Библия
Выбрать язык
Книги Ветхого Завета
Книги Нового Завета
с русским текстом
ВЕЛОТАН ВИСЬТАЛОММЕЗ
Глава 31
Лемуилӧс мамлӧн велӧтӧ́м
1 Кыввес Лемуил ӧксулӧн. Этадз велӧтӧм сійӧ мамыс.2 Зонӧ, менам чужӧм зонӧ,
тэ йылісь кыв се́тӧмӧн ме кейми.
3 Ассит вынтӧ инькаэзлӧ эн сет,
ӧксуэзӧс уськӧтiсь инькаэзӧс
эн лэдз бергавны тэ гӧгӧрын.
4 Лемуил, ӧксуэзлӧ оз ков винасӧ юны,
юраліссезлӧ ─ кодззӧта́н юа́ннэз.
5 Кодувьяныс нiя вермасӧ вунӧтны туйдӧ́тсӧ,
судын дугдасӧ дорйыны дзескӧтлӧм мортсӧ.
6 Кодззӧта́н юа́нсӧ сетӧ кулісь мортлӧ,
винасӧ сетӧ ӧддьӧн тӧждiсисьлӧ.
7 Сія ась юӧ да вунӧтӧ ассис умӧля олӧ́мсӧ,
пессьӧ́м-мырсьӧ́мыс ась и тӧд вылӧ оз усь.
8 Дорйы нiйӧ, кӧдна асьнысӧ озӧ вермӧ дорйыны
да айтӧм-мамтӧммесӧ.
9 Судын бӧрйись веськыта,
дорйы умӧля олісьӧс да кортӧн ветлӧтісьӧс.
Бур иньӧс ошкӧ́м
10 Бур инь адззыны абу кокнит.
Дона иззэзся сія донажык.
11 Жӧник сылӧ быдӧсын веритӧ,
сылӧ инь пажытьсӧ содтӧ.
12 Бур иньыс кузь ола́н сылӧ бурсӧ керӧ,
оз кер умӧльсӧ.
13 Вурун да лён сія шедтӧ,
гажа сьӧлӧмӧн удж бердӧ кутчисьӧ,
аслас киэзӧн быд торсӧ керӧ.
14 Сія вузасисьлӧн корабль кодь,
ылісь сёя́нсӧ вайӧ.
15 Сія одз чеччӧ, гортiссезлӧ сёя́н лӧсьӧтӧ,
инька раббезлӧ удж сетӧ.
16 Видзӧтӧ ыб да сійӧ небӧ.
Аслас киэзӧн шедтӧм сьӧм вылӧ
виноград пуэз садитӧ.
17 Сія сьӧкыт удж вермӧ керны,
сылӧн киэс вынаӧсь.
18 Сія тӧдӧ, сылӧн уджыс бура мунӧ,
ойбыт сылӧн биыс сотчӧ.
19 Киыс печка́н дынӧ нюжӧтчӧ,
чуннес чӧрссӧ оз и лэдзлӧ.
20 Кортӧн ветлӧтiсьлӧ сія сетӧ,
умӧля олісьлӧ отсасьӧ.
21 Кӧдзытiсь да лымись сія оз пов,
гортiссеслӧ эд сія быдӧнныслӧ тӧвся паськӧм вурис.
22 Ачыс шебрассэз кыйӧ,
сӧдз дӧраись пемыт-гӧрд рӧма паськӧмӧ пасьтасьӧ.
23 Сылісь жӧниксӧ бур мортӧ пуктӧны.
Карӧ пыра́н ыбӧссэз дынын
жӧникыс ӧтлаын пӧриссезкӧт пукалӧ.
24 Бур инь паськӧм вурӧ да вузалӧ,
Финикияись вузасиссезлӧ кушаккез вайӧ.
25 Выныс да бурӧ пуктӧ́мыс сійӧ кытшӧвтӧны.
Ашынся лунсӧ сія гажӧн видзчисьӧ.
26 Сія мывкыда кыввезӧн баитӧ,
рам сьӧлӧмсянь велӧтӧ.
27 Гортас сія быдӧс син вылын видзӧ,
весь няньсӧ оз сёй.
28 Челядь чеччӧны да шудаӧн сійӧ шуӧны.
Жӧникыс сійӧ ошкӧ сідз:
29 «Бур да кужись инькаэс унаӧсь,
а тэ быдӧннысся буржык».
30 Басӧк вывты́р да бытшӧм чужӧ́м бӧбӧтанаӧсь,
нія вежсясӧ,
а Дӧсвидзисись полісь иньӧс колӧ ошкыны.
31 Аслас киэзӧн керӧ́м понда сійӧ буркы́втӧ
*а,
сылӧн керӧ́м понда сійӧ отир одзын ошкӧ!
*а 31:31 буркы́втны ─ благодарить
Глава 31
