Евангелиятнень эса фкя и сяка тонафтомась, хуш синь сёрмадозь ниле ломатть. Синь ульсть Исусонь тонафниенза и сёрмадсть Иняру Ваймопожфть вятеманц коряс. Евангелияса максови масторлангонь Идить, Исус Кристосонь, эряфоц и тонафтомац. Ниле Евангелиятне тисазь Од Сотксть пялешканц.
"Апостолхнень Тевсост" няфневи, мезе ульсь Исус Кристосонь менели кеподемадонза меле. Тя книгать, кода и "Лукань коряс Евангелиять" сёрмадозе урмань пчкафнись Лука.
Сембе сёрматнень тяшнезь Исусонь мельге молихне. Яку и Иуда сёрмадсть тифтень сёрма, Пята – кафта, Иоанн – колма, Павел – кемголмува. "Еврейхненди сёрмать" тяштиец лац-ряц апак содак, хуш кой-кит лувондсазь – сёрмадысь Павел. Сёрматнень эса няфневихть тефт васень кристиаттнень эряфста, азондови евангелиять тонафтомань смузец и кода вятема кристианонь эряф.
"Иоаннонь Панжемвалонзон" сёрмадозень Иоанн апостолсь, Исус Кристосонь ся тонафниец, кона сёрмадозе "Иоаннонь коряс Евангелиять". Тя книгась – сай пингть панжемац, книга сянь колга, мезе Исус Азорсь панчсь "Иоанн уренцты" и "мезти курок сави улемс".
283 
