Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
55 Псалом
1 Сьыліссезӧн веськӧтлісьлӧ. Дудіок йылісь, кӧдӧ ылісь муын оз сьылӧт. Давид гижис сійӧ, кӧр филистим отир кутісӧ сійӧ Гефын.2 Енӧ, ло ме дынӧ небыт сьӧлӧма!
Отирыс ме сьӧрын вӧтлісьӧны,
медбы лолӧс босьтны.
Нія быд лун уськӧтчывлӧны, менӧ дзескӧтлӧны.
3 Ме вылӧ лэбтісьӧммес
быд лун ме сьӧрын вӧтлісьӧны,
медбы лолӧс босьтны.
Медвылісьӧ, ме вылӧ лэбтісьӧммес ӧддьӧн унаӧсь!
4 Кӧр ме пола, сэк Тэ вылӧ надейтча.
5 Ме ошка Енсӧ Сылӧн кыв понда.
Ен вылӧ надейтча,
немись ог пов.
Мый керас меным мортыс?
6 Ме вылӧ лэбтісьӧммес
менчим кыввезӧс быд лун мӧдӧрӧ бергӧтӧны.
Нія юраныс видзӧны,
кыдз бы меным умӧльсӧ керны.
7 Нія ӧксьывлӧны, сайласьӧны,
менам быд оськӧв сьӧрын видзӧтлӧны,
медбы босьтны менчим лолӧс.
8 Неужто нія пышшасӧ
умӧльсӧ керӧ́мныс понда вештісьӧ́мись?
Енӧ, лӧгувьят уськӧт отирресӧ.
9 Тэ лыддин менчим быд пышшалӧ́мӧс да сайласьӧ́мӧс.
Аслат дозӧ ӧкты менчим синваӧс,
гиж нійӧ Аслат небӧгӧ.
10 Кӧр ме кора Тэнӧ отсавны,
сэк ме вылӧ лэбтісьӧммес бӧр мунӧны.
Сы сьӧрті ме тӧда:
Еныс ─ ме дор.
11 Ме ошка Енсӧ Сылӧн кыв понда,
ошка Дӧсвидзисьсӧ Сылӧн висьталӧ́м понда.
12 Ен вылӧ надейтча,
немись ог пов.
Мый керас меным мортыс?
13 Енӧ, ме кера кӧсйисьӧ́мӧ сьӧрті:
вая Тэныт буркывта́н езъяла́ннэз
*а.
14 Тэ эд мездін менӧ кулӧ́мись,
[синнэзӧс ─ синва кисьтӧ́мись].
Тэ видзин менчим коккезӧс джӧмдалӧ́мись,
медбы меным ветлӧтны Тэ одзын
ловья отиркӧт югытас.
*а 55:13 буркывта́н езъяла́н ─ жертва благодарения
Глава 55
