Выбрать язык
Книги Ветхого Завета
Книги Нового Завета
с русским текстом1 Шым чашым кучышо шым Суксо кокла гыч иктыже толын да мылам каласен: «Тышке тол, мый тыланет шуко вӱд ӱмбалне шинчыше чот яжарланыше ӱдырамашым судитлымым ончыктем.2 Тудын дене мландымбалысе кугыжа-влак яжарланеныт, да тудын яжарланымыжын аракаж дене мланде ӱмбалне илыше-влак руштыныт».3 Вара Суксо мыйым шӱлыш дене ир мландыш наҥгаен. Мый йошкар янлык ӱмбалне шинчыше ӱдырамашым ужынам, янлыкын шым вуйжо да лу тӱкыжӧ лийын, капше Юмым мыскылыме лӱм-влак дене темалтше лийын.4 Ӱдырамаш шемалге-йошкар да чевер вургеман лийын, шӧртньӧ, шергакан кӱ да ракывотшер дене сӧрастарыме улмаш, йырнык да яжарланымыжын амырчыкше дене темыме шӧртньӧ чашым кидыштыже кучен.5 Тудын саҥгаштыже шолып шонымашан лӱмым возымо: «Кугу Вавилон – мландымбалысе яжарланыше-влакын да йырныкын авашт».6 Святой-влакын вӱрышт да Иисусын таныклышыже-влакын вӱрышт дене тудын йӱын темше улмыжым мый ужынам.
Ӱдырамашым ужмекем, мый моткоч чот ӧрынам.7 Суксо мылам каласен: «Молан тый ӧрат? Мый тыланет тиде ӱдырамашын да тудым нумалше шым вуян, лу тӱкан янлыкын тайныштым каласем.8 Тыйын ужмо янлык лийын, а ынде уке. Тудыжо пундашдыме келгыт гыч лектеш да пытымашке кая. Мландымбалне илыше-влак, кӧмытын лӱмыштым тӱням ыштыме годсекак илыш книгаш возымо огыл, янлыкым ужмекышт ӧрыт: тиде янлыкше лийын, ынде уке, но толеш.9 Тыште уш-акыл кӱлеш. Шым вуй – тиде шым курык, нунын ӱмбалне ӱдырамаш шинча;10 тыгак тиде шым кугыжа. Нунын кокла гыч визытынже сӱмырленыт, иктыже уло, пытартышыже але толын огыл, а кунам толеш, кужу жаплан кодшаш огыл.11 Тиде янлык, кудо лийын да ынде уке, тудо кандашымше, но нине шымыт кокла гыч улеш да пытымашке кая.12 Тыйын ужмо лу тӱкӧ – тиде лу кугыжа, нуно кугыжанышым але налын огытыл, но янлык дене пырля кугыжан гай кучемвийым кӱчык жаплан налыт.13 Нуно икоян лийыт: куатыштымат, кучемвийыштымат янлыклан пуат.14 Нуно Пача дене кредалаш тӱҥалыт, да Пача нуным сеҥа, вет Тудо – господь-влакын Господьышт да кугыжа-влакын Кугыжашт, а Тудын дене пырля улшо-влакше ӱжмӧ, ойырен налме да ӱшанле улыт».
15 Вара Суксо мылам ойлен: «Яжарын шинчыме верыште тыйын ужмо тӱрлӧ вӱд – тидыже калык, еҥ тӱшка, тукым да йылме-влак.16 Янлыкын тыйын ужмо лу тӱкыжӧ яжарым ужмышудымо лийыт. Нуно тудым нимо деч посна, чарам кодат, капшым кочкыт, яжарым тулеш йӱлалтат.17 Вет Юмо шке шонымыжым шуктымым нунын шӱмышкышт пыштен, сандене нуно икоян кумылыштым шуктат да, Юмын шомакше шукталтмешке, янлыклан шке кугыжанышыштым пуат.18 А тыйын ужмо ӱдырамаш мландымбалысе кугыжа-влак дене кугыжаланыше кугу ола улеш».
Глава 17