Выбрать язык
Книги Ветхого Завета
Книги Нового Завета
с русским текстом1Гижӧ Павел, Кристос Исуслӧн апостол. Апостолнас менӧ сувтӧтісӧ миянӧс Мездӧтісь Ен да Дӧсвидзись Кристос Исусыс, миян надеяным.2Гижа Тимофейлӧ. Тэ меным веритӧмным кузя былись зон туйӧ. Ен Айным да Дӧсвидзись Кристос Исусным ась козьналасӧ тэныт небыт сьӧлӧмсянь бурсетӧмсӧ*а да лӧнь олансӧ.
3Македонияас иньдӧтчытӧнням ме кори тэнӧ олыштны Ефесас. Сэтчинісь мукӧдсӧ тшӧкті ӧвны, медбы эзӧ велӧтӧ мӧдікас4да эзӧ чулӧтӧ весись кадсӧ абутӧмыс йылісь баитӧмнаныс, орӧттӧг эзӧ бӧрйисьӧ чужан вужжезас*б. Сэтісь лэбтісьӧ уна етшасьӧм*в. Сія оз отсав керны Еныслісь уджсӧ, кӧдӧ позьӧ керны дзир веритӧмӧн.5Ме сеті этнӧ тшӧктӧммесӧ*г, медбы тіян вӧлі радейтӧм. Радейтӧмыс петӧ сӧстӧм сьӧлӧмсянь, умӧльсӧ кертӧг олӧмсянь да былись веритӧмсянь.6Сэтісь мукӧдыс ылалісӧ, лэдзчисисӧ баитны абутӧмыс йылісь.7Нія асьнысӧ пуктӧны Туйдӧтӧ велӧтіссезӧ. Асьныс тай озӧ вежӧртӧ, мый баитӧны да мыйӧ велӧтӧны.
8Мийӧ тӧдамӧ: Туйдӧтыс бур, мортыс кӧ сы сьӧрті олӧ.9Тӧдамӧ, Туйдӧтыс абу гижӧм Ен сьӧрті веськыта оліссезлӧ. Сія гижӧм Туйдӧт вылӧ видзӧттӧг оліссезлӧ, кывзісьтӧммезлӧ, Ентӧг оліссезлӧ, умӧльсӧ кериссезлӧ, сэрпӧссезлӧ, ай-мам вылӧ ки лэбтіссезлӧ, морт вийиссезлӧ, Енсӧ абутӧм туйӧ пуктіссезлӧ,10кыскасиссезлӧ, ӧтамӧдкӧт инькӧт моз олісь ай отирлӧ, отирӧн вузасиссезлӧ, бӧбӧтчиссезлӧ да нылӧ, кӧдна сетӧм кывсӧ озӧ видзӧ. Туйдӧтыс гижӧм быдӧнныслӧ, кӧдна керӧны сійӧ, мый абу бур велӧтӧмыс сьӧрті.11Сія велӧтӧмыс ─ Енлӧн югьялӧм йылісь Бур Юӧр. Сійӧ Бур Юӧрсӧ висьтасьны менӧ ыстіс Еныс, Кӧдӧ пыр колӧ ошкыны.
12Буркывта миянлісь Дӧсвидзись Кристос Исуссӧ. Сія вынсьӧтіс менӧ да пуктіс надейнӧй мортӧ керны Сылісь уджсӧ.13Ме одзжык Кристоссӧ видлі, Сылісь отирсӧ вашӧтлі, нылӧ умӧльсӧ кери. Но Кристосыс вӧлі ме дынӧ небыт сьӧлӧма. Ме эд сідз кери тӧдтӧг, Сылӧ эг верит да.14Дӧсвидзисьным тырмӧмви козьналіс меным бурсетӧмсӧ, Кристос Исус пыр сетіс веритӧм да радейтӧм.15Быдыслӧ колӧ босьтны этнӧ веськыта висьталӧм кыввесӧ: Кристос Исусыс локтіс му вылас мездыны умӧльӧ кериссесӧ. Ны коласісь медумӧльыс ме.16Кристос Исусыс вӧлі ме дынӧ небыт сьӧлӧма. Сія ме вылын мыччаліс отирыслӧ Ассис ыджыт мыласӧ*е. Отирыс ась видзӧтӧны ме вылӧ да пондӧны Сылӧ веритны, медбы овны пырся оланын*ж.17Пыр олісь да юралісь Ӧксулӧ ─ ыджыт мывкыда тыдавтӧм ӧтка Енлӧ ─ вылына лэбтӧмыс*з да югьялӧмыс*и пырся-пыр! Аминь.
18Тимофей зонӧ, видза тӧдвылам тэ йылісь Енсянь юӧртіссезлісь висьталӧммезнысӧ. Кора тэнӧ: нылӧн висьталӧм сьӧрті пессьы бур воин моз.19Быдӧс кер ёна веритӧмӧн да ов сідз, медбы сьӧлӧмытлӧ нем вӧлі висьтавны*к умӧльсӧ. Мукӧдыс сьӧлӧмныслісь висьталӧмсӧ пуктісӧ абутӧм туйӧ, сійӧн нылӧн веритӧмныс косьмӧм шор моз ӧшис.20Сэтшӧммес Именей да Александр. Ме нійӧ коли сотанаыслӧ, медбы дугдісӧ умӧльтны Енсӧ.
*а 1.2 бурсетӧм ─ благодать
*б 1.4 чужан вуж ─ родословие, происхождение
*в 1.4 етшасьны ─ спорить
*г 1.5 тшӧктӧм ─ заповедь, повеление
*д 1.12 буркывтны ─ благодарить
*е 1.16 мыла ─ терпение
*ж 1.16 пырся олан ─ вечная жизнь
*з 1.17 вылына лэбтӧм ─ честь
*и 1.17 югьялӧм ─ слава
*к 1.19 сьӧлӧмлӧн висьталӧм ─ совесть
Глава 1