Bible Stories
Выбрать язык
Choose Old Testament Story
Choose New Testament Story
САУЛ – ИЗРАИЛЬЛЭН ЭКСЭЕЗ
Самуил Израильын быдӟым пророк луиз. Со ялан ас калыксэ куриз мурт калыкъёслэн инмаръёссы-сульдэръёссы бордысь куштӥськыны но Зэм Инмар пала берыктӥськыны. Пересьмем бераз, Самуил Израильлы судьяе аслэсьтыз кык пиоссэ пуктӥз. Но соос атайзылэн сюрес вылтӥз ӧз мынэ, узырлык-байлык люкан сюрес вылэ султӥзы: кузьымъёс октӥзы, калыкез шонертэм судить каризы. Соку Израильлэн тӧроосыз Самуил доры лыктыса шуизы: «Тани, тон пересь ини, нош пиосыд тынад сюрес кузяд уг мыно. Соин ик милемлы эксэй шедьты, со милемын мед кивалтоз, соку асьмелэн но мукет калыкъёслэн кадь ик луоз». Самуил тодӥз, соослэн куронзы Инмарлы ярантэм шуыса. Вӧсяськыса куриськыкуз, Кузё-Инмар солы шуиз: «Кызьы та калык куре, ваньзэ соосъя лэсьты. Соос тынэсьтыд ӧз куштӥське, Мынэсьтым куштӥськизы, соослэн уг поты Монэ эксэй каремзы. Египетысь поттэм нуналысеным та дырозь соос ялан Монэ вунэто, мукет инмаръёслы йыбыртъяса уло. Кызьы Мыным лэсьтӥзы, тыныд но озьы ик лэсьто. Калыклэсь верамзэ санэ пон, но тон соослы вера, кыӵе но кыӵе луоз соослэн эксэй ки улын улонзы».
Кузё-Инмарлэсь кылъёссэ Самуил калыклы вераз но шуиз: «Тӥледын эксэй кивалтӥз ке, со тӥледыз ляльчи кароз, соку мозмытыны куроды, нош Кузё-Инмар тӥледлы уз ни юрттӥськы». Озьы ке но, Самуиллэсь ӵектонзэ калык ӧз ни кылзӥськы, эксэй пуктыны куриз.
Кузё-Инмар Самуил доры Саул нимо веськрес мугоро, чебер пияшез лэзиз. Кузё-Инмар Самуиллы шуиз: «Тани со адями, кудӥз сярысь Мон тыныд верай. Со Мынам калыкеным кивалтоз». Самуил вӧйын сосудэз кутӥз но Сауллэн йыр вылаз кисьтӥз. Собере сое со чупаз но шуиз: «Тани, тонэ Кузё-Инмар эксэй луыны вӧйын зырӟиз, Солэн калыкезлэн эксэез луод». Озьы Саул Израильлы эксэй луиз.
1 Эксэйлык 8:1-22; 9:15-17; 10:1
156 
