Choose Language
Old Testament Books
New Testament Books
2-тӥ книга
1Соку Соломон шуиз: «Кузё-Инмар шуиз, Солэн ӟеч эрикез вань пеймыт азьын улыны,2мон Тыныд, [Святой,] улыны корка пуктӥ, пумтэм вапумъёс ӵоже Тыныд улон инты».3Эксэй берытскиз но кенеше люкаськем вань израиль калыкез бакель кариз, кенеше люкаськем вань израиль калык пыд йылаз сылӥз, –4со шуиз: «Израильлэн Инмарез Кузё-Инмар данлыко, Со мынам атаелы, Давидлы, Ас ымыныз мар вераз, сое Ас киыныз быдэстӥз! Со шуиз:5”Ас калыкме Египет музъемысен поттэм дырысен Мон нимылы улон корка пуктон понна одӥгезлэсь но израиль выжылэсь городзэ ӧй бырйы, Аслам Израиль калыкеным кивалтыны одӥгзэ но ӧй бырйы,6бырйи Иерусалимез, отын Мынам нимы мед улоз шуыса, бырйи Давидэз, Мынам израиль калыке вылын мед луоз шуыса”.7Мынам атаелэн, Давидлэн, сюлмаз малпан улӥз: Израильлэн Инмарезлэн Кузё-Инмарлэн нимызлы сӥзем корка пуктоно.8Нош Кузё-Инмар Давидлы, мынам атаелы, шуиз: ”Тынад сюлмад малпан улэ Мынам нимылы сӥзем храм пуктыны; умой, со тынад сюлмад улэ шуыса.9Но тон храм уд пукты, сое тынад макес вискысьтыд потэм пиед Мынам нимылы сӥзем храм пуктоз”.10Аслэсьтыз верам кылзэ Кузё-Инмар быдэстӥз: атае, Давид, интые мон луи, Израильлэн престол вылаз мон пукси, кызьы вераз Кузё-Инмар, Израильлэн Инмарезлэн Кузё-Инмарлэн нимызлы сӥзем корка пуктӥ.11Отчы мон Кузё-Инмарлэсь израиль пиослы сётэм сӥзён-косонэн ковчегез пуктӥ».
12Кенеше люкаськем вань израиль калыклэн азяз, Кузё-Инмарлы курбон сётон ӝӧк азе, Соломон султӥз но киоссэ вӧлъяз, –13уго Соломон ыргонлэсь амвон лэсьтӥз – вить гырпум кузьдалаез, вить гырпум пасьталаез, нош ӝуждалаез куинь гырпум ӝужда, сое азбар шоры пуктӥз; со вылэ султыса, кенеше лыктэм вань израиль калык азе пыдесъяськыса йыбырттӥз, киоссэ ин пала ӝутыса,14со шуиз: «Кузё-Инмаре Израильлэн Инмарез! Инмын но, музъем вылын но тон кадь Инмар ӧвӧл. Сӥзён-косонэз но вань сюлмынызы Тынад азьтӥд ветлӥсь ляльчиосыдлы гажан-жалянэз Тон утиськод:15Аслад ляльчиедлы, Давидлы, мынам атаелы, верамдэ быдэстӥд; мар верад Ас ымыныд, та нуналэ сое Ас киыныд быдэстӥд.16Израильлэн Инмарез Кузё-Инмаре, али но быдэсты мынам атаелы, Давид ляльчиедлы, тазьы верам кылъёстэ: ”Тынад пиосыд ас сюрессэс чакласа улӥзы ке, Мынам законэлэн сюресъёсыз вылтӥ ветлӥзы ке, кызьы тон Мынам азьтӥм ветлӥд, Израильлэн престол вылаз, Мынам азям пукись пимуртэд уз ышы-быры”.17Израильлэн Инмарез Кузё-Инмар, шонер мед луоз Давид ляльчиедлы Тынад верам кылыд.
18Зэм ик, Инмарлы-а музъем вылын адямиосын огазьын улоно? Ин но, инъёслэн инъёссы но Тонэ тэрытыны уг быгато ке, соку мынам пуктэм коркам уката но уд тэры.19Ас ляльчиедлэсь вӧсяськемзэ санэ пон; солэсь куриськемзэ но, Инмаре Кузё-Инмаре! Ас ляльчиедлэсь Тынад азяд вазиськемзэ, вӧсяськемзэ кыл.20Тынад синъёсыд нуназе но, уйин но та храм шоры учкыса мед улозы, Аслэсьтыд нимдэ сётыны сӥзем инты шоры, та интыын ляльчиедлэсь вӧсяськем кылъёссэ кылыны мед быгатод шуыса.21Ас ляльчиедлэсь, израиль калыкедлэсь вӧсяськемзэ кыл, кызьы со та интыын вӧсяськоз; Аслад улон интыысеныд, Инмысен, кыл но жаля-уть милемыз!
22Ас матысезлы пумит кин ке сьӧлыказ ке, со кылзэ мед сётоз шуыса куризы ке, соку та храмын курбон сётон ӝӧкед азьын кыл сётон луоз,23соку Тон Инмысен кыл но Ас ляльчиосыдлы суд лэсьты, янгышоослы пунэмзэ берыкты, лэсьтэм ужзэс йыр вылазы пон но шонер лэсьтӥсьёсты шонере потты, шонерлыко ужъёссы понна шонерен пунэмзэ берыкты.
