Библия
Выбрать язык
Книги Ветхого Завета
Книги Нового Завета
с русским текстом
ВЕЛОТАН ВИСЬТАЛОММЕЗ
Глава 16
Дӧсвидзись вылӧ надейтчись ─ шуда морт
1 Морт лӧсьӧтчӧ мыйкӧ керны,
но керсяс дзир сія, мый Дӧсвидзись шуас.
2 Быд морт ассис туйесӧ шуӧ сӧстӧммезӧн,
но Дӧсвидзись мортлісь сьӧлӧмсӧ тӧдмалӧ-видзӧтӧ.
3 Ассит уджтӧ кер Дӧсвидзись вылӧ надейтчӧмӧн,
и мый мӧдiн керны, сія керсяс.
4 Дӧсвидзисьыс быдӧс аркмӧтӧм кытшӧмкӧ могись,
нельки умӧльӧ керисьсӧ лӧг лун кежӧ видзӧ.
5 Асьсӧ вылына лэбтiсь морт
Дӧсвидзисьлӧ син вылӧ оз ков.
Бура тӧд: сія оз кольччы мыжйытӧг!
[Бур туй пондӧтчӧ веськыта керӧ́мсянь,
сія Еныс одзын езъяла́н вайӧ́мся буржык.
Дӧсвидзисьсӧ кошшись адззас веськыта олӧ́м,
и сылӧн тӧдӧ́мыс содас.
Кӧда былись кошшӧ Енсӧ,
сы сьӧлӧмын пыр лоас лӧнь.]
6 Небыт сьӧлӧм да быль сӧстӧмтӧны умӧль керӧ́мись,
Дӧсвидзисись полӧ́м умӧлись видзӧ.
7 Кӧр мортлӧн туйес Дӧсвидзисьлӧ сьӧлӧмви,
сэк и морткӧт лӧгаліссесӧ Сія керӧ ёрттэзӧн.
8 Бӧбӧтӧмӧн уна сьӧм
*а босьтӧ́мся буржык
невна шедтыны аслат уджӧн да веськыта овны.
9 Морт аслыс туйсӧ бӧрйӧ,
но Дӧсвидзисьыс сылісь оськӧввесӧ туйдӧтӧ.
10 Ӧксулӧн кыввес вылісянь вынсьӧтӧмӧсь,
суд вылын сія веськыта бӧрйисьӧ.
11 Бура ӧшлӧ́мсӧ
*б лӧсьӧтiс Дӧсвидзись,
гириэс быдӧс Сысянь.
12 Ӧксуэз умӧль керӧ́м вылӧ синӧн озӧ вермӧ видзӧтны,
веськыта керӧ́м вылын эд нылӧн юралӧ́мныс видзсьӧ.
13 Ӧксулӧ сьӧлӧмви веськыта баитiсь,
быльсӧ висьталісьӧс сія радейтӧ.
14 Ӧксулӧн лӧгасьӧ́мыс вермас кулӧ́м вайны,
но мывкыда морт сійӧ раммӧтас.
15 Ӧксулӧн югыт синнэзӧн видзӧтӧ́мын ─ ола́н,
сылӧн отирлӧ бурсӧ керӧ́мыс кыдз тулысся зэр.
16 Мывкыд ӧктӧ́мыс зарнися буржык,
вежӧрсялӧ́мыс сӧстӧм эзы́сься донажык.
17 Веськыта олісьлӧн туйыс умӧль керӧ́мсӧ орддьӧ.
Кин видзӧтӧ аслас туй сьӧрын,
сія ассис ола́нсӧ видзӧ.
18 Кин асьсӧ вылына лэбтӧ, сы вылӧ умӧльыс локтӧ.
Кин вышитчӧ ─ асьсӧ уськӧтӧ.
19 Абу бурыс асьнысӧ лэбтiссезкӧт
мы́рддьӧмсӧ янсӧтны.
Буржык вӧвны рам мортӧн
да овны пажытьтӧммезкӧт.
20 Кин керӧ ассис уджсӧ бур вежӧрӧн,
сія адззас бурсӧ.
Мортыс шуда,
надейтчӧ кӧ сія Дӧсвидзись вылӧ.
21 Мывкыда мортӧс шуасӧ бур вежӧраӧн.
Бур кыввезӧн велӧтӧ́мсянь буржыка велалӧны.
22 Бур вежӧра мортлӧ вежӧрыс вайӧ ола́н.
Мывкыдтӧммезлӧ мывкыдтӧг олӧ́мыс ─ мыжйӧ́м.
23 Мывкыда мортлӧн сьӧлӧмсис
мывкыда кыввез петӧны.
Сылӧн велӧтӧ́мсянь буржыка велалӧны.
24 Бур кыввез ─ кыдз ма:
лов гажӧтӧны, лыэз веськӧтӧны.
25 Эмӧсь туйез, кӧднӧ морт шуӧ веськыттэзӧн,
но нiя кулӧ́мӧ вайӧтӧны.
26 Морт уджалӧ, медбы асьсӧ вердны,
уджавны кынӧмыс тшӧктӧ да.
27 Ылӧтлісь морт лёксӧ керны лӧсьӧтчӧ,
сылӧн басниыс сота́н би кодь.
28 Гусьӧн умӧльсӧ керись лӧгалӧ́м лэбтӧ,
шушкӧтчись ─ ёрттэзӧс янсӧтӧ.
29 Кӧда юрас видзӧ отирсӧ дзескӧтны,
сія матісьсӧ ызйӧтӧ умӧльсӧ керны,
кежӧтӧ сійӧ умӧльсӧ кера́н туй вылӧ.
30 Кин чикралӧ синнэсӧ, сія мӧдӧ умӧльсӧ керны.
Кин тырпсӧ курччӧвтӧ, сія лёксӧ керӧ.
[Сыись лӧгыс горись тшын моз путриктӧ-петӧ.]
31 Дзор юрси ─ югьяла́н юркытш,
сія локтӧ веськыта олӧ́мсянь.
32 Ыджыт мылаа
*в морт повтӧм мортся буржык.
Асьӧс киын видзӧ́м буржык кар босьтӧ́мся.
33 Чапкӧны жребий,
но мый усяс ─ сія Дӧсвидзисьсянь.
*а 16:8 сьӧм ─ деньги
*б 16:11 ӧшлӧ́м ─ взвешивание
*в 16:32 мыла ─ терпение
Глава 16
