Bible Stories
Выбрать язык
Choose Old Testament Story
Choose New Testament Story
ДАВИД БЫДЭС ИЗРАИЛЬЛЭН ЭКСЭЕЗ ЛУЭ
Филистим калык израиль пиосын ялан ожмаськыса улӥз. Таяз ожын соос израиль ожгарчиосты пазьгизы, Саул эксэй но, солэн пиосыз но ож бусые йырзэс понӥзы. Эксэй армиысь одӥг мурт пырак Давид доры ож бусыысь вуыса ивортӥз: Саул но солэн Ионафан пиез виемын. Со мурт малпаз вал тушмонэзлэсь быремзэ кылыса, Давид шумпотоз шуыса. Давид Сауллэсь вань урод ужъёссэ тодаз ӧз вайы. Ӝожомыса, бӧрдыса со Саулэз но Ионафанэз буре ваиз, соос сярысь кырӟан кылдытӥз: «Саул но Ионафан, ог-огзэс яратыса, тупаса улӥсьёс, кулэм беразы но ӧз люкиське.
Ӧрӟиослэсь шаплыесь, левъёслэсь кужмоесь вал соос. Израиль нылъёс! Саул понна бӧрдэ, со тӥледыз дуно басмаосын дӥся вал, зарниен чеберъя вал дӥськуттэс. Ож бусые таӵе кужмоос, оло, погразы-а?! Чигиськисько тон понна, Ионафан братэ. Тон мон понна туж дуно адями вал. Тонэ яратонэ пырак ӵоже сюлмам улоз».Озьы Давид соосты бӧрдыса жаляз. Давид та бере, Кузё-Инмарлэн косэмезъя, Хеврон каре улыны интыяськиз. Ӝоген татчы кӧня ке иудейёс*а вуизы но Давидэз Иудей музъемысь, Израильлэн лымшор люкетысьтыз, престолэ пуксьыны вӧйын зырӟизы. Сизьым но ӝыны ар ортчыса, Давид быдэс Израильлэн эксэез луиз. Самуил пророк пыр мар солы сӥземын вал, Инмар сое быдэстӥз.
2 Эксэйлык 1:1-4, 23-27; 2:1-4
*а Иудейёс – татын: Иаковлэн Иуда нимо пиезлэн выжыысьтыз адямиос.
166 