24Тон азьын сьӧлыкамез понна Тынэсьтыд израиль калыктэ тушмон погыртӥз ке, нош соос Тыныд вазиськизы ке, Тынэсьтыд нимдэ тодытӥзы ке, Тон азьын та храмын куриськизы, вӧсяськизы ке,25соку Тон Инмысен кыл но израиль калыкедлэсь сьӧлыксэ кушты, соослы но, соослэн атайёссылы но сётэм Аслад музъемад соосты берыкты.
26Ин ворсаськиз ке, зор ӧз ни ке луы, – Тон азьын сьӧлыкамзы понна, нош та интыын вӧсяськизы ке, Тынэсьтыд нимдэ данъязы ке, сьӧлыкъёссылэсь палэнскизы ке, уго Тон соосты зӥбыт-востэм карид,27соку Тон Инмысен кыл но Ас ляльчиосыдлэсь, израиль калыкедлэсь, сьӧлыкъёссэс кушты, соослы ӟеч сюрес возьматы, кудтӥз соослы мыныны кулэ; Ас калыкедлы люкетлы сётэм музъем вылад зор лэзь.
28Музъем вылын сютэм улон луиз ке, яке сьӧдчер, ӵушкась тӧл яке мӧль усиз ке, саранча яке нумыръёс алязы ке, асьсэ музъем вылын ик тушмонъёс ӝикатыса-ёртыса возьыны кутскизы ке, кыӵе ке шугадӟонъёс, кыӵе ке висёнъёс луизы ке,29вань вӧсяськемез, вань куриськемез – одӥг адямилэсь-а со луоз яке вань израиль калыкедлэсь-а, куке соос котькудзы, асьсэлэсь шуге-леке сюронзэс, куректон-кайгузэс шӧдыса, киоссэс храм пала вӧлъязы ке,30Инмысен – Аслад улон интыысеныд – кыл но простить кар, котькудӥзлы пунэмзэ берыкты, лэсьты солэн улэм сюресэзъя, кызьы Тон солэсь сюлэмзэ тодӥськод, – уго Тон одӥгнад гинэ адями пиослэсь сюлэмзэс тодӥськод, –31мед кышкалозы Тынэсьтыд, атайёсмылы сётэм музъем вылын улыкузы, вань улон нуналъёсазы Тынад сюрес вылтӥд мед ветлозы.
32Тынад израиль калыкед бордысь потымтэ мукет выжыысь адями гинэ но, Тынад быдӟым нимыдлы луыса, Тынад кужмо киыдлы луыса, вӧлъям суйбыгытэдлы луыса кыдёкысь музъемысь лыктоз но та храм азьын вӧсяськиз ке,33Инмысен, Аслад улон интыысеныд, кыл, мурт выжыысь адями Тынэсьтыд сюлворыса куриз ке, ваньзэ быдэсты, – быдэс дунне вылысь вань калыкъёс Тынэсьтыд нимдэ мед тодозы, израиль калыкед кадь Тынэсьтыд мед кышкалозы, та мынам пуктэм коркае Тынад нимыдлы сӥземын шуыса мед тодозы.
34Тынад возьматэм сюрестӥд калыкед тушмонэзлы пумит оже потӥз ке, Тынад быръем городэд пала берыктӥськыса, Тынад нимыдлы сӥзьыса мынам пуктэм храме пала берыктӥськыса вӧсяськиз ке,35соку Инмысен кыл соослэсь вӧсяськемзэс, соослэсь куриськемзэс, мар соослы кулэ, сое лэсьты.
36Тон азьын сьӧлыказы ке, – уго сьӧлыкасьтэм одӥг адями но ӧвӧл, – соослы вождэ поттӥд ке, соосты тушмон киулэ сётӥд ке, соосты пленэ басьтэмъёс сьӧразы кыдёкысь музъеме нуизы ке, яке матысь музъеме,37пленэ нуэм музъемын соос валатскизы ке, Тыныд вазиськизы, вӧсяськизы ке, пленэ сюрыса улоно музъемазы тазьы шуизы ке: ”Ми сьӧлыкамы, законлы пумит уж лэсьтӥмы, ми янгышоесь”, –38пленэ нуэм, пленын улоно музъемазы вань сюлмынызы, вань лулынызы Тыныд вазиськизы ке, дор музъемзы пала берытскыса, кудзэ Тон соослэн атайёссылы сётӥд, вӧсяськизы ке, Тынад быръем городэд пала, Тынад нимыдлы сӥзьыса мынам пуктэм храм пала берытскыса вӧсяськизы ке,39соку Инмысен, Аслад улон интыысеныд, соослэсь вӧсяськемзэс, куриськемзэс кыл, мар соослы лэсьтыны кулэ – лэсьты, Ас калыкедлэсь сьӧлыкъёссэ кушты, маин соос Тон азьын сьӧлыказы,40Инмаре! Тынад синъёсыд усьтэмын мед луозы, пельёсыд сак мед улозы, та интыын вӧсяськыку.
41Нош али, Инмаре Кузё-Инмаре, Аслад шутэтскон интыяд султы,
Тон Ачид но Тынад кужымедлэн ковчегез.
Инмаре Кузё-Инмаре, священникъёсыд утиськонэн мед дӥсяськозы,
шонер улӥсьёсыд ӟечлыкен тыр мед луозы.
42Инмаре Кузё-Инмаре! Вӧйын зырӟемдэ бордысьтыд эн палэнты,
Давид ляльчиедлы гажан-жаляндэ возьматыны эн вунэты».
Глава 6
