Библия
Выбрать язык
Книги Ветхого Завета
Книги Нового Завета
с русским текстом
ЕКЛЕСИАСТЛОН НЕБОГ
Глава 10
1 Кулӧм гуттэз чӧскыт дука висӧ
тшыкӧтӧны да зынсьӧтӧны.
Сідз и мывкыда мортсӧ, кӧдӧ бурӧ пуктӧны,
умӧльтӧ сылӧн невна мывкыдтӧг керӧ́мыс.
2 Мывкыда мортлӧн сьӧлӧмыс вайӧтӧ шуда
*а ола́нӧ,
мывкыдтӧмлӧн ─ шудтӧм ола́нӧ.
3 Кӧр мывкыдтӧм морт мунӧ туй кузя,
быдӧнныс адззӧны, кытшӧм етша сылӧн вежӧрыс.
Сія эд быдӧнныслӧ ассис етша вежӧрсӧ мыччалӧ.
4 Юралісь тэ вылӧ лӧгасяс кӧ, эн пышшы.
Мортыс асьсӧ рама видзны кужӧ кӧ,
сэк нельки ыджыт умӧль керӧ́м проститасӧ.
5 Шонді увтын ме адззылі
юралісьлісь сэтшӧм умӧль керӧ́м:
6 учӧт вежӧраэсӧ вылына лэбтӧ,
а пажытя отирсӧ улӧ лэдзӧ.
7 Ме адззылі: раббез верзьӧмӧн мунӧны,
а ӧксуэз раббез моз подӧн ветлӧтӧны.
8 Кин мӧдіклӧ яма гарйӧ, сія ачыс сэтчӧ усьӧ.
Кин йӧр разьӧ, сійӧ кый чушкӧ.
9 Иззэз поткӧтiсь вермас асьсӧ стрӧйдны.
Пес поткӧтiсь вермас асьсӧ дойдны.
10 Ныжмӧм чертӧ он кӧ кеслы,
ковсяс быд вынiсь уджавны.
Мывкыдыс сорасьӧ́мтӧ вермас веськӧтны.
11 Кыйӧн веськӧтлісьӧс
*б кыйыс
*в чушкас кӧ
удж пондӧтӧ́мӧдз,
сэк сылӧ кужӧ́мыс оз ни отсав.
12 Мывкыда мортлӧн баитӧ́мыс сьӧлӧм бурмӧтӧ,
а мывкыдтӧмсӧ аслас ӧмыс вийӧ.
13 Сылӧн баитӧ́мись медодзза кыввесӧ он вежӧрт,
и медбӧрья кыввесӧ сія бӧбсорӧн висьталӧ.
14 Мывкыдтӧм морт унаӧв баитӧ,
кӧть оз тӧд, мый сійӧ видзчисьӧ.
Некин эд оз вермы висьтавны,
мый лоас сылӧн кулӧ́м бӧрын.
15 Мывкыдтӧмсӧ уджыс мыдзӧтӧ,
сія нельки карӧ муна́н туйсӧ вунӧтӧ.
16 Умӧль сія муын, кытӧн ӧксуыс томыник,
а веськӧтліссес асывсянь гажӧтчӧны.
17 Бур сія муын, кытӧн ӧксуыс бур увтырись.
Сэтӧн веськӧтліссес аскадӧ сёйӧны-юӧны
вынсялӧ́м понда, озӧ кодалӧ́м могись.
18 Дышӧтчисьлӧн потолокыс ӧшӧтчӧ,
киэз тэчӧмӧн пукалісьлӧн керку юрыс письтӧ.
19 Ӧтлаӧ сёйны-юны гажӧтчӧ́м могись ӧксьӧны,
и винаыс ола́нсӧ гажӧтӧ.
А быдӧс понда сьӧмӧн вештiсьӧны.
20 Ӧксуӧс умӧльтны нельки юрат эн пырт,
уна пажытя мортӧс ольпасят эн умӧльт.
Енӧжись кай вермас нуӧтны тэнчит кывветӧ,
бордаыс вермас висьтасьны тэнчит баитӧ́мтӧ.
*а 10:2 шуда ─ счастливый
*б 10:11 кыйӧн веськӧтлісь ─ заклинатель
*в 10:11 кый ─ змея
Глава 10
