Библия
Выбрать язык
Книги Ветхого Завета
Книги Нового Завета
с русским текстом
ЕКЛЕСИАСТЛОН НЕБОГ
Глава 1
1 Висьталӧ́ммес Давид зонлӧн, Ерусалимись ӧксулӧн, мывкыда велӧтісьлӧн.Шонді увтын нем абу вильыс
2 Весись, весись,
быдӧс весись педзӧ́м
*а,
─ шуис мывкыда велӧтісь.
3 Мортлӧ мый бурыс сьӧкыта уджалӧ́мись,
шонді увтын сылӧн мырсьӧ́мись?
4 Му вывсис ӧтіккез мунӧны,
сэтчӧ мӧдіккез чужӧны,
а муыс пыр сулалӧ.
5 Шонді петӧ, и шонді пуксьӧ,
сэсся бӧра аслас петанінӧ тэрмасьӧ.
6 Тӧлыс пӧльтӧ ойланьсянь,
сэсся бергӧтчӧ, пӧльтӧ лунланьсянь.
Сія бергалӧ-кытшлалӧ
да бӧр бертӧ сэтчӧ, кытӧн лэбтісис.
7 Быдӧс юэс визывтӧны саридзӧ,
но саридзыс оз тыр.
Ваыс бӧр бертӧ ва петанінӧ,
медбы бӧра визывтны.
8 Мортсӧ быдӧс мыдзӧтӧ:
сія оз вермы быдӧс висьтасьны,
видзӧтӧ́мӧн озӧ пӧтӧ синнэз,
кывзӧ́мӧн озӧ тырӧ пеллез.
9 Мый вӧлі, сія и лоас.
Мый вӧлі керӧм, сійӧ и пондасӧ керны,
шонді увтас нем абу вильыс.
10 Мукӧдыс йылісь шуӧны, эта мыйкӧ виль пӧ,
а сія миян овтӧдз кӧркӧ вӧлӧма ни.
11 Мый вӧлӧма, сійӧ вунӧтісӧ,
а мый лоас, сійӧ сёрӧнжык оліссез вунӧтасӧ.
Мывкыда велӧтісьлӧн шуд кошшӧ́м
12 Ме, мывкыда велӧтісь, вӧлі ӧксуӧн Израильын, Ерусалим карын.13 Ме быдсӧн ола́нӧс пуктi, медбы мывкыда юрӧн видзӧтны-тӧдмавны быдӧс, мый керсьӧ енӧж увтын. Этӧ сьӧкыт уджсӧ Еныс сетiс отирлӧ, медбы нiя весь эзӧ олӧ.14 Ме адззылі быдӧс, мый керсьӧ енӧж увтын. И ме адзза: быдӧс весись педзӧ́м, кыдз тӧв сьӧрын вӧтлісьӧ́м*б.
15 Чукылясӧ он вермы веськӧтны,
и мый абу, сійӧ он вермы лыддьыны.
16 Ме аскӧттям баитi сідз: «Ме вы́лына лэбтiси. Лои мывкыдажык быдӧннысся, кӧдна ме одзын юралісӧ Ерусалимын. Мывкыдыс да тӧдӧ́мыс*в сьӧлӧмам уна йиджисӧ».17 Менӧ сьӧлӧмӧ кыскис тӧдмавны, мыйын мывкыдыс, етша вежӧрыс да бӧбсораыс. Но ме вежӧрті: эта кыдз тӧв сьӧрын вӧтлісьӧ́м.
18 Мортлӧн уна кӧ мывкыдыс, уна и тӧждісьӧ́мыс.
Кӧда содтӧ тӧдӧ́мсӧ, сія содтӧ сьӧлӧм шогсӧ.
*а 1:2 педзӧ́м ─ суета
*б 1:14 Али: ловлӧн тӧждісьӧ́м
*в 1:16 тӧдӧ́м ─ знание
Глава 1
