«Бура шулöма Вежа Лов миян батьяслы Исай пророк пыр:
– Мун да висьтав тайö войтырыслы: пельнаныд кутанныд кывзыны да онö гöгöрвоöй, синнаныд кутанныд видзöдны да онö аддзöй. Чорзьöма тайö войтырыслöн сьöлöмыс, сьöкыд пеляöсь, куньса синмаöсь. Аддзынысö оз зiльны, кывзынысö оз кöсйыны, сьöлöмнаныс оз гöгöрвоны. Мелань бергöдчынысö оз кöсйыны, медым Ме бурдöдi найöс.
Тöдöй, Ен мöдöдöма мездмöмсö ентöдтöмъяслы, найö и кыласны».
Тайöс кылöм бöрын юдейяс мунiсны ас костаныс ёна вензьöмöн. Павел олiс на Римын кык во чöж да сибöдлiс ас дорас быдöнöс. Сiйö повтöг да восьсöн висьтавлiс волысьяслы Енлöн Юралöм йылысь да Господь Исус Кристос йылысь.
Тайö кывъяснас помасьö ”Апостолъяслöн уджъяс” небöг. Лыддьысьысь, дерт, кöсйö тöдны, мый лои водзö апостол Павелкöд. Павеллöн мöдöдöм гижöдъяс серти, а сiдзжö мукöд пасйöдъяс серти позьö тöдмавны, мый кык во мысти Павелöс вöлi мездöма синъялöм*а улысь. Павел сэки водзö кутiс паськöдны Бур Юöр. Йöзлöн висьталöмъяс серти римса император Нерон дырйи Павел выльысь веськалiс дзескыдiнö да сэнi кулiс.
486 
