Выбрать язык
Книги Ветхого Завета
Книги Нового Завета
с русским текстом1 Тыгеракын, икымше ойпидыш годым калыкын Юмылан служитлымым палемдыше радамже да тиде тӱнясе святой верже лийыныт.2 Скинийым шогалтыме, тудын икымше кыдежыштыже светильник, ӱстел, надыр кинде лийын, да тудым «святой» маныныт.3 А кокымшо пӱрдыш вес велне «святой дечат святой» манме кыдеж верланен.4 Тушто тӱтыраш шӧртньӧ дене ыштыме ӱстел да чыла могырым шӧртньӧ дене леведме ойпидыш шондык лийыныт. Шондыкышто манным аралыме шӧртньӧ ате, Ааронын пеледше пондыжо да ойпидышым возыман кок кӱоҥа киеныт.5 Шондык ӱмбалне Юмын чапше дене йолгалтше херувим-влак серлагыме верым леведыныт. Тидын нерген ынде тичмашын каласкалыме ок кӱл.
6 Чылажымат тыге келыштарымеке, скинийын икымше кыдежышкыже иерей-влак служитлыме пашаштым шукташ эре пурен коштыныт.7 А кокымшо кыдежыш ийлан ик гана архиерей гына пурен, тунамжат пеленже вӱрым налшаш улмаш, тудым шке верчше да калыкын палыде ыштыме языкше верч надырлан конден.8 Икымше скиний шогымо годым эн святой верыш корным эше почмо огыл манын, Святой Шӱлыш ончыкта.9 Чыла тиде – кызытсе жапым туштен ончыктымаш: пӧлекым да надырым кондат, но нунышт Юмылан тыге служитлыше еҥын совестьшым тӱрыснек эрныктарен огыт керт.10 Кочкыш, йӱыш да тӱрлӧ мушкылтмо йӱла-влак семынак надырым кондымашат – кап дене кылдалтше кӱштымаш веле, чыла тидыже уэмдымаш жап марте гына лиеш.
11 Но Христос, мемнам вучышо суапын Архиерейже, ынде кугурак да сайрак скиний дене толын. Тиде скинийже кид дене ыштыме огыл, Юмын ыштыме тиде тӱня гыч огыл.12 Каза таган да ӱшкыжын вӱржӧ дене огыл, а Шкенжын Вӱржӧ дене Христос икана эн святой верыш пурен да курымашлык сулен налмашым мыланна ыштен.13 Вет каза тага ден ӱшкыж вӱрым да тунан ломыжшым шыжыктымаш шакшемше-влакын кап ден чоныштым эрыкта да святитла гын,14 тугеже Христосын Вӱржӧ мыняре шукырак ышта! Тудо Святой Шӱлыш дене Шкенжым Юмылан титакдыме жертве семын пуэн. Христосын Вӱржӧ мемнан шӱмнам колымашке наҥгайыше паша деч эрыкта, да ме илыше да чын Юмылан служитлен кертына.
15 Ӱжмӧ-влак сӧрымӧ курымашлык югыпогым налышт манын, Христос, икымше ойпидыш годымсо титакым сулен налаш колымеке, у ойпидышын ходатайже лийын.16 Кушто завещаний*а уло, тушто завещанийым возышын колымыжым пеҥгыдемден ончыкташ кӱлеш,17 завещаний колымо деч вара веле вийыш пура. Возышын илымыж годым тудын нигунамат вийже уке.18 Садланак икымше ойпидышат вӱр деч посна пеҥгыдемдалтын огыл.19 Вет Моисей, законысо чыла кӱштымым уло калыклан ойлымеке, ӱшкыжын да каза таган вӱрыштым, тыгак вӱдым, йошкар межым да иссоп укшым налын, закон книга ӱмбакат, калык ӱмбакат шыжыктен.20 Тудо ойлен: «Теве ойпидышын вӱржӧ, тиде ойпидышым Юмо тыланда шукташ кӱштен».*б21 Тыгак скинийымат, Юмылан служитлыме годым кучылтмо чыла ӱзгарымат вӱр дене шыжыктен.22 Закон почеш чылам гаяк вӱр дене эрныкташ кӱлеш, да вӱрым йоктарыме деч посна титакым касарымаш огеш лий.
23 Тыгеже пылпомышысо дене келшен толшо-влакым тыге эрныкташ кӱлеш, а чыла пылпомышысым шкенжым – тидын дечат сайрак надыр дене.24 Вет Христос кид дене ыштыме святой верыш огыл пурен – тидыже чын святой верын тӱсшӧ веле – а ынде мемнан верч Юмын ончылан шогалаш манын, пылпомышкак пурен.25 Святой дечат святой верыш ий еда шкенжын вӱржӧ дене огыл пурышо тыглай архиерей семын Христос Шкенжым шуко гана жертвылан пуаш тушко пурен огыл,26 уке гын тӱня тӱҥалтыш гычак Тудлан шуко гана орланен колаш логалеш ыле. Ынде, саман мучаште, Шкенжын жертвыже дене языкым пытараш манын, Тудо ик гана гына тӱняшке толын.27 Айдеме ик гана колышаш, а вара суд лиеш.28 Христос денат тыгак: шукыштын языкыштым Шке ӱмбакыже налаш манын, Тудо Шкенжым ик гана жертвылан пуэн, а кокымшо гана языклан кӧра огыл, а Тудым вучышо-влакым утараш толеш.
*а 9:16 Ик грек мутак «завещанийым» да «сугыньым» але «ойпидышым» ончыкта.
*б 9:20 Лекм 24:8.
Глава 9