Библия
Выбрать язык
Книги Ветхого Завета
Книги Нового Завета
с русским текстом
ВЕЛОТАН ВИСЬТАЛОММЕЗ
Глава 6
Туйдӧтӧ́ммез да ӧлӧ́ммез
1 Зонӧ, тэ мӧдік понда кӧсйисин кӧ,
сылісь одзӧс вештыны кыв сетін,
2 сэк тэ аслат кылӧн асьтӧ кӧрталін,
ӧмсит петӧм кылӧн асьтӧ кутін.
3 Зонӧ, кер, мый ме висьтала, асьтӧ мезды.
Тэ сюрин йӧз морт киӧ.
Мун сы дынӧ, уськӧтчы коккезас да кеймись.
4 Синнэтлӧ эн лэдз куньсьыны, эн сунась.
5 Мездӧтчы вӧралісьлӧ шедӧм кӧр
*а моз,
кай кыйи́сь киись ─ кай моз.
6 Дышӧтчись, мун кӧдзы́в дынӧ,
видзӧт сы удж сьӧрын да мывкыдсяв.
7 Сылӧн абу юралісь, сы сьӧрын видзӧтлісь,
некин сійӧ оз тшӧкты уджавны,
8 но сія гожумнас ӧктӧ сёян,
вунда́н кадӧ чукӧртӧ нянь.
[Мун мош дынӧ да видзӧт-тӧдмав,
кытшӧм бура сія уджалӧ.
Быдӧнныслӧ кола́н удж сія керӧ,
сылӧн керӧ́мыс веськӧтӧ и ӧксуӧс
*б,
и учӧт мортӧ пуктӧмӧс.
Сійӧ быдӧнныс радейтӧны да бурӧ пуктӧны.
Мошлӧн кӧть и етша выныс,
но сія ыджыт мывкыда.]
9 Дышӧтчись, кытчӧдз тэ пондан узьны?
Кӧр ни сайман он вывсит?
10 Тэ невна узьыштан,
невна сунасьыштан,
киэтӧ тэчӧмӧн пукалыштан,
11 да он и казяв,
кыдз бадзо́р
*в моз локтас умӧля олӧ́мыт,
гусясись моз локтас тшыгьялӧ́мыт.
[Он кӧ понды дышӧтчыны,
сэк визывта́н ва моз локтас вунда́н кадыт,
умӧля олӧ́мыт тэ дынісь ылӧ пышшас.]
12 Лёк керись морт некытчӧ оз туй,
сія ветлӧтӧ да бӧбӧтчӧ.
13 Сія синнэзнас кваркышалӧ,
киэзнас-коккезнас мыччалӧ.
14 Сьӧлӧмас сія видзӧ,
кыдз бы гусьӧн умӧльсӧ керны.
Быд кадӧ сія юрас видзӧ лёк керӧ́мсӧ,
отирсӧ ӧтамӧдкӧт лӧгӧтӧ.
15 Эта понда сылӧн ола́ныс видзчисьтӧг орас.
Чожа сія усяс и оз ни веськав.
16 То кватя, мый Дӧсвидзисьлӧ син вылӧ оз ков,
нельки сизима, кинӧс Сія сэрпӧсьӧ пуктӧ:
17 асьсӧ лэбтісьӧс, ылӧтлісьӧс,
сӧстӧма олісьлісь вир кисьтісьӧс,
18 умӧльсӧ керны лӧсьӧтчисьӧс,
лёксӧ керны чож кока мортӧс,
19 бӧбӧтчисьӧс, кӧда морт вылӧ вӧвлытӧмсӧ висьталӧ,
воннэзӧс ӧтамӧдкӧт лӧгӧтісьӧс.
20 Зонӧ, айытлісь тшӧктӧ́ммесӧ эн вунӧт,
мамытлісь велӧтӧ́ммесӧ абутӧм туйӧ эн пукты.
21 Пыр кежӧ пукты нійӧ сьӧлӧмат,
каттьы нійӧ пель саят.
22 Кӧр пондан мунны, нія тэӧн пондасӧ веськӧтлыны.
Водан узьны, тэ сьӧрын пондасӧ видзӧтны.
Сайман, тэкӧт пондасӧ баитны.
23 Тшӧктӧ́мыс ─ югдӧта́н,
велӧтӧ́мыс ─ югытыс,
ӧлӧмӧн
*г велӧтӧ́мыс ─ ола́нӧ туй.
24 Нія видзасӧ тэнӧ умӧль инька дынӧ сидзӧ́мись,
йӧз иньлӧн леститчӧмӧн баитӧ́мись.
25 Сьӧлӧмат эн пырт сылісь басӧк чужӧ́мсӧ,
аслат синнэзӧн асьтӧ эн кый,
ась оз ылӧт сія тэнӧ аслас синнэзӧн.
26 Кыскасись инька сулалӧ ӧтік нянь тор.
Йӧз инь понда тэ ӧштан меддонасӧ ─ ассит ола́нтӧ.
27 Вермас разь кинкӧ паськӧмсӧ соттӧг
пиас
*д би сюйыштны?
28 Коккесӧ соттӧг вермас разь кинкӧ
сотча́н шоммез вылӧт ветлӧтны?
29 Сідз овлӧ и сыкӧт, кин пырӧ йӧз инь дынӧ.
Мӧдіклӧн инь дынӧ инмылӧм понда сылӧ вештісясӧ.
30 Гусясись вылӧ ӧддьӧн озӧ лӧгасьӧ,
кӧр сія гусялӧ тшыгьялӧ́м коста,
медбы мыйӧнкӧ тыртны гырксӧ.
31 Но кӧр сійӧ кутасӧ,
сія сизимпӧв вештісяс,
сетас быдӧс, мый сылӧн вӧлі гортас.
32 Йӧз инькӧт кыскасись морт вежӧрсӧ ӧштӧм.
Кыскасьӧ́мнас сія ассис ола́нсӧ орӧтӧ.
33 Сійӧ вартласӧ, и сія рожа куля́нӧдз усяс.
Эта сэрпас пырӧ́мыс сы бердӧ лякасяс.
34 Вежӧктӧ́мыссянь жӧникыс лёксялас,
сія жалейттӧг вештісяс.
35 Сія оз босьт некытшӧм дона вештӧ́м.
Оз лӧньсьы,
мымда бы тэ эн содты сылӧ козиннэсӧ.
*а 6:5 кӧр ─ олень
*б 6:8 ӧксу ─ царь
*в 6:11 бадзо́р ─ бродяга
*г 6:23 ӧвны ─ предостерегать
*д 6:27 пи ─ пазуха
Глава 6
