Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
38 Псалом
1 Идифунлӧ, сьыліссезӧн веськӧтлісьлӧ. Давидлӧн псалом.2 Ме шуи:
«Понда видзӧтны ас сьӧрам,
медбы эг кер умӧльсӧ аслам кылӧн.
Ӧмӧс понда видзны пӧданӧн,
кытчӧдз одзам Ентӧг олісьыс».
3 Ме чӧлі, шы эг сет.
Нельки бурыс йылісь эг баит,
и менам сьӧлӧм шогӧ содіс.
4 Менам сьӧлӧмӧ сотчыны пондіс,
тӧждісьӧ́ммезӧ менӧ ӧзйӧтісӧ,
и ме понді баитны:
5 «Дӧсвидзисьӧ,
висьтав менчим кула́н лунӧс
да мымда ме ола,
медбы ме тӧді,
мый кузя менам ола́нӧ.
6 Тэ сетін меным ола́н луннэсӧ етша,
ола́нӧ дзир долонь
*а кузя.
Тэ одзын менам ола́н луннэзӧ абутӧм туйӧ.
Былись эд,
быд мортлӧн ола́ныс кыдз тӧлӧн нуӧтӧм тшын.
7 Былись эд, мортыс кыдз вуджӧ́р,
весь сія педзӧ
*б, ӧктӧ аслыс пажыть,
и оз тӧд, кинлӧ быдӧс ӧктӧмыс дӧнзяс.
8 Дӧсвидзисьӧ, мый меным ӧні видзчисьны?
Ме Тэ вылӧ надейтча.
9 Мезды менӧ быд умӧль керӧ́мись,
мывкыдтӧм отирсӧ эн лэдз серавны ме вылын.
10 Ме шы ог сет, ог осьтлы ассим ӧмӧс,
этӧ быдӧс эд керин Тэ.
11 Дугды менӧ вартлыны,
Тэнат сӧталӧ́мсянь ме кула́н дорын ни.
12 Тэ пондан кӧ веськыта висьтавлыны мортлӧ
сылісь умӧль керӧ́ммесӧ
да ны понда мыжйыны,
сэк быдӧс басӧкыс сылӧн киссяс
кыдз кӧр
*в гаг кералӧ́мсянь паськӧм.
Мортлӧн олӧ́мыс эд кыдз тӧлӧн нуӧтӧм тшын.
13 Дӧсвидзисьӧ, кыв менчим кеймӧ́мӧс,
кыв менчим ойзӧ́мӧс.
Синваӧс кисьтӧ́м коста эн чӧв.
Ме эд му вылас дзир локтісь-мунісь,
кыдз и айезӧ.
14 Дугды лӧгавны ме вылӧ,
медбы ме верми вынсявны.
Ме эд кула кӧ, сэсся ог ни ло».
*а 38:6 долонь ─ ладонь
*б 38:7 педзны ─ суетиться
*в 38:12 кӧр ─ моль
Глава 38
