Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
87 Псалом
1 Корей зоннэзлӧн сьыла́н псалом. Сьыліссезӧн веськӧтлісьлӧ. Сьылӧны «Махалаф» проглаз сьӧрті. Езрахись Еманлӧн велӧтӧ́м.2 Дӧсвидзись Енӧ, менам Мездісьӧ!
Ой и лун ме Тэныт горӧн кеймися.
3 Менам кеймисьӧ́мӧ ась локтӧ Тэ дынӧдз,
бергӧт пельтӧ кывны менчим кеймӧ́мӧс.
4 Ола́нам пӧттӧдз ни вӧлі быдкодь сьӧкыт кадыс.
Ме ола медбӧрья луннэз.
5 Ме лои кула́н дорись морт кодь,
вынтӧм морт кодь.
6 Ме кыдз вийӧм,
жыв куйла шойнаын кулӧммез коласын,
кӧднӧ Тэ дынсит тойыштін
и тӧдвылӧ он ни уськӧтлы.
7 Тэ лэдзин менӧ улӧ,
пемыт пыдӧстӧминӧ.
8 Тэнат лӧгыт менӧ личкӧ,
Тэнат ваэт менӧ кок вылісь уськӧтісӧ.
9 Менчим ёрттэзӧс Тэ ме дынісь кидтін,
керин менӧ нылӧ сэрпӧсь мортӧн.
Менӧ йӧртін,
и ме ог вермы петны.
10 Шогсьӧ́м-горзӧ́мсянь менам синнэзӧ пемдісӧ.
Дӧсвидзисьӧ, ме Тэныт лунтыр кеймиси,
киэзӧс лэбтӧмӧн кейми.
11 Кулӧммезлӧ Тэ керан разь адззы́влытӧммесӧ?
Кулӧммез разь чеччасӧ да пондасӧ Тэнӧ ошкыны?
12 Шойнаын куйліссезлӧ пондасӧ разь висьтасьны
Тэнат небыт сьӧлӧм йылісь,
сісьманінас ─ Тэнат быль йылісь?
13 Пемытінас казяласӧ разь
Тэнчит адззывлытӧм керӧ́мметӧ,
кулӧммезлӧн муын ─ Тэнчит веськыта керӧ́мтӧ?
14 Но ме Тэныт горӧн кеймися, Дӧсвидзисьӧ.
Асъяпоннас менам кеймӧ́мӧ локтас Тэ дынӧ.
15 Дӧсвидзисьӧ, мыля Тэ менӧ чапкан,
ме шогья чужӧ́мтӧ сайӧвтан?
16 Томсянь ме песся-мырся,
унаись ни вӧлі кула́н дорын.
Тэнат ӧддьӧн повзьӧтӧ́мметсянь
ме быдсӧн вынтӧмсялі.
17 Тэнат лёксялӧ́мыт ме вылӧт муніс.
Тэнат повзьӧтлӧ́мыт менӧ кок вылісь уськӧтіс.
18 Нія менӧ ва моз кытшӧвтісӧ,
ӧтмӧдӧрсянь зэлӧтісӧ.
19 Ёрттэзкӧт да матіссезкӧт Тэ менӧ янсӧтін,
менам тӧдсаэз озӧ тыдалӧ.
Ошкӧ́м.
Глава 87
