Bible Stories
Выбрать язык
Choose Old Testament Story
Choose New Testament Story
ИЗРАИЛЬ ИНМАР ДОРЫСЬ ПАЛЭНСКЕ
Египет музъемысь поттэм Инмарзы Кузё-Инмар азьын Израиль пиос сьӧлыкаса улыны кутскизы. Мурт инмаръёсты сӥлы карыса, Зэм Инмарез тодӥсьтэм калыкъёслэн сямъёссыя соос улыны кутскизы. Израиль калык ас эксэйёсызлэсь адӟем карыны кутскиз: вань гуртъёсазы, каръёсазы сульдэръёслы курбон сётон интыос лэсьтылӥзы, сӥлы карыса йыбыртъян изъёс пуктылӥзы, вань ӝужыт вырйылъёсы, вань куаро-ваё писпуос улэ Астарталэсь сульдэръёссэ пуктылӥзы. Израиль калык Кузё-Инмарлэсь вожзэ поттыса улӥз. Соос сульдэръёслы йыбыртъяса улӥзы, Кузё-Инмар соослы шуиз ке но вал: «Тазьы эн каре».
Соку Кузё-Инмар вань пророкъёсыз пыр, азьпалзэ адӟисьёс пыр, Израилез но Иудаез чакласькыса улыны косыса шуиз: «Урод сюрес вылысьтыды коже, курон-косонъёсме, пуктон-косонъёсме, быдэссэ законме быдэсъяса улэ, сое Мон атайёстылы сётӥ вал: Аслам ляльчиосы, пророкъёс, пыр Мон тӥледыз визьмаса-нодъяса вози вал». Инмарзылы Кузё-Инмарлы оскисьтэм атайёссы музэн ик, соос ӧз кылзӥське, вогъяськыса улӥзы. Соос Кузё-Инмарлэсь пуктон-косонъёссэ но, атайёссылы сётэм сӥзёнэз но, Солэсь усьтӥськонзэ но сиё-сано ӧз каре. Котыразы улӥсь калыкъёслэсь адӟем карыса, юрӟым ужъёс сьӧры мыныны кутскизы, асьсэос но юрӟымесь луизы. Инмарзылэсь Кузё-Инмарлэсь вань курон-косонъёссэ кулэтэм карыса, соос кортэз ӵыжатыса, кык ошпиослэсь сульдэрзэс кисьтӥзы, Астарталы йыбыртъян инты лэсьтӥзы. Инмысь кизилиослы, шундыен толэзьлы но, Ваал сульдэрлы но йыбыртъяса улӥзы. Нылпиоссэс тыл вамен поттылӥзы; тунаськон, веднаськон ужъёсын выризы; Кузё-Инмарлы ярантэм ужъёс лэсьтыса, Солэсь вожзэ поттылӥзы.
Кузё-Инмар израиль калыклы туж вожзэ поттӥз, соослэсь палэнскиз. Одӥг Иуда выжы кылиз, соос но Инмарзылэсь Кузё-Инмарлэсь курон-косонъёссэ быдэсъятэк улӥзы.
4 Эксэйлык 17:7-18
210 
