Выбрать язык
Книги Ветхого Завета
Книги Нового Завета
с русским текстом1 Вара мый храм гыч шым Суксылан виян йӱк дене ойлымым колынам: «Кайыза да Юмын шыдыжын шым чашыжым мланде ӱмбаке ястарыза!»
2 Икымше Суксо каен да шке чашыжым мланде ӱмбаке ястарен. Тунам янлыкын палыжым налше да тудын тӱсшылан вуйым савен кумалше-влакын капешышт орландарыше йырнык шӱйшӧ сусыр лектын.
3 Кокымшо Суксо шке чашыжым теҥызыш ястарен: вӱд колышын вӱржӧ гай лийын, да теҥызыште чыла чонан колен.
4 Кумшо Суксо шке чашыжым эҥерлашке да памашлашке ястарен, да нуно вӱрыш савырненыт.5 Мый вӱд Суксын ойлымыжым колынам:
«Господь, Тый улшо да лийше, святой,
тыге судитлымет дене чын улат.
6 Нуно святой ден пророк-влакын вӱрыштым йоктареныт,
да Тый нунылан вӱрым йӱаш пуэнат.
Нуно тидым шогат».
7 Мый жертвенник деч весын ойлымыжым колынам:
«Туге, Чылакучышо Господь Юмо,
Тыйын судитлымет чын да поро».
8 Нылымше Суксо шке чашыжым кечыш ястарен: кечылан еҥ-влакым тул дене когарташ эрык пуалтын.9 Кугу пич шокшо дене еҥ-влак когаргеныт да нине эҥгекым кид йымалныже кучышо Юмын лӱмжым мыскыленыт, язык деч кораҥын огытыл, Юмым чапландарен огытыл.
10 Визымше Суксо шке чашыжым янлыкын престолышкыжо ястарен, да тудын кугыжанышыже пычкемышалтын. Еҥ-влак орланымышт дене йылмыштым пурыныт,11 орланымыштлан да сусырыштлан кӧра пылпомышысо Юмым мыскыленыт, осал пашашт деч кораҥын огытыл.
12 Кудымшо Суксо шке чашыжым кугу Евфрат эҥерыш ястарен. Эҥерын вӱдшӧ кошкен, тыге эрвел могырысо кугыжа-влаклан корно почылтын.13 Вара драконын умшаж гыч, янлыкын умшаж гыч да шояк пророкын умшаж гыч ужавала койшо кум шакше шӱлыш лекмым мый ужынам.14 Нуно палдарыше палым ончыктышо ия шӱлыш улыт. Нуно уло тӱнян кугыжаж-влак деке лектыт да нуным Чылакучышо Юмын тиде кугу кечынже лийшаш кредалмашлан погат.15 «Теве, вор семын вучыдымын толам: чара кошташ огыл да намысшым ынышт уж манын, вургемжым аралыше да тӱткӧ лийше еҥ поро пиалан».16 Суксо чыла кугыжа-влакым еврейла Армагеддон*а манме верыш поген.
17 А шымше Суксо шке чашыжым южыш ястарен, да пылпомышысо храм гыч престол деч виян йӱк шергылтын, тудо каласен: «Шукталтын!»18 Волгенче, кӱдырчӧ да йӱк-йӱан лийын, мланде виян чытырналтын. Тугай кугу да виян чытырналтмаш лийын, могайже мланде ӱмбалне айдеме улмо годсек нигунамат лийын огыл.19 Кугу ола кум ужашлан шелалтын, вес калык-влакын олашт шаланеныт. Шыдыжын да чот сырымыжын аракажым йӱкташ манын, Юмо кугу Вавилон оламат шарналтен.20 Чыла отро торлен йомын, курык-влакат кодын огытыл.21 Пылпомыш гыч еҥ-влак ӱмбаке талант*б наре нелытан шолдыра шолем йоген. Шолем деч лийше эҥгеклан верчын еҥ-влак Юмым мыскыленыт, вет азапше моткоч кугу лийын.
*а 16:16 Армагеддон – ’Мегиддо курык’ манмым ончыктышо еврей лӱм. Мегиддо ола Палестинын йӱдвел ужашыштыже лийын. Иоаннын ужмо кончымаште тиде верыш тӱнясе кугыжа-влак кугу кучедалмашке погыненыт.
*б 16:21 Талант – кумло килограмм утла.
Глава 16