Bible Stories
Выбрать язык
Choose Old Testament Story
Choose New Testament Story
АННАЛЭН ВӦСЯСЬКОНЭЗ
Израильысь Рама карын улӥз Елкана нимо пиосмурт. Солэн кышноез Анна нимо вал. Анна нылпи ӧз вайы, со понна со туж ӝожомыса улӥз. Арлы быдэ тупатэм нуналъёсы соос Силом каре ветлылӥзы, отын Кузё-Инмарлэн пичи храмез вал, отын соос Кузё-Инмарлы йыбырттылӥзы, курбон сётылӥзы. Храмын вӧсяськыса улыкузы, Анна ялан бӧрдылӥз, номыр но ӧз сиы. Елкана кышнозэ яратэ вал, сое со жаляса улӥз.
Одӥг пол Силоме, Кузё-Инмарлэн храмаз вуэм бере, Анна нош ик бӧрдыны кутскиз. Елкана солы шуиз: «Анна, малы тон бӧрдӥськод? Малы тон номыр но уд сииськы? Малы тынад сюлмыд ӝожомыса улэ? Дас пиосты мон уг воштӥськы шат?»
Кузё-Инмарлэн корказ, храме, пырыса, Анна туж бӧрдӥз, тэльмырыса вӧсяськиз но Кузё-Инмар азьын кыл сётӥз: «Э Саваоф Кузё-Инмар! Ас ляльчиедлэсь ӝожен улэмзэ адӟид ке, монэ тодад ваид но мыным, ляльчиедлы, пи нуны сётӥд ке, соку мон сое пырак ӵожелы Кузё-Инмар дорын ужан-тыршонлы сёто, бритва но солэн йыр бордаз уз йӧтӥськы». Анна кема вӧсяськиз Кузё-Инмар азьын, нош храме пырон азьын пукись Илий священник солэн ымдуръёсыз шоры учкыса улӥз: уго Анна ас понназ куриськиз, нош ымдуръёсыз куара поттытэк выризы. Илий малпаз, со кудӟемын ӧвӧл меда шуыса. Со Анналы шуиз: «Кудӟем мурт, кема-а тон татын сылод на? Мын, сайкиськы». Солэн пумитаз Анна шуиз: «Кузёе, номыр курытсэ мон ӧй юы, мур куректон-кайгуме мон
Кузё-Инмар азьын вераса улӥ. Эн малпа тон азьын сӧриськем кышномурт сылэ шуыса: мур куректонлы, кӧтӝожлы чидатэк мон татын вӧсяськи». Соку Илий солы шуиз: «Мын каньылэн, Израильлэн Инмарез Кузё-Инмар тынэсьтыд вань куронъёстэ быдэстоз». Нош Анна шуиз: «Аслэсьтыд ляльчидэ ноку но кулэтэм эн кары!» Храмысь бертэм бераз, Анна сиськиз, азьвыл кадь солэн ымнырыз ӝож тусъем ӧй ни вал.Кузё-Инмар Анналэсь вӧсяськемзэ кабыл басьтӥз, ӝоген со пи нуны ваиз.
1 Эксэйлык 1:1-18
148 
