Bible Stories
Выбрать язык
Choose Old Testament Story
Choose New Testament Story
ӜУАСЬ ТЁРНПУ КУАК
Моисейлэн улонэз чылкак воштӥськиз. Нырысь ньыльдон аръёссэ со Египетын ортчытӥз, эксэй ныллэсь пизэ кадь сое быдэ вуттӥзы. Собере эшшо ньыльдон арзэ со Иофор варматаез дорын пудо возьмаса ортчытӥз. Огпол со пудо уллёзэ кыдёке кыр дуннее нуиз но Инмарлэн Хорив гурезь дораз вуиз. Отысен ӝуась тёрнпу куак пӧлысен Кузё-Инмарлэн кылчинэз возьматскиз. Моисей адӟиз: тёрнпу куак быдэсак тыл пӧлын, но со ӝуаса уг быры. Моисей аслыз ачиз шуиз: «Мыныса учко ай, мар паймымон адӟон та, кызьы озьы куак ӝуаса уг быры».
Моисейлэсь ӝуась куакез учкыны лыктэмзэ Кузё-Инмар адӟиз но куак пушкысен Со вазиськиз: «Моисей! Моисей! Матэ эн лыкты! Пыдысьтыд кутчандэ кыль, тынад сылоно интыед – святой музъем. Мон – тынад атаедлэн Инмарез, Авраамлэн Инмарез, Исааклэн Инмарез, Иаковлэн Инмарез». Моисей ымнырзэ ӵоктаз – со Инмар шоры учкыны кышказ. Кузё-Инмар куак пӧлысен солы шуиз: «Мон адӟисько Ас калыкелэсь Египетын курадӟемзэ, бӧрдэмзэ, чакласа улӥсьёс вылэ ӝожтӥськемзэс но кылӥсько. Соослэсь куректон-кайгуоссэс тодӥсько, соосты египет калыклэн ки улысьтыз мозмытыны мынӥсько, татысь соосты ӟеч, эркын музъем вылэ потто – отӥ йӧлын чечыё шур бызе. Мон кылӥсько израиль пиослэсь бӧрдэмзэс, адӟисько, кызьы соосты египет калык ултӥяса возе. Озьыен, мын: Мон тонэ Египетлэн эксэез доры ыстӥсько. Мынэсьтым калыкме, израиль пиосты, тон Египетысь поттод».
Моисей паймытскиз. Таӵе быдӟым уж борды басьтӥськыны со ассэ ярантэм муртэн лыдъяз. Инмарлы со шуиз: «Кин бен мон сыӵе – эксэй доры мыныны но израиль калыкез Египетысь поттыны?» Инмар солы шуиз: «Мон тонэн ӵош луо».
Потон 3:1-12
86 
