзнысӧ
вайлісӧ езъяла́н козинӧн сэрпӧсь ловвезлӧ.
38 Нiя кисьтлісӧ вирсӧ
асланыс ныввезлісь да зоннэзлісь,
кӧдна умӧльсӧ нем эзӧ керӧ.
Ханаан отирлӧн ас керӧм еннэзлӧ
езъяла́н козинӧн челядьнысӧ вайлісӧ,
сія вир кисьтӧ́мӧн мусӧ сэрпӧсьтісӧ.
39 Асланыс керӧ́ммезӧн асьнысӧ сэрпӧсьтісӧ,
умӧльсӧ керны лэдзчисисӧ
да Еныс дынiсь ылалісӧ.
40 Сэк Аслас отир вылӧ Енлӧн лӧгыс ӧзйис.
Аслас бӧрйӧм отирыс Сылӧ син вылӧ эз понды ковны.
41 Сія сетіс нiйӧ ентӧдтӧммез киӧ.
Израиль отир вылын пондiсӧ ыждавны нiя,
кӧдна синӧн эзӧ вермӧ видзӧтны ны вылӧ.
42 Ны вылӧ уськӧтчӧм йӧз нійӧ дзескӧтліс,
йӧз кипод увтын Израиль отир лӧньсьывліс
*д.
43 Дӧсвидзись нiйӧ унаись мездывліс,
но нiя асланыс мугсьӧ́мӧн
*е Сійӧ лӧгӧтлісӧ.
Умӧль керӧ́ммезныс кузя нiя нач лэдзчисисӧ.
44 Но сьӧкыт кадӧ Сія нылӧ отсавліс,
кӧр нылісь горӧн герьясьӧ́мнысӧ кывліс.
45 Сія ныкӧт керӧм йитӧ́тсӧ тӧдвылас уськӧтліс,
Ассис сьӧлӧмсӧ ны дынӧ небзьӧтліс.
46 Сія керлывліс жалейтіссезӧн нійӧ,
кӧдна кипод увтын пессис-мырсис Израиль отир.
47 Дӧсвидзисьным, миян Енным, мезды миянӧс!
Ӧкты миянӧс, отиррез коласӧ рознитчӧммесӧ!
Сэк мийӧ ошкам Тэнчит вежа нимтӧ,
пондам ошшасьны Тэнат югьялӧ́мӧн.
48 Дӧсвидзисьсӧ, Израильлісь Енсӧ, пырся-пыр ошкӧ!
Отирыс быдӧнныс ась висьталӧны: «Аминь!»
Аллилуйя!
Ошкӧ́м.
*а 105:15 пӧрӧс ─ заразная болезнь
*б 105:22 Хам му ─ Египет му
*в 105:25 ӧнас ─ палатка
*г 105:28 Ваал-Фегор ─ ас керӧм енлӧн ним
*д 105:42 лӧньсьыны ─ смириться
*е 105:43 мугсьыны ─ упрямиться
Глава 105
