Выбрать язык
Книги Ветхого Завета
Книги Нового Завета
с русским текстом1 Иаков ончыко ончалынат, ужын: Исав [изаже] толеш, пеленже нылшӱдӧ еҥ. Иаков Лиян, Рахильын да кок тарзе ӱдырамашын йочаштым посна-посна ойырен шогалтен.2 Тарзе ӱдырамаш-влакым да нунын йочаштым ончыко вераҥден, нунын почеш Лиям да тудын йочаже-влакым шогалтен, а Рахиль ден Иосифым эн шеҥгелан коден.3 А шкеже нунын ончылно ошкылын. Изаж деке лишеммыж годым вуйжым шым гана мланде марте савен.4 Исав шке шольыж деке куржын миен, тудым ӧндалын, шӱйышкыжӧ кержалтын да шупшалын. Нуно коктынат шортыныт.
5 Исав вуйжым нӧлталын да Иаковын ватыж ден йочаж-влакым ужын. Тудо йодын: «Кӧмыт тиде тыйын улыт?» Иаковшо манын: «Тиде тыйын тарзетлан Юмын пуымо икшывыж-влак».6 Вара тарзе ӱдырамаш-влак ден нунын йочашт лишемыныт да вуйыштым савеныт.7 Лия ден йоча-влакшат, толын, вуйыштым савеныт. Пытартышлан Иосиф ден Рахиль толыныт да тыгак вуйыштым савеныт.
8 Вара Исав йодын: «Мый пеш шуко кӱтӱм вашлийым. Молан тый нуным колтенат?» Иаковшо манын: «Чыла тидым [тыйын тарзетлан] озажын поро кумылжым сулен налаш манын колтымо».9 Исав тудлан каласен: «Шольым, мыйын шкемынат чыла уло. Мо тыйын уло, тек шке денет кодеш».10 Иаков тидлан вашештен: «Уке, мый тыйын поро кумылетым суленам гын, нал мый дечем тиде пӧлекым. Мый вет тыйын чуриетым Юмын чурийжым ужмо семын ужым, да тый мылам поро кумылетым ончыктышыч.11 Нал мыйын кондымо суапландарымаш пӧлекем. Юмо мылам чылажымат пеш шуко пуэн, мыйын чыла уло». Тыгай мутшо дене Иаков изажым савырен – тудо пӧлекшым налын.
12 Вара Исав манын: «Айда тарванена да каена. Мый ончыч ошкылам».13 Иаков тудлан каласен: «Мыйын озам пала: икшывем-влак эше изи улыт, а шорык ден ушкал-влакем пачан да презан улыт. Нуным кечыгут эре поктен наҥгаяш гын, колен кертыт.14 Мыйын озам шке тарзыж деч ончыч кайыже, а мый вольык ден йоча-влакын каен кертмышт семын Сеирыш шке озам деке эркын миен шуам».15 Исавше манын: «Мый тый денет шке еҥем кокла гыч икмыняржым кодем». А Иаков вашештен: «Молан тидыже? Мыйже вет озамын поро кумылжым гына сулен налнем ыле!»
16 Исав тудо кечынак толмо корныж дене Сеирыш каен.17 А Иаков Сокхофыш тарванен, тушан тудо шкаланже пӧртым чоҥен, вольыкшылан леваш-влакым ыштен. Садланак ты вержымат Сокхоф*а манын лӱмден.
18 Месопотамий гыч пӧртылмекше, Иаков Ханаан мландысе Сихем олашке сайынак миен шуын да ола воктене верланен.19 Емморын, Сихемын ачажын, эргышт деч шӱдӧ ший оксалан мландым налын да тушан шке омашыжым вераҥден.20 Вара тушто жертвенникым шынден да Господьын, Израиль Юмын, лӱмжым ӱжын кумалын.
*а 33:17 «Сокхоф» лӱм еврей йылмыште ’леваш-влак’ манмым ончыкта.
Глава 33