Bible Stories
Выбрать язык
Choose Old Testament Story
Choose New Testament Story
ОЗИЯ ЭКСЭЙЛЭН ВЫЛТӤЯСЬКОНЭЗ НО ВӦСЬ ЛУОНЭЗ
Иуда кунын дасэтӥез эксэйзы Озия (Азария) нимо вал. Эксэе со туж пинал – 16 арес дыръяз пуксиз. Иерусалимысь эксэй пуконын со 52 ар ӵоже пукиз. Кузё-Инмарлы ярамон ужъёс лэсьтыса улӥз. Солэн бадӟымесь пудо уллёосыз вал. Трос калык солэсь бусыоссэ, виноград бакчаоссэ утялтыса возиз – со музъем ужез яратӥз. Озиялэн трос ожгарчиосыз вал. Соослы со щитъёс, шибодыос, корт изьыос, корт дӥськутъёс, пукыӵъёс, зӥръян изъёс дасяз. Иерусалимысь каланчаос йылэ, кар борддорлэн сэрегъёсаз со бадӟым изъёсты зӥръясь, пукыӵ ньӧлъёсты ыбылӥсь машинаосты быгатыса лэсьтӥз. Озиялэн данэз туж кыдёке вӧлмиз, со туж кужмо луиз. Инмар солы юрттӥз.
Таӵе кужмо луэм бераз, Озия сюлмыныз вылтӥяськыны кутскиз. Со ик сое быронэ вуттӥз: ас Инмарез Кузё-Инмар азьын со йыруж лэсьтӥсь луиз. Вылтӥяськыса, Озия эксэй Кузё-Инмарлэн храмаз пыриз, алтарьын фимиам ӵындытон понна. Со бӧрсьы Азария священник пыриз, соин ӵош пыризы Кузё-Инмарлэн кышкасьтэм тямыстон священникъёсыз. Соос тыршизы Озияез ярантэм уж лэсьтонлэсь дугдытыны: «Озия, тыныд уг яра Кузё-Инмар азьын ӵындытыны; со Аарон выжыысь потэм священникъёслэн ужзы, соос та ужлы юри быръемын. Вӧсяськон интыысь пот. Тон законлы пумит уж лэсьтӥськод, та понна Инмар Кузё-Инмар дорысь тыныд сӥ-дан уз луы». Озиялэн йыркурез пурӟиз, – ӵындытон кадила солэн кияз вал ини. Священникъёслы йырзэ кур карем бераз, соку ик, соослэн син азязы, Озиялэн бамаз гижло чер (проказа) потӥз, – ӵынатон алтарь вӧзын ик. Ымнырысьтыз гижлозэ адӟем беразы ик, Азария но мукетъёсыз вань священникъёс сое храмысь потытӥзы. Со ачиз но дыртыса потӥз, – валаз Кузё-Инмар сое вӧсь кариз шуыса. Кулытозяз со гижло черен курадӟыса, нимаз коркан улӥз, Кузё-Инмарлэн храмаз пыраны солы лэземын ӧй вал. Нош солэн Иоафам пиез эксэй юртэн, калыкен кивалтыса улӥз.
2 Паралипоменон, 26-тӥ люкет
208 
