Библия
Выбрать язык
Книги Ветхого Завета
Книги Нового Завета
с русским текстом
ВЕЛОТАН ВИСЬТАЛОММЕЗ
Глава 5
Йӧз иньсӧ ылынжыка орддьы
1 Зонӧ, кывзы менчим мывкыда висьталӧ́ммезӧс,
каттьы пель саят вежӧра кыввезӧс.
2 Сэк тэ пондан бура авйыны
*а и тӧдӧмӧн баитны.
[Эн кывзы инькаӧс,
кӧда баитӧ, кыдз виа бордӧн мавтӧ.]
3 Йӧз иньлӧн баитӧ́мыс чӧскыт ма моз визывтӧ,
сылӧн сёрниыс вися небытжык.
4 Но ны бӧрсянь лоӧ́мыс курыт урбӧжся
*б курытжык,
ӧтмӧдӧрсянь лэчыт шыпуртся
*в лэчытжык.
5 Сылӧн коккес кулӧ́мӧ вайӧтӧны,
оськӧввес пыдӧстӧминӧ локтӧны.
6 Ола́нӧ вайӧта́н туйсӧ сія абутӧм туйӧ пуктӧ,
сылӧн туйес чукыляӧсь.
Сія и ачыс оз тӧд, кытчӧ мунӧ.
7 Сідзкӧ, челядь, менӧ кывзӧ,
менам велӧтӧ́мись эд кежӧ.
8 Йӧз инькасӧ ылынжыка орддьы,
сы керку ыбӧс дынӧ эн сибӧтчы.
9 Сибӧтчан кӧ, вынтӧ сетан мӧдіклӧ,
ола́н луннэтӧ ─ сьӧлӧмтӧм мортлӧ.
10 Тэнчит пажытьтӧ мӧдіккез босьтасӧ,
мырсьӧмӧн шедтӧмыт
*г мӧдік керкуӧ вуджас.
11-12 Кӧр выныт бырас, вывты́рыт садьтӧмсялас,
сэк тэ пондан ойзыны да висьталан:
«Мыля нӧ ме эг радейт велӧтӧ́мсӧ?
Мыля ме абутӧм туйӧ пуктывлі ӧлӧ́мсӧ?
13 Мыля ме эг кывзы менӧ велӧтіссесӧ,
пеллезӧс тупкавлі, эг кывзы туйдӧтіссесӧ?
14 Быдӧнныс одзын ме ӧдва эг усь рожа куля́нӧдз
*д».
15 Васӧ ю аслат ва видзанінісь,
аслат юкмӧсісь визывтӧмсӧ.
16 Тэнат ва петанінісь ваыс ась оз визывт уличаэзӧт,
ась оз котӧрт отаиннэзӧт
*е.
17 Сія ась лоӧ тэнат ӧтнатлӧн,
мӧдіккезлӧ эн сет.
18 Тэнат ва петаніныт ась лоӧ бласлӧви́тӧм.
Сьӧлӧмтӧ бурмӧт аслат иньӧн,
кӧда вылын тэ томнат гӧтрасин,
19 аслат сьӧлӧмшӧрӧн,
визыв кӧр
*ж кодь басӧк иньӧн.
Сы морос бердын тэныт ась пыр лоӧ долыт.
Сылӧн радейтӧ́мсянь тэныт ась пыр лоӧ бур.
20 Зонӧ, мыйлӧ тэныт мӧдӧрӧ ылавны?
Мыйлӧ тэныт йӧз инькасӧ кутлыны?
21 Дӧсвидзись мортлісь туйесӧ адззӧ,
сылісь быд туй Сія видзӧтӧ.
22 Ентӧг олісьӧс аслас лёк керӧ́ммес кутӧны.
Умӧль керӧ́ммес сійӧ домалӧмӧн видзӧны.
23 Велӧттӧг сія кулӧ,
аслас мывкыдтӧг олӧ́мсянь сія ылалӧ.
*а 5:2 авйыны ─ рассуждать
*б 5:4 курыт урбӧж ─ полынь
*в 5:4 шыпурт ─ меч
*г 5:10 шедтыны ─ заработать, добывать
*д 5:14 рожа куля́н ─ позор
*е 5:16 отаин ─ площадь
*ж 5:19 кӧр ─ олень
Глава 5
