Choose Language
Old Testament Books
New Testament Books
2-тӥ книга
1Соломон вӧсяськемысь дугдэм бере инмысь тыл васькиз, тылын сутӥськись курбонэз, мукет курбонъёсты ньылӥз, Кузё-Инмарлэн пиштӥсь данлыкез корка тыр люкаськиз.2Священникъёс Кузё-Инмарлэн корказ пырыны ӧз быгатэ, малы ке шуоно Кузё-Инмарлэн пиштӥсь данлыкез Кузё-Инмарлэн корка тыраз улӥз.3Вань израиль пиос тыллэсь но Кузё-Инмарлэн пиштӥсь данлыкезлэсь корка вылэ васькемзэ адӟизы но музъем вылэ, выж вылэ ымныр вылазы выдӥзы, йыбырттӥзы но Кузё-Инмарез данъяса улӥзы, уго Со ӟечлыко, Солэн гажан-жалянэз пумтэм вапумъёс улэ.
4Нош эксэй но, вань калык но Кузё-Инмар азьын курбон сётъяны кутскизы.5Соломон эксэй кызь кык сюрс ошъёсты, сю кызь сюрс ыжъёсты курбон сётӥз: тазьы эксэй, вань калык но Инмарлэсь корказэ вӧсязы.6Священникъёс служить карыса сылӥзы, левитъёс Кузё-Инмарлэн крезьгур поттӥсь шудонъёсыныз шудыса улӥзы, – соосты Давид эксэй лэсьтӥз вал Кузё-Инмарез данъян понна, – уго бырисьтэм Солэн гажан-жалянэз; Давид крезьгур поттӥсь шудонъёсын Кузё-Инмарез данъяса улӥз; священникъёс соос азьын гумызэс пелляса улӥзы, нош быдэс Израиль кылзӥськыса сылӥз.7Кузё-Инмарлэн корка азьысьтыз азбарлэсь пуш люкетсэ вӧсяз: отын со тылын сутӥськись курбонъёс, тупаса улонлы сӥзем курбонъёслэсь кӧйзэс сётӥз, уго Соломонлэн ыргонлэсь лэсьтэм курбон сётон ӝӧкез тылын сутӥськись курбонъёсты, нянь курбонъёсты, кӧез тэрытыны ӧз ни быгаты.
8Со виын Соломон сизьым нунал кыстӥськись праздник лэсьтӥз, быдэс Израиль соин огазьын вал – туж трос калык люкаськиз, Емафе пырон дорысен Египет шур дорозь;9тямысэтӥ нуналэ праздникез келян ортчытӥзы, уго курбон сётон ӝӧкез сизьым нунал ӵоже вӧсязы, праздник но сизьым нунал ӵоже кыстӥськиз.10Сизьыметӥ толэзьлэн кызь куинетӥ нуналаз эксэй калыкез доразы бертыны лэзиз, сюлмынызы шумпотыса, шулдыръяськыса бертӥзы Кузё-Инмарлэн Давидлы, Соломонлы, Израильлы, Ас калыкезлы, лэсьтэм ӟечлыкез понна.
11Кузё-Инмарлы корка, эксэйлы корка пуктонзэ Соломон йылпумъяз; Кузё-Инмарлэн корказ, аслаз корказ мар лэсьтыны сюлмыныз малпаз Соломон, ваньзэ азинлыко быдэстӥз.12Кузё-Инмар уйин Соломонлы возьматскыса шуиз: «Мон тынэсьтыд вӧсяськемдэ кылӥ но курбон сётон корка Аслым инты бырйи.13Мон инмез ворсай но зор ӧз ни ке луы, саранчаез та музъемез сиыны косӥ ке, яке Ас калыке вылэ сьӧдчер лэзи ке,14Мынам нимыным нимаськись калык зӥбыт-востэм кариськиз ке, вӧсяськизы ке, Монэ утчазы ке, асьсэлэн уродэсь-лекесь сюресъёссы вылысь кожизы ке, соку Мон Инмысен кыло, сьӧлыкъёссэс кушто, музъемзэс бурмыто.15Табере Мынам синъёсы усьтэмын луозы, та интыын вӧсяськемез Мынам пельёсы сак кылзозы.16Та виын Мон та интыез бырйи но та коркаез дун-чылкыт кари, отын Мынам нимы пумтэм вапумъёс ӵоже мед улоз; Мынам синъёсы, Мынам сюлмы отын вань нуналъёс ӵоже улозы.17Мынам син азьтӥм ветлӥд ке, кызьы ветлӥз Давид, тынад атаед, мар Мон тыныд косӥ, ваньзэ сое быдэсъяса улӥд ке, Мынэсьтым пуктон-косонъёсме, законъёсме быдэсъяса улӥд ке,18соку тынэсьтыд эксэйлыктэ юнмато, кызьы тынад атаедлы, Давидлы, кыл сётыса шуи: ”Тынад Израилен кивалтӥсь пиосмуртэд уз быры”.
19Нош тӥ палэнскиды ке, Мынэсьтым тӥледлы сётэм пуктон-косонъёсме, курон-косонъёсме быдэсъямысь дугдӥды ке, мыноды но мукет инмаръёслы ужаса-тыршыса улыны кутскиды ке, соослы йыбыртъяды ке,20соку Мон Израилез соослы сётэм Ас музъем вылысьтым быдто. Аслам нимылы сӥзьыса вӧсям храмез но Ас азьысьтым палэнто но вань калыкъёс пӧлын мадёнлы, серекъян-веранлы пӧрмыто.21Та ӝужыт храм вӧзтӥ котькудӥз ортчись мурт солэсь кышкатскоз но шуоз: ”Мар понна Кузё-Инмар та музъемен, та храмен тазьы кариз?”22Шуозы: ”Египетысь поттэм атайёссылэсь Инмарзэс Кузё-Инмарез санэ понэмысь дугдэмзы понна но мукет инмаръёс борды думиськемзы, соослы йыбыртъямзы, ужаса-тыршыса улэмзы понна, – со понна Со соос вылэ вань та шугадӟонэз лэзиз”».
Глава 7
