Bible Stories
Выбрать язык
Choose Old Testament Story
Choose New Testament Story
ВАЛААМ ПРОРОК НО КЫЛЧИН
Израиль калык Иерихон карлы матэ вуыса, Иордан шур дуре дугдӥз. Та ёросын моавит калык улӥз. Израиль калык туж трос вал, моавитъёс соослэсь кышкатскизы. Моавитъёслэн Валак эксэйзы Валаам пророкез ӧтьыны ас адямиоссэ лэзиз. Пророклы со тазьы вераны косӥз: «Египетысь потэм калык ми вӧзы улыны интыяськиз; соос сокем трос, – быдэс музъемез басьтӥзы. Лыктыса карга та калыкез, соос милесьтым кужмогес ук, нош тон соосты каргад ке, соку мон соосты вормо но ас музъем вылысьтым улляло. Мон тодӥсько уго: кинэ тон бакель кариськод, со бакель каремын луэ, нош кинэ ке каргаськод ке, со каргамын луэ».
Валаам сюрес вылэ потӥз. Со мумы ишак вылэ пуксиз, соин ӵош кык медоосыз сюрес вылэ потӥзы. Малпамтэ шорысь ишак кылчинэз (ангелэз) адӟиз, со кияз мечен сюрес вылын сылэ вал, соку ишак сюрес вылысь бусые кожиз. Валаам жугыса ишакез сюрес вылэ поттыны тыршиз. Но соиз, нош ик кылчинэз адӟыса, сюрес вылысь кожыса выдӥз. Пророк нош ик сое жугыны кутскиз.
Соку Кузё-Инмар ишаклы кыл сётӥз но соиз адями кылын вазиськиз: «Мар мон тыныд кари, малы тон монэ куинетӥ ползэ жугиськод ини?» Кузё-Инмар Валаамлэсь синзэ усьтӥз, соку со но мечен сылӥсь кылчинэз адӟиз. Валаам пыдесъяськиз но солы йыбырттӥз. Кылчин солы шуиз: «Мар понна тон куинь пол кутскыса ишакез жугид? Тынад сюресэд шонертэм, со понна мон тонэ дугдытыны лыктӥ». Валаам кылчинлэн пумитаз шуиз: «Сьӧлыкай, ӧй тоды уго, тон монэ дугдытон понна сюрес вылын сылӥськод шуыса. Тыныд ярантэм уж лэсьтыны малпаськем ке, соку мон берытско». Кылчин солы шуиз: «Мын та адямиосын ӵош, но вера сое гинэ, мае мон тыныд верало».
Моавитъёс малпало вал, Валаам лыктоз но израиль калыкез каргалоз, соос вылэ шугадӟонъёс лэзёз шуыса. Нош Валаам соослы шуиз: «Кызьы мон Израилез карганы быгатӥсько, Инмар соосты уг ке карга? Кызьы мон соос вылэ шугадӟонъёс лэзьытыны быгатӥсько, Кузё-Инмарлэн соосты курадӟытэмез уг ке поты?» Соку Валаам, каргам интые, куинь пол кутскыса, Израилез бакель (благословить) кариз.
Лыдпусъёс 22:1-40; 23:7-20; 24:10
118 
