Bible Stories
Выбрать язык
Choose Old Testament Story
Choose New Testament Story
СОДОМЕН ГОМОРРА КАРЪЁСЛЭН БЫРОНЗЫ
Содом, Гоморра, Адма, Севоим каръёсын улӥсьёс вылэ азон-калгон, юрӟым-кырсь сьӧлыкъёс лэсьтыса улэмзы понна, Кузё-Инмарлэн вожпотонэз ӝуатскиз. Содом быдтэмын луоз шуыса, Кузё-Инмар Авраамлы ялӥз, нош Авраам сюлворыса куриз, та сьӧлыко городэз Со медаз быдты вал шуыса. Соку Кузё-Инмар кыл сётӥз: та городын вань ке дас ке но шонер улӥсь муртъёс, соку Со городэз уз быдты. Но со мында шонер улӥсьёс ӧз сюре. Соку тани мар луиз: Содомын кышноеныз, кык нылъёсыныз улӥз шонер улӥсь Лот. Инмар та городэ адями тусбуйын кык кылчинъёсты ыстӥз. Ӝыт вал ни. Куноятыны яратӥсь Лот соосты корказ пыртӥз, ӧз тоды, соос кылчинъёс луо шуыса.
Соос изьыны ӧз на выдэ вал, Содомын улӥсьёс, юрӟым-кырсь сьӧлыко уж лэсьтыны малпаса, Лотлэсь юртъерзэ котыртӥзы. Лотлэн матаз лыктыны кутскизы, малпазы ӧссэ тӥяны. Соку кылчинъёс Лотлы кизэс сётӥзы но сое корка пушкы пыртӥзы, ӧсэз пытсазы. Нош корка пырон ӧс дорын сылӥсьёсты, ваньзэс – пичиоссэ но, бадӟымъёссэ но – адӟисьтэм каризы. Кылчинъёс Лотлы шуизы: «Ми та интыез быдтомы, малы ке шуоно, Кузё-Инмар адӟе, кылэ макем кужмо шонер улӥсьёслэн викышъянзы». Соос китӥз кутыса Лотэз, солэсь кышнозэ, кык нылъёссэ городысь поттӥзы. Одӥгез кылчин соослы шуиз: «Берлане эн утчаське, гурезьёсы пегӟе, медад быре».
Лот Сигоре вуыку, шунды ӝужамын вал ини. Соку Кузё-Инмар инмысен Содомен Гоморра вылэ зорез кадь, ӵуждариен (сераен) тыл кисьтӥз; та городъёсты куашкатӥз, соослэсь котыр ёроссэс но, та городъёсын улӥсьёсты но – ваньзэ, мар будэ вал музъем вылын, быдтӥз. Нош Лотлэн кышноез, со бӧрсьы мынӥсь мурт, берлань учкиз но сылал юболы пӧрмиз.
Улон-вылон, 19-тӥ люкет; 2-тӥ закон 29:23
42 
