Bible Stories
Выбрать язык
Choose Old Testament Story
Choose New Testament Story
МОИСЕЕН ААРОН ЕГИПЕТЛЭН ЭКСЭЕЗ АЗЬЫН
Египетлэн эксэез Инмар калыкез кошкыны мед лэзёз шуыса, Кузё-Инмар Моисейлы косон сётэм бере, Моисей шуиз: «Э, Кузё-Инмаре! Мон могаса, каллен вераськисько. Мон интые кинэ ке мукетсэ ысты». Соку Кузё-Инмар Моисейлэн Аарон агаез сярысь шуиз: «Тынад Аарон агаед вань ук, левит пи. Мон тодӥсько, со ӟеч вераськыны быгатэ шуыса. Мон дышето, мар тӥледлы вераны, мар карыны кулэ луоз».
Собере Моисеен Аарон Египетлэн эксэез доры лыктыса шуизы: «Тазьы шуэ Кузё-Инмар, Израильлэн Инмарез: “Мынэсьтым калыкме дорысьтыд кошкыны лэзь, кыр дуннее вуыса, шумпотон-шулдыръяськон нуналзэ мед пусъёз но Мыным курбон мед сётоз“». Соку эксэй шуиз: «Кин Со сыӵе Кузё-Инмар – Солэсь мед кылзӥськом но Израиль калыкез кошкыны мед лэзём? Кузё-Инмарез мон уг тодӥськы, израиль калыкез кошкыны уг лэзьы. Моисеен Аарон, малы тӥ калыкез ужамысь ӝегатӥськоды? Мынэ, асьтэлэсь уждэс ужалэ». Та бере Египет эксэй израиль калыкез эшшо но юнгес ӝикатыса возьыны кутскиз, чакласа улӥсьёслы косон сётӥз: таослы эшшо но тросгес уж мед сётозы шуыса.
Египет эксэйлэн син азяз трос паймымон тодметъёс, ужъёс Кузё-Инмар возьматылӥз, нош эксэй вог сямыныз Инмарлэсь калыксэ лэзьыны ӧз малпа. Соку Кузё-Инмар дорысь египет калык вылэ укмыс пумо шимес вӧсь каронъёс вуизы: Нил шурысь ву вирлы пӧрмиз; Египет музъем вылэз эбекъёс шобыртӥзы; сюй пыры (тузон) нымы-кибылы пӧрмиз; туж трос вир юись лузьёс Египетэ вӧлмизы; адямиосты, пудо-животэз висёнъёс погыртӥзы: урӟись яраё сьӧд чер; йӧзор усьылӥз, быдэс Египет музъем вылэ саранча вӧлмиз, Египет улосэз пеймыт ӝокатӥз. Нош эксэй эшшо но воггес но, воггес луиз, – ачиз но курадӟонъёс чидано ке но луиз, израиль калыкез кошкыны ӧз лэзьы. Соку Моисеен Аарон дасэтӥез вӧсь карон лыктоз шуыса кышкатӥзы.
Потон, 4-тӥ – 10-тӥ люкетъёс
88 
