Выбрать язык
Книги Ветхого Завета
Книги Нового Завета
с русским текстом1 Ме юрам уна бергӧтлі да вежӧрті то мый: веськыта оліссес, мывкыдаэс да нылӧн керӧ́ммес быдӧс Енлӧн киын. Но морт оз тӧд, мый сійӧ видзчисьӧ: радейтны сійӧ пондасӧ, али син вылӧ оз понды ковны.2 Быдӧнныслӧ усьӧ ӧтік перьё*а: веськыта олісьлӧ и Ентӧг олісьлӧ, рам мортлӧ [и лӧглӧ], сӧстӧма олісьлӧ и сэрпсӧ керисьлӧ, езъяла́н вайисьлӧ и сылӧ, кӧда оз вай езъяла́нсӧ. Бурсӧ керисьлӧ и умӧльсӧ керисьлӧ, кыв сетісьлӧ и кыв сетны полісьлӧ ─ быдӧнныслӧ усьӧ ӧтік перьё.3 Сія и эм умӧльыс шонді увтас: быдӧннысӧ видзчисьӧ ӧтік перьё. И сія умӧль: мортлӧн сьӧлӧмыс тырӧм умӧльсӧ керӧ́мӧн да мывкыдтӧг олӧ́мӧн. А сэсся сія мунӧ кулӧммез дынӧ.
4 Ловья мортлӧн эм надея. Нельки ловья понлӧ буржык кулӧм левся.5 Ловьяэс тӧдӧны: и нія куласӧ. А кулӧммес нем озӧ тӧдӧ. Нылӧ бурсӧ нем ни озӧ сетӧ, нійӧ эд вунӧтісӧ ни.6 Нылӧн радейтӧ́мыс, лӧгалӧ́мыс, вежӧктӧ́мыс ӧшисӧ. Шонді увтас некӧр и немын нылӧ оз ни ло пайыс.
7 Сідзкӧ, гажӧн сёй няньтӧ, долыт сьӧлӧмӧн ю винатӧ, сідз керӧ́мыт эд Еныслӧ сьӧлӧмви.8 Тэнат паськӧмыт ась пыр лоӧ чочком, юрыт ─ виӧн ма́втӧм.9 Тэнат ола́н луннэт чожа чулалӧны, сідзкӧ, сьӧлӧмтӧ бурмӧт аслат инькӧт олӧмӧн, тэ эд сійӧ радейтан. Мырсьы-уджав да пантав быд лунсӧ, кӧднӧ Еныс сетіс тэныт овны шонді увтын. Сэтшӧм эд тэнат ола́н пайыт.10 Кытшӧм удж верман керны выныт сьӧрті, сійӧ кер. Кулӧммезлӧн оланінын, кытчӧ тэ мунан аскадӧ, абу уджалӧ́мыс, абу авйӧ́мыс, абу тӧдӧ́мыс да мывкыдыс.
11 Шонді увтас ме эшӧ казялі, кыдз овлӧ:
перыта котӧртісь медодз оз пыр лок,
повтӧммез оз овлӧ вермаліссезӧн*б,
мывкыда мортлӧн абу няньыс,
вежӧра мортлӧн абу уна пажытьыс.
Мортӧс, кӧдалӧн кисис быдӧс петӧ, озӧ ошкӧ.
Быд лоӧ́млӧ эд эм аслас кад,
быд мортлӧн ─ аслас ола́н пай.
12 Мортыс оз тӧд, мымда сылӧ кольччис овны.
Сьӧкыт кадыс морт вылӧ видзчисьтӧг локтӧ
да сійӧ кутӧ.
Умӧляс морт шедӧ
кыйся́нӧ шедӧм чери моз,
лӧчӧ*в сюрӧм кай моз.
13 Шонді увтын ме адззылі ыджыт мывкыд.14 Вӧлі учӧтик кар. Сэтӧн оліссес вӧлісӧ етша. Сы вылӧ уськӧтчис вына ӧксу. Сія карсӧ кытшӧвтіс. Карсӧ босьтны сія уна мый керис.15 Карас адззисис пажытьтӧм, но мывкыда морт. Аслас мывкыдӧн сія карсӧ мездіс. А сэсся сійӧ мортсӧ быдӧнныс вунӧтісӧ.16 Ме шуи:
─ Мывкыдыс вынся буржык,
но пажытьтӧм мортлісь мывкыда висьталӧ́мсӧ
озӧ кывзӧ, абутӧм туйӧ пуктӧны.
17 Мывкыдтӧммез веськӧтлісьлісь горӧтлӧ́мсӧ озӧ кылӧ,
а мывкыда мортлісь лӧня баитӧ́мсӧ кывзӧны.
18 Мывкыдыс быдкодь тышкася́нся*г буржык,
но ӧтік умӧльсӧ керись вермас уна бурсӧ разьны.
*а 9:2 перьё ─ судьба, участь
*б 9:11 вермалісь ─ победитель
*в 9:12 лӧч ─ силок
*г 9:18 тышкася́н ─ оружие
Глава 9